1 तेखअ सारी सभा उझ़ुई अर तिन्‍नैं निंयं ईशू राज़पाल पिलातुसा सेटा लै। 2 तिंयां लागै ईशू लै इहै दोशा लांदै, "हाम्हैं भाल़अ अह म्हारै देशे लोगा रोम राज़े खलाफ शकाऊंदअ अर अह करा माहा राज़ै लै कारै दैणा लै नांईं, अर आप्पू लै बोला अह मसीहा अर राज़अ।"

3 पिलातुसै पुछ़अ ईशू का, "तूह यहूदी मणछो राज़अ आसा?"

ईशू दैनअ ज़बाब, "तूह आसा लागअ द आप्पै बोल्दअ।"

4 तेखअ बोलअ पिलातुसै बडै प्रोहता अर तिधी होरी लोगा लै, "मुखा निं एऊ मणछा दी किछ़ै दोश शुझदअ।"

5 पर तिंयां लागै होर बी खास्सै बोल्दै, "अह शकाऊआ गलील मुल्खै ओर्ही इधी तैणीं, सारी यहूदा दी शिक्षा दैई सोभी लोगा।"

6 इहअ शूणीं पुछ़अ पिलातुसै तिन्‍नां का, "अह गलील मुल्खा का आसा?" 7 ज़ांऊं पिलातुसै ज़ाणअ कि तेऊ मुल्खै करा हेरोदेस राज़अ राज़। तेऊ छ़ाडअ ईशू हेरोदेस राज़ै सेटा लै। किल्हैकि सह थिअ तिन्‍नां धैल़ै एरुशलेम नगरी आअ द।

8 हेरोदेस हुअ ईशू भाल़ी बडअ खुश, किल्हैकि सह च़ाहा त कई धैल़ै ओर्ही ईशू भाल़णअ अर तेऊ ती ईशूए बारै खास्सी गल्‍ला शूणीं दी। हेरोदेस राज़ै ती एही बी आशा कि ईशू तेऊ का किछ़ै नछ़ैण रहैऊए। 9 तेऊ पुछ़ी ईशू का खास्सी गल्‍ला पर ईशू निं किछ़ ज़बाब दैनअ, 10 बडै प्रोहत अर शास्त्री तै खल़्हुऐ दै बडै तन मन्‍न लाई ईशू लै दोशा लांदै। 11 तेखअ हेरोदेस राज़ै अर तेऊए सपाही किअ ईशूओ सुहांग अर बैंज़णीं रंगे झिकल़ै बन्हैऊंईं छ़ाडअ बापस पिलातुसा सेटा लै। 12 तैहा ई धैल़ी हुऐ पिलातुस अर हेरोदेस आप्पू मांझ़ै साथी, एता पैहलै डाहा तै तिंयां एकी-दुजै लै ज़ीद।

13 राज़पाल पिलातुसै शादै सोभै बडै प्रोहत, अफसर अर होर लोग, संघा बोलअ इहअ, 14 "तम्हैं आणअ अह मणछ मुंह सेटा लै अर तम्हैं बोला एऊए बारै इहअ कि अह पाआ लोगा शकाऊई करै कबाता! पर मंऐं हेरअ अह थारै सम्हनै ज़ाच़ी-भाल़ी। पर ज़हा गल्‍लो तम्हैं एऊ लै दोश लाअ, इहअ निं मुखा एऊ दी सज़ा दैणैं जोगी किछ़ै शुझुअ। 15 नां हेरोदेस राज़ै एऊ दी किज़ै दोश भेटअ। किल्हैकि तेऊ छ़ाडअ अह मुंह सेटा लै बापस। ऐबै भाल़ा, एऊ निं इहअ किछ़ै किअ कि हुंह एऊ लै मारनै जोगी सज़ा दैई सके। 16 तै ऐबै लाअ मंऐं अह च़िक्‍की करै छ़ाडी।" 17 पिलातुस त थैरे धैल़ी तिन्‍नां लै एकी ज़ुल्म करनै आल़ै कैदी छ़ाडणा लै मज़बूर।

18 तेखअ पाअ सोभी हाल्‍लअ-गोल्‍लअ अर लैल़ा पाई बोलअ, "एऊ पाआ मारी अर हाम्हां लै छ़ाड बरोबा।" 19 बरोबा त ज़ुंणी नगरी दी राज़ द्रोह अर हत्या किई ती अर सह थिअ कैद खानै पाअ द। 20 पर पिलातुस च़ाहा त ईशू छ़ाडणअ अर तेऊ समझ़ाऊऐ तै लोग एकी बारी भिई। 21 पर लोगै लैल़ा पाई-पाई बोलअ, "एऊ मारा क्रूसा दी।"

