1 Ligbi ko ɔ Yesu bu e kaseli ɔmɛ abɛ ko kɛ tsɔɔ mɛ bɔ nɛ e he hia kaa a sɔle daa nɛ e ko ti mɛ kɛ ya si a nine maa su nɔ́ nɛ he pɛɛ nɛ a ngɛ kpae ɔ nɔ.

2 E de mɛ ke, "Kojolɔ ko hi si ngɛ ma ko mi. E ji nɔ ko nɛ bui nɔmlɔ nɛ e yi Mawu gbeye hulɔ.

3 Yo ko nɛ e huno gbo, nɛ lɛ hu e ngɛ jamɛ a ma a mi ɔ ya kojolɔ nɛ ɔ ngɔ si abɔ ngɛ e kɛ nyumu ko nɛ ye lɛ awi ɔ a kpɛti munyu he ke e hyɛ mi ha lɛ. 4 Kojolɔ nɛ ɔ pui yo ɔ nya mi kulaa. Se pee se ɔ, kojolɔ ɔ de e he ke, 5 ‘I yi Mawu gbeye nɛ i wo we nɔmlɔ kɛ pee we nɔ́ ko, se jehanɛ ɔ lɛɛ yo nɛ ɔ munyu ba ti mi, lɔ ɔ he je ɔ, i ma hyɛ ha lɛ.’ "

6 Kɛkɛ nɛ Nutsɔ ɔ de mɛ ke, "Ke ji nɔ́ bimi nɛ a yɛ se ɔ maa ti kojolɔ nɔmlɔ yayami nɛ ɔ po nɛ lɔ ɔ he je ɔ, e maa ma nya si kaa e maa pee nɔ nɛ a ngɛ lɛ bie ɔ nɛɛ, 7 anɛ nyɛ he we yi kaa Mawu maa ye lɛ nitsɛ e nihi nɛ ngɛ lɛ pee kpae daa nyɔ kɛ pia a a sane ha mɛ lo? 8 E ma ha mɛ heto mla! Se mohu sane ɔ ji kaa benɛ Nɔmlɔ Bi ɔ maa kpale kɛ ba a, nihi nyɛmɛ e ma ba na kaa a ngɛ hemi kɛ yemi ngɛ zugba a nɔ nɛ a ngɛ sɔlee?"

9 Nɛ e bu mɛ abɛ nɛ ɔ nɛ kɔɔ ni nɛmɛ nɛ fiaa kaa dali ji mɛ nɛ a bui ni kpahi ɔmɛ a he:

10 "Nyumuhi enyɔ ya Sɔlemi We ɔ ke a yaa sɔle. Nɔ kake ɔ, Farisi no he wolɔ kɛ he nɔ wolɔ nɛ buu e he dalɔ ji lɛ; nɛ nɔ kpa a hu jua tsulɔ kɛ nɔ sisilɔ ji lɛ. 11 Farisi no ɔ ho da si ngɛ he ko banee nɛ e sɔle ke, ‘Mawu, i naa mo si kaa i pi yayami peelɔ kaa ni komɛ, titli ɔ, kaa jua tsulɔ nɛ daa si ngɛ lejɛ ɔ. Ejakaa i sisi we nɔ ko hyɛ nɛ i bɔɛ ajuama. 12 I hiɔɔ ngma si enyɔ ngɛ otsi mi; nɛ i woɔ ye níhi nɛ i naa kulaa a mi dlami nyɔngma mi kake ngɔ haa Mawu.’

13 Se jua tsulɔ, ojo fialɔ ɔ da si ngɛ se lokoo, nɛ e wo we e hɛ mi nɔ nɛ e hyɛ hiɔwe po, se mohu e wo he hiami kɛ ngɛ e gugue gbee ngɛ kɔmɔ yee kɛ ngɛ dee ke, ‘Mawu, moo na ami yayami peelɔ nɛ ɔ mɔbɔ.’ 14 I ngɛ nyɛ dee anɔkuale mi kaa tsa pi Farisi no ɔ, se mohu yayami peelɔ nɛ ɔ ji nɔ nɛ a wo e bimihi tsuo ngɔ ke. Ejakaa nɔ tsuaa nɔ nɛ woɔ e he nɔ ɔ, a maa ba lɛ si, nɛ nɔ tsuaa nɔ nɛ baa e he si ɔ, a ma wo e nɔ."

15 Be ko ɔ binyɛmɛ komɛ wo a bi tsɔwi kɛ ba Yesu ngɔ ke e wo e nine ngɔ ta a he nɛ e jɔɔ mɛ. Se kaseli ɔmɛ wo fɔli ɔmɛ a hɛ mi la nɛ a fie mɛ ke a ho.

16 Se Yesu tsɛ jokuɛwi ɔmɛ kɛ ba e ngɔ nɛ e de kaseli ɔmɛ ke, "Nyɛ ha nɛ bi tsɔwi ɔmɛ nɛ a ba ye ngɔ. Nyɛ ko tsi mɛ blɔ, ejakaa nihi nɛ ngɛ hemi kɛ yemi kaa bi tsɔwi nɛ ɔmɛ mohu a nɔ́ ji Mawu Matsɛyemi ɔ nɛ. 17 Nɛ i ngɛ nyɛ dee anɔkuale mi ke nɔ fɛɛ nɔ nɛ e hemi kɛ yemi be kaa bi tsɔwi nɛ ɔmɛ a nɔ́ ɔ, e be Matsɛyemi ɔ agbo ɔ mi sɛe ligbi ko."

