इज़राईल आसा छ़ेक्कै खतम हणैं आल़अ
1 तेखअ बोलअ बिधाता मुल्है इहअ, 2 "मणछा, हुंह परमेशर बिधाता बोला इज़राईल देशे ज़ैगा लै, ‘ऐबै हणीं अह सारी ज़ैगा छ़ेक्कै खतम!
3 "‘इज़राईल, शुण! तेरै बनाश हणैंओ बगत गअ एछी! ताखा जाणअ थोघ लागी कि मुंह ताल्है केही रोश्शै आसा आई दी। ज़िहअ-ज़िहअ पाप तंऐं किअ, तेता लै करनअ मुंह तेरअ नसाफ। ज़ुंण तंऐं च़िल़्हखरै काम किऐ, तेता लै दैणीं मुंह ताल्है सज़ा। 4 तेता लै निं मुंह ताल्है धख बी झींण करनी नां तूह मुखा बच़ी सकदअ। इज़राईल, ज़ुंण तंऐं कदुष्ट अर च़िल़्हखरै काम किऐ, तेता लै लाई मंऐं ताल्है सज़ा दैई ताकि ताखा थोघ लागे कि हुंह आसा बिधाता।’"
5 म्हारअ मालक बिधाता बोला इहअ, "इज़राईल, ताल्है आसा आफ़ता प्रैंदै आफ़त पल़णै आल़ी। 6 ऐबै मुक्की सोभ गल्ला! अह आसा बनाश हणैंओ बगत! भाल़णीं दै! सह गअ ताह खतम करदअ एछी! 7 इज़राईल मुल्खै बस्सै दै लोगो! थारै बनाश हणैंओ बगत गअ पुजी। थारै उछ़टी धारा गान-स्ताना दी नाच़-खेल्ह खतम हणैंओ बगत गअ ऐबै एछी, तम्हां जैंदरी हणअ सिधअ हाल्लअ-गोल्लअ अर ठुर्हा लागी दी।
8 "इज़राईल, ऐबै दैणअ मुंह ताल्है आपणअ रोश्श तरैल़ी। ज़िहअ-ज़िहअ तंऐं किअ, तेता लै करनअ मुंह तेरअ नसाफ। ज़ुंण तंऐं च़िल़्हखरै काम किऐ, तेता लै दैणीं मुंह ताल्है सज़ा। 9 तेता लै निं मुंह ताल्है धख बी झींण करनी नां तूह मुखा बच़ी सकदअ। इज़राईल, ज़ुंण तंऐं कदुष्ट अर च़िल़्हखरै काम किऐ, तेता लै लाई मंऐं ताल्है सज़ा दैई ताकि ताखा थोघ लागे कि हुंह आसा बिधाता अर सह आसा हुंह ज़ुंणी ताल्है सज़ा दैनी।"
10 इज़राईलीओ! थारै बनाश हणें धैल़ी गई पुजी, तम्हां लै आसा घोर आफ़त पल़णै आल़ी! थारै कदुष्ट काम अर घमंड भर्हुअ खास्सअ। 11 उपद्रभा करदी-करदी लागै तम्हैं घोर ज़ुल्म करदै! तम्हां मांझ़ै निं कोह बच़णअ, नां थारी धन-माया अर नां थारी शोभा शान बच़णीं।
12 सह बगत गअ एछी, सह धैल़ी आसा नेल़! तेभै नां सस्तै दी मोल लणैं आल़ै खुश हणअ नां बेच़णैं आल़ै माल़ी च़ेतणी, किल्हैकि सह रोश्श पल़णअ सोभी प्रैंदै अर बनाश हणअ सोभिओ। 13 ज़ुंण आपणीं जदी ज़ैगा बेच़े तिन्नां निं सह कधि बापस भेटणीं। ज़ै तिन्नां मांझ़ै कुंण ज़िऊंदअ बी होए रहअ द, तैबी निं तेऊ आपणीं जदी ज़ैगा बापस भेटणीं। किल्हैकि बिधातो कोप पल़णअ सोभी लै। ज़ै कुंण पापी मणछ ज़िऊंदअ बी होए तेऊ हणअ ज़िऊंणअ कठण। 14 तिन्नैं बाज़अ नर्शिंगअ, जुधा लै हेरअ सोभी च़िज़ो इंतज़ाम करी। पर जुधा लै निस्सअ बागै कोह निखल़ी किल्हैकि बिधातो कोप आसा सोभी लै पल़अ द।
इज़राईले पापा लै सज़ा
