אַשְׂכִּֽילְךָ ׀ וְֽאוֹרְךָ בְּדֶֽרֶךְ ־ זוּ תֵלֵךְ אִֽיעֲצָה עָלֶיךָ עֵינִֽי ׃

וַאֲנִי בְּרֹב חַסְדְּךָ אָבוֹא בֵיתֶךָ אֶשְׁתַּחֲוֶה אֶל ־ הֵֽיכַל ־ קָדְשְׁךָ בְּיִרְאָתֶֽךָ ׃

תּֽוֹדִיעֵנִי אֹרַח חַיִּים שֹׂבַע שְׂמָחוֹת אֶת ־ פָּנֶיךָ נְעִמוֹת בִּימִינְךָ נֶֽצַח ׃

אַשְׁרֵי אָדָם מָצָא חָכְמָה וְאָדָם יָפִיק תְּבוּנָֽה ׃

וְנָחֲךָ יְהוָה תָּמִיד וְהִשְׂבִּיעַ בְּצַחְצָחוֹת נַפְשֶׁךָ וְעַצְמֹתֶיךָ יַחֲלִיץ וְהָיִיתָ כְּגַן רָוֶה וּכְמוֹצָא מַיִם אֲשֶׁר לֹא ־ יְכַזְּבוּ מֵימָֽיו ׃

אַל ־ תֹּאמַר מֶה הָיָה שֶׁהַיָּמִים הָרִאשֹׁנִים הָיוּ טוֹבִים מֵאֵלֶּה כִּי לֹא מֵחָכְמָה שָׁאַלְתָּ עַל ־ זֶֽה ׃

הֲלוֹא יָדַעְתָּ אִם ־ לֹא שָׁמַעְתָּ אֱלֹהֵי עוֹלָם ׀ יְהוָה בּוֹרֵא קְצוֹת הָאָרֶץ לֹא יִיעַף וְלֹא יִיגָע אֵין חֵקֶר לִתְבוּנָתֽוֹ ׃

אַֽל ־ תִּתְהַלֵּל בְּיוֹם מָחָר כִּי לֹא ־ תֵדַע מַה ־ יֵּלֶד יֽוֹם ׃

גַּל ־ עֵינַי וְאַבִּיטָה נִפְלָאוֹת מִתּוֹרָתֶֽךָ ׃

שְׁמַע עֵצָה וְקַבֵּל מוּסָר לְמַעַן תֶּחְכַּם בְּאַחֲרִיתֶֽךָ ׃

לִמְנוֹת יָמֵינוּ כֵּן הוֹדַע וְנָבִא לְבַב חָכְמָֽה ׃

בִּבְכִי יָבֹאוּ וּֽבְתַחֲנוּנִים אֽוֹבִילֵם אֽוֹלִיכֵם אֶל ־ נַחֲלֵי מַיִם בְּדֶרֶךְ יָשָׁר לֹא יִכָּשְׁלוּ בָּהּ כִּֽי ־ הָיִיתִי לְיִשְׂרָאֵל לְאָב וְאֶפְרַיִם בְּכֹרִי הֽוּא ׃ ס

