एजकेल 20

इज़राईली रहै अज़ी बी द्रोह करदै लागी

1 हाम्हां गई ती बाबेल देशे गलामी दी सातुई साल लागी। तैहा साला दसा शाऊंणै आऐ इज़राईली सैणैं मुंह सेटा लै। तिंयां तै मुंह सेटा बिधाता पुछ़दै आऐ दै कि हुंह तिन्‍नां का खोज़े कि बिधाता किज़ै च़ाहा। तिंयां बेठै मुंह सेटा धरनीं। 2 तेखअ दैनअ बिधाता मुखा समाद, 3 तेऊ बोलअ इहअ, "मणछा, इना इज़राईली सैणैं का खोज़ इहअ कि हुंह मालक बिधाता बोला तिन्‍नां लै इहअ, ‘तम्हैं आसा ऐहा गल्‍ला पुछ़दै आऐ दै कि हुंह तम्हां लै किज़ै च़ाहा? हुंह बोला तम्हां लै आपणैं सोह कि मुंह निं तम्हां का किछ़ खोज़णअ कि हुंह तम्हां लै किज़ै च़ाहा। अह गल्‍ल डाही मंऐं मालक बिधाता बोली।

4 "‘मणछा, ऐबै कर तूह इनो नसाफ! तूह खोज़ ऐबै आप्पै कि कहा दी आसा खोट! तूह लअ इना का खोज़ी कि इने दादै-बाबै किहै-किहै च़िल़्हखरै काम किऐ। 5 तूह दै इना का खोज़ी कि हुंह इना लै किज़ै बोला। ज़धू मंऐं इज़राईल आप्पू लै छ़ांटअ, तधू दैनी ती मंऐं याकबे आद-लुआदा लै ज़बान। मिसर देशै हेरअ त मंऐं इना का रहैऊई कि हुंह कुंण आसा अर मंऐं बोलअ त इना लै तधू कि हुंह आसा थारअ परमेशर बिधाता।✝20:5 लुआ. 6:2-8 6 तधू दैनी ती मंऐं ज़बान, "इज़राईलीओ, मंऐं आसा तम्हां लै एक देश छ़ांटी डाहअ द, सह आसा संसारै सोभी देशा का बधिया। तेते ज़ैगा आसा खास्सी रज़दी-पज़दी। मिसर देशे गलामी का आज़ाद करी पजैल़णैं मुंह तम्हैं तेऊ देशै।" 7 मंऐं बोलअ त तिन्‍नां लै इहअ बी, "थारअ दिल आसा मिसर देशे च़िल़्हखरी मुहुर्ती दी लागअ द। इना मुहुर्ती शोटा पोर्ही, एता करै निं आप्पू लै छ़ोत लाई किल्हैकि थारअ परमेशर बिधाता आसा हुंह।" 8 पर तिन्‍नैं किअ मुल्है द्रोह, तिन्‍नैं निं मेरी गल्‍ल शूणीं। तिन्‍नैं निं कोही बी मिसर देशे तिंयां च़िल़्हखरी मुहुर्ती आप्पू का दूर किई अर नां तेते पूज़ा करनी छ़ाडी। तिन्‍नों दिल त तेथ लागअ द। तेखअ ती मंऐं एही डाही दी कि तिन्‍नां लै दैणअ मुंह तिधी मिसर देशै ई आपणअ रोश्श तरैल़ी। 9 पर मंऐं निं इहअ किअ ताकि होरी देशे लोगा जैंदरी मेरै नाअं नकदरअ नां होए। मंऐं ती इज़राईली लै ज़बान दैनी दी कि मुंह करनै तिंयां मिसर देशे गलामी का आज़ाद। इज़राईली फेर रहणैं आल़ै सोभी देशा का थिअ ऐहा गल्‍लो थोघ।

