1 ईशू भाल़ै भबने भढारै पाअ बडै-बडै सेठ मणछै आपणैं साबै खास्सअ दान। 2 अर ईशू भाल़ी एक गरीब बिधबा बी तेथ दूई चाम्बे सिक्‍कै पांदी।

3 तेखअ बोलअ ईशू आपणैं च़ेल्‍लै का, "हुंह खोज़ा तम्हां का सत्त कि ऐहा गरीब बिधबा बेटल़ी दैनअ होरी सोभी सेठ लोगा का खास्सअ दान। 4 किल्हैकि सोभी दैनअ आपणीं खास्सी ज़ैदाता मांझ़ै धख-धख। पर ऐहा का थिअ धख ज़िहअ अर ऐहा दैनी आपणीं सह सारी कमाई इधी दान।"

5 तेऊए च़ेल्‍लै मांझ़ै बोलअ कई इहअ, "अह भबन भाल़ किहै बडै-बडै शोभलै पात्थरा करै आसा बणाअं द अर शोभली च़िज़ा करै सज़ाऊअ द।" ईशू बोलअ, 6 "इहै धैल़ै बी एछणैं, ज़ेभै ईंयां ज़ुंण बी तम्हैं इधी भाल़ा, ज़ै इधी पात्थर प्रैंदै पात्थर बी होए टेक्‍कअ द सह बी पाणअ एकी धैल़ै ढोल़ी।"

7 तिन्‍नैं पुछ़अ ईशू का, ओ "गूरू, इहअ कधू हणअ? ज़ांऊं ईंयां गल्‍ला पूरी हणीं, तैहा बेलो कै नछ़ैण हणअ?" 8 ईशू बोलअ तिन्‍नां लै,✝ "चतैन रहै, कसरै ज़ाणैं निं लागी, कई बोल़णअ मेरै नाओंऐं एछी कि हुंह आसा सह ई, अह बगत आसा गअ द नेल़ एछी, तम्हैं तिन्‍नां पिछ़ू निं डेऊई।

9 "ज़ेभै तम्हां का देशै जुध हणें अर जुधे गल्‍ला शुणें, तम्हैं निं डरी। किल्हैकि ईंयां गल्‍ला हणीं आसा पैहलै ज़रूरी, पर तैहा बेला बी निं अंत हणअ।"

10 तेखअ बोलअ ईशू तिन्‍नां लै, "किल्हैकि एकी ज़ाती करनअ दुजी ज़ाती संघै जुध अर एकी मुल्खा करनअ दुजै मुल्खा संघै जुध। ✝ 11 ज़ैगै-ज़ैगै हणीं ज़ाज़री अर देशै-देशै पल़णै नकाल़। देशै एछणी माहा मरी हणीं अर सरगै हणीं बडी डरैऊंणी गल्‍ला अर बडै-बडै नछ़ैण हणैं प्रगट।

12 "पर इना सोभी गल्‍ला का आजी ढाकणैं तम्हैं मेरै नाओंऐं। तम्हां लै दैणीं बडी दुख तकलिफ तम्हैं करनै पांच़ी-पज़ैती लै सभागृहा खल़ै। तम्हैं करनै कैद संघा निंणै राज़ै अर पांच़ा सेटा लै घिशी। 13 पर अह हणअ तम्हां लै शाजत दैणैंओ मोक्‍कअ। 14 तैही डाहा आपणैं मन्‍नैं एही पाक्‍की कि पैहलै ई का इहअ फिकर निं करी कि हाम्हां किज़ै बोल़णअ।

15 "किल्हैकि मुंह दैणैं तम्हां लै इहै बोल अर अक्ल कि थारै सोभ बरोधी निं थारअ सम्हनअ करी सकदै अर नां रोक्‍की सकदै। 16 ऐहा गल्‍ला डाहै आद कि थारै ईज-बाब अर भाई, टबरा अर थारै साथी बी ढाकणैं तम्हैं, इधी तैणीं कि तम्हां मांझ़ै कई पाणै मारी। 17 मेरै नाओंआं पिछ़ू हणैं खास्सै मणछ थारै दुशमण। 18 पर थारै मुंडो निं बाल़ बी बरैबाद हणअ।✝ 19 खिरी तैणीं मुंह दी विश्वास डाही करै सबर करी सका तम्हैं आपणैं प्राण बच़ाऊई डाही।