כִּי אִם לַבִּינָה תִקְרָא לַתְּבוּנָה תִּתֵּן קוֹלֶֽךָ ׃

אָז תָּבִין יִרְאַת יְהוָה וְדַעַת אֱלֹהִים תִּמְצָֽא ׃

אַנְשֵׁי ־ רָע לֹא ־ יָבִינוּ מִשְׁפָּט וּמְבַקְשֵׁי יְהוָה יָבִינוּ כֹֽל ׃

כִּי מֹצְאִי מצאי חַיִּים וַיָּפֶק רָצוֹן מֵיְהוָֽה ׃

בִּֽישִׁישִׁים חָכְמָה וְאֹרֶךְ יָמִים תְּבוּנָֽה ׃

עִמּוֹ חָכְמָה וּגְבוּרָה לוֹ עֵצָה וּתְבוּנָֽה ׃

בָּֽא ־ זָדוֹן וַיָּבֹא קָלוֹן וְֽאֶת ־ צְנוּעִים חָכְמָֽה ׃

¹ וַיַּעַן אִיּוֹב וַיֹּאמַֽר ׃

² אָמְנָם יָדַעְתִּי כִי ־ כֵן וּמַה ־ יִּצְדַּק אֱנוֹשׁ עִם ־ אֵֽל ׃

³ אִם ־ יַחְפֹּץ לָרִיב עִמּוֹ לֹֽא ־ יַעֲנֶנּוּ אַחַת מִנִּי ־ אָֽלֶף ׃

⁴ חֲכַם לֵבָב וְאַמִּיץ כֹּחַ מִֽי ־ הִקְשָׁה אֵלָיו וַיִּשְׁלָֽם ׃

¹² וְֽהַחָכְמָה מֵאַיִן תִּמָּצֵא וְאֵי זֶה מְקוֹם בִּינָֽה ׃

¹³ לֹא ־ יָדַע אֱנוֹשׁ עֶרְכָּהּ וְלֹא תִמָּצֵא בְּאֶרֶץ הַֽחַיִּֽים ׃

¹⁴ תְּהוֹם אָמַר לֹא בִי ־ הִיא וְיָם אָמַר אֵין עִמָּדִֽי ׃

¹⁵ לֹא ־ יֻתַּן סְגוֹר תַּחְתֶּיהָ וְלֹא יִשָּׁקֵל כֶּסֶף מְחִירָֽהּ ׃

¹⁶ לֹֽא ־ תְסֻלֶּה בְּכֶתֶם אוֹפִיר בְּשֹׁהַם יָקָר וְסַפִּֽיר ׃

¹⁷ לֹא ־ יַעַרְכֶנָּה זָהָב וּזְכוֹכִית וּתְמוּרָתָהּ כְּלִי ־ פָֽז ׃

¹⁸ רָאמוֹת וְגָבִישׁ לֹא יִזָּכֵר וּמֶשֶׁךְ חָכְמָה מִפְּנִינִֽים ׃

¹⁹ לֹֽא ־ יַעַרְכֶנָּה פִּטְדַת ־ כּוּשׁ בְּכֶתֶם טָהוֹר לֹא תְסֻלֶּֽה ׃ פ

²⁰ וְֽהַחָכְמָה מֵאַיִן תָּבוֹא וְאֵי זֶה מְקוֹם בִּינָֽה ׃

²¹ וְֽנֶעֶלְמָה מֵעֵינֵי כָל ־ חָי וּמֵעוֹף הַשָּׁמַיִם נִסְתָּֽרָה ׃

²² אֲבַדּוֹן וָמָוֶת אָמְרוּ בְּאָזְנֵינוּ שָׁמַעְנוּ שִׁמְעָֽהּ ׃

וְהַיְלָדִים הָאֵלֶּה אַרְבַּעְתָּם נָתַן לָהֶם הָֽאֱלֹהִים מַדָּע וְהַשְׂכֵּל בְּכָל ־ סֵפֶר וְחָכְמָה וְדָנִיֵּאל הֵבִין בְּכָל ־ חָזוֹן וַחֲלֹמֽוֹת ׃

אֲדֹנָי יְהֹוִה נָתַן לִי לְשׁוֹן לִמּוּדִים לָדַעַת לָעוּת אֶת ־ יָעֵף דָּבָר יָעִיר ׀ בַּבֹּקֶר בַּבֹּקֶר יָעִיר לִי אֹזֶן לִשְׁמֹעַ כַּלִּמּוּדִֽים ׃

הוֹי הַיֹּרְדִים מִצְרַיִם לְעֶזְרָה עַל ־ סוּסִים יִשָּׁעֵנוּ וַיִּבְטְחוּ עַל ־ רֶכֶב כִּי רָב וְעַל פָּֽרָשִׁים כִּֽי ־ עָצְמוּ מְאֹד וְלֹא שָׁעוּ עַל ־ קְדוֹשׁ יִשְׂרָאֵל וְאֶת ־ יְהוָה לֹא דָרָֽשׁוּ ׃

וְגַם ־ הוּא חָכָם וַיָּבֵא רָע וְאֶת ־ דְּבָרָיו לֹא הֵסִיר וְקָם עַל ־ בֵּית מְרֵעִים וְעַל ־ עֶזְרַת פֹּעֲלֵי אָֽוֶן ׃

