1 Nɛ sihi he ɔ tsuo te si nɛ a kpaka lɛ kɛ ya ha Pilato nɛ ji Amlaalo ɔ. 2 Nɛ a ya bɔni e nya pomi. Ekomɛ ji, "Wa na nɔmlɔ nɛ ɔ nɛ ngɛ ma a tue puɛe. E ngɛ ma mi bi ɔmɛ dee ke a ko wo lapoo kɛ ha Roma amlaalo ɔ. Nɛ e de hu ke lɛ ji wa Matsɛ kɛ Yiwamihelɔ."

3 Pilato bi Yesu ke, "Anɛ mo ji Yiwamihelɔ kɛ Yuda bi ɔmɛ a Matsɛ ɔ lo?" Yesu ha Pilato heto nɛ e de ke, "Ee, ja i kaa bɔ nɛ o de ɔ."

4 Pilato plɛ nɛ e de osɔfo nikɔtɔma amɛ kɛ nimli asafo ɔ ke, "E pee we mlaa tɔmi nɔ́ ko nɛ i na ngɛ munyu nɛ ɔ he."

5 Enɛ ɔ nɛ e de ɔ puɛ ma a tsui nɛ a de lɛ ke, "Se e ngɛ ma mi bi ɔmɛ a yi mi woe kɛ si amlaalo ɔ kɛ níhi nɛ e ngɛ tsɔɔe kɛ ngɛ Yudea tsuo kpae, kɛ je Galilea hluu kɛ ba pue Yerusalem ɔ."

6 Benɛ Pilato nu enɛ ɔ, e bi ke, "Anɛ Galilea no ji lɛ lo?"

7 Nɛ benɛ e na le kaa e je Galilea a, e ke a wo lɛ kɛ ya ha Matsɛ Herode, ejakaa Galilea ngɛ Herode nɔ yemi sisi; nɛ Herode hu ba Yerusalem jamɛ a be ɔ mi. 8 Herode bua jɔ e he saminya kaa e na he blɔ nɛ e maa na Yesu, ejakaa e nu e he sanehi fuu nɛ e je lɛ hlami kɛ, nɛ e pee nyakpɛ nɔ́ ko nɛ e na.

9 Enɛ ɔ he je ɔ, e bi Yesu munyu slɔɔtohi fuu, se e ha we lɛ kake po heto. 10 Nɛ osɔfo nikɔtɔma amɛ kɛ asafo nikɔtɔma amɛ ngɛ ngmlaa kpae kɛ ngɛ sane ɔmɛ poe kɛ ngɛ e nɔ fɔe.

11 Jehanɛ ɔ Herode kɛ e soja amɛ hu bɔni Yesu ahlua bɔmi kɛ e he fɛu yemi. A wo lɛ matsɛ tade ko nɛ a kpale lɛ kɛ ya ha Pilato. 12 Jamɛ a ligbi ɔ nɔ ɔ, Herode kɛ Pilato nɛ a kɛ a he yi pe be abɔ ɔ, a tsa.

13 Kɛkɛ nɛ Pilato tsɛ osɔfo nikɔtɔma amɛ kɛ asafo nikɔtɔma amɛ kɛ nihi nɛ ba bua a kulaa, 14 nɛ e de mɛ ke, "Munyu nɛ nyɛ ba wo nɔmlɔ nɛ ɔ he ji, e ngɛ ma a tue puɛe. Nɛ nyɛ nitsɛmɛ nyɛ hɛ mi nɛ i kojo lɛ ngɛ, se i nɛ mlaa tɔmi nɔ́ ko kulaa ngɛ e he. 15 Herode hu ma nya si kaa e nɛ tɔmi ko ngɛ e he nɛ sa gbenɔ fɔ bumi; nɛ lɔ ɔ he je ɔ, e kpale lɛ kɛ ba ha wɔ. 16 Enɛ ɔ he je ɔ, i ma ha nɛ a fiaa lɛ kpa nɛ ma ngmɛɛ e he."

