1 ज़ांऊं तम्हां परच़ी पाई हर गोत्रे हेस्सै बांडी हेरनी, एक हेस्सअ डाहै तेथ मांझ़ै बिधाता लै ज़ुदअ। अह ज़ैगा लोल़ी डाहूल़ी करै नापी पज़ाह हज़ार हाथ लाम्मी अर बिह हज़ार हाथ बिरली रही। अह सारी ज़ैगा हणीं पबित्र। 2 ऐहा ज़ैगा डाहै बिधाते भबना लै पांज़ शौ डाहूल़ी* लाम्मी अर पांज़ शौ डाहूल़ी बिरली ज़ैगा अर तैहा ज़ैगा बागै लोल़ी पज़ाह-पज़ाह डाहूल़ी ज़ैगा होर एही रही। 3 पबित्र ज़ैगा मांझ़ै करै तम्हैं पच्‍ची हज़ार डाहूल़ी लाम्मी अर दस हज़ार हाथ बिरली ज़ैगा ज़ुदी। ऐहा ज़ुदी किई दी ज़ैगा दी बणाऐं बिधातो पबित्र भबन। सह भबने ज़ैगा हणीं खास पबित्र। 4 ऐहा पबित्र ज़ैगा दी अह आधअ हेस्सअ हणअ बिधाते भबनै पबित्र अर खास पबित्र ज़ैगा च़ाकरी करनै आल़ै प्रोहता लै अर अह ज़ैगा हणीं सिधी बिधाते भबन अर तिन्‍नां प्रोहते घअरा बणाणां लै। 5 पबित्र ज़ैगो आधअ हेस्सअ ज़ुंण पच्‍ची हज़ार डाहूल़ी लाम्मअ अर दस हज़ार डाहूल़ी बिरलअ बच़अ, सह हणअ होरी लेबी गोत्रा आल़ै लै ज़ुंण बिधाते भबनो होर काम-काज़ सभाल़ा। एथ हणीं सिधी तिन्‍नें नगरी।

6 बिधाता लै डाही दी पबित्र ज़ैगा पिछ़ू डाहै तम्हैं नगरी बणाणां लै पच्‍ची हज़ार हाथ लाम्मी अर दस हज़ार हाथ बिरली ज़ैगा होर। अह हेस्सअ हणअ पबित्र ज़ैगा का लाऊआ। ऐहा ज़ैगा सका इज़राईली मांझ़ै कज़ोहै बस्सी।

7 इज़राईली प्रैंदै राज़ करनै आल़ै लै हणैं बिधाता ज़ुदी डाही दी पबित्र ज़ैगा दोहरी बाखा नगरी बणाणां लै दूई हेस्सै। एक पुर्बा बाखा अर एक पछ़म दिशा बाखा। पुर्बा बाखे ज़ैगा हणीं देशे पुर्बा बाखे सिऊंआं तैणीं अर पछ़मा बाखे ज़ैगा हणीं समुंदरै तैणीं। डाहूल़ी करै नापी डाहणैं ईंयां दुहै हेस्सै तेतरै ई ज़ेतरै-ज़ेतरै इज़राईले होरी गोत्रे बांडै आऐ। 8 अह एतरअ हेस्सअ हणअ राज़ै लै ज़हा इज़राईला प्रैंदै राज़ करनअ। ताकि सह बादा का परज़ा हंतदअ नांईं लागे। पर इज़राईली सोभी टोली लै दैऐ तिन्‍नें गोत्रे साबै बांडी।

9 मालक बिधाता बोलअ इहअ, "इज़राईला प्रैंदै राज़ करनै आल़ै राज़ैओ, तम्हैं किअ बतेर्हअ पाप! ऐबै पाआ ज़ुल्म करने छ़ाड़! परज़ा हंतदै निं ऐबै लागा, नां मेरी परज़े ज़ैगा-ज़िम्मीं लुटदै लागा। ऐबै करा धर्म अर नसाफ डाही राज़। अह गल्‍ल डाही मंऐं मालक बिधाता बोली।

10 "नाप-तोल करना लै निं बाटी तराकल़ा दी हेर-फेर करी।✝

11 "थारी नाप-तोल करने बाटी* अर तराकल़ी लोल़ी बराबर निखल़ी। थारी बाटी अर पाथअ* लोल़ी नापी करै बराबर निखल़अ।