יִרְאַת יְהוָה מוּסַר חָכְמָה וְלִפְנֵי כָבוֹד עֲנָוָֽה ׃

קֹֽנֶה ־ לֵּב אֹהֵב נַפְשׁוֹ שֹׁמֵר תְּבוּנָה לִמְצֹא ־ טֽוֹב ׃

יִשְׁמַע חָכָם וְיוֹסֶף לֶקַח וְנָבוֹן תַּחְבֻּלוֹת יִקְנֶֽה ׃

כִּֽי ־ גָבְהוּ שָׁמַיִם מֵאָרֶץ כֵּן גָּבְהוּ דְרָכַי מִדַּרְכֵיכֶם וּמַחְשְׁבֹתַי מִמַּחְשְׁבֹתֵיכֶֽם ׃

רַק ־ בְּזָדוֹן יִתֵּן מַצָּה וְאֶת ־ נוֹעָצִים חָכְמָֽה ׃

וְנָחָה עָלָיו רוּחַ יְהוָה רוּחַ חָכְמָה וּבִינָה רוּחַ עֵצָה וּגְבוּרָה רוּחַ דַּעַת וְיִרְאַת יְהוָֽה ׃

וַהֲרִיחוֹ בְּיִרְאַת יְהוָה וְלֹֽא ־ לְמַרְאֵה עֵינָיו יִשְׁפּוֹט וְלֹֽא ־ לְמִשְׁמַע אָזְנָיו יוֹכִֽיחַ ׃

יְֽהוָה בְּחָכְמָה יָֽסַד ־ אָרֶץ כּוֹנֵן שָׁמַיִם בִּתְבוּנָֽה ׃

כִּי בְּצֵל הַֽחָכְמָה בְּצֵל הַכָּסֶף וְיִתְרוֹן דַּעַת הַֽחָכְמָה תְּחַיֶּה בְעָלֶֽיהָ ׃

הִגִּיד לְךָ אָדָם מַה ־ טּוֹב וּמָֽה ־ יְהוָה דּוֹרֵשׁ מִמְּךָ כִּי אִם ־ עֲשׂוֹת מִשְׁפָּט וְאַהֲבַת חֶסֶד וְהַצְנֵעַ לֶכֶת עִם ־ אֱלֹהֶֽיךָ ׃ פ

גַּם ־ זֹאת מֵעִם יְהוָה צְבָאוֹת יָצָאָה הִפְלִיא עֵצָה הִגְדִּיל תּוּשִׁיָּֽה ׃ ס

כִּֽי ־ יְהוָה יִתֵּן חָכְמָה מִפִּיו דַּעַת וּתְבוּנָֽה ׃

יַדְרֵךְ עֲנָוִים בַּמִּשְׁפָּט וִֽילַמֵּד עֲנָוִים דַּרְכּֽוֹ ׃

חֲכַם ־ לֵב יִקַּח מִצְוֺת וֶאֱוִיל שְׂפָתַיִם יִלָּבֵֽט ׃

גַּם אֱוִיל מַחֲרִישׁ חָכָם יֵחָשֵׁב אֹטֵם שְׂפָתָיו נָבֽוֹן ׃

מַחֲשָׁבוֹת בְּעֵצָה תִכּוֹן וּבְתַחְבֻּלוֹת עֲשֵׂה מִלְחָמָֽה ׃

הַשְׁמִיעֵנִי בַבֹּקֶר ׀ חַסְדֶּךָ כִּֽי ־ בְךָ בָטָחְתִּי הוֹדִיעֵנִי דֶּֽרֶךְ ־ זוּ אֵלֵךְ כִּֽי ־ אֵלֶיךָ נָשָׂאתִי נַפְשִֽׁי ׃

דֶּרֶךְ אֱוִיל יָשָׁר בְּעֵינָיו וְשֹׁמֵעַ לְעֵצָה חָכָֽם ׃

מָֽה ־ רַבּוּ מַעֲשֶׂיךָ ׀ יְֽהוָה כֻּלָּם בְּחָכְמָה עָשִׂיתָ מָלְאָה הָאָרֶץ קִנְיָנֶֽךָ ׃

