1 Ke i tuɔ gbi kpahi nɛ ngɛ hiɔwe kɛ zugba nɛ ɔ nɔ nɛ i kase we tete, se i be ni kpahi a he suɔmi ɔ, lɛɛ i ngɛ kaa ngmlɛ nɛ pɛɛ gu. 2 Nɛ ke a pee mi gbalɔ nɛ i le nɔ́ tsuaa nɔ, nɛ i naa nɔ́ nɛ maa ba hwɔɔ se, nɛ i ngɛ hemi kɛ yemi nɛ ma nyɛ ha yoku nɛ hia kɛ je he nɛ e ngɛ, se i be suɔmi ɔ, lɛɛ ye he be se nami ko kulaa. 3 Nɛ ke i ngɔ ye nihi tsuo ngɔ ke ohiafohi, nɛ a sa ye nɔmlɔ tso ɔ hɛ ngmengmle mi ngɛ Manye Munyu ɔ fiɛmi he se i be suɔmi ɔ, i be he se ko nae.

4 Suɔmi mi jɔ nɛ e toɔ e tsui si. Suɔmi hɛ kɔɛ nɛ e ji hunga. Suɔmi wo we e he nɔ, nɛ e pee we pupuupu. 5 Suɔmi pee we níhi nɛ sɛ, e klɔɛ lɛ nitsɛ e nɔ́ mi, nɛ e wo we e nya nɔ ngɛ nɔ nɔ. Suɔmi hla we lɛ nitsɛ e nɔ́ se blɔ, e na we abofu, nɛ e kɛ nɔ tɔmi wui e mi. 6 Suɔmi nya we amimi yemi he, se mohu e nyaa anɔkuale he. 7 Ke o ngɛ nɔ ko he suɔmi ɔ, o yeɔ lɛ anɔkuale ngɛ nɔ́ tsuaa nɔ mi; o heɔ e nɔ yeɔ. O ngɛ hɛ nɔ kami ngɛ e mi nɛ o fiɔ e se daa.

8 Gbami kɛ gbi slɔɔtohi a tumi se maa po, nɛ nile kɛ Mawu dloomi nike ni ɔmɛ kɛ he wami ɔmɛ kulaa a se maa po, se suɔmi se be poe gbleegbleegblee. 9 Amlɔ nɛ ɔ, nɔ́ bɔɔ ko pɛ wa le kɛ wa dloomi nike ni ɔmɛ, nɛ nihi nɛ a dloo mɛ fiɛmi he wami ɔ, a fiɛmi ɔmɛ hu tete pi si. 10 Se ke a pee wɔ nɛ wa hi kɛ pi si ɔ, lɛɛ dloomi nike ni nɛ ɔmɛ nɛ sui ɔ, a se dimi se maa po.

11 Benɛ i ji jokuɛ ɔ, i tuɔ munyu kaa jokuɛ, nɛ i susuu nihi a he kaa jokuɛ. Se benɛ i wa nɛ i pee nyumu nɔkɔtɔma a, ye juɛmi nya wa pe jokuɛ mi juɛmi ɔ. Ja a he je ɔ, i sake jokuɛwi a ni peemi ɔmɛ ngɔ pue he. 12 Ja a nɔuu nɛ wa hyɛɔ Mawu, nɛ wa nuɔ Mawu sisi fa kɛ fa amlɔ nɛ ɔ, kaa nɔ́ nɛ wa ngɛ lɛ hyɛe tsuu ngɛ ahuhuɛ nɛ mi tsɔ we mi. Se wa maa na lɛ kɛ pi si hɛ mi kɛ hɛ mi ligbi ko. Amlɔ nɛ ɔ, nɔ́ nɛ i le ɔ, e mi tsɔ we, se jamɛ a ligbi ɔ lɛɛ ma na nɔ́ tsuaa nɔ paa kaa bɔ nɛ Mawu naa ye tsui mi kɛ pii si ɔ.

13 Níhi etɛ nɛ a se pui ji, hemi kɛ yemi, hɛ kɛ nɔ fɔmi kɛ suɔmi. Se a ti nɔ́ nɛ kle pe kulaa ji suɔmi.