17 Ejakaa e he hia kaa daa jeha yemi be ɔ, e ngmɛɛ ni nɛmɛ nɛ a wo mɛ tsu ɔmɛ a ti nɔ kake he kɛ ha ma a. 18 Se asafo ɔ kpa ngmlaa kɛ gbi kake pe kekle ɔ ke, "Moo gbe lɛ nɛ o ngmɛɛ Baraba he kɛ ha wɔ!" 19 Baraba ji nɔ ko nɛ a wo lɛ tsu mi, ejakaa e nyɛɛ nihi a hɛ mi ngɛ Yerusalem nɛ a te si kɛ si amlaalo ɔ; nɛ e gbe nɔ hulɔ ngɛ basabasa peemi ɔ mi. 20 Pilato kɛ mɛ sa nya ngɛ a bimi nɛ ɔ he, ejakaa e suɔ nɛ e ngmɛɛ Yesu he. 21 Se a kpa ngmlaa ekohu ke, "Moo sɛu lɛ! Moo sɛu lɛ!" 22 Pilato bi mɛ nɔ́ nɛ ji si etɛ ke, "Mɛni tɔmi nɛ e tɔ nɛ tsɔɔ kaa e sa gbenɔ? I de nyɛ ke, i nɛ tɔmi ko ngɛ e he nɛ sa gbenɔ fɔ bumi; nɛ ja a he je ɔ, i ma ha nɛ a fiaa lɛ kpa nɛ ma ngmɛɛ e he." 23 Se ni ɔmɛ hia ngmlaa wawɛɛ pe kekle ɔ nɛ a de ke a gbe Yesu; nɛ a ngɔ a munyu ɔ.

24 Nɛ lɔ ɔ he je ɔ, Pilato bu Yesu gbenɔ fɔ kaa bɔ nɛ ni ɔmɛ bi ɔ. 25 Nɛ e ngmɛɛ Baraba nɛ a wo lɛ tsu ngɛ atuã nɛ e tsɔ kɛ nɔ nɛ e gbe ɔ he ɔ, ngɛ a bimi ɔ nya; nɛ e je Yesu he gbi kɛ ha mɛ nɛ a ya pee lɛ nɔ́ nɛ a suɔ.

26 Benɛ a kpaka Yesu kɛ yaa nɛ a ya sɛu lɛ ɔ, a kɛ Kirene nyumu ko nɛ a tsɛɛ lɛ ke Simon ɔ kpe nɛ e je ngmɔ mi kɛ ma Yerusalem ma a mi nɛ a nyɛ e nɔ nɛ a wo Yesu sɛumi tso ɔ ngɔ tloo lɛ kɛ nyɛɛ Yesu se. 27 Nɛ nihi fuu kɛ yihi nɛ ngɛ ya foe nyɛɛ a se. 28 Se Yesu plɛ nɛ e de mɛ ke, "Yerusalem bi yihi, nyɛ ko fo ya ha mi, se mohu nyɛ fo ya kɛ ha nyɛ nitsɛmɛ nyɛ he kɛ nyɛ bimɛ. 29 Ejakaa be ma nɛ a ma de ke, yosahi a he ngɛ ni saminya. 30 Jamɛ a be ɔ mi ɔ, nimli ma kpa yokuhi pɛɛ ke a ku kɛ pue a nɔ nɛ a pɔtɔ mɛ, kɛ kpohi hu ke a ba ha a nɔ. 31 Ejakaa ke a ngɛ tso mumu enɛ ɔ pee ɔ, lɛɛ tso gbigbli ɔ kɛ a maa pee lɛ kɛɛ?"

32 Nɛ a kpaka yayami peeli kpahi enyɔ hu nɛ a bu mɛ gbenɔ fɔ ngɔ piɛ e he kɛ yaa nɛ a ya sɛu mɛ. 33 Benɛ a ya su sɛumi ngwɔhe ɔ, he nɛ a tsɛɛ ke, "Yikokonohe" ɔ, a sɛu nihi etɛ ɔmɛ tsuo ngɛ lejɛ ɔ. A wo Yesu kɛ wo ni enyɔ ɔmɛ a kpɛti, nɔ kake ngɛ e muɔ nɔ nɛ nɔ kake hu ngɛ e hiɔ nɔ.

34 Se Yesu sɔle nɛ e de ke, "Tsaatsɛ, mo ngɔ ke mɛ, ejakaa a li nɔ́ nɛ a ngɛ pee ɔ." Soja amɛ hu fɔ sɔ kɛ dla e tade ɔmɛ ngɔ ha a he. 35 Nɛ ni ɔmɛ daa si ngɛ hyɛe be mi nɛ Yuda bi ɔmɛ a nikɔtɔma amɛ ngɛ e he fɛu yee ke, "Ni kpahi a yi wami nɛ e heɔ. Ke Mawu Bi kɛ Yiwamihelɔ ji lɛ tutuutu kaa bɔ nɛ e de ɔ, lɛɛ lɛ nitsɛ e he e yi wami mwɔnɛ ɔ nɛ waa hyɛ ha."

36 Soja amɛ hu ye e he fɛu nɛ a wo wai nɛ nya wa ngɔ ha lɛ ke e nu. 37 Nɛ a de lɛ ke, "Ke mo ji Yuda bi ɔmɛ a Matsɛ ɔ, lɛɛ mo he mo nitsɛ o yi wami."