וְהוֹלַכְתִּי עִוְרִים בְּדֶרֶךְ לֹא יָדָעוּ בִּנְתִיבוֹת לֹֽא ־ יָדְעוּ אַדְרִיכֵם אָשִׂים מַחְשָׁךְ לִפְנֵיהֶם לָאוֹר וּמַֽעֲקַשִּׁים לְמִישׁוֹר אֵלֶּה הַדְּבָרִים עֲשִׂיתִם וְלֹא עֲזַבְתִּֽים ׃

דְּרָכֶיךָ יְהוָה הוֹדִיעֵנִי אֹרְחוֹתֶיךָ לַמְּדֵֽנִי ׃

הַדְרִיכֵנִי בַאֲמִתֶּךָ ׀ וְֽלַמְּדֵנִי כִּֽי ־ אַתָּה אֱלֹהֵי יִשְׁעִי אוֹתְךָ קִוִּיתִי כָּל ־ הַיּֽוֹם ׃

בְּטַח אֶל ־ יְהוָה בְּכָל ־ לִבֶּךָ וְאֶל ־ בִּֽינָתְךָ אַל ־ תִּשָּׁעֵֽן ׃

בְּכָל ־ דְּרָכֶיךָ דָעֵהוּ וְהוּא יְיַשֵּׁר אֹֽרְחֹתֶֽיךָ ׃

כִּי לֹא מַחְשְׁבוֹתַי מַחְשְׁבוֹתֵיכֶם וְלֹא דַרְכֵיכֶם דְּרָכָי נְאֻם יְהוָֽה ׃

אַל ־ תְּהִי חָכָם בְּעֵינֶיךָ יְרָא אֶת ־ יְהוָה וְסוּר מֵרָֽע ׃

פִּֽי ־ צַדִּיק יֶהְגֶּה חָכְמָה וּלְשׁוֹנוֹ תְּדַבֵּר מִשְׁפָּֽט ׃

נֵר ־ לְרַגְלִי דְבָרֶךָ וְאוֹר לִנְתִיבָתִֽי ׃

מֵיְהוָה מִֽצְעֲדֵי ־ גֶבֶר כּוֹנָנוּ וְדַרְכּוֹ יֶחְפָּֽץ ׃

נֹצֵר פִּיו שֹׁמֵר נַפְשׁוֹ פֹּשֵׂק שְׂפָתָיו מְחִתָּה ־ לֽוֹ ׃

עֹשֵׂה אֶרֶץ בְּכֹחוֹ מֵכִין תֵּבֵל בְּחָכְמָתוֹ וּבִתְבוּנָתוֹ נָטָה שָׁמָֽיִם ׃

כִּי בְתַחְבֻּלוֹת תַּעֲשֶׂה ־ לְּךָ מִלְחָמָה וּתְשׁוּעָה בְּרֹב יוֹעֵֽץ ׃

יָדַעְתִּי יְהוָה כִּי לֹא לָאָדָם דַּרְכּוֹ לֹֽא ־ לְאִישׁ הֹלֵךְ וְהָכִין אֶֽת ־ צַעֲדֽוֹ ׃

לָךְ ׀ אֱלָהּ אֲבָהָתִי מְהוֹדֵא וּמְשַׁבַּח אֲנָה דִּי חָכְמְתָא וּגְבוּרְתָא יְהַבְתְּ לִי וּכְעַן הֽוֹדַעְתַּנִי דִּֽי ־ בְעֵינָא מִנָּךְ דִּֽי ־ מִלַּת מַלְכָּא הוֹדַעְתֶּֽנָא ׃

לֹֽא ־ יַחְפֹּץ כְּסִיל בִּתְבוּנָה כִּי אִֽם ־ בְּהִתְגַּלּוֹת לִבּֽוֹ ׃

וַיֹּאמֶר אֶל ־ הַשֹּֽׁפְטִים רְאוּ מָֽה ־ אַתֶּם עֹשִׂים כִּי לֹא לְאָדָם תִּשְׁפְּטוּ כִּי לַיהוָה וְעִמָּכֶם בִּדְבַר מִשְׁפָּֽט ׃

עָנֵה דָֽנִיֵּאל וְאָמַר לֶהֱוֵא שְׁמֵהּ דִּֽי ־ אֱלָהָא מְבָרַךְ מִן ־ עָלְמָא וְעַד ־ עָלְמָא דִּי חָכְמְתָא וּגְבוּרְתָא דִּי לֵֽהּ ־ הִֽיא ׃