18 Ligbi ko ɔ Yuda no asafo nɔkɔtɔma ko bi lɛ ke, "Mawetsɛ kpakpa, kɛ ma pee kɛɛ nɛ ma na neneene wami?"

19 Yesu bi lɛ ke, "Anɛ ‘nɔ kpakpa’ a nɛ o ngɛ mi tsɛe ɔ o nuɔ sisi saminya lo? Nɔ ko be nɛ ji nɔ kpakpa ja Mawu nɔ kake too pɛ.

20 O le mlaa nyɔngma amɛ kulaa. Ekomɛ ji, ‘Mo ko bɔ ajuama, mo ko gbe nɔmlɔ, mo ko ju, mo ko ye lakpa, moo bu o fɔli’ kɛ nɔ́ nɛmɛ nɛ piɛ ɔmɛ."

21 Nyumu ɔ de Yesu ke, "I ye mlaa nɛ ɔmɛ kulaa nɔ kɛ je ye jokuɛ mi."

22 Yesu de lɛ ke, "E piɛ mo nɔ́ kake. Moo ya nɛ o ya jua o níhi kulaa nɛ o ngɛ nɛ o wo sika a ngɔ ke ohiafohi nɛ o ma na weto ni ngɛ hiɔwe konɛ o ba nyɛɛ ye se."

23 Se benɛ nyumu ɔ nu enɛ ɔ, e po e he nɛ e je mɔbɔmɔbɔ, ejakaa e ngɛ níhi fuu. 24 Yesu hyɛ e kuɛ se mi mane nɛ e de e kaseli ɔmɛ ke, "Nyɛɛ hyɛ bɔ nɛ e he wa ha niatsɛ ha kaa e maa sɛ Mawu Matsɛyemi ɔ mi. 25 E he wɛ ha afukpɔngɔ kaa e maa sɛ abui puɔ mi kaa bɔ nɛ e he wa ha niatsɛ kaa e maa sɛ Mawu Matsɛyemi ɔ mi ɔ."

26 Benɛ ni ɔmɛ nu munyu nɛ ɔ, a bi ke, "Lɛɛ mɛnɔ yi wami nɛ a ma he mɔ?"

27 E ha mɛ heto nɛ e de ke, "Nɔ́ nɛ he wa ha adesa a, e he wɛ ha Mawu." 28 Kɛkɛ nɛ Petro de lɛ ke, "O na kaa wa si wa wehi nɛ wa ba nyɛɛ o se."

29 Yesu ha heto nɛ e de lɛ ke, "Niinɛ i; nɛ i ngɛ nyɛ dee anɔkuale mi ke nɔ tsuaa nɔ nɛ si e we, e yo, nyɛmimɛ nyumuhi, fɔli loo bimɛ ngɛ Mawu Matsɛyemi ɔ he ɔ, 30 a maa to lɛ ngwɔ he si abɔ ngɛ je nɛ ɔ mi, nɛ e ma na neneene wami hulɔ ngɛ je nɛ maa ba a mi."

31 Kɛkɛ nɛ e tsɛ e kaseli nyɔngma kɛ enyɔ ɔmɛ kɛ ba e ngɔ nɛ e de mɛ ke, "Nyɛ le kaa wa yaa Yerusalem, nɛ níhi kulaa nɛ blema gbali ɔmɛ gba ngɛ Nɔmlɔ Bi ɔ he ɔ maa ba mi ngɛ lejɛ ɔ. 32 Ejakaa a ma je lɛ ngɔ wo je mi bimɛ a dɛ nɛ a maa pee lɛ nisɛ ni a ni; a maa ye e he fɛu, nɛ a maa la lada ngɔ pue e nɔ. 33 A maa fiaa lɛ kpa nɛ a maa gbe le, nɛ ligbi nɛ ji etɛ ɔ nɔ ɔ, e maa te si ekohu."

34 Se kaseli ɔmɛ nui munyu ɔmɛ nɛ e tu ɔ ekoeko sisi. E pee mɛ kaa nɔ nɛ alobalo nɛ e ngɛ siae.

35 Benɛ a maa ho Yeriko ma a mi sɛmi ya a, a na hɛ ngmɛ yuyuilɔ ko nɛ hii si ngɛ blɔ ɔ he ngɛ ni bae. 36 Benɛ e nu kaa nihi fuu bee ɔ, e bi ke mɛni a ngɛ pee lo. 37 A de lɛ ke Yesu Nazaret no ɔ nɛ e bee. 38 Kɛkɛ nɛ nyumu nɛ ɔ bɔni ngmlaa kpami ke, "Yesu, David Bi, moo na mi mɔbɔ!"

39 Ni nɛmɛ nɛ ngɛ hlami ɔ bɔni lɛ demi kɛ e pee kɔ. Se si abɔ nɛ a ngɛ lɛ dee ke e pee kɔ ɔ, si abɔ nɛ ngmlaa a nya ngɛ wae ji lɔ ɔ nɛ.

40 Benɛ Yesu ya su he nɛ e ngɛ ɔ, e ho da si nɛ e bi ke a wo hɛ ngmɛ yuyuilɔ ɔ kɛ ba e ngɔ. 41 Kɛkɛ nɛ Yesu bi lɛ ke, "Mɛni o ngɛ hlae nɛ ma pee ha mo?" E kpa lɛ pɛɛ nɛ e de ke, "Nutsɔ, i ngɛ hlae nɛ ma hyɛ nɔ."

42 Nɛ Yesu de lɛ ke, "Moo hyɛ nɔ koo! O hemi kɛ yemi tsa mo."

43 Amlɔ ɔ nɔuu ɔ, nɔmlɔ ɔ hɛ ngmɛ bli nɛ e bɔni nɔ hyɛmi. E nyɛɛ Yesu se kɛ bua jɔmi nɛ e bɔni Mawu yi jemi. Nɛ nihi kulaa nɛ na nɔ nɛ ba a, a wo sina kɛ yi jemi ngɔ ha Mawu.