10 "‘तैही आणै मंऐं तिंयां मिसर देशे गलामी का काढी संघा पजैल़ै रेगीस्तानै। 11 मंऐं खोज़अ तिन्‍नां का आपणअ बधान अर बिधी ज़ेते साबै रही मणछ ज़िऊंदै रहा।✝20:11 लेब. 18:5 12 मंऐं डाही तिन्‍नां लै बशैघे धैल़ी बी ज़ुंण तिन्‍नां जैंदरी मेरी ऐहा गल्‍लो नछ़ैण आसा कि हुंह बिधाता करा तिन्‍नां पबित्र।✝20:12 लुआ. 31:13-17 13 पर ज़धू इज़राईली रेगीस्तानै आसा तै, तिन्‍नैं किअ तधू मुल्है द्रोह। तिन्‍नैं निं मेरअ बधान अर बिधी मनी ज़ेता करै मणछा ज़िन्दगी भेटा। तिन्‍नैं लाई मेरी बशैघे धैल़ी छ़ोत। तेखअ हेरअ त मंऐं सोठी कि मुंह काढणअ इना लै आपणअ सारअ रोश्श तेऊ ई रेगीस्तानै संघा करनै ईंयां पठ खतम। 14 पर मंऐं निं इहअ किअ, ताकि मेरअ नाअं तिन्‍नां देशा सम्हनै नकदरअ करनअ च़ाहंदअ त ज़हा नदरी मंऐं इज़राईली मिसर देशे गलामी का काढी आणै तै। 15 तेखअ खाऐ मंऐं सोह कि मुंह निं ईंयां तेऊ रज़दी-पज़दी ज़ैगा आल़ै देशै पजैल़णैं ज़ेते मंऐं इना लै ज़बान थिई दैनी दी कि मुंह दैणअ सह इना लै।✝20:15 गण. 14:26-35 16 किल्हैकि मेरै बधान अर बिधी मनणा लै हुधूऐ तिंयां! तिन्‍नैं समझ़ी मेरी बशैघे धैल़ी नकदरी। तेता छ़ाडी लागै तिंयां मुहुर्ती पूज़दै।

17 "‘पर तज़ी बी किई मंऐं तिन्‍नां लै झींण। मंऐं निं तिंयां तेऊ रेगीस्तानै पठी मारै आथी। 18 मंऐं दैनी तेथ तिन्‍नें ज़ुआन शोहरू लै चतैनगी, "ज़ेऊ रिती-रबाज़े साबै थारै दाद-बाब ज़िन्दगी ज़िऊई, तम्हैं निं तिहअ करी। ज़ुंण बिधी तिन्‍नैं आसा डाही दी, तेता निं मनी आथी। तिन्‍नें बणाईं दी मुहुर्ती पूज़ी करै निं आप्पू लै छ़ोत लाई। 19 हुंह आसा थारअ परमेशर बिधाता। तम्हैं ज़िऊऐ सिधी मेरै बधान अर बिधीए साबै ज़िन्दगी। 20 बशैघे धैल़ी मनै पबित्र धैल़ी, सह हणअ मेरी तम्हां संघै हुई दी करारो नछ़ैण। तै रहणीं तम्हां आद कि हुंह बिधाता आसा थारअ परमेशर।"

21 "‘पर तिन्‍नें लुआद बी हुऐ मुल्है द्रोही। तिन्‍नैं बी निं मेरअ बधान अर बिधी मनी ज़ुंण मणछा लै ज़िन्दगी दैआ। तिन्‍नैं बी समझ़ी मेरी बशैघे धैल़ी नकदरी। तेखअ सोठअ त मंऐं तिन्‍नां लै इहअ कि मुंह काढणअ इना लै आपणअ सारअ रोश्श तेऊ ई रेगीस्तानै संघा करनै ईंयां पठ खतम। 22 पर मंऐं निं इहअ किअ, ताकि मेरअ नाअं तिन्‍नां देशा सम्हनै नकदरअ करनअ च़ाहंदअ त ज़हा नदरी मंऐं इज़राईली मिसर देशे गलामी का काढी आणै तै। 23 रेगीस्तानै दैनी ती मंऐं तिन्‍नां लै ज़बान। मंऐं बोलअ त तिन्‍नां लै कि तिंयां छिंगणैं मुंह देशा-देशा जैंदरी।✝20:23 लेब. 26:33 24 किल्हैकि तिन्‍नैं निं मेरअ बधान अर मेरी बिधी मनी। तिन्‍नैं किई मेरी बशैघे धैल़ी नकदरी। तिन्‍नों दिल त तिन्‍नां मुहुर्ती दी लागअ द ज़ेता तिन्‍नें दाद-बाब पूज़ा तै।

25 "‘तेखअ दैनअ मंऐं तिन्‍नां इहै बधान अर बिधी मनणै ज़ुंण तिन्‍नां लै ज़िन्दगी निं दैई सकदै तै। 26 ज़ुंण तिंयां भैंट करा तै, मंऐं दैनअ तिन्‍नां तेता करै छ़ोतलै हणैं। तिन्‍नैं किऐ आपणैं ज़ेठै शोहरू बल़ीदान करी आगी दी हूम! ताकि तिन्‍नें अत्री होए। अह ती तिन्‍नां लै सज़ा ताकि तिन्‍नां का थोघ लागे कि हुंह आसा बिधाता।

