1 Maa pee be nɛ ɔ mi ɔ, a ba de Yesu ke Pilato ha nɛ a gbe Yuda bi komɛ nɛ je Galilea ba ngɛ bɔ sae ngɛ Sɔlemi We ɔ ngɛ Yerusalem.

2 Nɛ e bi ke, "Anɛ nyɛ susuu kaa Yuda bi nɛ ɔmɛ a ji yayami peeli pe Galilea tsɛmɛ kpa amɛ nɛ piɛ ɔ, nɛ lɔ ɔ he je nɛ a kpata a hɛ mi ngɛ ɔ lo? 3 Dabi! I ngɛ nyɛ dee ke, ja a kɛ̃ nɛ nyɛ hu nyɛ hɛ mi ma kpata ke ji nyɛ tsakee we nyɛ tsui nɛ nyɛɛ ba Mawu ngɔ.

4 Nɛ nihi nyɔngma kɛ kpaanyɔ ɔmɛ nɛ Siloam tsu ɔ ku pue a nɔ nɛ a gbo ɔ nɛɛ, anɛ mɛ ji yayami peeli nɛ pe kulaa ngɛ Yerusalem lo? 5 Dabi! Se mohu ja a kɛ̃ nɛ nyɛ hu nyɛ hɛ mi ma kpata, ja nyɛ tsake nyɛ tsui."

6 Kɛkɛ nɛ e bu mɛ abɛ nɛ ɔ ke, "Nɔ ko ya du tso ko nɛ ngɛ kaa mangoo tso ngɛ e ngmɔ mi. Se tso ɔ wui. 7 Nyagbe mi ɔ, e de ngmɔ nɔ hyɛlɔ ɔ ke, ‘Jeha etɛ ji nɛ nɛ tso nɛ ɔ wui yiblii kake po. Mɛni he je nɛ e sa kaa ma puɛ be ngɛ e he. E sa nɛ wa wo lejɛ ɔ kɛ du nɔ́ kpa ko. Moo po lɛ kɛ fɔ si.’

8 Se ngmɔ nɔ hyɛlɔ ɔ de lɛ ke, ‘Mo ha lɛ jeha kake hu kɛ piɛ he. I ma wo e sisi niye ni nɛ ma hyɛ ha. 9 Ke e wo yiblii hwɔɔ se jeha a, e hi, se ke pi ja a lɛɛ i ma po lɛ.’ "

10 Hejɔɔmi Ligbi ɔ eko ɔ, benɛ e ngɛ ni tsɔɔe ngɛ kpe he ɔ, 11 e na yo ko nɛ e se kpɛ, maa pee jeha nyɔngma kɛ kpaanyɔ sɔuu ji nɛ nɛ e nyɛ we e mi nɛ e kpa.

12 Yesu tsɛ lɛ kɛ ba e ngɔ nɛ e de lɛ ke, "A tsa o hiɔ ɔ ha mo!" 13 Nɛ Yesu ta e he kɛkɛ nɛ e se ɔ bɔle nɛ e nyɛ da si tutuutu. Yo ɔ bua jɔ saminya nɛ e na Mawu si, nɛ e je e yi.

14 Se enɛ ɔ ngɔɛ Yuda no nɔkɔtɔma nɛ ji kpe he ɔ nɔ hyɛlɔ ɔ nya. E mi mi fu, ejakaa Yesu tsa nɔ ɔ ngɛ Hejɔɔmi Ligbi nɔ. Kɛkɛ nɛ e de ni ɔmɛ ke, "Ni tsumi ligbi ekpa sɔuu nɛ ngɛ otsi ɔ mi. Jamɛ a ligbi ɔmɛ a nɔ nɛ e sa kaa nyɛɛ ba ngɛ nɛ a tsa nyɛ hiɔ ɔmɛ ha nyɛ, se tsa pi Hejɔɔmi Ligbi ɔ nɔ."

15 Se Nutsɔ ɔ ha heto nɛ e de lɛ ke, "Mo osatotsɛ! Anɛ o tsu we ni ngɛ Hejɔɔmi Ligbi ɔ nɔ lo? O je we o nahi ngɛ Hejɔɔmi Ligbi ɔ nɔ nɛ o kpakaa mɛ nɛ a ya nuu nyu lo? 16 Anɛ e dɛ kaa i pineɔ Yuda yo nɛ ɔ nɛ Abosiami ngɔ lɛ nyɔguɛ jeha nyɔngma kɛ kpaanyɔ sɔuu ji nɛ ɔ ngɛ Hejɔɔmi Ligbi ɔ nɔ lo?"

17 E heto nɛ ɔ ha nɛ zo gbe e he nyɛli ɔmɛ. Nɛ ni ɔmɛ a bua jɔ ngɛ nyakpɛ níhi slɔɔtohi nɛ e tsu ɔmɛ a he. 18 Kɛkɛ nɛ e tsa nɔ bɔni mɛ Mawu Matsɛyemi ɔ he ni tsɔɔmi. Nɛ e bi ke, "Kɛ Matsɛyemi ɔ ngɛ kɛɛ, nɛ mɛni he nɛ wa ma wo lɛ kɛ to? 19 E ngɛ kaa wu nyafii ko nɛ ngɛ kaa kabɔte wu nɛ a du ngɛ abɔɔ mi; be bɔɔ se ɔ, e puɛɛ nɛ e bɔɔ agbo nɛ lohwe pɛlitsɛhi ba maa tsu ngɛ mi nɛ a naa sihi he." 20 Nɛ e bi ekohu ke, "Mɛni he nɛ wa ma wo Mawu Matsɛyemi ɔ ngɔ to? 21 E ngɛ kaa tsopa nɛ haa nɛ ma fuɔ, nɛ ke a pɔtɔ ngɔ wo ma mi ɔ, o be nae kaa e ngɛ ni tsue kɛ ya si ma a ma fu."

