1 ✝बिधाता किई मुंह संघै गल्‍ला तेऊ बोलअ इहअ, "मणछा, ऐहा जंतरी खा, तेखअ डेऊ संघा खोज़ पठी गल्‍ला इज़राईली का।"

2 मंऐं खोल्ही आपणीं खाख अर तेऊ खैऊई मुखा सह जंतरी। 3 तेऊ बोलअ इहअ, "मणछा, ऐहा जंतरी खा ज़ुंण मंऐं ताल्है दैनी, एता करै डाह आपणअ पेट भरी।" मंऐं खाई सह जंतरी अर तेतो सुआद त मखीरा ज़िहअ मिठअ।

4 तेखअ बोलअ बिधाता इहअ, "मणछा, तूह डेऊ ऐबै इज़राईली सेटा संघा खोज़ मेरअ समाद ज़ेही मंऐं गल्‍ला खोज़ी पठी तिन्‍नां का। 5 मंऐं छ़ाडअ तूह इज़राईली सेटा, तूह निं मंऐं होरी देशा सेटा लै छ़ाडअ ज़सरी ताह बोली-भाषा ई समझ़ निं एछदी। 6 ज़ै ताह हुंह होरी देशा सेटा लै छ़ाडदअ ज़सरी ताह बोली-भाषा ई निं समझ़ एछदी, तिन्‍नां हेरनी ती तेरी गल्‍ला शूणीं। 7 पर इज़राईली लोगा मांझ़ै निं एकी बी तेरी लाई शूणीं, किल्हैकि तिंयां निं मेरी बी शुणदै। तिंयां आसा सोभ हठू अर शरेरै। 8 ऐबै बणाणअं मुंह तिन्‍नां सेटा तूह बी तिहअ ई हठू ज़िहै तिंयां आसा। 9 तूह करनअ मुंह तिन्‍नां सेटा बडी टोल्हा ज़िहअ पाक्‍कअ अर हीरै ज़िहअ राट्टअ, तूह निं तिन्‍नां द्रोही का डरी आथी।"

10 "मणछा, तूह शुण मेरी गल्‍ला धैन दैई, ज़ुंण बी हुंह ताखा खोज़ूं, तेता डाहै तूह आद। 11 तेखअ डेओऐ तूह तेरै आपणैं देशे लोगा सेटा लै ज़ुंण इधी बाबेल देशै कैद करी गलामी दी आसा आणै दै। संघा खोज़ै तूह तिन्‍नां गल्‍ला पठी ज़ुंण ताखा मंऐं परमेशर बिधाता खोज़ी, च़ाऐ तिंयां तेरी गल्‍ला दी धैन दैए च़ाऐ नां दैए।"

12 तेखअ च़कअ हुंह बिधाते आत्मां उझै, ज़ांऊं बिधातो प्रतप्प उझै उझ़ुअ मुखा शुण्हुंई मेरी पिठी पिछ़ू ज़ोरै-ज़ोरै गुल़ूबिज़ल़ू ज़ेही छ़ेल़। 13 मुखा शुण्हुंई छ़ेल़ कि तिन्‍नां ज़ीबे फैंख आसा एकी-दुजै फैंखा संघै बागरी दी छ़णाठदै लागै दै। तिन्‍नां घरेटा घुर्हने छ़ेल़ एही ज़ाणनअ कि तेथ हुई ज़ेही ज़ाज़री। 14 बिधाते आत्मां निंयं हुंह दूर, मंऐं च़ेतअ आप्पू भितरी खास्सअ दुख अर मुंह ती खास्सी रोश्शै आई दी पर बिधाते शगती त हुंह पठी काबू डाहअ द करी। 15 तेखअ आअ हुंह कबार दरैऊआ नेल़ तेल-अबीब धारा ज़िधी गलामी दी डेऊऐ दै होर थिऐ बस्सै दै। तिधी रहअ हुंह साता धैल़ी तैणीं। ज़ुंण बी मंऐं भाल़अ अर शूणअ, तेता करै त मुंह ज़िहअ प्राच लागअ द अर हुंह त खास्सअ दुखी हुअ द।

