फरीसी मणछे घअरै ईशू
1 तेखअ बेठअ ईशू बशैघे धैल़ी फरीसी मणछे कहा एकी सैणें घअरै रोटी खांदअ अर तिंयां थिऐ ईशू मारना लै ताखुऐ दै। 2 तेखअ आअ एक मणछ ईशू सेटा, तेऊए हाथ खूर तै शुंआंऐं दै। 3 एता भाल़ी ईशू शास्त्री अर फरीसी लै बोलअ, "बशैघे धैल़ी बधाने साबै अह मणछ नरोगअ करनअ ठीक आसा कि गलत?" पर तिंयां रहै च़ुप्पी।
4 तेखअ छ़ुंअ ईशू सह रोगी मणछ आपणैं हाथा करै, सह मणछ हुअ नरोगअ। तेखअ दैनअ ईशू तेऊ मणछा डेऊणैं। 5 तेखअ बोलअ ईशू तिन्नां लै, "तम्हां मांझ़ै इहअ कुंण आसा ज़सरै गाभू या बाछ़ू कुहै दी पल़े अर बशैघे धैल़ी सह बागा लै तेभी नांईं काढे?" 6 तिंयां निं ऐहा गल्लो ज़बाब दैई सकै।
मानदारी अर प्राहुंणैंओ अदर
7 ज़ांऊं ईशू भाल़अ कि छ़ांदै करी शादै दै लोग किल्है च़ाहा छ़ांटी करै बडी ज़ैगा बेशणअ, ईशू खोज़ी तिन्नां का एक कथ्या, 8 "ज़ेभै तम्हां कुंण बैहे धामा लै शादे, बडी ज़ैगा निं बेशणअ इहअ निं हआ कि तेऊ होए तम्हां का बी बडै मणछा लै छ़ांदअ किअ द। 9 तेखअ ज़ुंणी ताल्है अर तेऊ बडै मणछा दुही लै आसा छ़ांदअ किअ द, ज़ै सह इहअ बोले कि ऐहा ज़ैगा दै एऊ लै बेशणा लै अर तेभै लागणअ, शर्मिंदै हई सोभी का होछ़ी ज़ैगा बेशणअ।
10 "पर ज़ेभै ताह शादे, तेभै बेश सोभी का होछ़ी ज़ैगा दी, ताकि सह ज़ुंणी ताल्है छ़ांदअ आसा किअ द, सह आप्पै इहअ बोले कि ओ साथी, इधी बेश बडी ज़ैगा तेभै हणीं तिन्नां होरी मांझ़ै तेरी बड़ैई। 14:10 सैणीं. 25:6-7 11 ज़ुंण बी आप्पू बडअ समझ़े, सह करनअ होछ़अ अर ज़ुंण आप्पू होछ़अ समझ़े, सह करनअ बडअ।"
12 तेखअ तेऊ फरीसी मणछा लै बोलअ ईशू ज़ुंणी ईशू आपणैं घअरा लै त शादअ द, "ज़ेभै तूह क्लारी या बैल़ी खाए, तेभै निं तूह आपणैं बडै टबरा साथी-भाई या नेल़ रहणैं आल़ै सेठा शधाणूं लागी, इहअ निं हआ कि तिंयां बी ताल्है छ़ांदअ करे अर तिंयां लऐ तेतो बदल़अ। 13 पर ज़ेभै तूह रोटी खाए, तेभै शादै गरीब, लाट्टै, कांणै अर टुंडै। 14 परमेशरा दैणीं ताल्है बर्गत, किल्हैकि तिन्नां का निं ताल्है बदल़ै लणा लै किछ़ै आथी। पर ज़ेभै धर्मीं मणछ ज़िऊई उझ़णै, तेभै भेटणअ ताह एतो हेस्सअ।"
बडी धामा खाणें बारै कथ्या
(मोत्ती 22:1-10)
15 ईशू संघै घेहल़ी बेठै दै एकी ज़ण्हैं इना गल्ला शूणीं ईशू का बोलअ, "परमेशर दैआ तेऊ मणछा लै बर्गत ज़ुंण परमेशरे राज़ा दी रोटी खाए।" 16 ईशू बोलअ तेऊ लै, "एकी मणछै दैनअ बडअ भोज़ अर तेऊ शादै खास्सै मणछ। 17 ज़ांऊं धाम खाणां लै तैर गई हई, तेऊ दैनअ आपणैं दासा का सोभी लै छ़ांदअ, ‘एछा, धाम गई तैर हई।’
18 "पर तिन्नैं निं तैहा गल्ले परबाह किई। तिन्नां मांझ़ै बोलअ एकी इहअ, ‘मंऐं आसा लअ द एक खेच मोलै, मुंह लागा तेते हेर-सभाल़ करनी ज़रूरी। हुंह निं तै एछी सकदअ!’
