1 Jehanɛ ɔ, anyɛmimɛ, i suɔ nɛ ma tsɔɔ nyɛ Mumi mi dloomi nike nihi pɔtɛɛ nɛ a ha wa ti nɔ tsuaa nɔ ɔ. 2 Nyɛ ma kai kaa loko a tsɛ nyɛ nɛ nyɛ ba plɛ Kristo nihi ɔ, nyɛ jaa wɔhi nɛ eko tui munyu. 3 Se amlɔ nɛ ɔ, nyɛɛ kɛ nihi ngɛ kpee nɛ a tsɛɔ a he Mawu Mumi mi gbali. Kɛ nyɛ maa pee kɛ le kaa Mawu nɛ tsɔ mɛ aloo lakpa nɛ a ngɛ yee kɛɛ? Nyɛ maa le mɛ kɛ gu a munyu tumihi a mi, ejakaa nɔ nɛ tuɔ munyu ngɛ Mawu Mumi ɔ mi ɔ, e gbiɛ Yesu, nɛ nɔ ko be nyɛe ma de kɛ je e tsui mi ke Yesu ji Nutsɔ kaa ja Mumi Klɔuklɔu ɔ ngɔ wo e nya.

4 Mawu dloo wɔ nike nihi slɔɔtohi kɛ gu Mumi Klɔuklɔu kake ɔ nɔuu nɔ. 5 Mawu sɔmɔmi ni tsumi slɔɔtohi ngɛ, se Nutsɔ kake ɔ nɔuu wa kɛ sɔmɔɔ. 6 Nɛ ni tsumihi slɔɔtohi hu ngɛ, se Mawu kake ɔ nɛ guɔ blɔ slɔɔtohi a nɔ kɛ tsuɔ ngɛ wa wami mi. 7 Nɛ Mawu Mumi ɔ jeɔ Mawu he wami ɔ kpo kɛ guɔ wa ti nɔ tsuaa nɔ nɔ konɛ wa na he blɔ kɛ ye kɛ bua asafo ɔ tsuo.

8 Mumi ɔ dloo nɔ ko nile nɛ e kɛ haa ga womi; nɛ nɔ ko hu jamɛ a Mumi ɔ nɔuu dloo lɛ ni kasemi kɛ ni tsɔɔmi. 9 Jamɛ a Mumi ɔ nɔuu dloo nɔ ko hemi kɛ yemi titli ko, nɛ nɔ ko hu Mumi ɔ dloo lɛ hiɔ tsami he wami. 10 Nɔ ko lɛɛ Mumi ɔ dloo lɛ he wami nɛ e kɛ tsuɔ nyakpɛ nihi. A haa nɔ ko lɛɛ gbami kɛ Mawu Munyu ɔ fiɛmi dloomi nike ni; nɔ ko hu a dloo lɛ mumihi a si kpami; nɔ ko ɔ, a dloo lɛ gbi slɔɔtohi nɛ e kase we hyɛ a tumi. Nɛ nɔ kpa hu a ha lɛ munyuhi a sisi tsɔɔmi dloomi nike ni ɔ. 11 Se dloomi nike ni nɛ ɔmɛ tsuo ɔ, Mumi Klɔuklɔu kake too ɔ nɔuu nɛ e kɛ haa wa ti nɔ́ tsuaa nɔ bɔ nɛ e suɔ.

12 Kaa bɔ nɛ wa ngɛ nɔmlɔ tso kake se e hɛɛ he nihi fuu, nɛ he ni nɛ ɔmɛ tsuo nɛ peeɔ nɔmlɔ tso kake ɔ, ja a nɔuu ji Kristo Nɔmlɔ tso ɔ nɛ. 13 Wa ti nɔ tsuaa nɔ ɔ, Yuda bi jio, Hela bi jio, nyɔguɛhi jio, odehehi jio, Kristo nɔmlɔ tso kake ɔ he níhi ji wɔ tsuo; nɛ Mumi Klɔuklɔu kake ɔ nɛ baptisi wɔ ngɔ wo Kristo Nɔmlɔ tso kake ɔ mi, nɛ e dloo wɔ kulaa jamɛ a Mumi ɔ nɔuu.

14 Nɔmlɔ tso ɔ hɛɛ he nihi fuu. 15 Ke nane ma de ke akɛnɛ e pi nine he je ɔ, tsa pi Nɔmlɔ tso ɔ he ni ɔmɛ eko ji lɛ ɔ, lɔ ɔ tsɔɔ we kaa tsa pi nɔmlɔ tso ɔ he nɛ nane lɛɛ e ngɛ. 16 Nɛ ke tue hu ma de ke akɛnɛ tsa pi hɛ ngmɛ ji lɛ he je ɔ tsa pi nɔmlɔ tso ɔ he ni ɔmɛ eko ji lɛ ɔ, anɛ lɔ ɔ tsɔɔ kaa lɛɛ tsa pi nɔmlɔ tso ɔ he nɛ e ngɛ lo? 17 Ke nɔmlɔ tso mluku ɔ kulaa ji hɛ ngmɛ ɔ, kɛ nɔmlɔ ɔ maa pee kɛ nu nɔ́ kɛɛ? Aloo ke nɔmlɔ tso mluku ɔ kulaa hine tue agbo kake too ɔ nɛɛ kɛ a maa pee kɛ nu nɔ́ he fu kɛɛ?

