1 Paulo, nɔ nɛ Mawu tsɛ kɛ ha Yesu Kristo Manye Munyu ɔ fiɛmi ɔ, kɛ wa nyɛmi Sostene nɛ ngma womi nɛ ɔ 2 kɛ mane Mawu asafohi nɛ ngɛ Korinto ɔ. A ji nihi nɛ Mawu tsɛ kaa e bimɛ nɛ e tsukɔ a he ngɛ Kristo mi. A kɛ womi nɛ ɔ mane nihi tsuo hu nɛ ngɛ he fɛɛ he nɛ waa kɛ mɛ tsɛɛ Nutsɔ Yesu Kristo biɛ ɔ.

3 Jɔɔmi kɛ he jɔmi nɛ je wa Tsɛ Mawu kɛ Nutsɔ Yesu Kristo dɛ mi ɔ ha nyɛ tsuo.

4 I naa Mawu si daa ngɛ dloomi nike ni agbohi nɛ e ngɔ ha nyɛ ngɛ Kristo nihi nɛ nyɛ ji ɔ he. 5 E pee nyɛ ni nali ngɛ nyɛ wami be kulaa mi, nɛ e ye kɛ bua nyɛ ngɛ e he munyu tumi kɛ tsɔɔmi kɛ ni lemi tsuo mi. 6 Nɛ nɔ́ nɛ i de nyɛ kaa Kristo ma tsu ha nyɛ ɔ, e ba mi. 7 Amlɔ nɛ ɔ, nyɛ nine su dloomi kɛ jɔɔmi kɛ mumi mi nike ni kɛ he wami nɔ, ejakaa nyɛ tsu e suɔmi nya ni be mi nɛ nyɛ ngɛ wa Nutsɔ Yesu Kristo bami ekohu ɔ blɔ hyɛe ɔ. 8 Nɛ lɛ nɔuu e maa da nyɛ se kpɛii kɛ ya nyagbe konɛ yayami kɛ fɔ bumi ko nɛ ko hi nyɛ he ngɛ wa Nutsɔ Yesu Kristo bami ligbi ɔ nɔ. 9 Anɔkualetsɛ ji Mawu nɛ e maa pee enɛ ɔ ha nyɛ, ejakaa e yeɔ e si womi nɔ, nɛ lɛ nɔuu ji nɔ nɛ tsɛ nyɛ kɛ ba e kɛ e Bi wa Nutsɔ Yesu Kristo huɛ bɔmi ɔ mi.

10 Se, anyɛmimɛ suɔli, i kpa nyɛ pɛɛ ngɛ Nutsɔ Yesu Kristo biɛ mi kaa nyɛ kpa nya sami, nɛ nyɛ ha kake peemi nɛ hi nyɛ kpɛti ngɛ juɛmi kɛ níhi a he susumi mi konɛ mi gbami nɛ ko ba asafo ɔ mi. 11 Ejakaa, anyɛmimɛ suɔli, Kloe we ɔ mi bi komɛ ba de mi nya sami kɛ pɛ nɛ ngɛ nyɛ kpɛti ɔ. 12 Nɛ nyɛ ti nɔ tsuaa nɔ ngɛ nɔ́ kpa dee. Ni komɛ ke, "Ami lɛɛ Paulo se nyɛɛlɔ ji mi"; nɛ ni komɛ hu de ke, "Ami lɛɛ Apolo nɔ́ ji mi"; aloo "Ami lɛɛ Petro nɔ́ ji mi." Nɛ ni komɛ hu ngɛ dee ke, "Ami lɛɛ Kristo nitsɛ nɔ́ ji mi." 13 Enɛ ɔ tsɔɔ kaa nyɛ gba Kristo mi tsɔwitsɔwi.

Anɛ ami Paulo ji nɔ nɛ gbo ngɛ nyɛ he yayami ɔmɛ a he lo? Anɛ Paulo biɛ mi nɛ a baptisi nyɛ ngɔ wo lo? 14 I naa Mawu si kaa i baptisi we nyɛ ti nɔ ko, kaa ja Krispo kɛ Gaio pɛ; 15 konɛ nɔ ko nɛ ko de ke i ngɛ nɔ́ ko he pee aloo i je "Paulo Asafo" sisi. 16 Nɛ i baptisi Stefana weku ɔ hu, se kɛ je lɔ ɔ se ɔ, i kai we kaa i baptisi nɔ kpa ko hu. 17 Ejakaa Kristo tsɔɛ mi kaa ma ba baptisi nihi. Se mohu ma ba fiɛ Manye Munyu ɔ; pi ngɛ ni lemi nya, bɔ nɛ pee nɛ ma ko ha nɛ Kristo Sɛumi tso ɔ he sane ɔ nɛ pee gu.

