Lucas 19

ज़िती करै एरुशलेम नगरी लै डेऊणअ

28 इना गल्‍ला खोज़ी करै लागअ ईशू च़ेल्‍लै का आजू-आजू एरुशलेम नगरी लै हांढदअ।

29 तिंयां पुजै जैतून नाओंए धारा बेतफगे अर बेथनी गराऊंआं सेटा। तेऊ छ़ाडै आपणैं च़ेल्‍लै मांझ़ै दूई ज़ण्हैं गराऊंआं लै। तेऊ बोलअ तिन्‍नां लै इहअ, 30 "पार सम्हने नगरी लै डेओआ। तिधी पुजधी एक गाधू भेटणअ तम्हां बान्हअ द ज़ेथ प्रैंदै कधि कुंण बेठअ निं आथी। तेऊ आणा खोल्ही करै। 31 ज़ै तम्हां का कुंण पुछ़ै कि किल्है लाअ अह खोल्ही, तै बोलै इहअ कि प्रभू आसा एऊए ज़रुरत।"

32 ज़ुंण ईशू नगरी लै छ़ाडै तै तिन्‍नैं किअ तिहअ ई ज़िहअ-ज़िहअ ईशू तिन्‍नां लै बोलअ त। 33 ज़ांऊं गाधू खोल्हदै तै लागै दै, तेऊए मालकै तिन्‍नां लै बोलअ, "तम्हैं किल्है आसा लागै दै एऊ खोल्हदै?"

34 तिन्‍नैं बोलअ, "प्रभू आसा एऊओ किज़ै काम।" 35 तिन्‍नैं बी सह गाधू ईशू सेटा लै आणअ अर आपणैं झिकल़ै पाऐ तेऊ गाधू प्रैंदै संघा हुअ ईशू तेऊ गाधू प्रैंदै शुंआर। 36 ज़ांऊं सह हांढदअ लागअ, लोगै छ़ैऐ आपणैं झिकल़ै तेऊ आजू बाता।✝19:36 2 राज़. 9:13

37 ज़ांऊं ईशू नेल़ ज़िहअ जैतून धारे ढल़ाना दी पुजअ, च़ेल्‍ले सारी टोली तिन्‍नां शगतीए काम ज़ुंण तिन्‍नैं भाल़ै तै, तिन्‍नां आद करी बडी खुशी-खुशी किअ परमेशरो ज़ै-ज़ैकार

38 तिंयां थिऐ इहअ बोल्दै लागै दै,✝19:38 जक. 9:9; भज. 72:18-19; 118:26

"परमेशर दैआ तेऊ राज़ै लै बर्गत ज़ुंण तेऊए नाओंऐं एछा,

स्वर्गै शांती अर सरगै लोल़ी परमेशरे प्रतप्प हुअ।"

39 तेखअ लोगे झाल़ै मांझ़ा का लागै कई फरीसी बोल्दै, "हे गूरू इना च़ेल्‍लै दै नैरनीं।"

40 ईशू दैनअ तिन्‍नां लै ज़बाब, "ज़ै ईंयां च़ुप्पी रहै, पात्थरा पाणीं मेरी ज़ै-ज़ैकार करना लै लैल़ा।"