27 "‘मणछा, ऐबै लअ तूह इज़राईले आद-लुआदा का खोज़ी कि हुंह मालक बिधाता बोला तिन्‍नां लै इहअ, "विश्वास घात करी किअ थारै दादै-बाबै हुंह बेइज़त।" 28 मंऐं पजैल़ै तिंयां तेऊ देशै ज़ेते मंऐं ज़बान ती दैनी दी कि सह देश दैणअ मुंह तिन्‍नां लै। ज़ांऊं तिन्‍नें तिधी पुजी उछ़टी धारा अर हरै-हरै बूट भाल़े, तिंयां लागै तेथ सारै दी हूम अर बल़ीदान करदै! तिंयां लागै तेथ धूप ज़ाल़ी पूज़ा करदै अर दाखे रसे अर्घै दैंदै! इना एही गल्‍ला करै आणी तिन्‍नैं मुल्है खास्सी रोश्शै। 29 हुंह लागअ इज़राईली पुछ़दअ, "तम्हैं एथ उझै धारा च़ुंडी लै किज़ू डेओआ?" तधकै बोला तिंयां आझ़ तैणीं "उझै धारा।"

30 "‘मणछा, ऐबै लअ तूह इज़राईले आद-लुआदा का खोज़ी हुंह मालक बिधाता बोला इहअ कि ज़ेही थारै दाद-बाब मुहुर्ती पूज़ा करी छ़ोतलै हुऐ तै, तम्हां बी तिहअ ई करनअ? तम्हैं बी कंज़री बेटल़ी ज़िहै च़ाल्‍लै हई। 31 तम्हैं आसा आझ़ बी तिन्‍नां ई मुहुर्ती सेटा भैंट करी आप्पू लै छ़ोत लांदै लागै दै। आझ़ बी आसा तम्हैं आपणैं शोहरू तिन्‍नां ई मुहुर्ती लै बल़ीदान करदै लागै दै! तज़ी बी एछा तम्हैं इज़राईली मुंह पुछ़दै कि तम्हां का थोघ लागे कि हुंह किज़ै च़ाहा! हुंह मालक बिधाता आसा सदा ज़िऊंदअ अर मंऐं डाहअ तम्हां लै बोली कि हुंह निं तम्हां आप्पू का किछ़ पुछ़णें ज़ाज़त दैंदअ। 32 तम्हैं आसा आप्पू दी एही सोठ डाही हेरी दी कि तम्हां बणनअ होरी देशा ज़िहै। ज़िहै होरी देशे लोग काठा-पात्थरे पूज़ा करा, तम्हैं बी च़ाहा तिहअ ई करनअ। पर थारी अह सोठ निं कधि पूरी हणीं।’"

बिधाते सज़ा अर माफी

33 मालक बिधाता बोला इहअ, "इज़राईलीओ, हुंह बोला आपणैं सोह खाई इहअ, ‘मुंह करनै तम्हैं आप्पै आपणैं महान बला करै तम्हां गलाम बणाणैं आल़ै देशा का आज़ाद। हुंह हणअ थारअ राज़अ आप्पै। 34 मुंह आणनैं तम्हैं इना देशा का बापस ज़ेथ तम्हैं मंऐं छ़ाडै तै। मुंह आणनैं तम्हैं हर ज़ैगा का बापस। तम्हैं झाल़णैं मुंह आपणैं महान बला करै, तेखअ लागणअ तम्हां का थोघ कि मुंह तम्हां लै केही रोश्शै आसा आई दी। 35 तेता का काढी पजैल़णैं मुंह तम्हैं रेगीस्तानै शुन्‍नीं ज़ैगा अर फेर हणैं होर देश बस्सै दै। तिधी खोज़णअ मुंह तम्हां नदरी थारअ दोश। 36 ज़िहअ मंऐं थारै दाद-बाबो मिसर देशा का काढी सीनाई धारा थारअ नसाफ किअ त, मुंह दैणीं तम्हां लै बी तेही ई सज़ा। अह गल्‍ल डाही मंऐं मालक बिधाता बोली।

