1 Jehanɛ ɔ Nutsɔ ɔ hla kaseli nyingmi kpaago kpa nɛ e tsɔ mɛ, ni enyɔɔnyɔ, kɛ sɛ hlami nɛ a ya mahi kɛ kɔpehi kulaa nɛ e to kaa e ma ya slaa amɛ a mi. 2 Nɛ e de mɛ ke, "Nyɛ kpa nɔ́ kpami Nutsɔ ɔ pɛɛ nɛ e tsɔ ni tsuli kɛ ba nɔ́ kpami ɔ mi nɛ a ba piɛ nyɛ he, ejakaa ni tsumi ɔ hiɛ se ni tsuli ɔmɛ a he pi. 3 Nyɛɛ ho; nɛ nyɛ kai kaa i ngɛ nyɛ tsɔe kaa jijɔ bihi kɛ yaa ogbeteehi a kpɛti. 4 Nyɛ ko hɛɛ sika kɛ to dɛ, nɛ nyɛ ko hɛɛ ni bali a kotoku; nɛ nyɛ ko hɛɛ tokota kpa kɛ piɛ nɔ nɛmɛ nɛ nyɛ wo ɔmɛ a he. Nɛ nyɛ ko nga nɔ ko ngɛ blɔ ɔ nɔ.

5 Nɛ ke nyɛ sɛ we ko mi ɔ, nyɛɛ jɔɔ we ɔ nɛ nyɛ de ke, ‘Nyɛ he manye.’ 6 Ke jamɛ a we ɔ sa jɔɔmi ɔ, Mawu jɔɔmi ɔ maa hi we ɔ nɔ, se ke e sɛ ɔ, jɔɔmi ɔ maa kpale kɛ ba nyɛ ngɔ.

7 Ke nyɛ ya ma ko mi ɔ, nyɛɛ to we kake pɛ mi; nɛ nyɛɛ ye niye ni tsuaa niye ni nɛ a ma ha nyɛ ɔ kɛ nɔ nɛ a ma ha nyɛ ke nyɛɛ nu ɔ, ejakaa nɔ nɛ apaatsɛ tsu ɔ, lɔ ɔ nɛ e yeɔ. 8,9 Nɛ ma tsuaa ma nɛ ma he nyɛ atuu ɔ, nyɛɛ pee níhi enyɔ nɛ ɔmɛ ngɛ lejɛ ɔ: Nyɛɛ ye nɔ tsuaa nɔ nɛ a ma ha nyɛ ɔ. Nɛ nyɛ tsa hiɔtsɛ ɔmɛ nɛ nyɛ de mɛ ke, ‘Mawu Matsɛyemi ɔ na nyɛ ta.’

10 Se ke ma ko he we nyɛ atuu ɔ, nyɛ ya da ma a gbɛjegbɛ ɔ nɔ nɛ nyɛ de ke, 11 ‘Nyɛɛ hyɛ, nyɛ ma a mi bunyuku nɛ du wa nane sisi ɔ tete wa ngɛ blɛe pue si ha nyɛ kaa nyɛ ma na hɛ mi kpatami. Se nyɛ na nɛ nyɛɛ le kaa Mawu Matsɛyemi ɔ na nyɛ ta.’ 12 Nɛ i ngɛ nyɛ dee anɔkuale mi ke, ngɛ hwɔɔ se Kojomi Ligbi ɔ nɔ ɔ, e maa fani ha dikali a ma nɛ ji Sodom ɔ pe jamɛ a ma a. 13 Kusiɛ ha mo Korazin! Kusiɛ ha mo Betsaida! Ejakaa e maa pee gbeye ha nyɛ hwɔɔ se. Mɛni he je ɔ, kaa a ke nyakpɛ ni nguahi nɛ i tsu ngɛ nyɛ mi ɔ, Tiro kɛ Zidon nɛ i tsu ngɛ ɔ, jinɛ a mi bimɛ ko bu kpekpe nɛ a kpa la zu nɛ a kɛ mɔbɔ yemi kɛ he kuami pia a he momoomo. 14 I ngɛ nyɛ dee anɔkuale mi ke, e maa fani ha Tiro kɛ Zidon ngɛ Kojomi Ligbi ɔ nɔ. A tue gblami be hiɛe kaa nyɛ nɔ. 15 Nɛ nyɛ Kapernaum bi hu nɛɛ, kɛ ma de ngɛ nyɛ he kɛɛ? Nyɛ maa suɔ kaa a wo nyɛ nɔ kɛ ya hiɔwe gojoo lo? Due, a maa ba nyɛ si kɛ ho abosiamihi a je ya."