थारै पज़ाह पाथै दी लोल़ी पूरअ दूई खार हुअ।

अर पज़ाह बाटीओ तोल बी लोल़ी पूरअ दूई खार निखल़अ।

12 "थारअ नाप तोल लोल़ी इहअ हुअ:

एक च़ंदीओ सिक्‍कअ* लोल़ी पूरअ बारा गराम हुअ,

शाठी च़ंदीए सिक्‍कैओ बज़न लोल़ी पणअ सेर* हुअ।

13 "ज़ेभै तम्हैं मेरै भबना लै भैंट आणे, तेता आणै इहअ करै तोली:

दूई खार* कणका का आणै एक पाथअ भाग।

दूई खार ज़ौआ का बी आणै एक पाथअ भाग।

14 "जैतूने तेलो भाग दैणैंओ हणअ इहअ सूल:

दूई शौ पच्‍ची बाटी तेला का आणै तम्हैं दूई बाटी अर आध सेर तेल।

अह हणअ पांज़ खारा बराबर।

15 "इज़राईले हर टोली लोल़ी आपणीं-आपणीं हेल़्ही मांझ़ा का दूई शौ भेडा मांझ़ै एक भेड़ आणी। अह हणअ थारै पापो प्राश्त करना लै नाज़ बल़ीदान अर मेल़-ज़ोल़ो बल़ीदान।" परमेशर बिधाता बोलअ इहअ,

16 "एऊ ई साबै दैऐ सारी परज़ा इज़राईल देशे राज़ै लै भैंट। 17 इज़राईल देशे राज़े हणीं अह ज़िम्मैंबारी कि सह तिह, थैर, पुनूंईए अर बशैघे धैल़ी नाज़ बल़ी, हूम बल़ी अर अर्घै दैणा लै दाखे रसो इंतज़ाम करे। सह दैऐ इज़राईली परज़ा बाखा तिन्‍नें पापो प्राश्त करना लै पाप बल़ी, नाज़ बल़ी अर हूम बल़ी अर मेल़-ज़ोल़ो बल़ीदान।"

18 परमेशर बिधाता बोलअ इहअ, साज़ै च़ैत्रै काटै तम्हैं एक बाछ़ू ज़ेथ किछ़ै खोट निं होए संघा करै मुंह बिधाते भबने शुधी। 19 अह हणअ थारै पापो प्राश्त करना लै पाप बल़ीदान। तेतो धख लोधल़अ च़कै प्रोहत संघा लाऐ प्रऊल़ीए द्रींड, बेदीए शींगा दी अर भितरी खास पबित्र ज़ैगे दुआरे द्रींडा दी। 20 साता च़ैत्रै बी करै तम्हैं इहअ ई। अह पापो प्राश्त करना लै बल़ीदान हणीं तिन्‍नां आम मणछा लै ज़ुंणीं भूला-बिस्सरा पाप किअ। एऊ साबै करै तम्हैं मुंह बिधाते भबने शुधी।

21 "च़ौदा च़ैत्रा पोर्ही मनाऊंऐं तम्हैं ऊवार्णैओ थैर साता धैल़ी तैणीं अर तिन्‍नां साता धैल़ै तैणीं निं तम्हैं सज़ेल़ी रोटी खाई।✝ 22 इज़राईला प्रैंदै राज़ करनै आल़अ राज़अ आणै एऊ थैरे पैहली धैल़ी आपणैं अर सारी परज़े पापे प्राश्त करना लै एक बाछ़ू पाप बल़ीदान करना लै। 23 सह आणै एऊ थैरे साता धैल़ी तैणीं मुंह बिधाता लै हूम बल़ीदान करना साता धैल़ी तैणीं धैल़ एक-एक बाछ़ू, एक-एक गाभू ज़ेथ किछ़ै खोट निं होए। हर धैल़ै काटै पाप बल़ी लै एक बाकरअ साता धैल़ी तैणीं। 24 बल़ीदान करने हर बाछ़ू अर गाभू संघै आणै पांज़ पाथै नाज़ अर साढै चअन बाटी तेल।

25 "छ़ानींओ थैर, ज़ेता पंद्रा शऊजा पोर्ही मनाऊंआं, राज़अ दैऐ साता धैल़ी तैणीं एही ई पापे प्राश्त करना लै पाप बल़ी, हूम बल़ी अर नाज़ बल़ी। बल़ीदाना संघै नाज़ अर तेल दैणैंओ बी आसा अह ई सूल।"✝