एजकेल 33

एजकेल डाहअ बिधाता पहरी लाई

1 बिधाता खोज़अ मुखा समाद, तेऊ बोलअ भिई इहअ, 2 "मणछा, तूह खोज़ तेरै आपणैं भाई-बंध इज़राईली का मेरअ समाद। तिन्‍नां लै बोल तूह इहअ, ‘ज़ेभै हुंह कहा देशा दी तिन्‍नें दुशमण सैना जुधा लै छ़ाडा, तेभै छ़ांटा तेऊ देशे लोग आप्पू मांझ़ा का एक मणछ ज़ुंण तेऊ देशो पहरअ करे। 3 ज़ांऊं सह पहरी दुशमणे सैना जुधा लै एछदी भाल़ा, सह दैआ लोगा लै ज़ोरै नर्शिंगअ बाज़ी चतैनगी। 4 ज़ै नर्शिंगे चतैनगी शूणीं बी कुंण मणछ चतैन निं होए, सह पाणअ दुशमणा एछी तलबारा करै मारी। तेऊए मौतो ज़िम्मैंबार हणअ सह आप्पै। 5 तेऊए मौत हणीं तेऊए आपणीं गलती करै। किल्हैकि तेऊ निं चतैनगी दी धैन ई दैनअ। ज़ै तेऊ धैन दैनअ हंदअ, तै सका त सह मरनै का बच़ी।✝33:5 मोत्त. 27:25 6 पर ज़ै इहअ होए कि सह पहरी दुशमणे सैना जुधा लै एछदी भाल़े अर नर्शिंगै बाज़ी लोगा लै चतैनगी नांईं दैए! तेखअ ज़ै दुशमणे सैना एछी लोगा मारी पाए। तिंयां मणछ, मरनै तिन्‍नें पापा पिछ़ू पर तिन्‍नां मारनैओ दोश लागणअ तेऊ पहरी लै। किल्हैकि तेऊ निं तिन्‍नां लै तैहा आफ़ता का बच़णा लै चतैनगी दैनी।’

7 "मणछा, ऐबै लाअ मंऐं तूह इज़राईले आद-लुआदे फाज़त करनै आल़अ पहरी डाही। तूह दैऐ मेरी गल्‍ला खोज़ी तिन्‍नां लै चतैनगी। 8 ज़ै हुंह ताखा कहा कदुष्ट मणछे बारै इहअ खोज़ूं कि तिंयां मरनै, तिन्‍नां लै लऐ तूह चतैनगी दैई ताकि तिंयां पाप करनै का पिछ़ू हटे अर आपणीं ज़िन्दगी बच़ाऊई सके। ज़ै तूह तिन्‍नां का नांईं खोज़े, तिंयां; मरनै तिन्‍नें पापा पिछ़ू पर तिन्‍नें मौतो दोश लागणअ ताल्है। 9 ज़ै तूह कदुष्ट मणछा लै चतैनगी दैए अर सह पाप करनै का पिछ़ू नांईं हटे, तै मरनै तिंयां तिन्‍नें पापा पिछ़ू अर तेखअ निं तेरअ तेता लै किछ़ै दोश आथी।"

बिधाता च़ाहा पापी मणछा बी बच़ाऊंणअ

10 बिधाता बोलअ मुल्है भिई इहअ, "मणछा, इज़राईले आद-लुआदा का खोज़ तूह इहअ कि तम्हैं बोला इहअ, ‘हाम्हां प्रैंदै आसा म्हारै पाप अर ज़ुल्म करनैओ बेघै बडअ बोझ़अ। तेता बुल़्ही-बुल़्ही च़ाल्‍लै ऐबै हाम्हैं मरी। हाम्हैं किहअ करै बच़णैं?’ 11 तूह बोलै तिन्‍नां लै इहअ, ‘हुंह थारअ परमेशर बिधाता बोला मेरै सोह! हुंह निं कदुष्ट मणछा मरना लै बी खुश हंदअ। हुंह हआ तेता लै खुश ज़ेभै कुंण कदुष्ट मणछ पाप करनअ छ़ाडी मरनै का बच़ा। इज़राईलीओ, बूरअ करनअ छ़ाडा, तम्हैं किल्है आसा मरनअ हिछ़अ द?’