16 ज़ांऊं सात धैल़ी बिति, बिधाता बोलअ मुल्है इहअ, 17 "मणछा, ऐबै लाअ मंऐं तूह इज़राईले आद-लुआदे फाज़त करनै आल़अ पहरी डाही। तूह दैऐ मेरी गल्‍ला खोज़ी तिन्‍नां लै चतैनगी।✝ 18 ज़ै हुंह ताखा कहा कदुष्ट मणछे बारै इहअ खोज़ूं कि तिंयां मरनै, तिन्‍नां लै लऐ तूह चतैनगी दैई ताकि तिंयां पाप करनै का पिछ़ू हटे अर आपणीं ज़िन्दगी बच़ाऊई सके। ज़ै तूह तिन्‍नां का नांईं खोज़े, तिंयां; मरनै तिन्‍नें पापा पिछ़ू पर तिन्‍नें मौतो दोश लागणअ ताल्है। 19 ज़ै तूह कदुष्ट मणछा लै चतैनगी दैए अर सह पाप करनै का पिछ़ू नांईं हटे, तै मरनै तिंयां तिन्‍नें पापा पिछ़ू अर तेखअ निं तेरअ तेता लै किछ़ै दोश आथी।

20 "ज़ै कुंण धर्मीं मणछ पाप करदअ लागे, अर हुंह तिन्‍नां लै आफ़त पाए, तिंयां मरनै ज़ै तूह तिन्‍नां लै चतैनगी नांईं दैए। तिंयां मरनै तिन्‍नें पाप करनै पिछ़ू, तेखअ निं हुंह आद डाहंदअ कि तिन्‍नैं केतरअ भलअ किअ, अर तिन्‍नें मौतो दोश लाणअ मुंह ताल्है। 21 ज़ै तूह धर्मीं मणछा लै चतैनगी दैंदअ रहे कि पाप निं करी, ज़ै तिंयां तेरी शूणीं करै पाप नांईं करे, तै रहणैं तिंयां ज़िऊंदै अर तूह बी रहणअ बच़ी।"

22 बिधाता किअ हुंह पठी काबू संघा बोलअ मुल्है इहअ, "खल़अ उझ़ू संघा डेऊ खागा बाखा लै, तिधी करूं हुंह ताह संघै गल्‍ला।"

23 हुंह डेऊअ खागा बाखा लै तिधी शुझुअ मुखा बिधातो झ़ामण ज़िहअ मुखा कबार दरैऊआ नेल़ शुझुअ त। मंऐं टेक्‍कअ धरनीं उटै पल़ी माथअ। 24 बिधाते आत्मां किअ हुंह काबू दी संघा किअ हुंह मेरी ज़ांघा दी खल़अ। बिधाता बोलअ मुल्है इहअ, "तूह डेऊ आपणैं घअरा लै संघा रह दुआर हुल़ी भितरी। 25 मणछा, तूह डाहणअ लोगा राश्शी करै बान्हीं ताह निं बागै लोगा जैंदरी डेऊणअ भेटणअ। 26 मुंह करनीं तेरी ज़िभ काल्‍ली ताकि तूह इना द्रोही लै चतैनगी निं दैई सके। 27 तेखअ ज़ेभै हुंह ताह संघै भिई गल्‍ला करूं, तेभै करनअ मुंह तूह भिई बेज़अ। तेखअ खोज़णअ ताह तिन्‍नां का, ‘थारअ परमेशर बिधाता बोला इहअ।’ तिन्‍नां मांझ़ै कोई, शुणनअ तेरअ पर कोई निं तेरी गल्‍ला दी धैन ई दैणअ, तिंयां आसा ई द्रोही खिंबा का।"