1 ✝यहूदा मुल्खे राज़ै ती बाबेल देशे गलामी निंईं दसुई साल लागी दी। तैहा साला बारा पोशै पुजअ मुंह सेटा भिई बिधातो समाद। 2 बिधाता बोलअ इहअ, "मणछा, तूह खोज़ मिसर देशे माहा राज़े बारै। तूह बोलै कि तेऊ अर सारै मिसर देशा भेटणीं सज़ा। 3 तूह खोज़ै तिन्‍नां लै कि हुंह तेरअ परमेशर बिधाता बोला तिन्‍नां लै इहअ, ‘तूह मिसर देशो माहा राज़अ आसा बडै मगर म्हाछ़ा ज़िहअ, ज़ुंण नील नदीए पाणीं जैंदरी आसा बेठअ द। तूह बोला इहअ, "नील नदी आसा मेरी अर अह आसा तंऐं आप्पै आप्पू लै बणाईं दी!" 4 पर मुंह लाणैं तेरी कुकल़ी कणिच़ू। नील नदीए म्हाछ़ली दैणअ मुंह तेरी खाला दी पिड्डी शाचणैं। तेखअ काढणअ मुंह नील नदीए पाणीं जैंदरा का तेरी खाला दी शाची दी म्हाछ़ली संघी बागै। 5 मुंह शोटणअ तूह तिन्‍नां सोभी म्हाछ़ली संघी नील नदीए पाणीं मांझ़ा का काढी रेगीस्तानै। तूह हणअ प्राल़ी ज़ैगा धरनीं पल़अ द। ताह उझै च़कणै आल़अ निं कोह हणअ अर नां तूह कहा दाबी डाहणअ। तूह खाणअ तेथ काअ-गरली अर बणें ज़ीबा। 6 तेखअ जाणअ मिसर देशे सोभी लोगा का थोघ लागी कि हुंह आसा बिधाता।

"‘इज़राईली आसा तेरै आसरै रहै दै कि तूह तिन्‍नों साथ दैए, पर तूह थिअ भींन नगाल़ै ज़िहअ।✝ 7 ज़ांऊं तिन्‍नैं ताह दी धख नील़ लाअ, तूह चुटअ पोर्ही अर तिन्‍नें कान्हा पेठी तेरी झ़र्हा अर तिन्‍नों शाचअ चल़ैट। 8 ऐबै बोला हुंह मालक बिधाता कि मुंह छ़ाडणअ मिसर देशो राज़अ ताह संघै जुधा लै। तेऊ पाणै तेरै देशे सोभ मणछ अर डागै-चैणैं तलबारा करै मारी। 9 सारी मिसर देशे ज़ैगा पल़णीं उज़र अर शुन्‍नीं। तेखअ लागणअ ताखा थोघ कि हुंह आसा बिधाता।

"‘तूह बोला इहअ, "नील नदी आसा मेरी अर अह आसा तंऐं आप्पै आप्पू लै बणाईं दी!" 10 तैही हुअ हुंह तेरअ अर नील नदीओ दुशमण। मुंह करनी सारै मिसर देशे ज़ैगा उज़र अर शुन्‍नीं। उतरा बाखा मिगदोल नगरी उंधै दखणा बाखा सबेन नगरी अर कूश देश तैणीं रहणीं सोभी नगरी दी सिधी पात्थरे डिंगरी। 11 तेस्सी बाती कोह मणछ अर डागै-चैणैं हांढणै-फिरनैं आथी। तेथ निं च़ाल़्ही साला तैणीं कोह बस्सणअ। 12 मुंह करनअ मिसर देश संसारै सोभी का खास्सअ उज़र अर शुन्‍नअ। मिसर देशे नगरी रहणीं च़ाल़्ही साला तैणीं सोभी का खास्सी उज़र अर शुन्‍नीं पल़ी। मिसर देशे लोग छिंगणैं मुंह देशा-देशा जैंदरी।’"

13 परमेशर बिधाता बोलअ इहअ, "च़ाल़्ही साला बाद पजैल़णैं मुंह मिसर देशे लोग तिन्‍नें आपणीं ज़ैगा बापस। तिंयां आणनैं मुंह तिन्‍नां देशा जैंदरा का फरेऊई ज़ेथ मंऐं तिंयां छिंगी तै डाहै दै। 14 तिन्‍नां दैणअ मुंह मिसर देशै दखणा बाखा पत्रोस बस्सणै ज़ुंण तिन्‍नें ज़ल्म-भूमी आसा। तिधी हणैं तिंयां एक कमज़ोर देश। 15 मिसर देश हणअ सोभी देशा का कमज़ोर देश। तेखअ निं तिन्‍नां कधि एतरअ बल हणअ कि तिंयां होरी देशा प्रैंदै राज़ करी सके। तिन्‍नों ज़ोर करनअ मुंह पठ खतम कि तिंयां कहा होरी देशा कधि भिई गलाम नां बणाईं सके। 16 इज़राईल बी निं तेखअ कधि तिन्‍नें साथ दैणें आसरै रहणअ। मिसरीए दशा भाल़ी फिरनअ इज़राईली बी आपणअ पाप आद कि मिसर देशे आसरै रहणअ ती तिन्‍नें बडी भारी बडी भूल। तेखअ लागणअ इज़राईली का थोघ कि हुंह आसा तिन्‍नों परमेशर बिधाता।"

17 यहूदा मुल्खे राज़ै जेहोकीना बाबेल देशा लै कैद करी निंईं गई ती छब्बी साला बिति। तेखअ बोलअ नऊंऐं संबते धैल़ी बिधाता मुखा इहअ, 18 "मणछा, बाबेल देशे राज़ै नबूकदनेसरै हेरअ आपणीं सैना छ़ाडी सोर नगरी संघै घणअ जुध छ़ेल़ी। तेऊ दैनअ तिन्‍नां लै कामों बोझ़ खास्सअ। खास्सै गर्कै बोझ़ै च़की लागअ तिन्‍नें मुंडै इहअ घश कि तिंयां हुऐ ताम्बल़ै अर तिन्‍नें कान्हा आसा पठ खल्होशुई दी। एतरी बेठ खटी अर दाह ज़िरी बी निं तिन्‍नां सूर नगरी का किछ़ भेटअ। 19 ऐबै बोला हुंह परमेशर बिधाता इहअ, ‘मिसर देशे ज़ैगा लाई मंऐं बाबेल देशे राज़ै नबूकदनेसरा लै दैई। तिन्‍नें किम्मती च़िज़ा अर धन-माया दी करनअ तेऊ कबज़अ संघा निंणीं लुटी करै बाबेल देशा लै। सह हणीं तेखअ तेऊए सैना लै मज़दूरी। 20 बाबेल देशे राज़ै अर तेऊए सैना सूर नगरी लै सज़ा दैई ज़ुंण मेरी च़ाकरी किई, तेते मज़दूरी दैनी मंऐं तेऊ लै मिसर देश। अह गल्‍ल बोली मंऐं तेरै परमेशर बिधाता।

21 "‘ज़ेभै ईंयां गल्‍ला होए, तेभै बणाणअं मुंह इज़राईल देश भिई बलबान। एजकेल, तेभै दैणअ मुंह ताखा तिन्‍नां लै समाद। तिन्‍नां सोभी रहणअ ताह शूणैं लागी कि तूह किज़ै बोला। तेखअ जाणअ तिन्‍नां का थोघ लागी कि हुंह आसा बिधाता।’"