22 Yesu kpa ma amɛ kɛ kɔpekɔpe ɔmɛ a nɔ nɛ e ngɛ ni tsɔɔe. Se be tsuaa be ɔ, e wo e hɛ ngɔ pi Yerusalem. 23 Nɔ ko bi lɛ ke, "Awetsɛ, nihi bɔɔ pɛ a yi wami nɛ a ma he lo?"

Yesu ha lɛ heto nɛ e de ke, 24 "Hiɔwe blɔ o bli we. Lɔ ɔ he je ɔ, nyɛ wlua nyɛ he nɛ nyɛ na blɔ kɛ sɛ mi, ejakaa nihi fuu maa plee e mi sɛmi he, se a be nyɛe maa sɛ mi. 25 Ejakaa ke be nɛ wetsɛ ɔ ngmɛ sinya a pɛ kɛkɛ be ɔ be. Jamɛ a be ɔ mi pɛ nyɛ tlɔ sinya a se. Nɛ ke nyɛ si nɛ nyɛ de ke,

‘Nutsɔ, mo bli wɔ’ ɔ, e ma ha nyɛ heto ke, ‘I li nyɛ!’

26 Nɛ nyɛ ma de ke, ‘Waa kɛ mo nɛ yeɔ ni nɛ o tsɔɔ ni, nɛ o fiɛɔ ngɛ wa ma mi gbɛjegbɛ ɔmɛ a nɔ.’

27 Se e ma ka nɔ nɛ e ma de nyɛ ke, ‘I ngɛ nyɛ dee ke i li nyɛ. Nyɛ be hiɛmɛ nɛ ɔ nyɛe maa ba. Nyɛɛ je hiɛ ɔ nɛ nyɛɛ ho, nyɛ nɛ nyɛ peeɔ níhi nɛ dɛ ɔ.’

28 Nɛ benɛ nyɛ tlɔ sinya a se ɔ; nyɛ maa na Abraham kɛ Isak kɛ Yakob kɛ gbali ɔmɛ tsuo ngɛ Mawu Matsɛyemi ɔ mi, nɛ jamɛ a be ɔ mi ji be nɛ nyɛ ma fo ya nɛ nyɛ ma kpe nyɛ lungu nya. 29 Ejakaa nihi maa je jejeeje tsuo nɛ a ma ba hi a hi he ngɛ lejɛ ɔ. 30 Nɛ e maa ba mi kaa nihi nɛ mwɔnɛ ɔ no ko bui mɛ ɔ, a maa wo a hɛ mi nyami ngɛ lejɛ ɔ; nɛ nihi nɛ amlɔ nɛ ɔ, mɛ nɛ a buu saminya a, a be nɔ ko hinee kulaa ngɛ lejɛ ɔ."

31 E tu munyu nɛ ɔ se, e kɛ we nɛ Farisi bi ɔmɛ ekomɛ ba de lɛ ke, "O nɛ, ke o suɔ kaa a ko gbe mo ɔ, lɛɛ moo je hiɛmɛ nɛ ɔ nɛ o ho, ejakaa Matsɛ Herode ngɛ hlae ma kpata o hɛ mi."

32 Yesu ha mɛ heto ke, "Nyɛ ya de jamɛ a kɔkɔbo ɔ ke, i ma ya nɔ ma hiaa mumi yayami ɔmɛ; nɛ i ma tsu nyakpɛ nihi; nɛ i ma tsa hiɔhi mwɔnɛ ɔ kɛ hwɔɔ; nɛ ligbi nɛ ji etɛ ɔ, i ma gbe ye ni tsumi ɔ nya. 33 Anɔkuale i, mwɔnɛ ɔ kɛ hwɔɔ kɛ hwɔɔ se; nɛ nɔ ko be Mawu gbalɔ ɔ nyɛe maa gbe ngɛ he kpa ko kaa ja ngɛ Yerusalem pɛ.

34 Oo Yerusalem, Yerusalem, mo ma nɛ o gbee gbali ɔmɛ; mo ma nɛ o fiaa nihi nɛ a tsɔ mɛ nɛ a ba ye kɛ bua mo ɔ tɛ. Si nyɛmɛ nɛ i hla we kaa ma bua o bi ɔmɛ a nya kaa bɔ nɛ kungwɔ buaa e bimɛ a nya ngɔ woɔ e pɛli sisi nɛ e buu a nɔ ɔ, se o kplɛɛ we? 35 O nɛ, jehanɛ ɔ lɛɛ a si o we ɔ ha mo we doku. Nɛ o be mi nae hu kɛ ya si be mi nɛ o ma de ke, ‘A gbaa nɔ nɛ ma ngɛ Nutsɔ ɔ biɛ mi ɔ.’ "