15 दुशमण आसा तलबारा पाई नगरी बागै, नगरी भितरी आसा नबिज़री बमारी अर नकाल़। ज़ुंण बी नगरी बागै निखल़े, सह पाणअ दुशमणे सैना मारी, ज़ुंण नगरी भितरी रहे तिंयां मरनै नबिज़री बमारी अर भुखै! 16 ज़ुंण जुधा दी तलबारा करै मरनै, नबिज़री बमारी अर नकाल़ा का बच़े, तिंयां ठुर्हनै बच़दै उझै धारा लै। ईंयां मणछ हणैं किधी खागै बस्सी दी पालल़ी ज़िहै। ज़िऊंदै बच़ै दै तिन्नां सोभी मणछा करनअ आपणैं पापा लै शोग। 17 तिन्नां सोभिए ज़ांघा बाहा हणीं बाख दुबल़ी अर तिन्नां हणअ ठहरअ लागअ द। 18 तिन्नां बान्हणैं घेरी खिंथल़ै कि तिंयां पचताऐ ऐबै, तिंयां हणैं खास्सै डरै दै, तिंयां हणैं पठ शर्मिंदै हुऐ दै अर तिन्नां छाम्बणै आपणैं मुंडे शराल़ पठी। 19 तिन्नां डाहणैं आपणैं सुन्नअ-च़ंदी बाता छ़ोतली च़िज़ा ज़िहै शोटी, किल्हैकि ज़ांऊं बिधातो कोप पल़अ, तेभै निं तिन्नों सह सुन्नअ च़ंदी बी तिन्नां बच़ाऊई सकअ! भुखे पलका निं तिंयां तेता करै आप्पू लै रोटी बी मोल लई सकै। तेऊ सुन्नैं-च़ंदी ई पाऐ तिंयां पापा दी। 20 तिन्नां त आपणैं दिला लोभणैं आल़ै हार-शंगारो बडअ घमंड, तेऊ सुन्नैं-च़ंदी करै ई बणाईं तिन्नैं छ़ोतली बृथा मुहुर्ती अर मैहरै। तैही किअ बिधाता इहअ कि तिन्नां हुई आपणीं धन-माया का ई नफरत।
21 बिधाता बोला इहअ, "मुंह दैणअ तिन्नों सुन्नअ-च़ंदी होरी देशे पाखलै लोगा लुटणैं। कदुष्ट मणछा लुटणीं तिन्नें धन-माया पठी संघा लाणीं तेथ छ़ोत। 22 तिंयां परदेसी अर डाकू पेशणैं मेरै पबित्र भबना भितरी, तिन्नां लाणीं तेथ छ़ोत। मुंह निं तेता लै बी किछ़ बोल़णअ अर मुंह दैणअ तिन्नां तिहअ करनै।
23 "मेरी परज़ा बान्हणां लै बणां शांघल़, सारै आसा झाख पल़अ द, सारै देशै आसा काट-मार मच़ी दी अर हर नगरी आसा उपद्रभ हंदै लागै दै। 24 होरी देशा मांझ़ा पजैल़णैं मुंह सोभी का बूरै अर नर्दैई देश इधी, तिन्नां करनअ सोभी इज़राईलीए घअरै कबज़अ। तेभै चुटणीं तम्हां मांझ़ै बडै-बडै बलबान मणछे हिम्मत बी ज़ेभै मुंह होरी देशा करै थारै पूज़ा करने गान-स्ताना दी छ़ोत लाणीं। 25 ऐबै आसा बनाश हणैं आल़अ! तम्हैं रहणैं मेल़-ज़ोल़ करने आशा पर सह निं किधी हणअ। 26 तम्हां लै पल़णीं आफ़ता प्रैंदै आफ़त, तम्हां का शुण्हनी फेरा-फेर बूरी ई शणांईं। तम्हैं लागणै गूरा लोल़ै कि सह खोज़े कि तेऊ का धैनै-सुपनै किज़ै शुझुअ? पर तेऊ का निं खोज़णा लै किछ़ हणअ! प्रोहता का निं लोगा लै शिक्षा दैणा लै किछ़ै गल्ला हणीं अर नां सैणैं का किज़ै राम्बल़ी सलाह भेटणीं। 27 इज़राईल मुल्खे राज़ै हणअ शोग पल़अ द, कार-करिंदैओ हणअ हैअ चुटअ द अर लोग हणैं डरै काम्बदै लागै दै। ज़ुंण बी तम्हैं किअ तेते दैणीं मुंह तम्हां लै सज़ा। मुंह करनअ थारअ नसाफ तेऊ ई साबै ज़िहअ तम्हैं होरी संघै बभार करा। तेखअ लागणअ तम्हां का थोघ कि हुंह आसा बिधाता।"