18 Se pi ja a nɛ Mawu bɔ wɔ. E bɔ nɔmlɔ tso ɔ he nihi fuu nɛ e ngɔ eko tsuaa eko ngɔ ma nɔmlɔ tso ɔ he nɛ e suɔ. 19 Kɛ nɔmlɔ tso ɔ maa hi kɛɛ, ke ji e ngɛ he nɔ́ mluguduu kake pɛ? 20 Lɔ ɔ he je ɔ, a pee nɔmlɔ tso ɔ he nihi fuu mohu, se nɔmlɔ tso ɔ kake i. 21 Hɛ ngmɛ be nyɛe ma de nine ke, "I hla we mo." Nɛ yi hu be nyɛe ma de nanehi ke, "I hla we nyɛ."

22 Nɔmlɔ tso ɔ he ni komɛ nɛ peeɔ kaa a he wɛ nɛ a he hia we ɔ, mɛ mohu ji níhi nɛ a he hiaa wawɛɛ. 23 E hi kaa wa ngɛ nɔmlɔ tso ɔ he ni komɛ nɛ he be fɛu. Nɛ wa dlaa jamɛ a nɔmlɔ tso he nɔ́ ɔmɛ saminya nɛ a ko na. 24 Se níhi nɛ a he ngɛ fɛu nɛ a naa a, a hia we he dlami nɛ ɔ. Lɔ ɔ he je nɛ Mawu to nɔmlɔ tso ɔ ngɛ blɔ ko nɔ bɔ nɛ pee nɛ a wo hɛ mi nyami kɛ bumi kɛ ha e he nihi nɛ be fɛu ɔ. 25 Enɛ ɔ ha we nɛ mi gbami baa he ni ɔmɛ a kpɛti, se mɛ tsuo a baa a si bi a yi. 26 Ke nɔmlɔ tso ɔ he ni kake ngɛ nɔ́ nae ɔ, he ni ɔmɛ kulaa kɛ lɛ naa nɔ́. Nɛ ke a wo nɔmlɔ tso ɔ he ni ɔmɛ a ti nɔ kake hɛ mi nyami ɔ, nɔmlɔ tso he ni ɔmɛ kulaa bua jɔɔ a he.

27 Jehanɛ ɔ, bɔ nɛ i ngɛ tsɔɔe ji, nyɛ tsuo ɔ, Kristo Nɔmlɔ tso kake ɔ he níhi ji nyɛ, nɛ nyɛ ti nɔ tsuaa nɔ he hia. 28 Nɔmlɔ tso he ni ɔmɛ ekomɛ nɛ e ngɔ to asafo ɔ nɛ ji e Nɔmlɔ tso ɔ nya ji: bɔfohi kɛ gbali, nihi nɛ fiɛɔ Mawu Munyu ɔ; tsɔɔli, nyakpɛ ni tsuli, nihi nɛ a dloo mɛ he wami kɛ ha hiɔ tsami, yemi ke buali, nihi nɛ a hyɛɔ ni tsuli a nɔ, nihi nɛ a tuɔ gbi slɔɔtohi nɛ pi a ya kase ngɛ he ko. 29 Anɛ nɔ tsuaa nɔ ji bɔfo lo? Dabi! Anɛ nɔ tsuaa nɔ ji Mawu Munyu ɔ fiɛlɔ lo? Dabi! Anɛ nihi tsuo ji tsɔɔli lo? Anɛ nɔ tsuaa nɔ ngɛ he wami nɛ a kɛ tsuɔ nyakpɛ ni lo? 30 Anɛ nɔ tsuaa nɔ ngɛ he wami nɛ a kɛ tsaa hiɔ lo? Dabi! Anɛ Mawu dloo nɔ tsuaa nɔ he wami nɛ e kɛ tuɔ gbi slɔɔtohi nɛ e kase we gblee lo? Anɛ nɔ tsua nɔ nyɛɔ tsɔɔ gbi kpahi a sisi lo? 31 Dabi! Se nyɛɛ lɛɛ nyɛɛ bɔ mɔde nɛ nyɛ nine nɛ su dloomi nike nihi nɛ he hia pe kulaa amɛ a nɔ. Se kekleekle ɔ, nyɛ ha ma tsɔɔ nyɛ nɔ́ kpa ko nɛ hi pe kulaa.