20 "ज़ेभै तम्हैं एरुशलेम नगरी दुशमण सैना करै घेरै दै भाल़े, तेभै जाणैं तम्हैं कि एरुशलेम नगरीए बरैबादी आसा नेल़। 21 तेभै ज़ुंण यहूदा दी होए, तिंयां ठुर्है उझै धारा लै, अर ज़ुंण एरुशलेम नगरी भितरी होए, तिंयां निखल़ै बागा लै अर ज़ुंण गराऊंऐं होए, तिंयां निं तेथ डेऊई। 22 किल्हैकि ईंयां हणैं बदल़ै लणें इहै धैल़ै, ज़हा दी लिखी दी सारी गल्‍ला पूरी हणीं।✝

23 "तिन्‍नां धैल़ी ज़ुंण सुंदी बेटल़ी अर आपणैं शोहरू लै दुधा पणैंऊंदी होए तैहा लै हणअ ठुहर्नअ बडी आफ़त! किल्हैकि पृथूई हणअ बेघै बूरअ सांगट अर इना लोगा लै एछणी बडी खरी। 24 तिन्‍नां मांझ़ै मरनै कई दुशमणे तलबारा करै अर कई देशे लोगा जैंदरी डेऊणैं गलाम हई। तेखअ ज़ेभै तैणीं होरी ज़ातीओ बगत पूरअ निं होए, तेभै तैणीं हणअ एरुशलेम होरी ज़ातीए हाथै बरैबाद।✝

25 "सुरज़, ज़ोथ अर तारै दी शुझणैं नछ़ैण, अर पृथूई दी हणअ देशा-देशे हर ज़ातीए लोगा लै सांगट। किल्हैकि तिन्‍नां लागणीं समुंदरे बडै शणकारा डरै ओर्ही-पोर्ही ठुर्हा अर छ़ाल्‍लीए क्रुंगा करै पल़णअ हैल़अ। ✝

26 "तेखअ डेऊणैं संसारै आजू हणैं आल़ी गल्‍ला न्हैल़दी, भाल़दी-भाल़दी डरै मारै लोगे शाह-प्राण किल्हैकि सरगे सारी शगती बी सिक्‍कणी आजू-पिछ़ू। ✝

27 "तेभै भाल़णअ तिन्‍नां हुंह मणछो पूत शगती अर प्रतप्पा संघै बादल़ा दी एछदअ। ✝ 28 ज़ेभै ईंयां गल्‍ला हंदी लागे, सिधै हई आपणैं मूंड करै खल़ै किल्हैकि तेभै हणअ थारअ छ़ुटकारअ नेल़।"

29 ईशू खोज़ी तिन्‍नां का एक कथ्या, "फेडूए बूटा अर सोभी बूटा भाल़ा, 30 ज़ांऊं तेथ प्लीर एछा, तेभै हेरा तम्हैं ज़ाणीं कि बसंते ऋत आसा नेल़। 31 ठीक इहअ ई ज़ांऊं तम्हैं इना गल्‍ला हंदी भाल़े, तेभै समझ़ै कि परमेशरो राज़ आसा नेल़। 32 हुंह खोज़ा तम्हां का सत्त कि ज़ेभै तैणीं ईंयां गल्‍ला निभी निं जाए, तेभै तैणीं निं ऐहा पोस्तीए लोग मरनै आथी। 33 सरग अर पृथूई टल़णीं पर मंऐं ज़ुंण गल्‍ला बोली ईंयां हणीं सोभ पूरी।

34 "एता लै रहै चतैन, इहअ निं हआ कि थारै मन्‍न पेठे कबाता अर राल़ै-मताल़ै हई ऐहा संसारे ज़िन्दगीओ फिकर करी ढिलै होए, अर सह धैल़ी एछा तम्हां लै नभैऊशै ज़िऊआ लै ज़ज़ाल़ ज़िहअ। 35 किल्हैकि सह एछणी सारी पृथूई दी सोभी लै बराबर।✝

36 "बिऊंतै रहै अर हर बगत रहै प्राथणां करदै लागी कि तम्हैं एछणैं आल़ी सारी खरी का बच़े, मुंह मणछे पूते सम्हनै खल़ै हणैं जोगी हई सके।"

37 ईशू दैआ त धैल़ी भबनै शिक्षा अर राची डेओआ त बागै जैतून नाओंए धारा लै 38 तेखअ एछा त दोत्ती-दोत्थी भबनै अर खास्सै मणछ एछा तै ईशूए गल्‍ला शुणदै भबना लै।