Mateus 26

ईशूए लै छ़ल़

1 ज़ांऊं ईशू इना गल्‍ला बोली मुक्‍कअ, तेखअ लागअ सह आपणैं च़ेल्‍लै लै बोल्दअ, 2 "तम्हां का आसा थोघ कि दूई धैल़ै बाद आसा ऊवार्णैओ थैर। हुंह मणछो पूत करनअ कैद कि मुंह क्रूसा दी मारी पाए।"

3 तेखअ हुऐ बडै प्रोहत अर सैणैं काईफा नाओंए माहा प्रोहते भबनै कठा। तिधी किई तिन्‍नैं एक पांच़ी। 4 तिंयां लागै आप्पू मांझ़ै इहअ जोग करदै कि ईशू ढाकणअ हाम्हां छ़ल़-कपट करी बी संघा पाणअ मारी। 5 तेखअ लागै तिंयां इहअ बी बोल्दै कि ऊवार्णे जाचे धैल़ी निं हाम्हां इहअ करनअ, इहअ निं हआ कि लोग उपद्रभ करे।

बेथनी गराऊंऐं सखाऊअ ईशू सबक

6 तेखअ डेऊअ ईशू बेथनी गराऊंऐं, तिधी त सह शमौन नाओंए मणछे घअरै ज़ुंण ईशू कोहल़ा का शुचअ किअ त। 7 ईशू थिअ रोटी खांदअ बेठअ द, तिधी आई एक बेटल़ी अर तैहा आणअ संगमरमरे भांडै दी खुशबू दैणैं आल़अ किम्मती तेल। तैहा तरैल़अ सह तेल ईशूए मुंडै। 8 एता भाल़ी बोलअ रोश्शै च़ेल्‍लै इहअ, "अह इहअ किम्मती तेल किल्है किअ ऐहा ज़ांऐं? 9 एता बेच़ी सका तै खास्सै ढब्बै भेटी अर तिन्‍नां ढब्बै सका तै रैनै-गरीबा लै बांडी।" 10 अह गल्‍ल हेरी ईशू समझ़ी अर तेऊ बोलअ तिन्‍नां लै इहअ, "ऐहा दैआ रहणैं, तम्हैं किल्है आसा ऐहा तंग करदै लागै दै? ऐहा किअ मुल्है भलअ। 11 गरीब रहणैं कबल्‍लै तम्हां ई अर ज़ेभै थारअ दिल बोले तेभै सका तम्हैं तिन्‍नां लै दैई, पर हुंह निं तम्हां संघै कबल्‍लअ रहणअ। 12 ऐहा ज़ुंण अह मेरी देही दी खुशबू दैणैं आल़अ किम्मती तेल तरैल़अ, अह किई ऐहा मेरी देही दाबणे तैरी। 13 हुंह खोज़ा तम्हां का सत्त कि सारै संसारै ज़िधी बी मेरै बारै खुशीओ समाद खोज़े, तिन्‍नां मणछा खोज़णअ एसे बारै बी कि ऐहा मुल्है किज़ै किअ।"

करेती गराऊंए यहूदो विश्वास घात

14 करेती गराऊंआं का आसा त ईशूए बारा च़ेल्‍लै मांझ़ै एक च़ेल्‍लअ यहूदा, सह डेऊअ बडै प्रोहता सेटा संघा बोलअ इहअ, 15 "ज़ै हुंह ईशू कैद करना लै थारी मज़त करूं, तम्हां तेते मुल्है केतरै ढब्बै दैणैं?"

तिन्‍नैं बोलअ इहअ, "ताल्है दैणैं हाम्हां तोली करै तिह च़ंदीए सिक्‍कै।" 16 सह रहअ तेभी पोर्ही तेऊ मोक्‍के ताका कि सह किहअ करै ईशू ढाकणैं बझ़ैल़े।

च़ेल्‍लै संघै आखरी रोटीए थैरो भोज़

17 आखरी रोटीए थैरा का पैहली धैल़ी लागै च़ेल्‍लै ईशू का पुछ़दै, "हे प्रभू, तूह किधी च़ाहा कि हाम्हैं ताल्है ऊवार्णे थैरो भोज़ बणाणें तैरी करे?" 18 ईशू बोलअ तिन्‍नां लै, "तम्हैं डेओआ नगरी लै। तिधी भेटणअ तम्हां एक मणछ। तेऊ लै बोलै कि गूरू बोला इहअ कि मेरअ बगत आसा नेल़, अर मुंह मनाऊंणअ तेरै घअरै आपणैं च़ेल्‍लै संघै एछी अह ऊवार्णैओ थैर।" 19 ज़िहअ ईशू बोलअ, च़ेल्‍लै किअ तिहअ ई, संघा बणाअं च़ेल्‍लै तेऊ घअरै ऊवार्णे थैरो भोज़।

20 ज़ांऊं सान्ह पल़ी, ईशू बेठअ आपणैं बारा च़ेल्‍लै संघै रोटी खांदअ। 21 ज़ांऊं तिंयां खांदै लागै, ईशू बोलअ तिन्‍नां लै, "हुंह खोज़ा तम्हां का सत्त कि तम्हां मांझ़ै बझ़ैल़णअ हुंह कहा एकी ज़ण्हैं ढाकणैं।" 22 ऐहा गल्‍ला शूणीं हुऐ तिंयां खास्सै दुखी, अर तिंयां लागै एक-एक करी बारी-बारी ईशू का पुछ़दै, "हे गूरू सह हुंह किनी आसा?" 23 ईशू दैनअ तिन्‍नां लै ज़बाब, "ज़ुंणी मुंह संघै एभै मेरै थाल़ू का खाअ, तेऊ ई बझ़ैल़णअ हुंह ढाकणैं। 24 हुंह मणछो पूत ता मरनअ तेऊ ई साबै ज़िहअ मेरै बारै पबित्र शास्त्रा दी आसा लिखअ द। पर तेऊ मणछा लै आसा घोर आफ़त! ज़हा हुंह ढाकणैं बझ़ैल़णअ। तेऊ लै हणअ त भलअ इहअ ई कि तेऊओ ज़ल्म ई नांईं हंदअ।" 25 तेखअ बोलअ करेती गराऊंए यहूदा ईशू लै ज़ुंणी ईशू ढाकणैं थिअ लाअ द बझ़ैल़ी, "हे गूरू सह हुंह किनी आसा?" ईशू बोलअ तेऊ लै, "तंऐं हेरअ एभै बोली।"

प्रभू भोज़

26 ज़ांऊं तिंयां रोटी खांदै बेठै, ईशू च़की एक रोटी संघा किअ परमेशरो शूकर, तेखअ किऐ तैहा रोटीए म्हार-म्हार। तिंयां रोटीए म्हार दैनै तेऊ आपणैं च़ेल्‍लै लै इहअ बोली, "हुंज़ा, खाआ अह आसा मेरी देही।" 27 तेखअ च़कअ ईशू दाखे रसो प्रिहअ हाथै, सह बी दैनअ परमेशरो शूकर करी च़ेल्‍लै लै, संघा बोलअ इहअ, "एता का झुटा तम्हैं सोभै। 28 किल्हैकि अह आसा मेरअ लोहू, अह आसा मणछा संघै परमेशरे नऊंईं करार। बल़ीदानो अह लोहू बहाऊंणअ खास्सै मणछे पाप माफी लै।