1 तैहा ई धैल़ी डेऊअ ईशू घअरा का बागै संघा डेऊअ गलील समुंदरा बाखा अर तिधी रहअ सह बाढै लोगा लै शिक्षा दैंदअ बेशी। 2 ईशू सेटा आऐ तिधी खास्सै मणछ, तैही बेठअ ईशू किश्ती दी अर तिंयां सोभै लोग रहै समुंदरे बाढै खल़्हुई। 3 ईशू बोली कथ्या खोज़ी खास्सी गल्‍ला,

"शूणां, एकी बारी निखल़अ एकी बारी निखल़अ एक कृषाण बेज़ै बऊंदअ। 4 बेज़ै शोटदी बारी पल़अ धख बेज़अ बाते बाढै अर सह च़ुंघअ च़ेल्‍लू-पखीरू।

5 "धख बेज़अ पल़अ शकरीली ज़िम्मीं दी, तेथ निं तेता खास्सअ माट्टअ भेटअ, सह बेज़अ निं डुघै माट्टै दी पल़अ अर इहअ करै टिप्पअ सह जाऊअ। 6 ज़ांऊं सुरज़ो धुप्पअ टिप्परू दी पल़अ, तिंयां टिप्परू शुक्‍कै किल्हैकि तेते ज़लैल़ै निं डुघै माट्टै दी आथी तै।

7 "इहअ ई धख बेज़अ पल़अ झ़ाकल़ै, ज़ांऊं सह बेज़अ टिप्पअ, सह दाभूअ कांडे झ़ाकल़ा जैंदरी। 8 पर धख बेज़अ पल़अ रज़दी-पज़दी ज़िम्मीं दी, तिन्‍नां दी लागी खास्सी फसल। कोई दी शौ गुणा, कोई दी शाठ गुणा अर कोई तिह गुणा पज़ैआ।"

9 तेखअ बोलअ ईशू तिन्‍नां लै, "ज़ै तम्हैं एता समझ़णअ च़ाहा, तै दैऐ ऐहा गल्‍ला दी धैन कि मंऐं एभै तम्हां का किज़ै बोलअ।"

10 तेखअ आऐ च़ेल्‍लै ईशू सेटा संघा लागै इहअ बोल्दै, "तूह इना लोगा संघै कथ्या खोज़ी किल्है करा गल्‍ला?"

11 ईशू दैनअ तिन्‍नां लै ज़बाब, "तम्हैं सका स्वर्ग राज़ो भेद समझ़ी पर होरी लै ज़ुंण परमेशरे राज़ा दी नांईं आथी तिंयां निं समझ़दै। 12 ज़ुंण मेरी शिक्षा शूणां, तिन्‍नां लै दैणीं होर बी खास्सी समझ़ अर तिन्‍नां का हणअ होर बी खास्सअ ज्ञैन। पर ज़ुंण मेरी शिक्षा नांईं शूणां, तिन्‍नां का निंणअ सह बी पोर्ही ज़ुंण तिन्‍नां का धख समझ़ होए बी। 13 हुंह करा तिन्‍नां संघै कथ्या खोज़ी एते तैणीं गल्‍ला कि

तिंयां निं मेरै मुंह भाल़ी शिखल़दै

अर मेरी गल्‍ला शूणीं निं समझ़दै।

14 "तिन्‍नें बारै आसा परमेशरे गूर ईशायाह इहअ बोलअ द कि

‘मेरी गल्‍ला ता हेरनी तम्हां शूणीं

पर तम्हां निं समझ़ पल़णीं।

आछी का हेरनअ तम्हां भाल़ी

पर तम्हां का निं शुझणअ आथी।

15 किल्हैकि इना लोगो मन्‍न आसा पात्थरा ज़िहअ काठअ हुअ द।

ईंयां निं मेरी गल्‍ला शुणदै,

इनै आसा आपणीं आछी मुंदरी डाही दी कि

इहअ निं हआ कि इने आछी का शुझिए अर,

इने काना का शुण्हिंए अर

इने मन्‍नैं समझ़ एछे, अर ईंयां मुंह सेटा बापस फिरे

अर हुंह इना नरोगै करूं।’