22 पिलातुसै बोलअ चिऊथी बारी तिन्‍नां लै, "किल्है, एऊ किज़ै कदुष्ट काम किअ? मंऐं निं एऊ दी मौता दैणैं जोगी किछ़ै दोश भाल़अ, तै लाअ मंऐं अह च़िक्‍की करै छ़ाडी।"

23 पर तिंयां पल़ै पिछ़ू, "एऊ छ़ड़ाऊआ क्रूसा दी" अर तिंयां लागै होर बी ज़ोरै लैल़ा लांदै। 24 तेखअ दैनअ पिलातुसै हुकम कि ज़िहअ ईंयां बोला तिहअ ई करा। 25 तेऊ छ़ाडअ सह मणछ पोर्ही ज़ुंण राज़ द्रोह अर हत्या पिछ़ू कैद खानै त बंद किअ द। ज़हा तिंयां मांगा तै अर ईशू सभाल़अ तिन्‍नें साबै ज़िहअ तिंयां च़ाहा तै।

26 ज़ांऊं तिन्‍नैं ईशू निंयं, तिन्‍नैं ढाकअ शमौन नाओं मणछ कुरेन नगरी का आअ द, सह थिअ गराऊंआं का लागअ द एछदअ, सह निंयं तिन्‍नैं ज़ोरा-ज़ोरी क्रूसा बगारू।

27 पिछ़ू लागै खास्सै मणछ हांढदै। कई बेटल़ी लागी लेरदी अर हिक्‍का पटाक्‍कदी। 28 ईशू बोलअ तिन्‍नां बाखा भाल़ी करै, "हे एरुशलेम नगरीए शोहरीओ, मुल्है निं लेरा लाआ, पर आपणैं-आपणैं शोहरू लै लाआ लेरा। 29 किल्हैकि इहै धैल़ै एछणैं, ज़ेभै लोगा इहअ बोल़णअ, ‘तिंयां बेटल़ी आसा भागा आल़ी ज़ुंण बांढी आसा, भागा आल़अ आसा सह ओदर ज़ुंणीं ज़ल्म निं दैनअ, अर भागा आल़ी आसा तिंयां च़ूई ज़ुंणीं दुध निं पणैऊंअं।’ 30 तैहा घल़ी बोल़णअ तिन्‍नां इना उछ़टी धारा लै इहअ, ‘हाम्हां प्रैंदै ढूल़ा’ अर ढेक्‍का लै बोल़णअ इहअ, ‘हाम्हां डाहा दाबी।’

31 "किल्हैकि, ज़ै तिंयां हरै बूटा संघै इहअ करा, तै शुक्‍कै बूटा लै भुझ़ा तिन्‍नां कै निं करनअ होए।"

32 तिन्‍नैं सपाही निंयैं दूई होर मणछ बी क्रूसा दी छ़ड़ाऊंणा लै ज़ुंण खुंनी अर द्रोही तै।

33 ज़ांऊं तिंयां तैहा ज़ैगा पुजै, ज़िधा लै खोपल़ीए ज़ैगा बोला, तिन्‍नैं तिधी तिंयां कदुष्ट कामां करनै आल़ै दूई डाकू बी एक दैहणै अर एक बाऊंऐं क्रूसा दी छ़डाऊऐ। 34 तेखअ बोलअ ईशू, "हे बाब, इना कर माफ, किल्हैकि इना का निं थोघै कि ईंयां किज़ू करदै आसा लागै दै?" संघा तिन्‍नैं सपाही बांडै आप्पू मांझ़ै परच़ी पाई तेऊए झिकल़ै।✝

35 लोग तै लागै दै खल़्हुई करै भाल़ै अर तिंयां सपाहीए अफसर बी लागै सुहांगा करदै अर इहअ बोल्दै, "एऊ होर ता बच़ाऊऐ, ज़ै अह मसीहा आसा अर ज़ै अह परमेशरो छ़ांटअ द थिअ आप्पू ता बच़।"✝