12 "मणछा, ऐबै खोज़ तूह तेरै आपणैं लोगा का इहअ कि, ज़ै कुंण भलअ मणछ बी पाप करे, तेऊ लै बी दैणीं मुंह सज़ा। तेऊए पैहलै किऐ दै भलै काम निं तेऊ बच़ाऊई सकदै। ज़ै कुंण कदुष्ट मणछ बूरै काम करनै छ़ाडे, तै निं हुंह तेऊ लै सज़ा दैंदअ। ज़ै धर्मीं मणछ पाप करे, तेऊ निं तेऊए धर्में काम मरनै का बच़ाऊई सकदै। 13 ज़ै हुंह धर्मीं मणछा लै बोलूं कि तूह रहणअ ज़िऊंदअ, तेखअ बी ज़ै सह आपणैं पैहलै किऐ दै भलै कामें आसरै रही आजू पाप करे, तेखअ निं मुंह तेऊए तिंयां गल्‍ला आद रहणीं कि तेऊ केतरै भलै काम किऐ, तेऊ भेटणीं तेखअ तेऊए पापा पिछ़ू मौत। 14 ज़ै हुंह कहा बूरै मणछा लै बोलूं कि सह मरनअ, पर ज़ै सह पाप करनअ छ़ाडे अर भलै अर धर्मीं काम करे, 15 ज़िहअ कि सह लोगो बांधअ बापस दैए, लोगा का लुटी दी च़िज़ा तिन्‍नां लै बापस दैए, सह पाप करनै छ़ाडे, मेरै बधाने साबै ज़िन्दगी ज़िऊए, तै निं सह मरदअ आथी सह बच़णअ ज़िऊंदअ। 16 तै करनै मुंह तेऊए पाप माफ ज़ुंण तेऊ किऐ तै, सह रहणअ तेऊए भलै अर धर्मीं कामां करै ज़िऊंदअ।

17 "तैबी बोला इज़राईली परज़ा मुल्है इहअ, ‘मालक ज़हा बाता निंयां, तेथ निं नसाफ ई आथी!’ पर असली दी निं तिन्‍नें बात ठीक आथी। 18 ज़ै कुंण धर्मीं मणछ पाप करदअ लागे, सह मरनअ तिन्‍नां पाप करनै पिछ़ू। 19 ज़ै कदुष्ट मणछ पाप करनअ छ़ाडे अर सह भलै काम करे, तेता करै बच़ाऊंणी तेऊ आपणीं ज़िन्दगी। 20 तज़ी बी हआ तम्हैं इज़राईले आद-लुआद इहअ बोल्दै लागै दै, ‘मालक ज़हा बाता निंयां, तेथ निं नसाफ ई आथी!’ मुंह करनअ थारै कर्मे साबै थारअ नसाफ।"

एरुशलेम नगरीए बनाशे खबर

21 यहूदा मुल्खे राज़ै जेहोकीना ती बाबेल देशे गलामी दी निंईं बार्हूई साल लागी दी। तैहा साला पांज़ा पोशै आअ एरुशलेम नगरी का एक मणछ मुंह सेटा लै। सह निखल़अ किहअ करै तेऊ जुधा का बच़ी। मुंह सेटा पुजी खोज़अ तेऊ इहअ, "राज़धानी एरुशलेम हेरअ दुशमणै कबज़अ करी।"✝33:21 2 राज़. 25:3-10; जेर. 39:2-8; 52:4-14 22 ज़हा धैल़ी सह एरुशलेम नगरी का बच़ी आअ द मणछ मुंह सेटा पुजअ, तेता का पैहलकै धैल़ै उडै च़ेतअ मंऐं इहअ कि बिधाता किअ हुंह काबू। ज़ांऊं दुजै धैल़ै सह मणछ मुंह सेटा पुजअ, बिधाता किअ हुंह काल्‍लै का भिई बेज़अ।

