Korinto1 8

Wɔhi a niye ni hami

1 Jehanɛ ɔ, ngɛ nɔ́ nɛ kɔɔ wɔ nya niye ni yemi he, kaa bɔ nɛ nyɛ de ɔ, "Wɔ kulaa wa le ni." Wa le ni mohu, se ni lemi haa nɔ woɔ e he nɔ. Nɔ́ nɛ he hia ji suɔmi nɛ wa ma kɛ ha nɛ asafo ɔ nɛ pi si. 2 Ke nɔ́ ko susu kaa e le nɔ́ tsuaa nɔ ɔ, e ngɛ tsɔɔe kaa e li nɔ́ ko nɔ́ ko. 3 Se nɔ nɛ suɔ Mawu kɛ e tsui mi kulaa ji nɔ nɛ Mawu he nile ngɛ e mi.

4 Ke ja a, lɛɛ kɛ ji lɛ kɛɛ? Anɛ e sa kaa waa ye wɔhi a nya niye ni lo? Wɔ tsuo wa le klɛdɛɛ kaa wɔ ko wɔ ko be je nɛ ɔ mi, nɛ jehanɛ ɔ hu Mawu kake too nɛ ngɛ, nɛ mawu kpa ko be hu. 5 Ni komɛ deɔ ke mawuhi fuu ngɛ hiɔwe kɛ zugba a nɔ. 6 Se wɔɔ lɛɛ wa le kaa Mawu kake too nɛ ngɛ, nɛ lɛ ji Tsɛ ɔ nɛ bɔ nɔ́ tsuaa nɔ́, nɛ e pee wɔ lɛ nitsɛ e nihi; kɛ Nutsɔ Yesu Kristo kake, nɔ nɛ lɛɛ e nɔ a gu kɛ bɔ nɔ́ tsuaa nɔ́, nɛ lɛ e haa wɔ wami ɔ.

7 Se anyɛmimɛ Kristo se nyɛɛli komɛ ngɛ nɛ a li anɔkuale sane nɛ ɔ. Nɛ kɛ ba si mwɔnɛ ɔ, a susu kaa wɔhi ngɛ wami; lɔ ɔ he je ɔ, a kɛ hemi kɛ yemi yeɔ wɔhi a nya bɔ sami niye ni ɔ, se a he nile haoɔ mɛ nɛ e kojoɔ mɛ. 8 Nyɛ kai kaa niye ni gba we waa kɛ Mawu wa kpɛti. Ke wa ye ɔ, e be hae nɛ waa hi pe bɔ nɛ wa ngɛ ɔ. Nɛ ke wa yi hu, wa laa we nɔ́ ko. 9 Nyɛɛ hyɛ nɛ hi nɛ nyɛ ko da he blɔ nɛ ɔ nɔ nɛ nyɛɛ ye, nɛ lɔ ɔ nɛ ba tɔtɔ nyɛmimɛ nɛ a hemi kɛ yemi mi wɛ kaa nyɛ nɔ ɔ nane.

10 Nyɛɛ hyɛ, bɔ nɛ e maa ba ha ji, nɔ nɛ susuu kaa e ji yayami ke e ye niye ni nɛ ɔ, ke e na mo ni lelɔ nɛ o hii si ngɛ wɔ piɛ mi ngɛ yee ɔ, e maa wo lɛ he wami nɛ lɛ hu e ma ya ye: Tsɛ be ɔ, moo lɛɛ o le kaa e pee we nɔ́ ko mohu, se lɛɛ e susuu kaa e sɛ nɛ a yeɔ. 11 Lɔ ɔ he je ɔ, o ni lemi ɔ maa pee hɛ mi kpatami nɔ́ kɛ ha nyɛmi nɛ gbɔjɔ ngɛ mumi mi, nɛ e he Kristo ba gbo ngɛ ɔ. 12 Nɛ ke o ha o nyɛmi pee nɔ́ ko nɛ e susu kaa e hi ɔ, o pee yayami kɛ si lɛ, nɛ yayami nɛ o pee kɛ si o nyɛmi ɔ, Kristo nɛ o pee kɛ si. 13 Ja a he je ɔ, ke wɔhi a nya bɔ sami lo yemi ma ha ye nyɛmi maa pee yayami ɔ, lɛɛ i be yee gbleegbleegblee ngɛ ye wami si himi mi, bɔ nɛ pee nɛ ma ko ha nɛ ye nyɛmi ɔ nane nɛ kpata.