18 I Le klɛdɛɛ bɔ nɛ e ji kuasia sane kɛ ha nihi nɛ laa blɔ ɔ, ke a de mɛ ke Kristo gbo nɛ e kɛ he a yi wami ɔ. Se wɔ ni nɛmɛ nɛ a he wa yi wami ɔ, wa yo munyu nɛ ɔ kaa e ji Mawu he wami. 19 Ejakaa Mawu de ke, "Ma puɛ adesa yi wami hemi he blɔ nya tomi ɔmɛ tsuo, bɔ fɛɛ bɔ nɛ juɛmi ngɛ mi ha, nɛ i be ga leli ɔmɛ a ga amɛ tue bue, ke a hi saminya tete po."

20 Jije ni leli ɔmɛ kɛ womi mi leli kpanaa amɛ kɛ je nɛ ɔ mi munyu mi hlali agbo ɔmɛ ngɛ? Mawu ha nɛ mɛ tsuo a plɛ kuasiahi nɛ a ni lemi pee ni lemi gu. 21 Ejakaa ngɛ Mawu nile nya a, e ha we he blɔ kaa je ɔ nɛ gu nɔmlɔ ni lemi nɔ kɛ le lɛ. Nɛ enɛ ɔ he je ɔ, e he nihi kulaa nɛ he e munyu ɔ nɛ je ɔ susu kaa kuasia sane ɔ ye ɔ yi wami. 22 E ji kuasia sane kɛ ha Yuda bi ɔmɛ, ejakaa a ngɛ hlae nɛ a na hiɔwe okadi ko lolo nɛ tsɔɔ kaa anɔkuale fiɛmi i; nɛ e ji kuasia fiɛmi kɛ ha Hela bi ɔmɛ hu, ejakaa a dii ni lemi se, nɛ ja a he je ɔ, nɔ́ nɛ kɛ a ni lemi ɔ sɔ nɛ a heɔ yeɔ. 23 Lɔ ɔ he je ɔ, benɛ Yuda bi ɔmɛ naa wa he abofu kaa wa fiɛ ke Kristo gbo bɔ nɛ pee nɛ e he a yi wami ɔ, wɔ jali ɔmɛ lɛɛ e ji kuasia sane ngɛ a tue mi. 24 Se Mawu bli nihi nɛ e tsɛ kɛ ba yi wami hemi mi ɔ a hɛ ngmɛ konɛ a na kaa Kristo ji Mawu he wami agbo nɛ ma he a yi wami. Nɛ Kristo ɔ nitsɛ ji Mawu blɔ nya tomi nɛ e ma kɛ kpɔ mɛ ɔ e nyatsɛ. 25 Mawu blɔ nya tomi nɛ a susu kaa e ji kuasia blɔ nya tomi ɔ, nile ngɛ mi hluu pe nimli a nile, nɛ Mawu gbɔjɔmi he wa hluu pe nɔmlɔ adesa he wami.

26 Anyɛmimɛ suɔli, nyɛ kai bɔ nɛ nyɛ ngɛ loko Kristo tsɛ nyɛ ɔ, kaa nyɛ ti nihi bɔɔ pɛ nɛ ngɛ biɛ agbohi kɛ he wami kɛ sika. 27 Se mohu Mawu ngɔ juɛmi nɛ je ɔ susu kaa nile be mi ɔ ke tsu ni konɛ e kɛ gbe nihi nɛ je ɔ le kaa ni leli ɔ zo. 28 E gu blɔ nya tomihi nɛ je ɔ bui nɛ a gbe he guɛ ɔ nɔ nɛ e kɛ ba nihi nɛ je ɔ susu kaa a ji nimli nguahi ɔ si, 29 konɛ nɔ ko nɛ ko fia ngɛ Mawu hɛ mi.

30 Ejakaa Mawu kɛkɛ mi nɛ nyɛ na wami ngɛ kɛ gu Yesu Kristo nɔ. E tsɔɔ wɔ Mawu yi wami hemi he blɔ nya tomi ɔ, nɛ lɛ ji nɔ nɛ ha nɛ wa sa Mawu hɛ mi. E tsu wa he nɛ e pee wɔ klɔuklɔu; nɛ e ngɔ e he kɛ ha kɛ wo wa yi wami hemi he hiɔ. 31 Nɛ kaa bɔ nɛ Ngmami ɔ deɔ ɔ, "Ke nɔ ko maa fia a, e fia ngɔ fɔ nɔ́ nɛ Nutsɔ ɔ pee ɔ nɔ."