एजकेल 28

सूर नगरीए राज़े बारै समाद

1 बिधाता बोलअ मुल्है भिई इहअ, 2 "मणछा, तूह लअ सूर नगरीए राज़ै का खोज़ी कि हुंह परमेशर बिधाता बोला ताल्है इहअ, ‘ताह आसा बडअ घमंड! तूह बोला आप्पू लै कि दईब आसा तूह ई! तूह बोला इहअ कि तूह आसा परमेशरा ज़िहअ फेर समुंदरा मांझ़ै उछ़टी राज़गाद्दी दी बेठअ द। तूह समझ़ा आप्पू कि तूह आसा दईब! पर तूह आसा मणछ ई।✝28:2 एज. 28:9 3 तूह समझ़ा आप्पू लै इहअ कि तूह आसा दानिएला का बी खास्सअ अक्ली आल़अ अर इहअ निं किछ़ भेद आथी ज़ेतो ताखा थोघ निं आथी। 4 ताह आसा अक्ल अर ताह आसा समझ़, तेता करै हुअ तूह सेठ। तंऐं आसा आपणैं मैहले खास्सअ सुन्‍नअ च़ंदी डाहअ द भरी। 5 तूह आसा बपार करना लै सज़ाण, तैही हआ ताह नफअ ई नफअ। तूह हुअ सेठ अर तेतो आसा ताह घमंड।’"

6 तैही बोला मेरअ मालक बिधाता इहअ, "तूह समझ़ा आप्पू कि ताह आसा दईबा ज़ेही सोर-समझ़! 7 तैही शुण ऐबै! मुंह पजैल़णअ इहअ पाखलअ देश ताह संघै जुधा लै ज़ुंण संसारै सोभी देशा का नर्दैई आसा। तिन्‍नां करनी तेरी सोभ च़िज़ा बरैबाद ज़ुंण तंऐं आपणीं अक्ल अर समझ़ा करै आसा खटी दी। 8 तिन्‍नां पाणअ तूह मारी अर तिन्‍नां डाहणअ तूह मौते खात्ती दी शोटी। तेरी ल्हास रहणीं समुंदरै पल़ी। 9 ज़ेभै तेरै दुशमण ताह मारदै एछणैं, ताह तेभै बी इहअ बोल़णअ कि तूह आसा देअ? ज़ांऊं तूह तिन्‍नां तेरी हत्या करनै आल़ेए बशै पल़णअ, तेभै लागणअ ताखा थोघ कि तूह आसा मणछ ई। 10 तूह पाणअ परदेसी सैना कुक्‍करा ज़िहअ मारी! तेरी मौत हणीं तिन्‍नां मणछा ज़ेही ज़सरअ खतैर निं हंदअ हुअ द। अह गल्‍ल डाही मंऐं मालक बिधाता बोली।"

सूर नगरीओ बनाश

11 बिधाता दैनअ मुल्है भिई समाद, तेऊ बोलअ इहअ, 12 "मणछा, सूर राज़ै लै बोल शोगे गिह। तूह लअ इहअ खोज़ी कि हुंह परमेशर बिधाता बोला इहअ, ‘एकी ज़मानै तैणीं त तूह सूर नगरीए राज़अ भलअ मणछ ज़हा का अक्ल अर समझ़ आसा ती, होरी बी भेटा ती तिन्‍नां का शिक्षा। सूर नगरी दी बेघै बित्ती। 13 तूह त ज़िहअ परमेशरे अदन नाओंए सोभी का बधिया बागा दी बस्सअ द। ताखा तै किम्मती रत्न। ताखा थिऐ मानिक, हीरै, पेरोज़, पुखराज़, यशब, मरकत, नीलमणीं अर हर रंगे किम्मती मणीं ज़ेथ सुन्‍नअ त लाअ द। ताखा तै सुन्‍नें हार-शंगार। ईंयां सोभ च़िज़ा ताल्है तैहा धैल़ी लै बणाईं दी ज़धू तेरअ ज़ल्म हुअ।✝28:13 प्रका. 2:7 14 तेरी फाज़त करना लै थिऐ मंऐं बिधाता आपणैं करूब नाओंए स्वर्ग दूत डाहै दै। तूह त मेरी पबित्र धारा बस्सअ द। तूह हांढा त च़मकणै आल़ी मणीं जैंदरी।