36 सपाही बी आऐ नेल़ संघा दैनअ मिल्‍लै दाखे रसा दी चुशू डबेऊई ईशू का च़ाखणा लै। तिंयां बी लागै तेऊए सुहांगा करदै।✝ 37 "ज़ै तूह यहूदी मणछो राज़अ आसा, तै आप्पू; बच़ हेरुं।" 38 तेखअ तेऊ प्रैंदै क्रूसे च़ुंडी टोक्‍की तिन्‍नैं एक तगती, अर तेथ त तेऊओ दोश लिखअ, "यहूदी मणछो राज़अ।"

39 ज़ुंण तिंयां ईशू संघै डाकू बी क्रूसा दी तै छ़ड़ाऊऐ दै, तिन्‍नां मांझ़ै बोलअ एकी निंदा करी इहअ, "तूह कै मसीहा निं आथी? तै तूह आप्पू बी बच़ अर हाम्हां बी बच़ाऊ।"

40 एता लै दुजअ लागअ तेऊ पैहलै झ़ाहल़ काढी नैरदअ, "तूह कै परमेशरा का बी निं डरदअ आथी? ताल्है बी, अह ई सज़ा आसा दैनी दी। 41 हाम्हैं आसा फैंसले साबै ठीक सज़ा भुगतदै लागै दै किल्हैकि म्हारै कामों भेटणअ त हाम्हां अह ई फल, पर एऊ निं किछ़ै कदुष्ट काम किअ आथी।" 42 तेखअ बोलअ तेऊ, ए ईशू, "ज़ेभै तूह आपणैं राज़ एछे, तेभै डाहै मेरअ बी खैल।"

43 ईशू बोलअ तेऊ लै, "हुंह खोज़ा ताखा सत्त कि तूह हणअ आझ़ ई मुंह संघै स्वर्गे।"

44 दपहरा पोर्ही चिऊथै पहरै तैणीं रहअ तेऊ देशै घोर न्हैरअ हई अर उडै तैणीं रही ज़ेही राच पल़ी। 45 सुरज़ डुबअ अर परमेशरे भबनै लाअ द पल्दअ धेल़्हुअ प्रैंदा का थाल्‍लै तैणीं दूई बाखा लै।✝

46 तेखअ बोलअ ईशू ज़ोरै लैल़ पाई इहअ, "हे बाबा, मंऐं छ़ाडी आपणीं ज़िन्दगी तेरै आसरै।" इहअ बोली शोटै तेखअ ईशू प्राण। 47 एकी सुबैदारै तेऊ सम्हनै तिधी ज़ुंण हुअ तेता भाल़ी किई परमेशरे ज़ै-ज़ैकार संघा बोलअ, "ज़रूर अह मणछ त धर्मीं।"

48 खास्सै मणछ ज़ुंण तिधी भाल़ै थिऐ आऐ दै, तिंयां डेऊऐ एता भाल़ी हिक्‍का पटाक्‍कदी घअरा लै। 49 ईशूए सोभ भेतू-बछ़ैणूं अर ज़ुंण बेटल़ी गलील मुल्खा का ईशू सेटा आई, तिंयां ती दूर खल़्हुई करै ज़ुंण तिधी हुअ तेता भाल़ी लागी दी।✝

50 युसुफ नाओं एक बज़ीर त सादअ सिधअ अर धर्मीं मणछ। 51 सह निं तिन्‍नें बच़ारा अर कामां का खुश आथी त। सह थिअ यहूदी मणछे नगरी अरमतियाह गराऊंओ रहणैं आल़अ अर सह बी थिअ परमेशरे राज़ा न्हैल़अ लागअ द।

52 सह डेऊअ राज़पाल पिलातुसा सेटा लै संघा मांगी तेऊ का ईशूए ल्हास। 53 तेखअ थुआल़ी तेऊ ल्हास क्रूसा का धरनीं, संघा डाही बाछे कोरी च़ादरा दी पल़ेटी तैहा घोरी दाबी ज़ुंण भिल़ी दी थिई कोती दी अर तेथ निं अज़ी बी कोहै डाहअ त। 54 सह धैल़ी थिई ऊवार्णे थैरे तैरी करने धैल़ी अर बशैघे धैल़ी ती शुरू हणैं आल़ी।

55 तिंयां बेटल़ी ज़ुंण गलील मुल्खा का थिई आई दी, तिंयां डेऊई पिछ़ू-पिछ़ू अर तिन्‍नैं भाल़ी सह घोर कि ईशूए ल्हास किधी आसा डाही दी। 56 बापस फिरी करै बणाअं तिन्‍नैं खुशबूदार तेल अर बशैघे धैल़ी किअ तिन्‍नैं बधाने साबै राम।✝