1 Hejɔɔmi Ligbi ɔ eko ɔ, Yesu kɛ e kaseli ɔmɛ ya gu blɛfo ngmɔ komɛ a mi nɛ e kaseli ɔmɛ kpɔ blɛfo ɔ eko nɛ a hluɛ bɔni kpemi.

2 Farisi bi komɛ ka a hɛ mi nɛ a de ke, "Mɛni he je nɛ nyɛ ngɛ Hejɔɔmi Ligbi ɔ mlaa a nɔ tɔe? Nyɛ be he blɔ ngɛ mlaa a nya kaa nyɛ tsuɔ ni ngɛ Hejɔɔmi Ligbi ɔ nɔ."

3 Yesu ha Farisi bi ɔmɛ heto nɛ e de ke, "Anɛ nyɛ kane we Ngmami ɔ lo? Nyɛ kane we nɔ nɛ Matsɛ David pee benɛ hwɔ ngɛ e ke e we bi ɔmɛ yee ɔ lo? 4 Kaa e sɛ Sɔlemi We ɔ nɛ e ya muɔ abolo nɛ a kɛ maa Mawu hɛ mi ɔ, nɛ osɔfo ɔmɛ pɛ nɛ a ngɛ he blɔ nɛ a yeɔ ɔ, nɛ e ye nɛ e ha e we bi ɔmɛ hu eko nɛ a ye ɔ lo?" 5 Nɛ Yesu de kɛ fia se ke, "Nɔmlɔ Bi ɔ ngɛ he wami ngɛ Hejɔɔmi Ligbi ɔ tete nɔ."

6 Hejɔɔmi Ligbi kpa ko nɔ hu e ya ngɛ ni tsɔɔe ngɛ kpe he ɔ nɛ nyumu ko ngɛ lejɛ ɔ nɛ e hiɔ nine gbo. 7 Nɛ Farisi bi ɔmɛ kɛ mlaa tsɔɔli ɔmɛ bɔni lɛ hwɔɔmi kaa e ma tsa hiɔtsɛ ɔ lo bɔ nɛ pee nɛ a na nɔ ko nɔ nɛ a da nɛ a po e nya, ejakaa ligbi ɔ hine Hejɔɔmi Ligbi.

8 Yesu na a juɛmi momoomo. Se e tsɛ hiɔtsɛ ɔ nɛ e de lɛ ke e te si nɛ e ba da si ngɛ he nɛ nɔ tsuaa nɔ maa na lɛ ngɛ.

9 Kɛkɛ nɛ Yesu de Farisi bi ɔmɛ kɛ mlaa tsɔɔli ɔmɛ ke, "I ngɛ munyu ko nɛ i suɔ nɛ ma bi nyɛ. Anɛ e da kaa a pee kpakpa aloo a pee yayami ngɛ Hejɔɔmi Ligbi ɔ nɔ? E hi kaa a he nɔ yi wami aloo a kpata e hɛ mi?"

10 Yesu plɛ nɛ e hyɛ a hɛ mi kakaaka kɛ kpe, kɛkɛ nɛ e de hiɔtsɛ ɔ ke, "Moo bɔle o nine ɔ." Nɛ e bɔle e nine ɔ, kɛkɛ nɛ e nine ɔ mi wa kaa kaketsɛ ɔ.

11 Se enɛ ɔ puɛ e he nyɛli ɔmɛ a tsui nɛ a na e he abofu nɛ a bɔni ga hlami wo e he nɛ a tane e yi.

12 Enɛ ɔ se ɔ, e kɛ we nɛ e ho yoku ɔmɛ a nɔ ya nɛ e ya sɔle nyɔnyɔɔnyɔ kɛ je nanɛɛ. 13 Benɛ je na a, e tsɛ e se nyɛɛli ɔmɛ kɛ ba bua nɛ e hla a kpɛti ni nyɔngma kɛ enyɔ nɛ e wo mɛ ngɔ pee e kaseli ɔmɛ a nya dali. 14-16 Mɛ ji: Simon, nɔ nɛ e wo lɛ ke Petro ɔ, Andrea nɛ ji Simon nyɛmi ɔ, Yakobo, Yohane, Filipo, Bartolomeo, Mateo, Toma, Yakobo, Alfeo bi ɔ, Simon, nɔ nɛ e biɛ kpa hu ji Zelote, nɛ e sisi ji "Hɛ dɔ" ɔ, Yuda nɛ ji Yakobo bi ɔ, kɛ Yuda Iskariot, nɔ nɛ pee se nɛ e tsɔɔ Yesu se blɔ ɔ.

