एजकेल 32

मिसर देशो राज़अ आसा मगर म्हाछ़ा ज़िहअ

1 यहूदा मुल्खे राज़ै जेहोकीना ती बाबेल देशे गलामी दी निंईं बार्हूई साल लागी दी। तैहा साला बोलअ साज़ै फागणै बिधाता मुल्है भिई इहअ, 2 "मणछा, मिसर देशे माहा राज़ै लै दै तूह मेरअ समाद, तेऊ लै दै शोगे गिह बोली एही चतैनगी, ‘देशा-देशा जैंदरी आसा तूह आप्पू ज़ुआन सिहा ज़िहअ ज़ोरा आल़अ, पर असली दी आसा तूह आपणैं देशै दरैऊए पाणीं जैंदरी आल़अ मगर म्हाछ़। आपणैं थेला करै खदमाऊंईं किअ तंऐं सह पाणीं खादल़अ।’"

3 परमेशर बिधाता बोला इहअ, "मुंह झाल़णैं देशा-देशे खास्सै लोग, कि ताह तिंयां मेरै ज़ज़ाल़ा करै ढाके। तिन्‍नां घिशणअ तूह तेऊ ज़ज़ाल़ा करै पाणीं जैंदरा का बागै। 4 तूह बदल़णअ मुंह धरनीं संघा डाहणअ तिधी प्राल़ी ज़ैगा शोटी। तेखअ बशैल़णै मुंह ताह च़ोच़ल़दै सरगै डैऊंदै च़ेल्‍लू-पखीरू अर बणें ज़ीब शादणैं मुंह कि तिंयां तेरअ मास्स थोस्सी रज्ज़ी खाए। 5 तेरअ मास्स अर हाड-मूंड डाहणैं मुंह नाल़ै-धारा शोटी। 6 तेरअ लोहू डाहणअ मुंह धरनीं सारै दी पोछी, तेता करै भर्हनीं गाडा-नाल़ी अर धारा। 7 ज़ेभै मुंह तेरअ पठी बनाश करनअ, तेभै डाहणअ मुंह सरग बुदरी अर तारै बी डाहणैं न्हैरै करी। सुरज़ डाहणअ मुंह बादल़ा पिछ़ू च़ोरी अर ज़ोथा का निं प्रैश्शअ ई लागणअ।✝32:7 ईशा. 13:10; मोत्त. 24:29; मार्क. 13:24,25; लूक. 21:25; प्रका. 6:12,13; 8:12 8 ताह प्रैंदै डाहणअ मुंह सरगा का नटिप्प न्हैरअ करी, उझै का निं धख ज़िहअ प्रैश्शअ बी लागणअ। सारै संसारै हणअ नटिप्प न्हैरअ। ईंयां गल्‍ला डाही मंऐं परमेशर बिधाता बोली।

9 "ज़ांऊं होरी देशा का थोघ लागणअ कि मंऐं किअ तेरअ बनाश, तिंयां पाखलै देश बी लागणै डरै काम्बदै ज़हा तूह ज़ाणदअ बी निं आथी। 10 देशा-देशे लोगा लागणअ प्राच ज़ांऊं तिन्‍नां भाल़णअ कि मंऐं ताह संघै किज़ै किअ। तिन्‍नें राज़ै लागणै डरै काम्बदै ज़ांऊं मुंह तिन्‍नां सम्हनै आपणीं तलबार छ़ाडणीं। ज़ेभै मुंह तूह मारनअ, तेभै छ़ुटणअ तिन्‍नां दर्छ़णअ कि किहअ करै तिंयां मरनै का बच़े।"