לְאָדָם מַֽעַרְכֵי ־ לֵב וּמֵיְהוָה מַעֲנֵה לָשֽׁוֹן ׃

כִּי לְאָדָם שֶׁטּוֹב לְפָנָיו נָתַן חָכְמָה וְדַעַת וְשִׂמְחָה וְלַחוֹטֶא נָתַן עִנְיָן לֶאֱסוֹף וְלִכְנוֹס לָתֵת לְטוֹב לִפְנֵי הָֽאֱלֹהִים גַּם ־ זֶה הֶבֶל וּרְעוּת רֽוּחַ ׃

גָּדוֹל אֲדוֹנֵינוּ וְרַב ־ כֹּחַ לִתְבוּנָתוֹ אֵין מִסְפָּֽר ׃

לֵב נָבוֹן יִקְנֶה ־ דָּעַת וְאֹזֶן חֲכָמִים תְּבַקֶּשׁ ־ דָּֽעַת ׃

בַּעֲצָתְךָ תַנְחֵנִי וְאַחַר כָּבוֹד תִּקָּחֵֽנִי ׃

אֶרֶךְ אַפַּיִם רַב ־ תְּבוּנָה וּקְצַר ־ רוּחַ מֵרִים אִוֶּֽלֶת ׃

קְֽנֹה ־ חָכְמָה מַה ־ טּוֹב מֵחָרוּץ וּקְנוֹת בִּינָה נִבְחָר מִכָּֽסֶף ׃

וְהִתְעַנַּג עַל ־ יְהוָה וְיִֽתֶּן ־ לְךָ מִשְׁאֲלֹת לִבֶּֽךָ ׃

בְּהִתְהַלֶּכְךָ ׀ תַּנְחֶה אֹתָךְ בְּֽשָׁכְבְּךָ תִּשְׁמֹר עָלֶיךָ וַהֲקִיצוֹתָ הִיא תְשִׂיחֶֽךָ ׃

כֹּל אֲשֶׁר תִּמְצָא יָֽדְךָ לַעֲשׂוֹת בְּכֹחֲךָ עֲשֵׂה כִּי אֵין מַעֲשֶׂה וְחֶשְׁבּוֹן וְדַעַת וְחָכְמָה בִּשְׁאוֹל אֲשֶׁר אַתָּה הֹלֵךְ שָֽׁמָּה ׃ ס

אַשְֽׁרֵי ־ הָאִישׁ אֲשֶׁר ׀ לֹא הָלַךְ בַּעֲצַת רְשָׁעִים וּבְדֶרֶךְ חַטָּאִים לֹא עָמָד וּבְמוֹשַׁב לֵצִים לֹא יָשָֽׁב ׃

כִּי אִם בְּתוֹרַת יְהוָה חֶפְצוֹ וּֽבְתוֹרָתוֹ יֶהְגֶּה יוֹמָם וָלָֽיְלָה ׃

פֵּתַח דְּבָרֶיךָ יָאִיר מֵבִין פְּתָיִֽים ׃

לֵב אָדָם יְחַשֵּׁב דַּרְכּוֹ וַֽיהוָה יָכִין צַעֲדֽוֹ ׃

לַמְּדֵנִי ׀ לַֽעֲשׂוֹת רְצוֹנֶךָ כִּֽי ־ אַתָּה אֱלוֹהָי רוּחֲךָ טוֹבָה תַּנְחֵנִי בְּאֶרֶץ מִישֽׁוֹר ׃

לְמַֽעַן ־ שִׁמְךָ יְהוָה תְּחַיֵּנִי בְּצִדְקָתְךָ ׀ תוֹצִיא מִצָּרָה נַפְשִֽׁי ׃

הוֹרֵנִי יְהוָה דַּרְכֶּךָ וּנְחֵנִי בְּאֹרַח מִישׁוֹר לְמַעַן שׁוֹרְרָֽי ׃

יִרְאַת יְהוָה רֵאשִׁית דָּעַת חָכְמָה וּמוּסָר אֱוִילִים בָּֽזוּ ׃ פ