1 Jua tsuli nɛ a le mɛ kaa ojo fiali kɛ yayami peeli kpanakuhi ba buɔ Yesu fiɛmi ɔ tue. 2 Se enɛ ɔ ngɔɛ Yuda bi ɔmɛ a asafo nikɔtɔma amɛ kɛ mlaa tsɔɔli ɔmɛ a nya; e dɛ ha mɛ kaa Yesu kɛ nihi kaa ja a ngɛ bɔe nɛ be komɛ tete po e kɛ mɛ yeɔ ni. Nɛ a bɔni nya si hɔɔmi ngɛ e he. 3 Enɛ ɔ he je ɔ, Yesu bu mɛ abɛ nɛ ɔ ke, 4 "Ke o ngɛ to lafa nɛ kake tlɔ nga a, o be to nyingmi nɛɛ kɛ nɛɛ ɔ nɛ piɛ ɔ sie nɛ o ya hla nɔ nɛ laa a kɛ ya si o maa na lɛ lo? 5 Ke o na lɛ ɔ, o be lɛ woe kɛ fɔ o konɔ kɛ bua jɔmi kɛ ba we mi lo? 6 Nɛ ke o ba su we ɔ mi ɔ nɛ o ma tsɛ o huɛmɛ kɛ o piɛ nine nɔtsɛmɛ nɛ o bɔ mɛ amaniɛ nɛ o kɛ mɛ tsuo nɛ nya, ejakaa o na o lohwe ɔ lo?

7 Ja a kɛ̃ nɛ bua jɔmi maa ba hiɔwe ngɛ yayami peelɔ kake nɛ maa kpale kɛ ba Mawu ngɔ ɔ he, pe dali nyingmi nɛɛ kɛ nɛɛ nɛ tsui tsakemi ko he hia we mɛ ɔ.

8 Aloo yo ko ngɛ sika hiɔ kpɔ nyɔngma nɛ kake laa. Anɛ e be kane sue nɛ e hla lɛ ngɛ we ɔ mi he fɛɛ he, nɛ e be e puɔ tsuaa puɔ mi kɛ níhi a se kɛ ya si e maa na lɛ lo? 9 Nɛ lɛ hu ke e na e sika kpɔ nɛ laa nɛ ɔ nɛɛ, e be e huɛmɛ kɛ e piɛ nine nɔ bimɛ tsuo tsɛɛ nɛ e kɛ mɛ nɛ nya lo? 10 Ja a kɛ̃ nɛ hiɔwe bɔfo ɔmɛ tsuo a bua jɔɔ ngɛ yayami peelɔ kake nɛ tsake e tsui ɔ he."

Abɛ kpa hu nɛ e bu mɛ kɛ tsɔɔ e munyu ɔ nya ji, 11 "Nyumu ko hi si nɛ e ngɛ binyumuhi enyɔ. 12 Wayotsɛ ɔ de e tsɛ ɔ ke, ‘Tsaatsɛ, i suɔ nɛ o wo níhi nɛ maa pee ye blɔ fa mi nɔ ngɛ o gbosi ni ɔmɛ a mi ɔ ngɔ ha mi nyɔnglo.’ E tsɛ ɔ kplɛɛ nɛ e dla ni ɔmɛ a mi nɛ e wo wayotsɛ ɔ nɔ ngɔ ha lɛ.

13 Be bɔɔ se ɔ, bi nɛ ɔ to e nɔ́ fɛɛ nɔ nɛ e hia blɔ kɛ ho ma se lokoo ya. E ya bɔ huɛ yayahi nɛ e kɛ we kulaa nɛ e kpata e ni ɔmɛ tsuo a hɛ mi. 14 Be mi nɛ e ni ɔmɛ tsuo ta a pɛ nɛ hwɔ ngua ko ba zugba a nɔ; nɛ hwɔ bɔni lɛ yemi. 15 E ya kpa zugba a nɔ ngmɔtsɛ ko pɛɛ nɛ e ha nɛ e ya hyɛ e kpotoohi a nɔ ha lɛ. 16 Hwɔ ye niheyo nɛ ɔ hluu kɛ su he ko nɛ e na nɛ nɔ ko ko ha lɛ lohwe ɔmɛ a niye ni ɔ eko nɛ e ko ye; se enɛ ɔ pohu e nɛ nɛ e ye.

17 Benɛ e ba hɛli e he si ɔ, e de e he ke, ‘Ami pɛ ji nɛ ɔ lo? Yaa hyɛ tsɔli kɛ sɔmɔli ɔmɛ ngɛ tsaatsɛ we ɔ mi be nɛ ɔ mi ha; a yeɔ ni hluu nɛ eko piɛɛ; nɛ ami ji nɛ ɔ nɛ muklii mi hwɔ nitsɛ maa ho mi gbemi ya. 18 I ma kpale kɛ ho tsaatsɛ ngɔ ya nɛ ma ya de lɛ ke, Tsaatsɛ, i pee yayami kɛ si hiɔwe nɛ i tɔ mo hu o nɔ. 19 Nɛ lɔ ɔ he je ɔ, e sