1 Bɔfo ji mi nɛ Mawu tsɔ, i be nɔmlɔ ko sisi. Ami lɛɛ i na Yesu wa Nutsɔ ɔ hɛ mi kɛ hɛ mi; nɛ nyɛ si himi nɛ tsake ɔ ji nyɛ he dengme nɛ i gbo ɔ yiblii nɛ e wo kɛ ha Nutsɔ ɔ. 2 Se ke ni komɛ bui mi kaa bɔfo ɔ, nyɛɛ lɛɛ i ji bɔfo kɛ ha nyɛ, ejakaa ye ni tsumi ɔ nɔ a gu kɛ kpɔ nyɛ kɛ ha Kristo. 3 Enɛ ɔ ji heto nɛ i ngɛ ni nɛmɛ nɛ bi mi he blɔ nɛ i ngɛ ɔ hae.

4 Anɛ i be he blɔ kaa i yeɔ ni nɛ i nuu kaa bɔfo kpa amɛ lo? 5 Anɛ i be he blɔ kaa i kɛ nyɛmiyo nɛ ji ye tsu nya yo hiaa blɔ kaa bɔ nɛ kaseli kpa amɛ kɛ nyɛmimɛ ngɛ Nutsɔ ɔ mi kɛ Petro peeɔ ɔ lo? 6 Anɛ i kɛ Barnaba kɛkɛ nɛ sa ni tsumi, konɛ nyɛɛ lɛɛ nyɛ ha ni kpa amɛ a hiami nihi lo? 7 Ta hwulɔ te nɔ nɛ woɔ lɛ nitsɛ e he hiɔ nɛɛ? Aloo ngmɔ hulɔ te nɔ nɛ kpaa ni ngɛ lɛ nitsɛ e ngmɔ nɔ se e be he blɔ nɛ e yeɔ eko nɛɛ? Aloo to lɛlɔ te nɔ nɛ ngɛ jijɔ kɛ apletsihi lɛe se e be he blɔ nɛ e nuɔ a nyɔ nyu ɔ eko nɛɛ? 8 Tsa pi níhi nɛ nimli susuu ɔ kɛkɛ nɛ i ngɛ dee nɛ ma kɛ tsɔɔ nɔ́ nɛ da, se mohu i ngɛ nyɛ tue se tsɛe kɛ ba Mawu Mlaa amɛ a he. 9 Ejakaa a ngma ngɛ Mlaa nɛ Mawu ha Mose ɔ mi ke, "Mo ko fi na nɛ ngɛ blɛfo gblɛe ɔ e nya kaa e ko ye eko." Anɛ nyɛ susuu kaa nahi kɛkɛ a he nɛ Mawu de enɛ ɔ ngɛ lo? 10 Anɛ pi wɔ hu wa he munyu nɛ e ngɛ tue lo? Wa he e ngɛ susue ɔ nɛ; nɛ e ngɛ tsɔɔe kaa ni nɛmɛ nɛ nyɛmimɛ Kristo se nyɛɛli tsuɔ ni kɛ haa a, e sa nɛ a woɔ mɛ hiɔ. Lɔ ɔ he je ɔ, ni nɛmɛ nɛ huɔ kɛ ni nɛmɛ nɛ hluɛɔ blɛfo ɔ, a hɛ nɛ hi nɔ́ kaa mɛ hu a maa ye eko.

11 Wɔɔ lɛɛ wa du mumi mi wu kpakpahi kɛ wo nyɛ klaahi a mi. Anɛ e ji nɔ́ ko nɛ he maa wa ha nyɛ tsɔ ke wa bi nyɛ niye ni kɛ tade lo? 12 Nyɛ kɛ haa nihi nɛ ba fiɛɛ kɛ haa nyɛ, nɛ e sa ja. Se anɛ e sɛ kaa wɔ hu wa naa eko nɛ hiɛ pe a nɔ́ ɔ tete po kɛ jee nyɛ ngɔ lo? Se kɛ ɔ, wa di kikɛmɛ a he blɔ nɛ ɔ se, nɛ wa tsuɔ wa hiami níhi a he ni, nɛ nyɛ yi kɛ bua we wɔ. Wa bi we hiɔ womi ko kɛ ji nyɛ ngɔ, ejakaa wa sume nɛ lɔ ɔ nɛ ba pee blɔ tsimi nɔ́ ko kɛ ha nyɛ nɛ nyɛ ko ba nya Kristo Manye Munyu ɔ he.

13 Anɛ nyɛ kai we kaa ni nɛmɛ nɛ tsuɔ ni ngɛ Sɔlemi We ɔ, Mawu de mɛ ke a ye nike ni ɔmɛ nɛ a kɛ baa Sɔlemi We ɔ eko lo? Nɛ ni nɛmɛ nɛ tsuɔ ni ngɛ Mawu bɔ sami la tɛ ɔ he ɔ, anɛ nyɛ kai we kaa mɛ hu a yeɔ bɔ sami la tɛ ɔ nɔ nike ni ɔmɛ eko lo? 14 Ja a nɔuu kɛ Mawu to blɔ nya kaa ni nɛmɛ nɛ fiɛɔ e Manye Munyu ɔ mɛ hu a na nɔ́ ko kɛ je ni nɛmɛ nɛ heɔ Munyu ɔ ye ɔ a dɛ. 15 Se ami lɛɛ i bi we nyɛ pɛsua po hyɛ. Nɛ i be womi nɛ ɔ ngmae nɛ ma kɛ kai nyɛ kaa nyɛɛ pee kikɛmɛ a ni nɛ ɔmɛ kɛ ha mi. Anɔkuale ji kaa i ma suɔ nɛ hwɔ nɛ gbe mi pe nɔ nɛ i ma tsi bua jɔmi nɛ i naa ngɛ Munyu ɔ nɛ i fiɛɛ gu ɔ nya. 16 Nɛ Manye Munyu ɔ fiɛmi pi fiami nɔ ko kɛ ha mi, ejakaa a kɛ fɔ ye nɔ kaa ma fiɛ. Kusiɛ ha mi ke i fiɛ we Manye Munyu ɔ!