17 Benɛ a kple si kɛ je yoku ɔ nɔ ɔ, a ba da si ngɛ magbɛ ko nɔ nɛ nimli babauu ba bua wo Yesu kɛ ni nɛmɛ nɛ e hla a kɛ e se nyɛɛli kpa amɛ a he. A ji nihi nɛ je Yudea kɛ Yerusalem kɛ Tiro kɛ Zidon wo nya ma amɛ a mi tɔɔ kɛ ba nɛ a ba bu Yesu tue nɛ e tsa a hiɔhi ha mɛ. 18 Nɛ e hia mumi yayamihi ngɛ nihi fuu a mi. 19 Nɔ tsuaa nɔ bɔ mɔde kaa e maa ta Yesu he, ejakaa ke e ngɛ hiɔtsɛ ɔmɛ tsae ɔ, he wami jee e mi nɛ ke mo nɔ ɔ ta e he ɔ, e he wami ɔ sɛɔ o mi, kɛkɛ mo hu o na he wami. 20 Kɛkɛ nɛ Yesu plɛ e he kɛ kpee e kaseli ɔmɛ nɛ e de mɛ ke,

"A jɔɔ nyɛ nihi nɛ nyɛ be nɔ ko ɔmɛ, ejakaa nyɛ nɔ ji Mawu Matsɛyemi ɔ."

21 "A jɔɔ nyɛ nihi nɛ mwɔnɛ ɔ hwɔ ngɛ nyɛ yee ɔ, ejakaa e maa wo nyɛ nya ngma."

"A jɔɔ nyɛ nihi nɛ mwɔnɛ ɔ nyɛ ngɛ ya foe, ejakaa nyɛ ma ba muɔ kɛ bua jɔmi."

22 "A jɔɔ nyɛ ke ji nihi maa nyɛ nyɛ, a ma jɛ nyɛ, a ma je nyɛ we nɛ a ma puɛ nyɛ biɛ ngɛ ye he. 23 Nyɛ nya nɛ nyɛ bua nɛ jɔ kaa nyɛ ngɛ ni nɛ ɔmɛ nae, ejakaa nyɛ ngɛ hiɔwo ngua ko hwɔɔ se ngɛ hiɔwe. Ja a kɛ̃ nɛ a pee blema gbali ɔmɛ."

24 "Se due ha nihi nɛ ngɛ kpɔtɔɔ mi amlɔ nɛ ɔ; hwɔɔ se bua jɔmi ko be ha mɛ hu."

25 "A kle nɛ a plɔke mwɔnɛ ɔ; se anɔkuale ji kaa hwɔ yobu ko ma ba ye mɛ pee se. Mwɔnɛ ɔ muɔ ngɛ a nya, se a muɔ ɔ ma ba plɛ ya. 26 Kpoo ha nyɛ ke ji kaa nɔ tsuaa nɔ ngɛ nyɛ yi jee nɛ a ngɛ nyɛ he munyu kpakpa tue mwɔnɛ ɔ; ejakaa ja a nɛ a jeɔ lakpa gbali ɔmɛ a yi daa."

27 "Nyɛ tsuo nyɛɛ bu nɔ nɛ i ngɛ dee nɛ ɔ tue saminya. Nyɛɛ suɔ nyɛ he nyɛli. Nɛ nyɛɛ pee nihi nɛ nyɛɛ nyɛ ɔ kpakpa. 28 Nyɛɛ sɔle kaa e hi ha nihi nɛ gbiɛɛ nyɛ ɔmɛ; nɛ nyɛ bi Mawu gbaami kɛ ha nihi nɛ peeɔ nyɛ yayami ɔ."

29 "Ke nɔ ko gba o tue mi ma a, mo ha nɛ e gba kaketsɛ ɔ hu. Ke nɔ ko kpɔ o yi nɔ tade ɔ, mo je sisi nɔ ɔ hu ngɔ piɛ he kɛ ha lɛ. 30 Ke nɔ ko bi mo nɔ ko ɔ, mo ha lɛ. Nɛ ke nɔ ko wo nɔ ko ngɛ o dɛ ɔ, koo di se hu. 31 Nɔ nɛ o suɔ nɛ nihi nɛ a pee ha mo ɔ, mo hu moo pee ja a kɛ ha mɛ."

32 "Ke ji nihi nɛ suɔ mo ɔ kɛkɛ a sane o suɔ ɔ, mɛni yi jemi o susu kaa o ma na? Nihi nɛ li Mawu ɔ hu peeɔ ja a nɔuu. 33 Nɛ ke ji kaa nihi nɛ peeɔ mo kpakpa pɛ nɛ mo hu o peeɔ mɛ kpakpa a nɛɛ, anɛ e ji nyakpɛ nɔ ko lo? Wɔ jali tete peeɔ ja. 34 Nɛ ke ji o paa sika kɛ haa nihi nɛ o le kaa a ma ba ha mo ɔ nɛɛ, mɛni kpakpa o pee? Ejakaa nihi nɛ a yi kpɛti wa saminya tete paa sika kɛ haa a huɛmɛ, ejakaa a le kaa a ma ba to nane mi ha mɛ."