19 "दुजै बोलअ इहअ, ‘मंऐं आसा पांज़ ज़ोल़ी बल्द लऐ दै, अर आझ़ आसा मंऐं तिंयां खेचै ज़ुंडी परखी लाऐ दै? इहअ करै मुल्है छ़ाड माफी, हुंह निं एछी सकदअ।’ 20 तेखअ बोलअ एकी होरी इहअ, ‘मंऐं आसा एभै बैह किअ द अर हुंह निं एछी सकदअ।’
21 "बापस फिरी खोज़ी तेऊ दास ईंयां सारी गल्ला आपणैं मालक का। तेखअ आई घअरे मालक रोश्शै अर तेऊ आपणैं दासा लै बोलअ, ‘नगरीए बज़ारै डेऊ हर ज़ैगा संघा आण गरीब, लाट्टै-टुंडै अर कांणै काल्लै इधा लै शादी।’
22 "तेऊ दास बोलअ आपणैं मालका का भिई इहअ, ‘हे मालक, ज़िहअ तंऐं बोलअ त मंऐं किअ तिहअ ई। पर अज़ी बी आसा ज़ैगा रित्ती।’ 23 मालकै बोलअ दासा लै, बाता ‘हांढदै अर ओरी-पोरी डेऊई आण लोगा ज़ोरा-ज़ोरी बी शादी मेरअ घअर लोल़ी भर्हुअ। 24 किल्हैकि हुंह बोला ताखा इहअ कि ज़हा लै छ़ांदअ किअ त तिन्नां मांझ़ै निं मुंह लोल़ी एक बी धामा खांदअ बेठअ।’"
च़ेल्लै हणैंओ मोल
(मोत्ती 10:37,38)
25 ईशू पिछ़ू तै खास्सै मणछ लागै दै हांढदै। ईशू बोलअ पिछ़ू फिरी तिन्नां मणछा लै, 26 "ज़ै कुंण मुंह सेटा लै एछे, सह आपणैं ईज-बाब, बेटल़ी माठै, भाई बैहण, इधी तैणीं कि आपणैं प्राणा लै बी मुखा खास्सी झ़ूरी करे, तै निं सह मेरअ च़ेल्लअ बणी सकदअ।14:26 मोत्त. 10:37; जोह. 12:25; बधा. 33:9 27 ज़ुंण बी आपणअ क्रूस आप्पै च़की मुंह पिछ़ू एछे सह हणअ मेरअ च़ेल्लअ।
28 "तम्हां मांझ़ै इहअ कुंण आसा कि उछ़टी पुंडरी च़ाहा बणाणअं अर पैहलै बेशी तेतो खर्च़अ नां ज़ोल़े कि एता हुंह पूरअ बी सका करी कि नांईं? 29 किधी इहअ निं हआ कि आथरी पाई करै तेऊ च़िणीं निं सके, अर लोगा करनअ तेता भाल़ी सुहांग। 30 तिन्नां बोल़णअ इहअ, ‘अह बणाऊंदअ, लागअ त पर बणाईं निं सकअ?’
31 "या इहअ कुंण राज़अ आसा कि दुजै राज़ै संघै जुधा करदअ, डेऊअ पर पैहलै बेशी इहअ बच़ार निं किअ कि ज़ुंण बिहा हज़ारा सपाही पाई मुंह संघै जुधा करना लै आअ, तेऊओ मकाबलअ हुंह इना दसा हज़ारा करै करी सका कि नांईं? 32 नांईं ता करनअ दूरा ई का दूत छ़ाडी तेऊ संघै मेल़-ज़ोल़। 33 ठीक इहअ ई तम्हां मांझ़ै ज़ुंण आपणीं संसारे सोभी गल्ला नांईं छ़ाडे सह निं मेरअ च़ेल्लअ हई सकदअ।
नसादअ लूंण
(मोत्ती 5:13; मार्कुस 9:50)
34 "लूंण आसा ठीक पर ज़ै लूंणो सुआद लूंणअ नांईं होए, सह किज़ू करै करनअ लूंणअ? 35 सह नां ज़िम्मीं लै अर नां तेते खाद बणदी! तेखअ निं तेता ढेक्का शोटणै का सुआई किछ़ै काम रहंदअ। ज़ै तम्हैं एता समझ़णअ च़ाहा, तै दैऐ ऐहा गल्ला दी धैन कि मंऐं एभै तम्हां का किज़ै बोलअ।"