11 परमेशर बिधाता बोलअ मिसर देशे माहा राज़ै लै, "बाबेल देशो राज़अ एछणअ आपणीं सैना पाई ताह संघै जुधा लै। 12 तेऊए नर्दैई सैना पल़णअ तलबारा करै मिसर देशा लै चुटी अर तेरी सारी सैना करनी तिन्‍नां मारी खतम। तेरै सोभी लोगो अर तेरी तिन्‍नां सोभी च़िज़ो हणअ बनाश ज़ेतो ताह घमंड आसा। 13 गाडा-नाल़ी अर दरैऊए बाढै ज़ेतरै बी मिसर देशे डागै आसा तिंयां बी पाणै मारी। तेखअ नां कहा मणछे खूरा अर नां कहा डागे गोछ़ै करै पाणीं खादल़अ हणअ। 14 तेखअ करनअ मुंह गाडा-नाल़ीओ पाणीं भिई निम्बल़अ अर पाणीं रहणअ तेखअ जैतूने तेला ज़िहअ मज़ै करै बगदअ लागी। अह गल्‍ल डाही मंऐं परमेशर बिधाता बोली। 15 मुंह करनअ मिसर देश पठी उज़र अर शुन्‍नअ। मुंह करनअ तेथ बस्सै दै सोभिओ बनाश। तेखअ लागणअ तिन्‍नां मिसरी का थोघ कि हुंह आसा बिधाता। 16 अह चतैनगी हणीं मिसर देशा लै शोगे गिह। देशा-देशे बेटल़ी बोल़णीं अह गिह मिसर देश अर तेते सोभी लोगा मरने शोग मनाऊंणा लै। अह गल्‍ल डाही मंऐं परमेशर बिधाता बोली।"

मूंऐं दै मणछो संसार

17 यहूदा मुल्खे राज़ै जेहोकीना गई ती बाबेल देशे गलामी दी निंईं बार्हूई साल लागी। तैहा साला पंद्रा च़ैत्रै दैनअ बिधाता मुल्है भिई समाद। तेऊ बोलअ इहअ, 18 "मणछा, मिसर देशे खास्सै लोगा लै कर शोग। तिन्‍नां छ़ाड धरती हेठै डुघै दी तेऊ संसारै ज़िधी मणछ मरी करै डेओआ। तिंयां बी रहणैं होरी महान देशा संघै तेथ। 19 तिन्‍नां मिसरी लै बोल तूह,

‘तम्हैं सोठा आप्पू लै कि तम्हैं आसा होरी देशे लोगा का खास्सै बित्तै!

पर तम्हां बी लागणअ उंधै घोरी दी मूंऐं पैईताल़ै

तिन्‍नां मणछा सेटा लै डेऊणअ ज़ुंणी खतैर निं हंदअ किअ द।’

20 "दुशमण गऐ मिसर देशा संघै जुधा लै एछी, जुधा दी मरनै आल़ी सैना संघै मरनै मिसर देशे खास्सै लोग। कई निंणै तिन्‍नां मांझ़ै दुशमणा कैद करी। 21 महान जोधै अर ज़ुंण मिसरी बाखा जुध किअ, तिंयां बी आसा पैईताल़ै मिसरी पैईताल़ा पुजणा लै न्हैल़ै लागै दै, तिन्‍नां राज़ै बोल़णअ इहअ, ‘ज़सरअ खतैर निं हंदअ हुअ द, तिंयां बी पुजै इधी पैईताल़ै! भाल़ा, ईंयां पाऐ जुधा दी मारी अर ऐबै ईंयां घोरी दी मुल्दै पल़ै दै!’

22 "अश्शूरी जोधै अर तिन्‍नें सारी सैना आसा तेथ! तिंयां सोभ आसा जुधा दी मारी पाऐ दै। 23 तिन्‍नें घोरी ती पैईताल़ै उंधै खास्सै डुघै दी कोती दी। तिन्‍नां लै जुध करनै आल़ी तिन्‍नें सैना ती तिन्‍नां फेर लाम्मै पल़ै दै। आपणीं ज़िऊंदी ज़िता तै तिंयां होरी लोगा लै खास्सै नर्दैई। तिंयां पाऐ जुधा दी तलबारा करै मारी अर ऐबै आसा तिंयां घोरी डाहै दै दाबी।

