1 तिंयां पुजै समुंदरा पार गरासेनी मुल्खै 2 अर ज़ांऊं ईशू किश्ती का होथअ, तेभी आअ एक मणछ तेऊ मणछा दी थिअ भूत शाचअ द। सह मणछ आअ मल्थाना का ईशू सेटा लै ठुर्ही। 3 सह रहा त मल्थानै ई। तेऊ निं शांघल़ी करै बी बान्हीं सकदै तै।

4 किल्हैकि लोगै बान्हअ त सह शांघल़ी करै बी, पर सह पाआ त तेता बी चोल़ी अर तेऊ निं कोहै काबू करी सकदअ त। 5 सह रहा त धैल़ी-राची मल्थानै अर नाल़ै-धारा ज़ोरै-ज़ोरै हाक्‍का लैल़ा लांदी ठुल़्दअ लागी। आपणीं घेरी करा त सह तिछै पात्थरा करै क्रिंज़ा पाई छ़िन्ह-बिन्ह।

6 ज़ांऊं तेऊ का ईशू शुझुअ, सह आअ दूरा का ठुर्ही। ईशू सेटा धरनीं उटअ पल़ी बोलअ तेऊ लैल़ा पाई इहअ 7 "हे ईशू परम प्रधान परमेशरे पूता, मेरअ ताह संघै कै मेल़-ज़ोल़? हुंह दैआ ताल्है परमेशरे कसम कि तूह निं मुल्है दुख दैई।"✝ 8 किल्हैकि ईशू बोलअ त तेऊ लै इहअ, "भूता, एऊ मणछा का निखल़ पोर्ही।"

9 ईशू पुछ़अ तेऊ का, "ताह नाअं किज़ै आसा?"

तेऊ दैनअ ईशू लै ज़बाब, "मुंह नाअं आसा सैना, किल्हैकि हाम्हैं आसा खास्सै।" 10 तेऊ किई ईशू का खास्सी अरज़ कि हाम्हां निं एऊ मुल्खा का बागै काढी।

11 तिधी धारठी थिअ खास्सै सुंगरो एक छ़ुंड च़रदअ लागअ द, 12 तिन्‍नैं भूतै किई ईशू का एही अरज़, "हाम्हां दै इना सुंगरा जैंदरी डेऊणैं, ताकि हाम्हैं इना भितरी पेशी सके।"

13 तेखअ दैनी ईशू तिन्‍नां लै ज़ाज़त कि तिंयां सुंगरा दी पेठे। तिंयां भूत पेठै तेऊ मणछा का निखल़ी सुंगरा भितरी। तिन्‍नां सुंगरे छ़ुंडा दी तै खास्सै सुंगर कोई दूई हज़ार। तिंयां सुंगर हुऐ पठी बेगरै संघा पल़ै तिंयां धारठी प्रैंदा का समुंदरे पाणीं जैंदरी। इहअ करै हुऐ तिंयां सुंगर सोभ खतम।

14 तिंयां सुंगरा गुआल़ै ठुर्है तिधा का आपणीं नगरी अर गराऊंआं लै संघा खोज़अ तिन्‍नैं इना गल्‍लो सारअ समाद नगरी दी, नगरी का आऐ खास्सै मणछ तिधी भाल़ै। 15 ईशू सेटा पुजी ज़ांऊं तिन्‍नैं सह भूते खास्सी सैना शाचअ द मणछ होश-बाशा दी झिकल़ै बान्हीं बेठअ द भाल़अ, तिंयां डरै सोभ।

16 तिधी ज़ुंणी तिंयां गल्‍ला आपणीं आछी भाल़ी ती, तिन्‍नैं खोज़अ तिन्‍नां होरी का तेऊ भूत शाचै दै मणछो अर तिन्‍नां सुंगरो पूरअ हाल। 17 तिंयां सोभ लोग लागै ईशू का एही अरज़ करदै "म्हारै एऊ मुल्खा का डेऊ बागै।"

18 ज़ांऊं ईशू किश्ती दी बेशी च़ाल्‍लअ, ज़हा मणछा भूता का छ़ुटकारअ भेटअ त, सह लागअ ईशू का अरज़ करदअ, "मुंह बी दै तूह आप्पू संघै एछणैं।"

19 पर ईशू निं तेऊए अह गल्‍ल मनी संघा बोलअ तेऊ मणछा लै, "आपणैं घअरै डेऊ संघा खोज़ लोगा का इना गल्‍ला कि प्रभू ताल्है केही झींण किई अर ताल्है किहै बडै-बडै च़मत्कारे काम किऐ।"

20 सह मणछ डेऊअ तिधा का दिकापुलिस मुल्खा लै संघा लागअ लोगा का इना गल्‍ले बारै खोज़दअ कि ईशू तेऊ लै किहै बडै-बडै च़मत्कारे का किऐ! तेऊए गल्‍ला शूणीं हुऐ सोभ लोग रहैन।

21 ईशू डेऊअ भिई किश्ती दी बेशी समुंदरा पार। तिधी आऐ तेऊ सेटा खास्सै मणछ।

22 ज़ेतरी ईशू तिधी पुजअ, तेतरी गअ तिधी याईर नाओं एक मणछ एछी, सह थिअ सभागृहो कारदार। ज़ांऊं तेऊ का ईशू शुझुअ, तेऊ टेक्‍कअ ईशू सेटा धरनीं उटै पल़ी माथअ। 23 तेऊ किई ईशू का एही अरज़, "मेरी होछ़ी शोहरी आसा मरनै आल़ी। तूह एछ संघा छ़ुंह तैहा आपणैं हाथा करै ताकि सह मरनै का बच़े।"

