1 हाम्हां गई ती गलामी दी डेऊई छ़हुई साल लागी। तैहा साला पांज़ा भदरै तै गलामी दी निंयैं दै यहूदा मुल्खे सैणैं मुंह संघै बाबेल देशै मेरै घअरै बेठै दै। तिधी किअ हुंह हेरा-हेरी मेरै मालक बिधाते शगती आपणैं बशै। 2 मंऐं भाल़अ उझै अर मुखा शुझुअ तिधी धैनै किज़ै मणछा ज़िहअ। कुछी उंधै शुझुअ मुखा सह आगी ज़िहअ अर कुछी उझै थिअ सह बान्‍नी लाऐ दै कांस्सै ज़िहअ च़मकदअ लागअ द।✝ 3 तेऊ किई आपणीं बाह मुंह बाखा ओर्ही अर सह ज़ाण्हुंअ मुखा इहअ कि तेऊ ढाकअ हुंह मेरै मुंडे शराल़ा का। तेखअ ज़ाण्हुंअ मुखा धैनै-सुपनै इहअ कि बिधाते आत्मां च़कअ हुंह उझै बागरी दी संघा निंयं हुंह एरुशलेम नगरी लै। हुंह पजैल़अ बिधाते भबनै उतरा बाखा प्रऊल़ी भितरी खोल़ै, तिधी शुझुई मुखा एक मुहुर्ती ज़ुंण बिधाता लै रोश्श ठैऊआ।

4 तिधी शुझुअ मुखा इज़राईले परमेशर बिधातो तिहअ ई झ़ामण ज़िहअ मुखा कबार दरैऊए बाढै शुझुअ त।✝ 5 बिधाता बोलअ मुल्है इहअ, "मणछा, उतर दिशा बाखा भाल़।" हुंह लागअ भाल़अ, तिधी शुझुई मुखा बेदी नेल़ भितरी एछणें प्रऊल़ी सेटा सह मुहुर्ती ज़ुंण बिधाता लै रोश्श ठैऊआ।

6 परमेशरै बोलअ मुल्है इहअ, "मणछा, तंऐं भाल़अ बी कि ईंयां किज़ै करा! इज़राईली भाल़ केही च़िल़्हखरी गल्‍ला करदै आसा लागै दै! ताकि हुंह मेरी पबित्र ज़ैगा का पोर्ही दूर डेऊं! पर ताह भाल़णैं अज़ी इने एता का बी बडै-बडै च़िल़्हखरै काम।"

7 बिधाता निंयं हुंह भबने ताटीए बाघली प्रऊल़ी सेटा, तिधी शुझुअ मुखा दुआली दी एक जोहल़। 8 तेऊ बोलअ मुल्है, "मणछा, इधा का ढोल़ ऐहा दुआली पोर्ही।" मंऐं ढोल़ी तेऊ जोहल़ा बाती दुआल उंधै अर तिधी शुझुअ मुखा एक दुआर। 9 तेखअ बोलअ तेऊ मुल्है, "भितरा लै डेऊ संघा भाल़ कि तिंयां एथ किहै कदुष्ट अर च़िल़्हखरै कामां करदै आसा लागै दै।" 10 हुंह डेऊअ भितरा लै संघा लागअ भाल़अ। तेथ भाल़अ मंऐं कि दुआलीए भित्ती दी आसा कई च़िज़े खेल़्तरा पाई दी। तेथ तै शपैल़, तिंयां पशू ज़ुंण बधाने साबै छ़ोतलै आसा अर होर हांढणै-फिरनैं आल़ै ज़ीब ज़ेते इज़राईली पूज़ा करा तै। 11 तेखअ शुझुअ मुखा इहअ कि तिधी आसा इज़राईलीए सत्तर सैणैं। शापानो शोहरू जजनिया बी थिअ तिन्‍नां संघै। तिन्‍नैं सोभी तै धनैरै ढाकै दै अर तेता का थिअ धूँ लागअ द। 12 परमेशरै पुछ़अ मुखा इहअ, "मणछा, तंऐं भाल़अ बी कि इज़राईली सैणैं एथ न्हैरै किहै कदुष्ट कामां करदै आसा लागै दै! ईंयां सोभ आसा इधी ऐहा खुडी आपणैं-आपणैं देअए खेल़ी दी मुहुर्तीए पूज़ा करदै लागै दै। ईंयां बोला आप्पू मांझ़ै इहअ, ‘बिधाता निं हाम्हां भाल़अ आथी लागअ द! सह आसा म्हारै देशा छ़ाडी डेऊई गअ द।’"

13 बिधाता बोलअ मुल्है इहअ, "अह ता हुअ, ताह भाल़णैं आजू ईंयां एता का बी खास्सै च़िल़्हखरै कामां करदै।" 14 तेऊ निंयं हुंह तेखअ बिधाते भबने उतरा बाखे प्रऊल़ी सेटा लै। तिधी शुझुई मुखा बेटल़ी बेठी दी, तिंयां थिई तमूज देअए मरना लै लेरा लांदी लागी दी।

15 तेऊ बोलअ मुल्है इहअ, "मणछा, तंऐं भाल़अ कि ईंयां किज़ै करा! अह ता हुअ, ताह भाल़णीं अज़ी एता का बी खास्सी च़िल़्हखरी च़िज़ा।" 16 बिधाता निंयं हुंह भबना भितरे ताटी लै। तिधी शुझुऐ मुखा पच्‍ची ज़ण्हैं खास पबित्र ज़ैगे दुआरा अर बेदी मांझ़ै खल़्हुऐ दै। तिंयां तै खास पबित्र ज़ैगा बाखा पिठ अर पुर्बा बाखा मुंह करी उंधै उटै पल़ी सुरज़े पूज़ा करदै लागै दै!

17 परमेशरै बोलअ मुल्है इहअ, "मणछा, तंऐं भाल़अ कि ईंयां किज़ै करा? ईंयां यहूदा मुल्खे मणछ आसा इधी मेरी पबित्र ज़ैगा इहै च़िल़्हखरै कामां करदै लागै दै! अह आसा बेघै कदुष्ट काम! इहअ करै लाअ इनै सारै देशै पाप अर ज़ुल्म छिंगी। ईंयां आसा मुल्है कबल्‍लै होर बी रोश्श ठैऊंदै लागै दै। इना भाल़! ईंयां च़ाहा किहअ नां किहअ करै मेरी बेइज़ती ई करनी! 18 इना लै दैणीं मुंह एही सज़ा कि इना प्रैंदै काढणअ मुंह आपणअ सारअ रोश्श। ईंयां निं मुंह ज़िऊंदै छ़ाडणैं, इना लै निं मुंह ज़ाथी धख झींण बी करनी। इना लाणीं ज़ोरै-ज़ोरै मुल्है हाक्‍का-पकारा पर हुंह निं इने शूणीं गअ।"