15 "‘ज़धू तेरअ ज़ल्म हुअ, तधा ओर्ही करा त तूह सोभ काम भलै, पर बादा का लागअ तूह कदुष्ट कामां करदअ। 16 तेरअ धैन रहअ कबल्‍लअ बपार करना लै। तेतो नतिज़अ हुअ इहअ कि तूह लागअ ज़ुल्म अर पाप करदअ। तैही काढअ मंऐं बिधाता तूह आपणीं पबित्र धारा का पोर्ही अर तेरी फाज़त करनै आल़ै मेरै करूब नाओंए स्वर्ग दूत बी किऐ मंऐं ताखा दूर। तूह निं ऐबै च़मकणै आल़ी किम्मती मणीं जैंदरी हांढणअ। 17 ताह त एतो घमंड कि तूह आसा हेरनअ बित्तअ, तंऐं लाई आपणीं समझ़ बूरै कामां लै। तैही शोटअ मंऐं तूह धरनीं ताकि तेरी दशा भाल़ी होरी राज़ै बी शिक्षा भेटे। 18 बपार करदी किऐ तंऐं खास्सै कदुष्ट काम, तेता करै लागी तेरै पूज़ा-गाज़ा करने गान-स्ताना दी छ़ोत। तैही दैनअ मंऐं तेरी नगरी आग शाचणैं अर तेतो बनाश हणैं। सोभी का शुझुअ कि मंऐं बणाअं तेरअ धरनीं छ़ारो रूल़। 19 ऐबै हुअ तूह सदा लै खतम, तेरै ज़ाण-बछ़ैण आल़ै होरी देशा बी छ़ुटी तेरी एही बूरी दशा भाल़ी डरै काम्मणीं।’"

सदोन नगरीए बारै समाद

20 ✝ 28:20 जोए. 3:4-8; जक. 9:1,2; मोत्त. 11:21,22; लूक. 10:13,14 बिधाता बोलअ मुल्है भिई इहअ, 21 "मणछा, तूह दै सदोन नगरी लै मेरअ समाद खोज़ी चतैनगी। 22 तूह लअ सदोन नगरीए लोगा का खोज़ी कि हुंह मालक बिधाता बोला तिन्‍नां लै इहअ, ‘शूणां! हुंह हुअ ऐबै सदोन नगरीओ दुशमण, ज़ुंण ऐबै मुंह करनअ, तेता करै करनअ ऐहा नगरी बस्सै दै तम्हां लोगा बी मेरअ अदर। ज़ांऊं तम्हां ऐहा नगरी दी बस्सै दै लोगा लै मुंह थारै पापे सज़ा दैणीं, तेखअ एछणी तम्हां समझ़ कि हुंह आसा पबित्र परमेशर अर तम्हां का जाणअ थोघ लागी कि हुंह आसा बिधाता। 23 मुंह दैणअ तम्हां जैंदरी नबिज़री बमारी करै मरनै। थारै दुशमण पल़णै तम्हां लै फेरा-फेर चुटी। दुशमणा डाहणैं तम्हैं नगरी दी कज़िधल़ी बाता तलबारा करै काटी मारी। तेखअ लागणअ तम्हां का थोघ कि हुंह आसा बिधाता।’"

इज़राईला लै बर्गत

24 बिधाता बोलअ इहअ, "इज़राईली लै थिऐ आप्पू फेर बस्सै दै होर देश तिछै शूल़ अर कांडै ज़िहै ज़ुंण तिन्‍नां संघै बेघै बूरअ बर्ताअ करा तै। पर ऐबै निं आजू तिन्‍नां इहअ करनअ, तेखअ लागणअ इज़राईली का थोघ कि हुंह आसा तिन्‍नों परमेशर बिधाता।"

25 परमेशर बिधाता बोलअ इहअ, "मुंह पजैल़णैं इज़राईली तिन्‍नां देशा जैंदरा का बापस ज़ेथ मंऐं तिंयां छिंगी तै डाहै दै। तेखअ जाणअ सोभी लोगा का थोघ लागी कि हुंह आसा पबित्र परमेशर। तेखअ बस्सणै इज़राईली आपणैं देशै आपणीं तैहा ज़ैगा ज़ुंण मंऐं तिन्‍नें दाद-बाब याकबा लै आसा दैनी दी। 26 इज़राईली परज़ा बस्सणै तिधी राज्ज़ी-राम्बल़ै। तिधी च़िणनै तिन्‍नां आप्पू लै घअर संघा लाणैं आप्पू लै दाखे बाग। तिन्‍नां संघै बूरअ बर्ताअ करनै आल़ै तिन्‍नां फेर बस्सै दै देशा लै दैणीं मुंह सज़ा। आपणैं देशै बस्सी निं तिन्‍नां कोहिए किछ़ै डअर हणीं। तेखअ लागणअ तिन्‍नां का थोघ कि हुंह आसा तिन्‍नों परमेशर बिधाता।"