24 ईशू लागअ तेखअ तेऊए अरज़ शूणीं तेऊ संघै हांढदअ। होर बी डेऊऐ पिछ़ू खास्सै मणछ।

25 बाता हांढदी ती एक बेटल़ी, तैहा थिअ बारा साला ओर्ही लोहू बगणेंओ रोग। 26 तैहा कराऊअ त खास्सै बैईदा का आपणअ लाज़ बी पर सह निस्सी ती केही बिज़री। तैहा किई आपणीं सारी ज़िन्दगीए कमाई बी तैहा बमारी पिछ़ू खतम पर रोगा का नरोगै हणें ज़ैगा दाहुई सह।

27 ईशूए गल्‍ला शूणीं डेऊई सह खास्सै मणछा जैंदरी ईशू पिछ़ू अर तैहा छ़ुंअ पिछ़ू का ईशूए झिकल़ैओ पाल्‍लअ। 28 किल्हैकि सह सोठा ती आपणैं मन्‍नैं इहअ, "ज़ै हुंह ईशूए झिकल़ै बी छुंए, तेता करै जाणीं हुंह एऊ रोगा का बिज़री।" 29 ज़ांऊं तैहा ईशूए झिकल़ै छ़ूंऐं, तेभी हुअ तेसो लोहू बगणअ बंद।

30 ईशू का ज़ाण्हुंअ आप्पू बी कि तेऊ का निखल़ी शगती। ईशू पुछ़अ तेतरै लोगा जैंदरी पिछ़ू फिरी, "मेरै झिकल़ै कुंणी छ़ूंऐं?" 31 तेऊए च़ेल्‍लै बोलअ तेऊ लै, "तूह इना केही गल्‍ला करा, तूह भाल़ा बी हैनूं ताह पिछ़ू भाल़ केतरै लोग आसा हांढदै लागै दै! अर तूह बोला कि कुंणी हुंह छ़ुंअ!"

32 ईशू भाल़अ फेर तेऊ भाल़णा ज़ुंणी अह काम किअ त। 33 तेखअ सोठअ तैहा बेटल़ी इहअ कि मेरी भाल़ केही भलाई हुई, तैहा डरदी-काम्बदी ईशू सेटा माथअ टेक्‍की करै खोज़ी सारी गल्‍ला शुची-शुची।

34 ईशू बोलअ तैहा लै, "शोहरी, तंऐं किअ विश्वास कि हुंह सका ताह ठीक करी अर मंऐं हेरी तूह ऐहा बमारी का राम्बल़ी करी। ऐबै डेऊ शांती दी घअरा लै, तूह गई ऐबै ऐहा बमारी का छ़ुटी।"

35 ईशू त इहअ बोल्दअ ई लागअ द कि सभागृहे कारदारे घअरा का दैनअ लोगै समाद, "तेरी शोहरी, मरी गई, ऐबै तंऐं गूरू लै किल्है लाअ थोघै बाझ़ी इधा लै एछणेंओ कष्ट दैई?"

36 ज़िना गल्‍ला करदै तिंयां थिऐ लागै दै, तिंयां गल्‍ला किई ईशू शूणीं नां शूणीं, अर सभागृहे कारदारा लै ईशू बोलअ, "हैल़अ निं करी, तूह डाह सिधअ विश्वास।"

37 ईशू निं पतरास, याकब अर तेऊए भाऊ जोहन्‍ना छ़ाडी होरी कोही आप्पू संघै एछणैं दैनअ।

38 सभागृहे कारदारे घअरै पुजी भाल़ै ईशू तिंयां लोग लेरदै-पकारदै। 39 तेखअ तेऊ भितरी डेऊई तिन्‍नां लै बोलअ, "तम्हैं किल्है आसा लागै दै लेरदै-पकारदै? शोहरी निं मूंईं दी आथी अह आसा सुत्ती दी।"

40 तिंयां सोभ लागै ऐहा गल्‍ला शूणीं सुहांगा करदै, पर ईशू काढै तिधा का तिंयां सोभ लोग बागा लै अर शोहरीए ईज-बाब अर आपणैं चअन च़ेल्‍लै डाहै भितरी ज़िधी शोहरी ती डाही दी।

41 तेखअ ईशू शोहरीओ हाथ ढाकी करै बोलअ तेऊए आपणीं बोली दी, "तलीता कूम्मीं" एतो मतलब हआ, "लान्हींऐ खल़ी उझ़ू।" 42 ज़ांऊं ईशू इहअ बोलअ, सह शोहरी उझ़ुई तेभी खल़ी अर सह लागी हांढदी-फिरदी, किल्हैकि सह थिई बारा साले। ऐहा गल्‍ला भाल़ी हुऐ तिंयां रहैन।

43 तेखअ ईशू तिन्‍नां लै चतैनगी दैनी कि ऐहा गल्‍लो थोघ निं लोल़ी कोही का लागअ, तेखअ बोलअ तेऊ तिन्‍नां लै इहअ, "ऐहा शोहरी लै दैआ किज़ै खाणां लै।"