1 Lɔ ɔ he je ɔ, e sa nɛ a bu Apolo kɛ ami kaa Kristo sɔmɔli kɛ Mawu Munyu ɔ fiɛli kɛ e laami sane ɔmɛ a mi tsɔɔli. 2 Nɔ́ nɛ a hlaa ngɛ sɔmɔlɔ tsuaa sɔmɔlɔ dɛ ji kaa e ye e nutsɔ gbi nɔ. 3 Nɛ ami nɛɛ, anɛ i hine sɔmɔlɔ kpakpa lo? I hɛwi ye he ngɛ nɔ́ nɛ nyɛ ma de ngɛ enɛ ɔ he, aloo nɔ́ nɛ nɔ ko ma susu. Nɛ ami nitsɛ po i be ye he nyɛe ma kojo ngɛ enɛ ɔ he. 4 I nɛ yayami ko ngɛ ye he mohu, se lɔ ɔ tsɔɔ we kaa a bu mi bemi, ejakaa Nutsɔ ɔ nitsɛ ji nɔ nɛ maa kojo mi.

5 Ja a he je ɔ, nyɛɛ hyɛ nɛ hi nɛ nyɛ ko kojo nɔ ko kɛ sɛ hlami loko Nutsɔ ɔ nɛ ba nɛ e ba na kaa nɔ́ ko hine sɔmɔlɔ kpakpa loo sɔmɔlɔ tue gbolɔ. Ejakaa ke Nutsɔ ɔ ba a, e kɛ la ma je wa tsuihi a mi ni ɔmɛ kpo nɛ wa ti nɔ tsuaa nɔ maa na bɔ nɛ e nyɛmi ngɛ ha tutuutu. Enɛ ɔ mi nɛ nɔ tsuaa nɔ maa na nɔ́ he je nɛ wa ngɛ Nutsɔ ɔ ni tsue ngɛ. Nɛ jamɛ a ngmlɛfia a nɔ nɛ nɔ tsuaa nɔ ma na e yi jemi nɛ sa lɛ ɔ kɛ je Mawu dɛ mi.

6 Nyɛ he je nɛ i ngɔ Apolo kɛ ami nitsɛ ye he kɛ ngɛ ni nɛ ɔmɛ a he toe ngɛ konɛ ma kɛ tsɔɔ nyɛ nɔ́ nɛ i pɔɔ demi ɔ nya ke, nyɛ ko bu nɔ ko he akɔtaa pe nɔ ko. Nɛ nyɛ ti nɔ ko nɛ ko fia kɛ fɔ Mawu tsɔɔli ɔmɛ a ti nɔ ko nɔ pe nɔ ko. 7 Mɛni ha e slo mo ngɛ nɔ ko he? Nɛ mɛni o ngɛ nɛ pi Mawu nɛ ha mo? Nɛ ke Mawu ji nɔ nɛ ha mo nɔ́ tsuaa nɔ ɔ, mɛni he je mɔ nɛ o ngɛ o he pee agbo kaa nɔ́ nɛ mo nitsɛ o he wami nya nɛ o na nɔ́ nɛ o ngɛ ɔ?

8 E peeɔ nyɛ kaa nyɛ nine su Mumi mi niye ni nɛ he hia nyɛ ɔ tsuo nɔ́ momo. Nyɛ hyi kɛ Mumi ɔ mo; nyɛ plɛ matsɛmɛ ni nali, nɛ nyɛ je wa he ngɛ se lokoo ngɛ matsɛ yee. I na nɛ nyɛ ngɛ matsɛ yee niinɛ bɔ nɛ pee nɛ ke jamɛ a be ɔ su ɔ, waa kɛ nyɛ nɛ ye matsɛ ɔ ngɛ lejɛ ɔ. 9 I susuu be komɛ kaa Mawu ngɔ wɔ bɔfo ɔmɛ ngɔ pee se kpɛli, kaa nihi nɛ a bu mɛ gbenɔ fɔ nɛ a maa gbe mɛ, nɛ a to wɔ kɛ ha nimli kɛ hiɔwe bɔfo ɔmɛ tsuo nɛ a hyɛ wɔ.

