1 Jehanɛ ɔ, ngɛ sika nɛ nyɛ ngɛ tsue kɛ maa mane Yerusalem asafo ɔ blɔ fa mi ɔ, nyɛ hu nyɛɛ nyɛɛ blɔ nya tomi nɛ i to kɛ ha Galatia asafo ɔmɛ ɔ nɔ. 2 Daa Hɔgba a, nyɛ ti nɔ tsuaa nɔ nɛ je nɔ́ ko kɛ je otsi hiɔwo nɛ e na a mi kɛ to nɛ e kɛ tsu onia a. Nɔ tsuaa nɔ nɛ tsu onia a ngɛ bɔ nɛ Nutsɔ ɔ ye kɛ bua lɛ nɛ e na a nya. Nyɛ ko mlɛ nɛ ma ba loko nyɛ tsu onia a. 3 Nɛ ke i ba a, i ma ngma womi kɛ piɛ nyɛ nike ni ɔmɛ a he kɛ ha tsɔli nɛ nyɛ suɔ kaa a wo nyɛ nike ni ɔmɛ kɛ ya Yerusalem ɔ. 4 Nɛ ke e sa kaa ami hu ma piɛ a he kɛ ya a, i kɛ mɛ maa ya.

5 I ma ya gu Makedonia, se ye se ya be kɛe ngɛ lejɛ ɔ loko ma ba slaa nyɛ. 6 Eko ɔ, i ma hi nyɛ ngɔ be saii; nɛ eko ɔ, i ma ye fiɛ be ɔ hu ngɛ nyɛ ngɔ konɛ nyɛɛ wo mi blɔ kɛ ya he tsuaa he nɛ i ma ya a. 7 Jehanɛ ɔ, i be nyɛ slaae ngɛ si dami nya kɛkɛ. Ke Nutsɔ ɔ maa ngmɛ blɔ ɔ, i ma suɔ nɛ ma hi nyɛ ngɔ bɔɔ. 8 Se i ma hi Efeso kɛ ya su Pentekoste He Jɔɔmi Ligbi ɔ nɔ. 9 A bli blɔ ko ha mi kɛ ha Mawu Munyu ɔ fiɛmi kɛ ni tsɔɔmi ngɛ lejɛ ɔ. Ejakaa he nyɛli babauu ngɛ lejɛ ɔ.

10 Ke Timoteo ba nyɛ ngɔ ɔ, nyɛ ha nɛ e hɛ nɛ muɔ si, ejakaa e ngɛ Nutsɔ ɔ ni ɔ tsue kaa ami nɔuu. 11 Nɔ ko nɛ ko nyange lɛ, nɛ nɔ ko nɛ ko bu lɛ kaa jokuɛ nɛ a kua lɛ. Nɛ ke e ye e be ɔ ta a, nyɛɛ wo lɛ blɔ kɛ bua jɔmi kɛ mane mi. I ngɛ lɛ kɛ nyɛmi ɔmɛ blɔ hyɛe. 12 I kpa wa nyɛmi Apolo pɛɛ hluu nɛ e ba slaa nyɛ, se e pee we lɛ kaa Mawu suɔ kaa e ba nyɛ ngɔ amlɔ nɛ ɔ. Se e maa ba nyɛ ngɔ ke e na he blɔ.

13 Nyɛ hɛ nɛ ko je nyɛ he nɔ ngɛ oslaahi a he. Nyɛɛ da si kpɛii ngɛ Nutsɔ ɔ mi. Nyɛɛ pee nyumu nɛ nyɛ he nɛ wa. 14 Nɛ nyɛɛ pee nɔ́ tsuaa nɔ ngɛ mi mi jɔmi kɛ suɔmi mi.

15 Anɛ nyɛ kai Stefana kɛ e we mi bi ɔmɛ lo? Mɛ ji Akaia kekle Kristo se nyɛɛli ɔmɛ ɔ nɛ. Nɛ a ngɔ a wami be ɔ kulaa kɛ ngɛ Kristo ni tsumi ɔ tsue, nɛ a ngɛ Kristo se nyɛɛli wae ngɛ he fɛɛ he. 16 I kpa nyɛ pɛɛ nɛ nyɛɛ bu mɛ tue, nɛ nyɛɛ ye kɛ bua mɛ kɛ nihi kulaa nɛ ngɔ a he kɛ ha ni tsumi ɔ nɛ a ngɛ dengme gboe ngɛ nyɛ ngɔ ɔ. 17 E ngɔ ye nya kaa Stefana kɛ Fortunato kɛ Akaiko ba slaa mi ngɛ hiɛ ɔ. A ngɛ yee kɛ ngɛ mi buae ngɛ nyɛ nane mi. 18 A ba wo ye bua saminya nɛ a ha nɛ i na tsui. I heɔ yeɔ kaa ja a nɔuu nɛ a wo nyɛ hu nyɛ bua. I he ye kaa nyɛ bua jɔɔ ni tsumi nɛ kikɛmɛ a nimli nɛ ɔmɛ tsuɔ ɔ he.

19 Asia asafo ɔmɛ kulaa biɔ nyɛ. Akuila kɛ Priskila kɛ nihi nɛ peeɔ sɔlemi ngɛ a we ɔmɛ a mi ɔ kulaa biɔ nyɛ saminya. 20 Nyɛmimɛ ɔmɛ kulaa ngɛ hiɛ ɔ ke a biɔ nyɛ. Nyɛ nga nyɛ he nɛ nyɛɛ ta nyɛ bi a dɛ mi kɛ suɔmi ke nyɛ kpe.

21 Ami nitsɛ nɛ i ngɛ womi nɛ ɔ nyagbe ɔ ngmae ɔ nɛ. 22 Ke nɔ ko ngɛ nɛ sume Mawu ɔ, Jamɛatsɛ ɔ, gbiɛmi ngɛ e nɔ. Nutsɔ Yesu, ba! 23 Nutsɔ Yesu Kristo suɔmi ɔ kɛ e dloomi ɔ kɛ nyɛ nɛ hi si. 24 Yesu suɔmi ɔ kɛ nyɛ tsuo nɛ hi si, ejakaa Kristo Yesu níhi ji wɔ tsuo.