24 "एलाम नगरीए लोग अर तिन्‍नें सारी सैना बी आसा तेथ! तिंयां सोभै बी पाऐ जुधा दी मारी। ज़िऊंदी ज़िता तै तिंयां होरी मणछा लै खास्सै नर्दैई। इनो खतैर निं आथी हुअ द अर ऐबै पुजै ईंयां पैईताल़ै। तिंयां हुऐ होरी मणछा संघै मौते डुघी खात्ती दी डेऊई शर्मिंदै! 25 एलाम नगरीए राज़ै लै आसा मूंऐं दै मणछा जैंदरी डाहअ द च़ैन छ़ैई। तेऊए बडी सैना आसा तेऊए घोरी फेर सुत्ती दी। तिंयां आसा जुधा दी मारी पाऐ दै तिंयां मणछ ज़ुंणीं खतैर निं हंदअ किअ द। ज़िऊंदी ज़िता तै तिंयां होरी मणछा लै खास्सै नर्दैई। तिंयां बी हुऐ ऐबै तिहै ई तिन्‍नां होरी ज़िहै शर्मिंदै ज़ुंण मूंऐं दै मणछा जैंदरी आसा सताऊई डाहै दै।

26 "मेशक अर तूबल नगरीए लोग बी आसा तिधी! फेर आसा तिन्‍नें सैना डाही दी घोरी दी दाबी। तिंयां आसा जुधा दी मारी पाऐ दै इहै मणछ ज़ुंणी खतैर निं हंदअ किअ द। आपणीं ज़िऊंदी ज़िता आणा तै तिंयां होरी लोगा हंती-हंती मारी। 27 मेशक अर तूबल निं पराणैं ज़मानें तिन्‍नां शूरबीरा संघै घोरी दी दाबी डाहणैं ज़ुंणीं खतैर निं हंदअ त किअ द। तिंयां डेओआ तै पैईताल़ा लै तिन्‍नें अस्त्र-शस्त्रा संघी। ज़ेभै लोग तिन्‍नां दाबी डाहा तै, तिंयां डाहा तै तिन्‍नें तलबार तिन्‍नां मूंऐं दै शूरबीरे शरैहणैं, तिंयां आसा तेथ घोरी सुत्तै दै अर तिन्‍नें पापै आसा तिन्‍नें हाडकै डाहै दै ढोपी। किल्हैकि आपणीं ज़िऊंदी ज़िता तै तिंयां शूरबीर होरी लै खास्सै नर्दैई।

28 "इहअ करै डाहणै मिसर देशे लोग जुधा दी तलबारा करै मारै दै तिन्‍नां मणछा संघै दाबी ज़ुंणीं खतैर निं हंदअ किअ द।

29 "एदोम देशे लोग बी आसा तेथ तिन्‍नें राज़ै अर सैणैं संघी! तिंयां ती बडी बलबान सैना अर ऐबै आसा तिंयां पैईताल़ै तिन्‍नां जुधा दी तलबारा करै मारी पाऐ दै मणछा संघै सुत्तै दै ज़ुंणीं खतैर निं हंदअ किअ द।

30 "उतर दिशा बाखा देशै राज़ करनै आल़ै आसा सोभ तेथ! सदोन नगरीए लोग बी आसा तेथ! एकी ज़मानै तै तिंयां होरी लै खास्सै नर्दैई, पर ऐबै आसा तिंयां जुधा दी मारी पाऐ दै तिन्‍नां मणछा संघै सुत्तै दै ज़ुंणीं खतैर निं हंदअ किअ द। तिंयां हुऐ तिन्‍नां ई ज़िहै शर्मिंदै ज़ुंण पैईताल़ै डेऊऐ।"

31 परमेशर बिधाता बोलअ, "जुधा दी मारी पाऐ दै एतरै खास्सै मणछा भाल़ी फिरनअ मिसर देशे माहा राज़ै अर तेऊए सैना धख हैअ कि तेथ निं सिधै तिंयां आथी।

32 "मिसर देशो माहा राज़अ बी त आपणीं ज़िऊंदी ज़िआ होरी लै खास्सअ नर्दैई, ऐबै पाणै सह अर तेऊए सैना जुधा दी मारी संघा डाहणैं तिंयां जुधा दी तलबारा करै मारै दै तिन्‍नां मणछा संघै दाबी ज़ुंणीं खतैर निं हंदअ किअ द। अह गल्‍ल डाही मंऐं परमेशर बिधाता बोली।"