10 Wɔɔ lɛɛ nyɛ deɔ ke Mawu jami ha wa pee kuasiahi, se nyɛɛ lɛɛ Kristo se nyɛɛli ni leli kɛ juɛmitsɛmɛ ji nyɛ. Wɔɔ wa gbɔjɔ, se nyɛɛ lɛɛ nyɛ ngɛ he wami. A buu nyɛ, se wɔɔ lɛɛ a yeɔ wa he fɛu. 11 Kɛ ba si ngmlɛfia nɛ ɔ nɔ ɔ, hwɔ kɛ kuma ngɛ wɔ yee, nɛ he hami nihi tete po wa be bɔ nɛ sa nɛ wa ma kɛ tsi fiɛ. A peeɔ wɔ nihi nɛ sɛ, nɛ wa be wɔ nitsɛmɛ wa sihi he ko. 12 Wa gboɔ dengme nɛ wa tsuɔ ni kɛ wa nine konɛ wa na wa nya ngma. Wa jɔɔ nihi nɛ gbiɛɛ wɔ ɔ, nɛ wa toɔ tsui si haa nihi nɛ wa wɔ yi mi ɔ. 13 Benɛ a ngɛ wa he munyu yayahi tue ɔ, wa haa heto kɛ he si bami. Nɛ kɛ ba si piɔ ɔ, wa ngɛ kaa nane si bunyuku kɛ kuku nɔ dwɔmi.

14 I ngmɛ nyɛ ni nɛ ɔmɛ nɛ ma kɛ gbe nyɛ zo, se mohu i ngɛ nyɛ tue nɔ woe kɛ slɔmi kaa bimɛ nɛ a suɔ nyɛ. 15 Ejakaa ke nyɛ ngɛ ni tsɔɔli akpe nyɔngma nɛ maa tsɔɔ nyɛ Kristo he ni tete po ɔ, nyɛ kai kaa ami nɔ kake too ji nyɛ tsɛ. Ejakaa ami ji nɔ nɛ tsɔɔ nyɛ Kristo benɛ i fiɛ Manye Munyu ɔ kɛ ha nyɛ ɔ. 16 Lɔ ɔ he je ɔ, i ngɛ nyɛ pɛɛ kpae nɛ nyɛɛ kase mi.

17 Lɔ ɔ he je nɛ i ngɛ Timoteo nyɛ ngɔ tsɔe ɔ nɛ konɛ e ba ye kɛ bua nyɛ nɛ nyɛɛ pee enɛ ɔ. Lɛ ji nihi nɛ i na kɛ ha Kristo ɔ a ti nɔ kake. E ji ye suɔmi bi anɔkualetsɛ ngɛ Nutsɔ ɔ mi. E ma kai nyɛ nihi nɛ i tsɔɔ ngɛ asafo tsuaa asafo mi he fɛɛ he nɛ i ya a.

18 I le kaa nyɛ ti ni komɛ ngɛ a he nɔ woe, ejakaa a ngɛ susue kaa i be nyɛ ngɔ bae. 19 Se ke Nutsɔ ɔ suɔ ɔ, i be kɛe nɛ i ma ba nyɛ ngɔ. I ma ba na ni nɛmɛ nɛ ngɛ a he nɔ woe ɔ konɛ ma hyɛ mɛ ha kaa a ngɛ Mawu he wami ɔ niinɛ aloo munyu gu tuli kɛkɛ ji mɛ. 20 Ejakaa tsa pi munyu gu tumi mi nɛ Mawu Matsɛyemi ɔ ngɛ, se mohu he wami mi. 21 Kɛ nyɛ ngɛ hlae kɛɛ? Ma ba nyɛ ngɔ kɛ tue gblami aloo ma ba kɛ suɔmi kɛ he jɔmi?