16 Kɛkɛ nɛ e de e kaseli ɔmɛ ke, "Ni nɛmɛ nɛ ma he nyɛ atuu ɔ, ami nɛ a ngɛ hee ɔ nɛ; nɛ ni nɛmɛ nɛ be nyɛ hee ɔ, ami nɛ a kua a nɛ. Ke nɔ ko kua mi ɔ, Mawu nɛ tsɔ mi ɔ nɛ e kua a nɛ."

17 Benɛ kaseli nyingmi kpaago ɔmɛ kpale kɛ ba a, a kɛ bua jɔmi ba bɔ lɛ amaniɛ nɛ a de ke, "Nutsɔ, mumi yayamihi tete po bu wɔ tue benɛ wa wo o biɛ kɛ tu mɛ munyu ɔ."

18 E ha mɛ heto nɛ e de ke, "Niinɛ i, i na Abosiami nɛ e tsɔ kɛ je hiɔwe kaa oslabai nɛ gba. 19 Nɛ i ha nyɛ he wami nɛ nyɛ ma kɛ ku he nyɛlɔ ɔ he wami nya; nɛ nyɛ ma kɛ naa nyingmogblakotohi kɛ sinɔhi a nɔ nɛ nyɛ maa gbe mɛ, nɛ nɔ ko be nyɛ awi yee. 20 Se tsa pi nɔ́ nɛ he hia a ji kaa mumi yayamihi bu nyɛ tue ɔ, se mohu kaa a ngma nyɛ biɛ ngɛ hiɔwe."

21 Kɛkɛ nɛ Mumi Klɔuklɔu ɔ ha nɛ Yesu na bua jɔmi saminya nɛ e de ke, "Oo Tsaatsɛ, hiɔwe kɛ zugba Nutsɔ, i ngɛ o yi jee, nɛ i ngɛ mo si nae kaa o wo ni nɛ ɔmɛ ngɔ laa je nɛ ɔ mi ni leli kɛ juɛmitsɛmɛ, se o je kpo ngɔ tsɔɔ nihi nɛ ngɛ kaa jokuɛwi nɛ heɔ o nɔ yeɔ ɔ. I naa mo si, Tsaatsɛ, ejakaa bɔ nɛ o suɔ ji ja a nɛ. 22 Tsaatsɛ to nɔ́ tsuaa nɔ ngɔ wo ye dɛ, nɛ nɔ ko li Bi ɔ kɛ pi si, ja Tsɛ ɔ; nɛ nɔ ko hu li Tsɛ ɔ kɛ pi si, ja Bi ɔ kɛ nihi kulaa nɛ Bi ɔ suɔ kaa e ma je lɛ si ngɔ tsɔɔ mɛ ɔ."

23 Kɛkɛ nɛ e plɛ nɛ e de kaseli nyɔngma kɛ enyɔ ɔmɛ zaa ke, "E ji dloomi agbo kɛ ha nyɛ kaa a ha nyɛ he blɔ nɛ nyɛɛ na níhi nɛ nyɛ ngɛ nae nɛ ɔ. 24 Gbali ɔmɛ kɛ blema matsɛ ɔmɛ fuu hla kaa a ko hi si nɛ a na níhi nɛ nyɛ na kɛ níhi nɛ nyɛ nu nɛ ɔmɛ se a na we he blɔ."

25 Ligbi ko ɔ, nɔ ko nɛ le Mose mlaa amɛ saminya a ba ka Yesu nɛ e hyɛ ha kaa lɛ hu e le mlaa amɛ lo. E ba bi lɛ ke, "Tsɔɔlɔ, mɛni nɛ nɔ ko maa pee nɛ e ma na neneene wami ngɛ hiɔwe?"

26 Yesu bi lɛ ke, "Mɛni Mose mlaa a deɔ ngɛ enɛ ɔ he?"

27 Mlaa lelɔ ɔ ha lɛ heto nɛ e de ke, "Moo suɔ Nutsɔ o Mawu ɔ kɛ o tsui kulaa, kɛ o klaa kulaa, kɛ o he wami kulaa, kɛ o juɛmi kulaa. Nɛ o suɔ o nyɛmi kaa bɔ nɛ o suɔ mo nitsɛ o he ɔ."