17 Kaa ami nitsɛ ye suɔmi nya ni tsumi nɛ i ngɛ tsue jinɛ ma na hiɔwo ko kɛ je Nutsɔ ɔ dɛ, se tsa pi ja i, ejakaa Mawu nɛ tsɛ mi nɛ e kɛ kikɛmɛ a ni tsumi klɔuu nɛ ɔ wo ye dɛ, nɛ i be nya jemi ko. 18 Mɛni ji ye hiɔwo ngɛ blɔ nya tomi nɛ ɔ mi mɔ? Ye hiɔwo ji bua jɔmi nɛ i naa ngɛ Manye Munyu ɔ fiɛmi mi, nɛ i he we nɔ́ ko ngɛ nɔ ko dɛ nɛ i dí ye blɔ nya nɔ ko hu se.

19 Enɛ ɔ he ngɛ se nami pɔtɛɛ ko, ejakaa i pee we nyɔguɛ kɛ ha we nɔ ko ngɛ hiɔwo nɛ e woɔ mi he. Se mohu i kɛ bua jɔmi pee ye he sɔmɔlɔ kɛ ha nɔ tsuaa nɔ konɛ ma nyɛ ma kpɔ mɛ kɛ ha Kristo. 20 Ke i ya Yuda bi ɔmɛ a ngɔ ɔ, i peeɔ ye he Yuda no bɔ nɛ pee nɛ a bu Manye Munyu ɔ tue nɛ ye nine nɛ su a nɔ kɛ ha Kristo. Nɛ ke i su Hela bi ɔmɛ, nihi nɛ yeɔ Yuda bi a mlaahi kɛ kusumi ni peemihi a nɔ a ngɔ ɔ, e ngɛ mi kaa i kɛ mɛ kpa we gbi mohu, se i kɛ mɛ hwuɛ nɔ́ ko he, ejakaa nɔ́ nɛ i ngɛ hlae ji ma ye kɛ bua mɛ. 21 Nɛ ni nɛmɛ nɛ ja we Mawu ɔ, mɛ hu i kɛ mɛ hii si bɔ nɛ ma nyɛ; se i pee we nɔ́ ko nɛ kɛ Kristo jami ɔ sɔɛ. I kɛ mɛ kpaa gbi bɔ nɛ pee nɛ a bua nɛ jɔ ye he nɛ ma nyɛ ma ye kɛ bua mɛ.

22 I pee we ye he ni lelɔ tsɔ ngɛ gbɔjɔli ɔmɛ a kpɛti nɛ ma de ke mɛɛ kuasiahi ji mɛ. Enɛ ɔ he je ɔ, a suɔ kaa ma ye kɛ bua mɛ. Bɔ tsuaa bɔ nɛ nɔ ko ngɛ ha a, i bɔɔ mɔde nɛ i kɛ lɛ peeɔ kake bɔ nɛ pee nɛ ma na he blɔ nɛ ma jaje Kristo Manye Munyu ɔ kɛ tsɔɔ lɛ nɛ Kristo nɛ he e yi wami. 23 I peeɔ enɛ ɔ bɔ nɛ pee nɛ a nine nɛ su Manye Munyu ɔ nɔ. Jehanɛ ɔ hu ami nitsɛ i naa jɔɔmi ke a ba Kristo ngɔ ɔ.

24 A hiɛɛ fuu kɛ kaa fo, se nɔ kake too nɛ yeɔ hlami nɛ e naa jamɛ a blɔ he ɔ he nike ni. Lɔ ɔ he je ɔ, nyɛɛ ka fo ɔ konɛ nyɛɛ ye kunimi ɔ. 25 Loko ji nyɛ maa ye kunimi ɔ, nyɛ kua nyɛ he nɛ nyɛɛ hiɔ níhi fuu nɛ maa tsi nyɛ blɔ ɔ. Fo tulɔ tsuaa fo tulɔ peeɔ enɛ ɔ bɔ nɛ pee nɛ e nine nɛ su ayekoo nike ni nɛ se kɛ we nɔ. Se wɔɔ lɛɛ wa tsuɔ wa ni tsumi ɔ konɛ wa nine nɛ su hiɔwe nike ni nɛ puɛ we ɔ nɔ. 26 Lɔ ɔ he je ɔ, i ngɛ fo ɔ tue tɛɛ kɛ yaa nyagbe he ɔ kɛ oti ngɛ ye hɛ mi. I ngɛ kunɔ nɔe nɛ ma ye kunimi. Tsa pi kɔɔhiɔ nɛ i kɛ ngɛ nɔe, nɛ i fiɛ we hulɔ.

27 I gbaa ye nɔmlɔ tso ɔ nya nɛ i peeɔ lɛ basabasa nɛ i kɛ tsɔɔ lɛ nɔ́ nɛ sa nɛ e tsu, se pi e suɔmi nya i. I peeɔ enɛ ɔ bɔ nɛ pee nɛ nyagbe mi benɛ i bua fo mali ɔmɛ a nya ta a, a ko de ke ami lɛɛ i be he wami nɛ a ngmɛɛ ye he.