16 "पर परमेशरै दैनअ तम्हां लै इना गल्‍ला आपणीं आछी भाल़णेंओ मोक्‍कअ कि तम्हां का शुझिए अर तम्हैं किऐ तेऊ इहै कि तम्हैं तेऊओ समाद शुणें अर तेता समझ़े।

17 "किल्हैकि हुंह खोज़ा तम्हां का सत्त कि खास्सै गूर अर धर्मीं मणछ च़ाहा तै इना गल्‍ला भाल़णीं। तिन्‍नां निं ईंयां गल्‍ला भाल़णीं भेटी ज़ुंण आझ़ तम्हैं आसा भाल़ै लागै दै। तिंयां च़ाहा तै परमेशरो समाद शुणनअ ज़ुंण आझ़ तम्हैं शूणां पर तिन्‍नां निं शुणनअ भेटअ।"

18 तेखअ बोलअ ईशू इहअ, "बेज़ै बऊंणैं आल़अ कृषाण आसा परमेशरो समाद खोज़णैं आल़ै ज़िहअ। 19 ज़ुंण बी स्वर्ग राज़ो बैण शूणीं नांईं समझ़ा, तेऊए मन्‍नैं ज़ुंण बी बऊअ द त, तेऊ निंयां सह कदुष्ट राख्स छ़ड़ैऊई। अह आसा सह ई बेज़अ ज़ुंण बाते बाढै त बऊअ द।

20 "तिहअ ई शकरीली ज़िम्मीं दी पल़अ द बेज़अ आसा तिन्‍नां लोगे बारै ज़ुंण परमेशरो बैण शूणां अर तेभी खुशी-खुशी संघै मना। 21 पर आप्पू पाक्‍कअ विश्वास नांईं हणें बज़्हा रहा तिंयां थोल़ै ई धैल़ै लै। बैण मनणे बज़्हा ज़ांऊं तिन्‍नां लै मसीबता एछा, तिंयां छ़ाडा तेभै परमेशरा दी विश्वास करनअ।

22 "ज़ुंण बेज़अ झ़ाकल़ै पल़अ सह आसा तिन्‍नां मणछे बारै ज़ुंण बैण ता शूणां, पर एऊ संसारे फिकर अर धन-माये धोखै करै पाआ तेऊ बैणा बिस्सरी। तिंयां निं तिहअ करदै ज़िहअ परमेशर च़ाहा कि तिंयां करे।

23 "ज़ुंण बेज़अ रज़दी-पज़दी ज़िम्मीं दी पल़अ, अह आसा तिन्‍नां लोगे बारै ज़ुंणी परमेशरो बैण शूणअ, मनअ अर विश्वास किअ। तिन्‍नैं किअ तिहअ ई ज़िहअ परमेशर च़ाहा कि तिंयां करे। तिंयां आसा एही बधिया फसला ज़ेथ तिह गुणा, शाठ गुणा, कोई दी शौ गुणा फसल हुई।"

24 तेखअ खोज़ी ईशू तिन्‍नां का एक होर कथ्या, "स्वर्गो राज़ आसा तेऊ कृषाणा ज़िहअ ज़ुंणी आपणैं खेचै बधिया बेज़अ बऊअ। 25 पर ज़ांऊं लोग सुत्तै दै तै, तिन्‍नैं दुशमणै डाहै कणका जैंदरी बणें घाह लबहरै बऊई। 26 ज़ांऊं टिप्परू लागै अर सील निखल़ै तेखअ लागै तिंयां बणें घाह लबहरे दाणैं बी शुझदै।

27 "एता भाल़ी बोलअ तेऊए घअरे सोभी दास तेऊ सेटा एछी, ‘हे मालक, तंऐं कै आपणैं खेचै बधिया बेज़अ निं बऊअ त? तै ईंयां बणें लबहरै किधा का आऐ?’

28 "तेऊ बोलअ तिन्‍नां लै इहअ, ‘अह आसा कहा दुशमणो काम।’

"तिन्‍नैं दासै बोलअ मालका लै, ‘ऐबै तूह किज़ै बोला, हाम्हैं लबहरै कणक जैंदरा का पेच़ी झाल़ी डाहूं?’

