Mateus 6

25 "तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि किज़ै खाणअ किज़ै पिणअ? नां आपणीं देही लै फिकर करी कि हाम्हां किज़ै बान्हणअ? ज़िन्दगी आसा रोटी का अर देही आसा झिकल़ै का खास्सी किम्मती।

26 "सरगै डैऊंदै च़ेल्‍लू-पखीरू भाल़ा! तिंयां नां बऊंदै, नां लऊंदै आथी, अर नां तिंयां भढारा भरना लै कठा करदै। तैबी दैआ थारअ स्वर्गै रहणैं आल़अ बाब परमेशर तिन्‍नां लै खाणअ-पिणअ। तम्हैं कै तिन्‍नां का खास्सै किम्मती निं आथी? 27 तम्हां मांझ़ै इहअ कुंण आसा कि फिकर करी आपणीं अमर धख ज़ेही बी सका लाम्मी करी?

28 "झिकल़े तैणीं किल्है करा तम्हैं फिकर? बणैं लागै दै होछ़ै-होछ़ै फूला दैआ भाल़णीं कि तिंयां किहअ करै बझ़ा? तिंयां नां मैन्थ करदै, अर नां तिंयां ऊन काती करै आप्पू लै झिकल़ै बणाऊंदै।

29 "तैबी बोला हुंह तम्हां लै इहअ कि सुलैमान राज़ै बी निं आपणैं सारै राज़-पाठा दी तिन्‍नां कोही बराबर शोभलै झिकल़ै बान्हैं। 30 ज़ै परमेशर घैहणींए घाहा लै बी इहै झिकल़ै बन्हैऊंआं, ज़ुंण आझ़ आसा अर काल्‍ला दहणअ सह आगी जैंदरी। ओ बैहमी विश्वासीओ, तम्हां लै कै सह झिकल़ै दैई निं सकदअ?

31 "इहअ करै तम्हैं इहअ फिकर निं करी अर नां इहअ बोली कि हाम्हां किज़ै खाणअ-पिणअ अर बान्हणां लै किज़ै हणअ? 32 किल्हैकि होर लोग बी रहा इना च़िज़ा लोल़ै लागी, पर थारअ स्वर्गै रहणैं आल़ै बाब परमेशरा का आसा थोघ कि तम्हां आसा इना गल्‍ले ज़रुरत। 33 तैही बोला हुंह तम्हां लै इहअ कि पैहलै करा बाब परमेशरे धर्म अर राज़े लोल़-तोप अर ईंयां सारी च़िज़ा जाणीं तम्हां भेटी।*6:33 लूक. 12:31

34 "ऐबै काल्‍ला धैल़ीओ फिकर निं तम्हैं करी, किल्हैकि काल्‍ला एछणैं आल़ी धैल़ी हेरनअ आपणअ फिकर आप्पै करी अर आझ़ा लै आसा आझ़ो दुख ई बतेर्हअ।"