1 Anyɛmimɛ suɔli, i kɛ nyɛ ngɛ munyu tue kaa bimwɔwi ngɛ Mawu jami mi, nihi nɛ a be Nutsɔ ɔ mi, se mohu a ngɛ he lo se die. I be nyɛe nɛ i kɛ nyɛ maa tu munyu kaa Kristo se nyɛɛli nɛ a hyi tɔ kɛ Mumi ɔ. 2 I ha nyɛ nyɔ, pi niye ni nɛ he wa, ejakaa nyɛ nyɛ we nɛ nyɛɛ ta niye ni nɛ he wa. Nɛ amlɔ nɛ ɔ tete po nyɔ ɔ nɔuu a ma kɛ lɛ nyɛ. 3 Ejakaa bimwɔwi ji nyɛ ngɛ Mawu jami mi, nɛ kɛ ba su amlɔ nɛ ɔ, nyɛ nyɛɛ we ngɛ Mawu blɔ tsɔɔmi nya se mohu ngɛ he lo nya. Nɛ nyɛ ngɛ nyɛ he hunga jee. Nɛ pɛ tsɔwi gba nyɛ mi ɔ nɛɛ, anɛ enɛ ɔ tsɔɔ we kaa bimwɔwi ji nyɛ nɛ nyɛ ngɛ nɔ́ nɛ nyɛ nitsɛmɛ nyɛ suɔ pee kɛ sa lo? Niinɛ, nyɛ ngɛ nyɛ je mi bae kaa nihi nɛ a pi Nutsɔ ɔ bimɛ kulaa. 4 Nɛ nyɛ ngɛ pɛe ngɛ i kɛ Apolo wa ti nɔ nɛ pa e nyɛmi he. Nɛ nyɛ ha asafo ɔ mi gba a, anɛ e tsɔɔ we kaa nyɛ wɛ kulaa ngɛ Mawu jami mi lo?

5 Mɛnɔ kulaa ji mi, nɛ mɛnɔ kulaa ji Apolo nɛ a pɛɛ ngɛ e he? Mawu sɔmɔli kɛkɛ ji wɔ, nɛ wa hɛɛ nike ni titli komɛ, nɛ kɛ gu wa nɔ ɔ, nyɛ he ye. 6 Ami lɛɛ i du wu ɔ ngɛ nyɛ tsui mi, nɛ Apolo pue nɔ nyu. Nɛ tsa pi wɔ, se Mawu nɛ ha e wa. 7 Se tsa pi nɔ nɛ du wu ɔ aloo nɔ nɛ pue nɔ nyu ɔ nɛ he hia, se mohu Mawu nɔ nɛ ha nɛ e wa a ji nɔ nɛ he hia. 8 I kɛ Apolo ngɛ kuu kake mi kɛ ngɛ ni tsue. Wa hɛɛ oti kake se a maa wo wa ti nɔ tsuaa nɔ hiɔ ngɛ e ni tsumi ɔ he. 9 Wɔɔ lɛɛ Mawu he piɛli kɛkɛ ji wɔ ngɛ ni tsumi mi. Se nyɛɛ lɛɛ Mawu abɔɔ kɛ e tsu ji nyɛ.