29 "मालकै बोलअ तिन्‍नां लै, ‘इहअ निं करी, इहअ निं हआ कि बणें लबहरै झाल़दी बारी राम्बल़ै कणके दैणैंओ डाल़ बी झोठिआ। 30 तम्हैं करा इहअ, लऊंणै तैणीं दैआ इना दुही संघा-संघा बझ़णै। लऊंणे बगती बोल़णअ मुंह लऊंणै आल़ै लै कि इना बणें लबहरैओ लाऐ एकी ज़ैगा दहणा लै रूल़ अर कणक करै मेरै भढारै कठा।’"

31 तेखअ खोज़ी ईशू तिन्‍नां का एक होर कथ्या, तेऊ बोलअ इहअ, "स्वर्गो राज़ आसा एक शाऊईए दाणैं ज़िहअ, सह बऊअ एकी मणछै आपणैं खेचै। 32 आसा ता शाऊईओ दाणअ सोभी बेज़ै का होछ़अ पर ज़ांऊं सह बझ़ा, सह हआ सोभी शाग-पाचा का बडअ। सह हआ इहअ बूट कि सरगे च़ेल्‍लू-पखीरू बी बणाआं तेते शाण्हीं जैंदरी आपणैं कोल्ह।"

33 ईशू खोज़ी तिन्‍नां का एक होर कथ्या, "स्वर्गो राज़ आसा धख ज़िहै सज़ेल़ै ज़िहअ ज़ुंण कुंणी बेटल़ी खास्सै पिठै जैंदरी मुछ़अ। थोल़ी घल़ी बाद बणअ सह सारअ मुछ़अ द पिठअ सज़ेल़अ।"

34 ईंयां सोभ गल्‍ला खोज़ी ईशू कथ्या खोज़ी, इना एही गल्‍ला समझ़ाऊंणा लै करा त ईशू कथ्या खोज़ी गल्‍ला। 35 ताकि परमेशरे गूर ईशायाह बोलअ द बैण पूरअ होए,

"मुंह करनी कथ्या खोज़ी गल्‍ला,

अर तिंयां गल्‍ला करनी मुंह प्रगट ज़ुंण संसार शुरू हणैं ओर्ही गुप्त आसा रही दी।"

36 तेखअ आअ ईशू तिन्‍नां मणछा सेटा का घअरा लै। च़ेल्‍लै आऐ ईशू सेटा लै संघा लागै इहअ बोल्दै, "खेचै बणें लबहरे कथ्या समझ़ाऊ हाम्हां का।"

37 ईशू समझ़ाऊऐ तिंयां इहअ बोली, "बधिया बेज़ै बऊंणैं आल़अ आसा हुंह मणछो पूत। 38 खेच आसा एऊ संसारे मणछ। बधिया बेज़अ आसा स्वर्ग राज़े परज़ा ज़हा प्रैंदै परमेशर राज़ करा। बणों बेज़अ आसा तेऊ राख्से परज़ा ज़हा प्रैंदै सह राख्स राज़ करा। 39 कणका जैंदरी लबहरै बऊंणैं आल़अ दुशमण आसा सह राख्स। लऊंणे बेल आसा एऊ संसारा खतम हणैंओ नछ़ैण अर काटणै आल़ै आसा स्वर्ग दूत।

40 "ज़िहै बणें लबहरै झाल़ी दहई पाआ, तिहअ ई हणअ तेभै बी ज़ेभै परमेशरा सोभी लोगो नसाफ करी अह संसार खतम हणअ। 41 मुंह मणछे पूता छ़ाडणैं आपणैं स्वर्ग दूत। तिन्‍नां झाल़णैं तेऊए राज़ा का सोभ पाप अर कदुष्ट काम करनै आल़ै सोभ मणछ। 42 स्वर्ग दूता पाणै तिंयां जम्परी आगीए कूंडा जैंदरी। तिधी हणैं तिंयां लैल़ा लांदै अर दाहे झोशा करै दांदा कटिल्‍लदै। 43 तेभै च़मकणै धर्मीं आपणैं बाब परमेशरे राज़ा दी सुरज़ा ज़िहै।