37 "‘तम्हैं डाहणैं मुंह एक-एक गणी, ज़िहअ फुआल आपणीं भेडा शोठी हेठी नढैऊई करै गणी डाहा। मुंह बझ़ैल़णी तम्हां का मेरी करारे सोभ बिधी मनणै। 38 मुल्है द्रोह करनै आल़अ पापी मणछ काढणअ मुंह तम्हां जैंदरा का पोर्ही। तैहा ज़ैगा का काढणैं मुंह तिंयां पोर्ही ज़िधी तिंयां एभै आसा बस्सै दै, पर हुंह निं तिन्‍नां इज़राईल देशे ज़ैगा पुजणैं दैंदअ। तेखअ लागणअ तम्हां का थोघ कि हुंह आसा बिधाता।’"

39 परमेशर बिधाता बोलअ इहअ, "ज़ै तम्हैं इज़राईले आद-लुआद बी मेरअ नांईं शुणनअ च़ाहंदै, ज़ै तम्हैं बी मुहुर्ती पूज़ा करनी च़ाहा, तै डेओआ संघा रहा तिन्‍नां मुहुर्तीए च़ाकरी लागी! पर मंऐं डाहअ बोली कि तेखअ पल़णअ तम्हां मेरअ शुणनअ ई। ज़ुंण तम्हैं मुहुर्ती लै भैंट करी मेरै नाओंआं नकदरै करा, सह लागणअ तम्हां छ़ाडणअ। 40 हुंह थारअ परमेशर बिधाता बोला तम्हां लै इहअ, ‘इज़राईले आद-लुआदा टेक्‍कणअ इज़राईल देशे मेरी पबित्र सियोन धारा प्रैंदै मुंह सेटा माथअ। तिधी मनणी मुंह आप्पू लै तिन्‍नें च़ाकरी अर तिधी हणअ हुंह थारै सोभी बल़ीदान अर भैंट अर तम्हैं मनी दी मुल्है मानता लै खुश। 41 ज़िधी-ज़िधी देशै बी तम्हैं छिंघुऐ दै आसा, ज़ेभै मुंह तम्हैं तिन्‍नां देशा जैंदरा का झाल़ी आणनैं, तम्हैं मनणै मुंह धूपे खुशबू ज़िहै। तम्हां मांझ़ै रही रहैऊंणअ मुंह सोभी देशा का कि हुंह आसा पबित्र। 42 तम्हैं पजैल़णैं मुंह इज़राईल देशै बापस। अह आसा सह ई ज़ैगा ज़ेते मंऐं थारै दादा-बाबा लै दैणें ज़बान दैनी ती। तेखअ लागणअ तम्हां का थोघ कि हुंह आसा बिधाता। 43 तेखअ एछणी तम्हां आद कि तम्हैं किहै-किहै बूरै काम किऐ अर तम्हैं आप्पू लै केही छ़ोत लाई। ज़ुंण बी तम्हैं काम किऐ, तेता लै च़ेतणी तम्हां आप्पू ई शरम। 44 ज़ेभै मुंह आपणअ अदर डाहणां लै काम करनअ, तेभै लागणअ तम्हां इज़राईली का थोघ कि हुंह आसा बिधाता। किल्हैकि ज़ेतरै कदुष्ट तम्हैं आसा, मंऐं निं तम्हां लै तेतरी सज़ा दैनी ज़ेतरी तम्हां भेटी लोल़ी ती।’" मालक बिधाता डाहअ इहअ बोली।

दखण रेगीस्तानै आग

45 बिधाता बोलअ भिई मुखा इहअ, 46 "मणछा, दखण रेगीस्ताना बाखा भाल़, संघा खोज़ तेऊ देशे बारै, तूह खोज़ कि दखण रेगीस्तानै*20:46 दखण रेगीस्तानै एरुशलेम आजू किज़ै हणअ। 47 तूह लअ दखण रेगीस्ताने बस्सै दै लोगा का खोज़ी कि थारअ परमेशर बिधाता बोला तम्हां लै इहअ, ‘भाल़ा! मुंह चैल़णीं थारै बणैं आग अर तेथ पाणै मुंह हरै अर शुक्‍कै सोभ डाल़-बूट दहई। तैहा आगी निं कोहै शेऊई सकदअ। सह आग छिंघणीं दखणा उझै उतरा बाखा सारै दी अर तेता करनीं सोभ गल्‍ला दहई खतम। 48 सोभी भाल़णअ कि अह आग चैल़ी मंऐं बिधाता अर तेता निं कोहै शेऊई सकदअ।’"

49 पर मंऐं किई परमेशर बिधाता सेटा एही अरज़, "मेरै मालक, इहअ काम निं मुल्है दैई! लोग आसा मेरै बारै बोल्दै लागै दै कि हुंह डाहा आपणीं गल्‍ला करै लोगा जैंदरी झाख पाई!"