10 Ngɛ Mawu dloomi nya a, e pee mi tsu mami he galɔ. I tsua si voo nɛ i to tsu ɔ sisi, nɛ Apolo fia nɔ. Se nɔ nɛ fiaa tsu nɛ a to sisi nɔ ɔ, e sa nɛ e hyɛ nɛ e fia lɛ nɛ hi. 11 Nɛ sisi kpa ko be nɛ nɔ ko maa to nɛ maa hi pe nɔ́ nɛ a to momo nɛ ji Kristo ɔ. 12 Se tsu mami nihi slɔɔtoslɔɔtohi ngɛ nɛ a ma kɛ fia jamɛ a tsu nɛ a to sisi ɔ nɔ. Ni komɛ kɛ sika tsu fiaa, nɛ ni komɛ hu kɛ sika hiɔ loo tɛ nɛ he jua wa loo tso loo nga maa tsu ɔ. 13 Se be ma nɛ a maa ka maa hyɛ nɔ́ nɛ nɔ tsuaa nɔ kɛ ma e tsu ɔ ha ngɛ Kojomi Ligbi ɔ nɔ. Ejakaa a maa ka nɔ tsuaa nɔ ni tsumi kɛ gu la mi bɔ nɛ pee nɛ a na e ni tsumi ɔ paa kaa e gbe nya nɛ e hi kɛ pi si lo. 14 Nɛ ni tsulɔ tsuaa ni tsulɔ nɛ fia e tsu ɔ ngɛ sisi nɛ a to nɔ kɛ tsu mami ni kpakpahi nɛ tsu ɔ nyɛ da si ɔ, e nine maa su e hiɔwo nɔ. 15 Se ke e tsu ɔ sa a, lɛɛ e maa je mi dɛ gu. A ma he lɛ nitsɛ e yi wami mohu, se e maa pee kaa nɔ ko nɛ tu fo kɛ gu la glegleegle mi.

16 Anɛ nyɛ li kaa nyɛ tsuo Mawu Sɔlemi We ji nyɛ, nɛ Mawu Mumi ɔ hii nyɛ mi lo? 17 Ke nɔ ko wo Mawu Sɔlemi We ɔ he mu nɛ e puɛ lɛ ɔ, Mawu ma kpata e hɛ mi. Ejakaa Mawu Sɔlemi We ɔ he tsɔ nɛ e ngɛ klɔuklɔu, nɛ nyɛ ji jamɛ a we ɔ nɛ.

18 Nyɛ kpa nyɛ he mlɔɔmi. Ke nyɛ ti nɔ ko wo e he kɛ to je nɛ ɔ mi nihi a he nɛ e susu kaa ni lelɔ ji lɛ ɔ, e maa hi ha lɛ kaa e ngmɛɛ jamɛ a juɛmi ɔ he nɛ e pee e he kuasia bɔ nɛ pee nɛ lɔ ɔ nɛ ko tsi lɛ hiɔwe nile nami he blɔ. 19 Ejakaa je nɛ ɔ mi ni lemi ɔ ji kuasia nɔ́ ko ngɛ Mawu hɛ mi; kaa bɔ nɛ a de ngɛ Hiob Womi ɔ mi ke, Mawu guu ni lelɔ nitsɛ e hɛ mi tɛmi ɔ nɔ kɛ nuɔ lɛ; lɛ nitsɛ e ni lemi ɔ haa e hɛ mi kpataa. 20 Jehanɛ ɔ hu a de wɔ ngɛ David La Womi ɔ mi ke, Nutsɔ ɔ le bɔ nɛ nɔmlɔ adesa juɛmi tsuɔ ni ha, kaa kuasia kɛ yaka nihi e tsuɔ. 21 Lɔ ɔ he je ɔ, nyɛ ko fia ngɔ fɔ je nɛ ɔ mi ni leli a nɔ. Ejakaa Mawu ha nyɛ nyɛ hiami níhi kulaa momo. 22 E ha nyɛ Paulo kɛ Apolo kɛ Petro kaa nyɛ he piɛli; nɛ e ha nyɛ je nɛ ɔ tsuo nɛ nyɛ tsu he ni. Nɛ wami kɛ gbenɔ tete ɔ, nyɛ sɔmɔli ji mɛ, Nihi tsuo nɛ ngɛ amlɔ nɛ ɔ kɛ nihi nɛ maa ba amɛ kulaa nyɛ nihi ji mɛ. 23 Se nyɛɛ lɛɛ Kristo nihi ji nyɛ, nɛ Kristo ɔ, Mawu nɔ́ i.