लोगे पाप

23 बिधाता बोलअ मुल्है इहअ, 24 "मणछा, ज़ुंण लोग ऐबै इज़राईल देशै ढूल़ी-पल़ी दी नगरी दी आसा रहंदै लागै दै, तिंयां आसा इहअ बोल्दै लागै दै, ‘आबराम थिअ एक्‍कै मणछ, तज़ी बी दैनअ अह सारअ कनान देश तेऊ लै। हाम्हैं आसा इधी एतरै खास्सै पै, ऐबै आसा एऊ सारै देशे मालक सिधै हाम्हैं ई।’

25 "तूह लअ तिन्‍नां का खोज़ी कि हुंह परमेशर बिधाता बोला तिन्‍नां लै इहअ, ‘तम्हैं खाआ लोधल़ै संघी शिखा, तम्हैं पूज़ा मुहुर्ती, तम्हैं हत्या बी करा! तज़ी बी तम्हैं इहअ सोठा कि तम्हैं हणैं ऐहा सारी ज़ैगा गिम्मी एते मालक? 26 तम्हैं आसा आपणीं तलबारे आसरै, थारै आसा हर काम च़िल़्हखरै, तम्हैं सोभ आसा होरीए बेटल़ी संघै सुत्ती छ़ोतलै! एही किज़ै च़ीज़ आसा तम्हां दी कि तम्हैं ऐहा ज़ैगे मालक हणें बारै सोठे?’

27 "तूह लअ तिन्‍नां का खोज़ी कि हुंह परमेशर बिधाता बोला तिन्‍नां लै इहअ, ‘मंऐं डाहअ आपणैं सोह खाई बोली कि इज़राईल देशै ढूल़ी-पल़ी दी नगरी ज़ुंण बस्सै दै आसा, तिंयां पाणै मारी। ज़ुंण उज़र रेगीस्तानै होए तिंयां खाणैं बणें ज़ीबा। ज़ुंण धारा अर डुआरै होए लुक्‍की रहै दै, तिंयां मरनै नबिज़री बमारी करै। 28 मुंह करनअ सह देश उज़र अर पठ शुन्‍नअ। तिन्‍नें बलो घमंड करनअ मुंह इहअ करै खतम। इज़राईल देशे धारा हणीं एही उज़र कि तेस्सी बाती निं कोह एछणअ-डेऊणअ। 29 ज़ेभै मुंह लोगा लै तिन्‍नें पापे सज़ा दैणीं अर सारअ देश उज़र करनअ, तेखअ लागणअ तिन्‍नां का थोघ कि हुंह आसा बिधाता।’"

गूरे समादो नतिज़अ

30 बिधाता बोलअ इहअ, "मणछा, रही तेरी गल्‍ल, ज़ुंण इज़राईली इधी ताह संघै बाबेल देशै आसा, तिंयां हआ तेरै बारै गल्‍ला करदै लागै दै ज़ेभै तिंयां नगरीए दुआली नेल़ या आपणैं घअरे दुआरा आजू आप्पू मांझ़ै भेटा। ईंयां बोला आप्पू मांझ़ै इहअ, ‘च़ाल्‍ला हैनूं हाम्हां शुणनअ कि बिधाता तेऊ गूरा का हाम्हां लै ऐबै किज़ै समाद आसा दैनअ द।’ 31 ईंयां मेरी परज़ा करा ताह सेटा झाल़अ कि ज़ुंण तूह खोज़ा तेता शुणें, पर ज़िहअ तूह तिन्‍नां का खोज़ा, तिहअ निं तिंयां करदै आथी! गल्‍ला, करा ईंयां एही कि ईंयां झ़ूरा मुल्है ई! पर असली दी झ़ूरा ईंयां लोगा ठगणा लै कि तिन्‍नें च़िज़ा इना भेटे! 32 असली दी निं ईंयां ताह किछ़ समझ़दै, ताह समझ़ा ईंयां झ़ूरीए गिहा बोल़णैं आल़अ घैरी। ईंयां शूणां तेरी सारी गल्‍ला पर मंदै निं तेता मांझ़ै एक बी। 33 पर ज़ेभै तंऐं खोज़ी दी गल्‍ला तेही ई निभणी, ज़ांऊं ईंयां तिन्‍नां गल्‍ला तेही ई हंदी भाल़े, तेखअ लागणअ मेरी परज़ा का थोघ कि तिन्‍नां मांझ़ै त तूह बिधातो गूर।"