1 ✝बिधाता बोलअ मुल्है भिई इहअ, 2 "मणछा, अमोन नगरीए बारै लअ तूह मेरअ समाद खोज़ी। 3 तूह लअ तिन्‍नां अमोनी का खोज़ी कि हुंह परमेशर बिधाता बोला तिन्‍नां लै इहअ, ‘ज़धू मेरअ भबन छ़ोतलअ किअ, ज़धू इज़राईल देश बरैबाद किअ, ज़धू यहूदा मुल्खे परज़ा कैद करी गलामी लै निंयैं, तम्हैं हुऐ तधू बडै भारी खुश! 4 ऐबै शूणां तम्हैं! मुंह सभाल़णैं तम्हैं पुर्बा बाखे लोगा का, ताकि तिंयां तम्हां गलाम बणांए। तिन्‍नें सैना पाणै थारै देशै तम्हां जैंदरी डेरै। तिंयां बस्सणै तम्हां जैंदरी संघा तिन्‍नां झुटणअ तिन्‍नां भेडा-बाकरी अर गाऊईओ दुध अर तिन्‍नां खाणैं तिन्‍नां डाल़ा-बूटे फल़ ज़ुंण थारै आसा। 5 मुंह करनअ इहअ कि थारी राज़धानी रबाह नगरी हणीं एही ज़ैगा ज़ेथ ऊँट हणैं घाह च़रदै लागै दै। अमोन देश हणअ इहअ ज़ेथ सारै देशे भेडा-बाकरीए हेल़्ही हणीं सुत्ती दी। ताकि तम्हां का थोघ लागे कि हुंह आसा बिधाता।’"

6 परमेशर बिधाता बोला इहअ, "ज़धू मंऐं इज़राईला लै सज़ा दैनी, तम्हैं तै तधू ताल़ी बाज़दै लागै दै! तम्हैं लाई तैहा खुशी दी छ़ाहल़ा। तम्हैं किई इज़राईल देशे बेइज़ती कि भली हुई। 7 ऐबै शूणां तम्हैं! ऐबै दैणी मुंह तम्हां लै सज़ा। मुंह दैणअ होरी देशा थारी किम्मती च़िज़ा लुटणैं। मुंह करनअ थारअ नाअं-नशाण ई खतम, कि आजू थारअ देश रहे ई निं! मुंह करनै तम्हैं पठ बरैबाद! तेखअ लागणअ तम्हां का थोघ कि हुंह आसा बिधाता।"

8 ✝परमेशर बिधाता बोला इहअ, "मोआब अर सेईर देश बोला इहअ कि यहूदा मुल्ख आसा होरी देशा ज़िहअ। 9 ऐबै शूणां! मुंह दैणअ तिन्‍नें दुशमणा मोआब देशे सिऊंआं दी बस्सी दी नगरी बाती एछणैं। मुंह दैणअ तिन्‍नें सोभी का बधिया नगरी बेथ-जासमोत, बाल-मिऊन अर किर्यातैम नगरी दुशमणा कबज़अ करनै ज़ुंण तिन्‍नें सोभी का खास नगरी आसा। 10 अमोनी संघै करनै मुंह मोआब देशे लोग बी पुर्बा बाखा रेगीस्तानै बस्सै दै लोगे गलाम। होरी देशा निं आद बी रहणीं कि अमोन अर मोआब बी थिऐ होए देश! 11 इहअ करै दैणी मुंह मोआब देशा लै सज़ा अर तेखअ लागणअ तिन्‍नां का थोघ कि हुंह आसा बिधाता।"

12 ✝परमेशर बिधाता बोलअ इहअ, "एदोम देशै काढअ यहूदा मुल्खा लै बडै नर्दैई हई बदल़अ! ज़ुंण तिन्‍नैं यहूदा मुल्खा संघै किअ, तिन्‍नां लै आसा तेतो दोश। 13 ऐबै बोला हुंह परमेशर बिधाता इहअ कि मुंह दैणीं एदोम देशा लै सज़ा। मुंह पाणै तेऊ देशे सोभ मणछ सोभ मारी, तेथ निं मुंह डागै-चैणैं बी ज़िऊंदै छ़ाडणैं। तेऊ देशे ज़ैगा करनी मुंह पठ शुन्‍नीं। तिन्‍नें दुशमणा पाणै तिंयां जुधा दी तेमान नगरी पोर्ही ददान नगरी तैणीं सोभ तलबारा करै मारी। 14 मुंह लणअ आपणीं परज़ा इज़राईली करै एदोम देशा का बदल़अ। तेखअ लागणअ एदोमी का थोघ कि मुंह तिन्‍नां लै केही रोश्शै आसा आई दी अर तिन्‍नां लै सज़ा दैणैं आल़अ आसा हुंह बिधाता। अह गल्‍ल डाही मंऐं परमेशर बिधाता बोली।"

15 परमेशर बिधाता बोलअ इहअ, "पलिश्ती आसा इज़राईले आद-लुआद यहूदा मुल्खे परज़ा संघै जुगा-जुगा ओर्ही ज़ीद। सह ज़ीद डाही काढी तिन्‍नैं इज़राईली लै नर्दैई हई बदल़अ। तिंयां च़ाहा इज़राईला पठ खतम करनअ।✝ 16 ऐबै शुण! हुंह परमेशर बिधाता बोला इहअ कि मुंह दैणीं पलिश्ती लै सज़ा। मुंह पाणै करेती लोग मारी। ज़ुंण समुंदरे बाढै बच़ै दै आसा, तिंयां करनै मुंह खतम। 17 मुंह दैणीं तिन्‍नां पलिश्ती लै घोर सज़ा, मुंह काढणअ तिन्‍नां का बदल़अ। आपणैं तात्तै रोश्शै दैणअ मुंह तिन्‍नां लै इहअ सबक कि तिन्‍नां का थोघ लागे कि हुंह आसा बिधाता।"