1 Mɛni he je nɛ ke nyɛ ti nɔ ko kɛ e nyɛmi Kristo se nyɛɛlɔ na sane ɔ, e ke lɛ yɛ e nyɛmimɛ Kristo se nyɛɛli a ngɔ nɛ a ye sane ɔ ha lɛ, se e ya woɔ e he munyu ngɛ nihi nɛ pi Mawu jali a ngɔ. 2 Anɛ nyɛ li kaa wɔ Kristo se nyɛɛli ji ni nɛmɛ nɛ maa ye je ɔ nɔ, nɛ wa maa kojo hwɔɔ se ko lo? Mɛni he je nɛ nyɛ nyɛ we munyu tsɔwitsɔwi nɛ ɔmɛ nɛ nyɛɛ kojo ngɛ nyɛ kpɛti mɔ? 3 Anɛ nyɛ li hu kaa wɔ ji ni nɛmɛ nɛ maa kojo hiɔwe bɔfo ɔmɛ po lo? Lɔ ɔ he je ɔ, e sa kaa nyɛ nyɛ nɛ nyɛɛ ye nyɛ nitsɛmɛ nyɛ sanehi ngɛ zugba nɛ ɔ nɔ nɛ e ko wa ha nyɛ. 4 Mɛni he je mɔ nɛ nyɛ woɔ nyɛ sanehi kɛ ya haa nihi nɛ be nyɛ kpɛti nɛ a pi Kristo se nyɛɛli tete? 5 Anɛ zo gbi nyɛ lo? Anɛ ni lelɔ ko kulaa be asafo ɔ mi nɛ ma nyɛ sane nɛ ɔmɛ maa ye lo? 6 Asafo ɔ mi no ya woɔ e nyɛmi asafo mi no he munyu nɛ e kɛ lɛ yeɔ sane ngɛ nihi nɛ pi Kristo se nyɛɛli a hɛ mi.

7 Nɛ kaa nyɛ Kristo se nyɛɛli nyɛɛ kɛ nyɛ he maa hi munyu yee ɔ, e ji si gbeemi. Mɛni he je nyɛ sume nɛ ke a pee nyɛ nɔ́ nɛ dɛ ɔ, nyɛɛ ngmɛɛ he kɛkɛ? E ji hɛ mi nyami womi kɛ ha Nutsɔ ɔ, ke nyɛ ha nɛ a sisi nyɛ gu. 8 Se nyɛ nitsɛmɛ mohu ji yayami peeli ɔmɛ, nɛ nyɛ sisiɔ nihi kɛ nyɛ nyɛmimɛ tete po.

9 Anɛ nyɛ li kaa nihi nɛ peeɔ nɔ́ nɛ ɔmɛ ɔ, a nine be Mawu Matsɛyemi ɔ nɔ sue lo? Nyɛ ko sisi nyɛ he! Yakayaka ni peeli nɛ ji wɔ jali kɛ ajuama bɔli loo nyumuhi nɛ kɛ a nyɛmi nyumuhi peeɔ yakayaka ni; 10 kɛ juli kɛ hɛ tsuli kɛ da deli kɛ nɔ he guɛ gbeli a nine be Hiɔwe Matsɛyemi ɔ nɔ sue. 11 Nyɛ ti ni komɛ pee kikɛmɛ a ni nɛ ɔmɛ hyɛ, se amlɔ nɛ ɔ, a fɔ nyɛ he yayami ɔmɛ ngɛ nyɛ he, nɛ a ngɔ nyɛ kɛ to ha Mawu, nɛ e ngɔ nyɛ ngɛ nɔ́ nɛ Nutsɔ Yesu Kristo kɛ Mawu Mumi ɔ tsu kɛ ha nyɛ ɔ he je. 12 I ngɛ he blɔ nɛ i peeɔ nɔ́ tsuaa nɔ mohu, se tsa pi ni nɛ ɔmɛ kulaa eko nɛ hi kɛ ha mi. Nɛ ke a ha mi he blɔ kaa ma pee nɔ́ tsuaa nɔ nɛ i suɔ tete ɔ, ke jamɛ a nɔ́ ɔ maa ye ye nɔ nɛ i be nyɛe kpami ɔ, i be pee. 13 Ke waa kɛ niye ni to enɛ ɔ he ɔ, Mawu ha wɔ niye ni ke waa ye kɛ muklii nɛ e wɛɛ niye ni ɔ. Se enɛ ɔ tsɔɔ we kaa waa ye niye ni ɔ nɛ waa tɔ tsɔ. Nyɛ ko susu niye ni he kaa nɔ́ ko nɛ he hia tsɔ, ejakaa Mawu ma ha nɛ muklii kɛ niye ni tsuo se maa po ligbi ko.

Ajuama bɔmi hi, ejakaa a bɔɛ wa nɔmlɔ tso ɔmɛ kɛ ha ajuama bɔmi. Se mohu a bɔ mɛ kɛ ha Nutsɔ ɔ, nɛ Nutsɔ ɔ suɔ nɛ e hi wa nɔmlɔ tso ɔmɛ a mi. 14 Nɛ kaa bɔ nɛ Mawu tle Nutsɔ Yesu Kristo si kɛ je gbeje ɔ, ja a nɔuu e ma tle wa nɔmlɔ tso ɔmɛ si kɛ je gbeje ngɛ e he wami nya. 15 Anɛ nyɛ li kaa nyɛ nɔmlɔ tso ɔmɛ ɔ Kristo nitsɛ he nihi ji mɛ lo? Ma nyɛ ma ngɔ Kristo he fa ko kɛ to ajuama bɔlɔ he lo? Dabi! 16 Aloo nyɛ li kaa ke nɔ ko kɛ e he bɔ ajuama bɔlɔ he ɔ, e kɛ lɛ peeɔ nɔmlɔ tso kake lo? Ejakaa Mawu de wɔ ngɛ Ngmami ɔ mi kaa mɛ ni enyɔ ɔmɛ kulaa a plɛ he lo kake ngɛ e hɛ mi. 17 Se nɔ nɛ kɛ e he ha Nutsɔ ɔ, e kɛ Kristo peeɔ nɔmlɔ kake.

18 Enɛ ɔ he je nɛ i deɔ ke nyɛɛ tu ajuama bɔmi nya fo ɔ nɛ. Yayami ko be nɛ puɛɔ nɔmlɔ tso ɔ kaa ajuama bɔmi; nɛ nɔ nɛ bɔɔ ajuama a, e ji yayami nɛ e peeɔ kɛ siɔ lɛ nitsɛ e Nɔmlɔ tso ɔ. 19 Anɛ nyɛ li kɛ sa kaa nyɛ nɔmlɔ tso ɔmɛ ɔ Mumi Klɔuklɔu ɔ nɛ Mawu kɛ ha nyɛ nɛ ngɛ nyɛ mi ɔ e sihi he i lo? Tsa pi nyɛ nitsɛmɛ nyɛ nihi ji nyɛ nɔmlɔ tso ɔmɛ. 20 Ejakaa Mawu he nyɛ kɛ jua nɛ wa. Lɔ ɔ he je ɔ, nyɛɛ ngɔ nyɛ nɔmlɔ tso ɔmɛ kɛ wo Mawu hɛ mi nyami, ejakaa e nihi ji nɔmlɔ tso ɔmɛ.