38 A ngma ngɛ e sɛumi tso ɔ yi kpɛti ke, "Yuda bi ɔmɛ a Matsɛ ɔ ji nɛ ɔ nɛ."

39 Nɛ ni enyɔ ɔmɛ nɛ a sɛu kɛ piɛ e he ɔ a ti nɔ kake hu ye e he fɛu nɛ e de ke, "Pi o ke mo ji Yiwamihelɔ ɔ? Mo je o he nɛ o je wɔ hu koo!"

40 Se nɔ kaketsɛ ɔ kã e hɛ mi nɛ e de lɛ ke, "O ngɛ tsɔɔe kaa kɛ ba si amlɔ nɛ ɔ kulaa nɛ o ngɛ gbenɔ mi nɛ ɔ, o yi Mawu gbeye lo? 41 Wɔɔ lɛɛ nɔ́ nɛ wa ngɛ nae nɛ ɔ sa wɔ pɛpɛɛpɛ, se nyumu nɛ ɔ nɛɛ, mɛni lɛ hu e pee nɛ sa gbenɔ?" 42 Kɛkɛ nɛ e de Yesu ke, "Nutsɔ, mo kai mi be mi nɛ o maa ba ngɛ o Matsɛyemi ɔ mi ɔ."

43 Yesu de lɛ ke, "I ngɛ mo si woe anɔkuale mi ke, mwɔnɛ ɔ o kɛ mi maa hi Paradeiso."

44 Jamɛ a be ɔ mi ɔ, pu da se piani diblii wo kpii ngɛ je ɔ mi tsuo kɛ ya si piani ngmlɛ etɛ nɛ peeɔ ngmlɛfia etɛ. 45 Benɛ pu ɔ wo diblii ɔ kɛkɛ nɛ Sɔlemi We ɔ kpɛti bo titi ɔ mi gba kɛ je hiɔmi kɛ ba ma si.

46 Nɛ Yesu kpa ngmlaa nɛ e de ke, "Tsaatsɛ! I to ye mumi ɔ kɛ wo o dɛ mi." Kɛkɛ nɛ e ma e nya.

47 Benɛ sojahi lafa a nyatsɛ ɔ nɛ ngɛ lejɛ ɔ na nɔ́ nɛ ba a, e ye Mawu gbeye nɛ e wo e hɛ mi nyami nɛ e de ke, "Anɔkuale ji kaa Nɔmlɔ nɛ ɔ dalɔ ji lɛ."

48 Nɛ benɛ ni ɔmɛ nɛ ba nɔ́ hyɛmi ɔ na kaa Yesu ma nya a, a kpale kɛ ho a wehi a mi ya kɛ aywilɛho. 49 Se Yesu huɛmɛ kɛ yi ɔmɛ nɛ nyɛɛ e se kɛ je Galilea kɛ ba a, daa si ngɛ se lokoo ngɛ nɔ́ nɛ ngɛ nɔ yae ɔ hyɛe.

50-52 Nyumu ko nɛ a tsɛɛ lɛ ke Yosef nɛ je Yudea ma ngua nɛ ji Arimatia a mi, nɛ e ji Yuda bi ɔmɛ a kpe ngua mi no se e kɛ ma nikɔtɔma amɛ kpa we gbi ngɛ Yesu sane ɔ yemi ɔ mi ɔ, lɛ nɛ e ya bi Pilato konɛ e ha lɛ he blɔ nɛ e ya je Yesu gbogboe ɔ nɛ e ya dla. Yosef nɛ ɔ, e ji dalɔ nɛ lɛ hu e ngɛ Yiwamihelɔ ɔ bami ɔ blɔ hyɛe. 53 Yosef ho nɛ e ya je gbogboe ɔ ngɛ sɛumi tso ɔ nɔ nɛ e wo klala ngɔ blaa e he nɛ e wo lɛ ya ngɔ dla ngɛ gbogboe muɔ he nɛ a kpɛ ngɛ tɛ mi nɛ a dla we nɔ ko ngɛ mi hyɛ ɔ mi. 54 E pee enɛ ɔ Soha pu pɛplɛ kɛ yaa pu si nɔnɔɛ be mi; nɛ ligbi ɔ ji he dlami ligbi kɛ ha Hejɔɔmi Ligbi ɔ.

55 Benɛ a wo gbogboe ɔ kɛ yaa dlami ɔ, Galilea yi ɔmɛ nyɛɛ se nɛ a na kaa a kɛ lɛ ya wo tɛ muɔ ɔ mi. 56 Kɛkɛ nɛ a kpale kɛ ho we mi ya ya dla tsopahi kɛ nu je viahi nɛ a ma kɛ ya wo gbogboe ɔ. Se a gbi nya nɛ Hejɔɔmi Ligbi ɔ ba na mɛ. Lɔ ɔ he je ɔ, ngɛ Yuda bi ɔmɛ a mlaa a nya a, a jɔɔ a he ngɛ ligbi ɔ nɔ.