28 Yesu de lɛ ke, "Ja i pɛpɛɛpɛ! Moo pee enɛ ɔ nɛ o yi ma na wami."

29 Se nyumu ɔ hla kaa e maa tsɔɔ kaa dalɔ ji lɛ, lɔ ɔ he je ɔ, e bi lɛ ke, "Mɛnɔ ji ye nyɛmi?"

30 Yesu wo sane ko kɛ tsɔɔ lɛ nya nɛ e de ke, "Yuda no ko hia blɔ kɛ je Yerusalem kɛ yaa Yeriko nɛ ojo fiali ya po lɛ ngɛ blɔ ɔ nɔ. A fiaa lɛ ni saminya nɛ a je e tadehi ngɛ e he. A kpɔ e sika nɛ e hɛɛ ɔ hu kulaa ngɛ e dɛ nɛ a si lɛ ngɔ fɔ si ngɛ blɔ ɔ he nɛ e gbo fa kɛ fa.

31 E ba mi kaa Yuda no osɔfo ko ba gu jamɛ a blɔ ɔ nɔ, se benɛ e na nɔmlɔ ɔ nɛ fɔɔ si ngɛ blɔ ɔ he ɔ, e gba ya gu he kpa nɛ e je. 32 Lɔ ɔ se ɔ, Sɔlemi We ɔ mi sɔmɔlɔ ko hu ba gu jamɛ a blɔ ɔ nɔ nɛ e hyɛ lɛ nɛ e je e he.

33 Se Samaria no ko hu ba gu blɔ ɔ nɔ, nɛ benɛ e na nɔ ɔ nɛ a pla lɛ ngɔ fɔ si ɔ, e ni pee lɛ mɔbɔ. 34 E kple si kɛ je e teji ɔ nɔ nɛ e ya ba si ngɛ e kasa nya nɛ e to e pa amɛ a nɔ tsopa ha lɛ. Jehanɛ ɔ, e wo lɛ ngɔ fɔ e teji ɔ nɔ nɛ e kpaka lɛ kɛ lohwe ɔ blɛuu kɛ ya si a ya su nibwɔhi a to he, nɛ e ya hyɛ e nɔ nyɔnyɔɔnyɔ kɛ ya si je nanɛɛ. 35 Benɛ je na nɛ e ma tsa e blɔ hiami ɔ nɔ ɔ, e je e kotoku mi sika sidi akpe enyɔ ngɔ ha nibwɔhi a to hetsɛ ɔ nɛ e de lɛ ke, ‘Moo hyɛ nɔmlɔ nɛ ɔ nɔ ha mi; ke o puɛ sika nɛ pe nɔ́ nɛ i ngɛ sie nɛ ɔ ngɛ e he ɔ, i ma ba gbe yi ha mo ke i kpale kɛ ba hiɛmɛ nɛ ɔ.’

36 Nihi etɛ nɛ ɔmɛ nɛɛ, a ti mɛnɔ nɛ peeɔ nyumu nɛ a plaa le ɔ e nyɛmi?"

37 Nyumu ɔ ha heto nɛ e de Yesu ke, "Nɔ nɛ na lɛ mɔbɔ ɔ." Yesu de lɛ ke, "Ja i; moo ya nɛ mo hu o ya pee ja."

38 Yesu kɛ e kaseli ɔmɛ tsa a blɔ hiami ɔ nɔ kɛ yaa Yerusalem nɛ a ya su kɔpe ko mi. Yo ko nɛ a tsɛɛ lɛ ke Marta a nya a he nɛ e wo mɛ kɛ ho e we mi ya nɛ a ya to e ngɔ. 39 Benɛ a ya su we ɔ mi ɔ, Marta nyɛmiyo Maria ya hi si ngɛ Yesu nane nya nɛ e ngɛ munyuhi nɛ Yesu ngɛ tue ɔmɛ tue bue. 40 Se Marta lɛɛ e ya ngɛ dengme gboe ngɛ ni hooe kɛ ha nibwɔ ɔmɛ; nɛ e he ngɛ lɛ hiae kaa e nyɛmi ɔ ba piɛ we e he nɛ a kɛ hoo ni ɔ. Nɛ lɔ ɔ he je ɔ, e ya de Yesu ke, "Mawetsɛ, moo hyɛ ha kaa e sa nɛ ye nyɛmiyo ɔ nɛ e si ni hoomi ɔ kɛ ha ami nɔ kake lo? Mo de lɛ nɛ e ba piɛ ye he nɛ waa hoo ni ɔ."

41 Se Yesu de lɛ ke, "Marta, Marta, mɛni he je nɛ o ngɛ o he haoe babauu ngɛ níhi fuu a he kikɛ ɔ? 42 Nɔ́ kake pɛ nɛ he hia kaa waa hao wa he ngɛ he, nɛ Maria na jamɛ a nɔ́ ɔ momo nɛ a be hee ngɛ e dɛ."