1 Se Mumi Klɔuklɔu ɔ deɔ wɔ paa ke ngɛ nyagbe be ɔmɛ a mi ɔ, asafo ɔ mi ni komɛ maa kpale ngɛ Kristo se, nɛ a ma ya nyɛɛ tsɔɔli nɛ hɛɛ Abosiami mumi a se. 2 Tsɔɔli nɛ ɔmɛ toɔ a hɛ mi nɛ a yeɔ lakpa nɛ a he nile bui mɛ fɔ. 3 A deɔ ke e sɛ kaa a ngɔ yo loo a ye de lo, níhi nɛ Mawu bɔ kɛ ha Kristo se nyɛɛli ke a ye nɛ a na lɛ si ngɛ he ɔ. 4 Ejakaa nɔ́ tsuaa nɔ nɛ Mawu bɔ ɔ hi, nɛ wa ma nyɛ ye kɛ bua jɔmi ke wa na si ngɛ he, 5 nɛ wa bi Mawu ke e jɔɔ nɔ ha wɔ ɔ, ejakaa a kɛ Mawu Munyu ɔ kɛ sɔlemi tsukɔɔ he.

6 Ke ji o gba enɛ ɔ mi kɛ tsɔɔ ni kpa amɛ ɔ, lɛɛ o ngɛ o ni tsumi ɔ tsue kaa osɔfo kpakpa, nɔ nɛ hemi kɛ yemi kɛ anɔkuale tsɔɔmi nɛ e ngɛ se nyɛɛe ɔ pi si ngɛ e mi.

7 Ko puɛ o be ngɛ yaka nya sami kɛ nyazia munyuhi a he. Se mohu o ngɔ o be kɛ o he wami ɔ kɛ tsu mumi mi he wami nami he ni. 8 Nɔmlɔ tso ɔ he wami nami he mɔde bɔmi hi, se mumi mi he wami nami he hia wawɛɛ, ejakaa e nɔ nɛ nɔ́ fɛɛ nɔ nɛ o maa pee ɔ daa si ngɛ. Lɔ ɔ he je ɔ, moo bɔ o mumi ɔ he wami nami he mɔde, nɛ o gbo Kristo se nyɛɛlɔ kpakpa peemi he dengme, ejakaa lɔ ɔ maa ye kɛ bua mo ngɛ je nɛ ɔ mi kɛ je nɛ maa ba a hu mi. 9,10 Enɛ ɔ ji anɔkuale ɔ nɛ sa kaa nɔ tsuaa nɔ nɛ pɛtɛ he. Wa ngɛ dengme gboe, nɛ wa ngɛ nɔ nae ngɛ enɛ ɔ he, konɛ nihi nɛ a he nɛ a ye, ejakaa wa ngɛ hemi kɛ yemi ngɛ Mawu hɛ kalɔ ɔ mi, nɔ nɛ ji nɔ tsuaa nɔ Yiwamihelɔ ɔ, titli ɔ, ni nɛmɛ nɛ he e yi wami hemi ɔ ye ɔ.

11 Moo tsɔɔ ni nɛ ɔmɛ, nɛ o bɔ mɔde nɛ nɔ tsuaa nɔ nɛ e kase mɛ saminya. 12 Ko ha he blɔ nɛ a ko bu mo, akɛnɛ niheyo wayo ji mo ɔ. Se mohu moo pee o he nɔ hyɛmi nɔ kɛ ha mɛ, nɛ a nyɛɛ o se ngɛ o tsɔɔmi kɛ je mi bami kɛ suɔmi kɛ hemi kɛ yemi kɛ susumi kpakpa mi. 13 Moo kane nɛ o tsɔɔ asafo ɔ Ngmami ɔmɛ, nɛ o fiɛ Mawu Munyu ɔ kɛ ya si be nɛ i ma ba lejɛ ɔ.

14 Mo tsu Mawu dloomi nike ni ɔmɛ nɛ a ngɔ ha mo kɛ gu e gbali ɔmɛ a nɔ benɛ asafo nikɔtɔma amɛ wo a nine kɛ pue o yi kpɛti ɔ he ni. 15 Mo tsu dloomi nike ni ɔmɛ a he ni; mo wo o he kɛ wo o ni tsumi ɔ mi wawɛɛ konɛ nɔ tsuaa nɔ nɛ na o mɔde bɔmi kɛ o nɔ yami. 16 Nɛ o hyɛ o he nɔ ngɛ nɔ́ tsuaa nɔ nɛ o maa pee kɛ nɔ́ nɛ o ma susu mi. Mo ko ngmɛɛ nɔ́ nɛ ji anɔkuale ɔ he, nɛ Mawu maa jɔɔ mo, nɛ e maa gu o nɔ kɛ ye kɛ bua ni kpahi.