35 "I ngɛ nyɛ dee ke nyɛɛ suɔ nyɛ he nyɛli nɛ nyɛɛ pee mɛ kpakpa. Nyɛɛ pa mɛ nɔ nɛ nyɛ ko hyɛ blɔ kaa a ba to nane mi ha nyɛ. Ke nyɛ pee ja a, nyɛ hiɔwo nɛ nyɛ ma na kɛ je hiɔwe ɔ maa kle; nɛ a maa na nyɛ kaa Mawu bimɛ niinɛ, ejakaa e dlooɔ yi kpɛti wali kɛ nihi nɛ li sina tete po."

36 "Nyɛɛ na mɔbɔ kaa bɔ nɛ nyɛ Tsɛ ɔ naa nyɛ mɔbɔ ɔ.

37 Nyɛ ko kojo, nɛ nyɛ ko bu fɔ konɛ a ko kojo nyɛ nɛ a bu nyɛ fɔ."

38 "Ke nyɛ haa nɔ nɔ ɔ, nihi ma ha nyɛ hu nɔ fuu kɛ be nɔ. A maa wo ha nyɛ nɛ e ma hyi kɛ be nɔ nɛ a maa nyɛ nɔ nɛ a ma pue nɔ ekohu. Ejakaa nɔ ka nɔ nɛ nyɛ ma kɛ ka ha nihi ɔ, zaa jio, agbo jio, jamɛ a nɔ ka nɔ ɔ nɛ a ma kɛ ka ha nyɛ."

39 Yesu ya nɔ nɛ e bu mɛ abɛ nɛ ɔmɛ kɛ tsɔɔ níhi nɛ e ngɛ mɛ dee ɔ nya:

"Nyɛ na hɛ yuyuilɔ nɛ tsɔɔ hɛ yuyuilɔ kpa blɔ hyɛ lo? Mɛ ni enyɔ ɔmɛ tsuo a ma ya nɔ muɔ mi. 40 Kɛ maa pee kɛɛ nɛ kaselɔ maa le ni pe e Tsɔɔlɔ? Se kaselɔ tsuaa kaselɔ nɛ ma wlua e he kɛ kase ni ɔ, e ma ba le ni kaa e tsɔɔlɔ ɔ."

41 "Kɛ o peeɔ kɛ naa tso fɛfɛ nyafii nɛ sɛ o nyɛmi hɛ ngmɛ mi kɛɛ, nɛ ji e tɔmi bɔbɔyoo ko ɔ, be mi nɛ tso agbo nɛ hɔɔ si ngɛ mo nitsɛ o hɛ ngmɛ ɔ mi ɔ lɛɛ o nɛ lɛ? 42 Kɛ o ma plɛ kɛ de o nyɛmi ke, ‘Ma je nɔ ngɛ o hɛ ngmɛ mi ɔ ha mo,’ be mi nɛ tso puɛ ngɛ mo nitsɛ o hɛ ngmɛ mi kɛɛ? Osatotsɛ, moo hia plai ɔ ngɛ o hɛ ngmɛ mi kekle, kɛkɛ o maa hyɛ nɔ, nɛ o ma nyɛ ma je nɔ nɛ sɛ e hɛ ngmɛ mi ɔ ha lɛ."

43 "Tso kpakpa tsa wui yiblii yaya; nɛ tso yaya hu wui yiblii kpakpa. 44 Tso fɛɛ tso ɔ, e wowoe nɛ a kɛ leɔ e mi tso. Mɛnɔ hu nɛ e hlaa mangoo ngɛ akutu tso nɔ, aloo kpɛte ngɛ agowa tso nɔ? 45 Nɔmlɔ kpakpa jee tsui kpakpa mi kɛ tsuɔ nɔ́ kpakpa. Ja a kɛ̃ nɛ nɔ yayami pɛ nɛ nɔmlɔ yayami tsuɔ. Nɔ nɛ ngɛ nɔ ko e tsui mi ɔ, lɔ ɔ nɛ jeɔ kpo ngɛ e nya mi munyu mi.

46 Lɔ ɔ he je ɔ, kɛɛ peeɔ kɛɛ nɛ nyɛ tsɛɛ mi ‘Nutsɔ’ se nyɛ bui mi tue ɔ? 47 Nɛ nɔ tsuaa nɔ nɛ baa ye ngɔ nɛ e nuɔ ye munyu ɔ, nɛ e yeɔ nɔ ɔ, 48 e ngɛ kaa nɔ nɛ e gba muɔ nɛ e muɔ tɛ wo mi loko ji e fia gbogbo ngɔ ma nɔ. Nyu ko be nɛ maa hule jamɛ a tsu ɔ, ejakaa a to tsu ɔ sisi saminya ngɛ tɛ nɔ.

49 Se nihi nɛ nuɔ ye munyu ɔmɛ se a yi nɔ ɔ, a ngɛ kaa nɔ nɛ e tui tsu ɔ sisi loko ji e fia gbogbo ɔ ngɔ fɔ nɔ. Ke nyu sɛ jamɛ a tsu ɔ sisi ɔ, e maa hule lɛ."