"ज़ै तम्हैं एता समझ़णअ च़ाहा, तै दैऐ ऐहा गल्‍ला दी धैन कि मंऐं एभै तम्हां का किज़ै बोलअ।

44 "स्वर्गो राज़ आसा खेचै दाबी दी धन-माया ज़िहअ ज़ुंण माया कहा मणछा भेटी अर सह डाही तेऊ तिधी दाबी, तेऊ हुई एही खुशी कि तेऊ लअ आपणीं सारी ज़ैदात बेच़ी सह खेच मोलै।

45 "स्वर्गो राज़ आसा एकी बपारी ज़िहअ ज़ुंण सोभी का बधिया मोती लोल़अ त लागअ द। 46 ज़ांऊं तेऊ एक किम्मती मोती भेटअ, तेऊ पाअ मोती मोल लणें तैणीं आपणअ सोभ किछ़ बेच़ी।

47 "स्वर्गो राज़ आसा म्हाछ़ली ढाकणें एकी बडै ज़ज़ाल़ा ज़िहअ, ज़ुंण समुंदरै पाअ अर तेथ शाची सोभी रंगे म्हाछ़ली। 48 ज़ांऊं सह ज़ज़ाल़ म्हाछ़ली करै भर्हुअ, सह आणअ समुंदरे बाढा लै खिंच़ी। तेखअ भरी तेता मांझ़ै बधिया-बधिया म्हाछ़ली छ़ांटी करै च़ठै भितरी अर बाकी शोटी पोर्ही।

49 "ज़ेभै संसार खतम हणअ तेभै हणीं एही ई गल्‍ला। स्वर्ग दूता करनै स्वर्गा का एछी कदुष्ट मणछ धर्मीं मणछा का ज़ुदै अर तिंयां पाणै जम्परी आगीए कूंडा जैंदरी। 50 तिधी हणैं तिंयां लैल़ा लांदै अर दाहे झोशा करै दांदा कटिल्‍लदै।

51 "तम्हैं ईंयां गल्‍ला समझ़ी बी कि नांईं?"

52 च़ेल्‍लै बोलअ ईशू लै, "हाँ।"

ईशू बोलअ तिन्‍नां लै, "तैही ज़ुंण हर शास्त्री स्वर्ग राज़ो च़ेल्‍लअ आसा बणअ द, सह आसा तेऊ भढारी ज़िहअ ज़ुंण आपणैं भढारा का नऊंईं पराणीं च़िज़ा काढा।"

53 ज़ांऊं ईशू इना सोभी कथ्या खोज़ी मुक्‍कअ, तिधा का डेऊअ ईशू आपणैं घअरै नासरत नगरी लै। 54 तिधी पुजी लागअ यहूदीए सभागृहा एही शिक्षा दैंदअ कि तिंयां हुऐ रहैन संघा लागै तिंयां इहअ बोल्दै,

"एऊ ईंयां ज्ञैन अर महान शगतीए काम किधा का भेटै?" 55 अह कै युसुफ छदाणो शोहरू निं आथी? एऊए ईजा नाअं मरिअम निं आथी? एऊए कान्हैं भाऊ नाअं याकब अर युसुफ, शमौन अर यहूदा निं आथी? 56 एऊए सारी बैहणी कै हाम्हां मांझ़ै निं आथी? तै एऊ ईंयां सोभै गल्‍ला किधा का भेटी? 57 तिन्‍नैं च़ेती ऐहा गल्‍ले माल़ी अर तिन्‍नैं निं तेऊ दी विश्वास किअ।

पर ईशू बोलअ तिन्‍नां लै, "परमेशरे गूरो हआ होरी सोभी ज़ैगा अदर पर आपणैं देशै, रिश्तैदारा अर टबरा मांझ़ै निं तेऊओ अदर हंदअ।" 58 तिंयां निस्सै विश्वास करी अर ईशू निं तिधी किछ़ै बडै च़मत्कारे काम किऐ।