1 यहूदा मुल्खे राज़ै ती बाबेल देशे गलामी दी निंईं गैर्हूई साल लागी दी। तैहा साला बोलअ साज़ै ज़ेठै बिधाता मुल्है इहअ, 2 "मणछा, तूह खोज़ मिसर देशे माहा राज़ै अर तेऊए परज़ा लै मेरअ इहअ समाद,

‘तम्हैं सोठा आप्पू लै कि तम्हैं आसा होरी देशा का बलबान!

हुंह तम्हां कहा ज़िहअ खोज़ूं?

3 अश्शूर देश बी थिअ खास्सअ बलबान।

एकी ज़मानै त सह लाबानोन धारे बडी केल़ुई ज़िहअ,

ज़ेथ मोट्टी-मोट्टी पाक्‍की घणीं शाण्हीं ती, अर लाम्मी ती उझै बादल़ा जैंदरी तैणीं।

4 तैहा केल़ुई लै त तिधी बतेर्हअ पाणीं,

धरती भितरी पाणींए गाडा करै ती सह खास्सी लाम्मी बझ़ी दी।

तिंयां गाडा बगा ती तैहा केल़ुईए ज़ैगा बाती ज़िधी सह लाई दी आसा ती।

तिधा ई का डेओआ ती धख-धख पाणींए कुल्हा सारै बणैं होरी डाल़ा-बूटा लै।

5 तैहा बडी केल़ुई लै त खास्सअ पाणीं अर तैही हुई सह बणैं

होरी केल़ुई अर डाल़ा बूटा का सोभी का लाम्मी अर

एते शाण्हीं बी ती खास्सी मोट्टी अर लाम्मी।

6 तिन्‍नां शाण्हीं दी हआ तै च़ेल्‍लू-पखीरू आपणैं कोल्ह बणाऐं दै,

तैहा केल़ुई गोधै डाहा तै बणें ज़ीब सो दैई अर

संसारे बडै-बडै देश बी करा तै तैहा केल़ुईए छ़ैल्‍ली दी राम।✝

7 लाम्मी-लाम्मी शाण्हीं करै ती सह बेघै बडी अर भाल़णीं बेघै बित्ती किल्हैकि

तैहा केल़ुईए ज़लैल़ै तै डुघै राझ़ै दै ज़ेथ हेठै खास्सअ पाणीं थिअ अर

सह चुशा ती तेता का खास्सअ पाणीं।

8 तैहा केल़ुई ज़ेही बित्ती केल़ुई निं परमेशरे बागा दी बी आथी ती।

नां कहा कैलीए एही शाण्हीं एही पाक्‍की आथी ती,

चनारे बडै-बडै बूट बी निं तेते शाण्हीं सेटा किछ़ बी आथी तै!

सह ती एही बित्ती कि परमेशरे बागे डाल़ा-बूटा मांझ़ै निं

एक बी तैहा केल़ुईओ मकाबलअ करी सकदअ त।✝

9 सह ती एही बित्ती मंऐं बणाईं दी, तेसे शाण्हीं दैणअ मंऐं ई लाम्मी बझ़णै,

मुंह परमेशरे अदन नाओंए बागा दी सोभी डाल़ा-बूटा बी लागा त तेसो मांण।’"

10 "तैही बोला परमेशर बिधाता इहअ, ‘तैहा लाम्मी केल़ुई अश्शूर देशा थिअ ऐहा गल्‍लो घमंड कि सह आसा एही बडी कि तेसे च़ुंडी पुजा उझै बादल़ा तैणीं! 11 तैही दैनअ मंऐं परदेसी राज़ै तैहा लाम्मी केल़ुई अश्शूर देशा प्रैंदै राज़ करनै। तेऊ दैणीं तेसे पापे सज़ा ज़ुंण तैहा भेटी लोल़ी ती। तैही दैनअ मंऐं तैहा केल़ुई काटणै। 12 तिंयां परदेसी ज़ुंण सोभी का नर्दैई आसा, तिन्‍नैं डाही सह काटी करै धरनीं लाम्मी पाई। तैहा केल़ुईए शाण्हीं रही चुटी करै नाल़ै-धारा सारै देशै पल़ी। ज़ेतरै देश तेते छ़ैल्‍ली दी थिऐ बेठै दै, तिंयां डेऊऐ तैहा छ़ाडी दूर। 13 तैहा ढूल़ी दी केल़ुई दी बस्सणै च़ेल्‍लू-पखीरू अर तेता का धरनीं पल़ी दी बडी-बडी शाण्हीं हेठै रहणैं बणें ज़ीब सुत्ती। 14 तैही निं ऐबै कोही बूटा तेही बझ़ हणीं, च़ाऐ सह ज़ेही बी खास्सी पणैल्ही ज़ैगा होए लागअ द, कोह बूट निं ऐबै कधि तिहअ लाम्मअ हणअ ज़ेते च़ुंडी उझै उछ़टी बादल़ा तैणीं होए। तिंयां बडै-बडै बूटा ज़िहै मरनै सोभ मणछा ई ज़िहै, संघा पुजणैं तिंयां बी तेऊ संसारै ज़िधी मणछ मरी करै डेओआ।’"

15 परमेशर बिधाता बोला इहअ, "ज़ैहा धैल़ी तैहा केल़ुई पैईताल़ा लै डेऊणअ, मुंह बझ़ैल़णअ धरती भितरे पाणीं का तैहा लै शोग करनै। मुंह निं गाडा-नाल़ी बगणैं दैणअ। तैहा केल़ुईए मौत भाल़ी पल़णअ सारै लाबानोन बणैं शोग अर तेऊ बणें सोभी डाल़ा-बूटे पाच अल़णैं धरनीं। 16 ज़ांऊं तैहा केल़ुई धरना लै बदल़ दैणअ, तेता ढूल़णें छ़ेल़ शूणीं छ़ुटणीं देशा-देशा काम्मणीं। मेरै अदन नाओंए सोभ डाल़-बूट अर लाबानोन बणें ज़ेतरै डाल़ा-बूटा तैहा केल़ुई का पाणीं भेटा त, तिंयां सोभ डेऊऐ पैईताल़ा लै। 17 तिंयां बी पुजै तेऊ संसारै ज़िधी मणछ मरी करै डेओआ। संघा हुऐ तिन्‍नां संघै साझ़ू ज़ुंण जुधा दी पैहलै ई तै मरी गऐ दै। ज़ुंण तैहा केल़ुईए छ़ैल्‍ली दी राम करा तै, तिंयां छिंघुऐ देशै-देशै।

18 "मिसर देश आसा मेरै अदन नाओंए बागा दी बडअ बूट। होर डाल़-बूट निं तेऊए मकाबलै किछ़ बी आथी! सह आसा सोभी देशा का बलबान। सह बी पजैल़णअ अदने बागे होरी डाल़ा-बूटा संघै पैईताल़ै। संघा हणअ जुधा दी तलबारा करै मारी पाऐ दै तिन्‍नां मणछा संघै साझ़ू ज़सरअ खतैर निं हंदअ हुअ द। मिसर देशे माहा राज़ै लै हणअ इहअ ई! अह गल्‍ल डाही मंऐं परमेशर बिधाता बोली।"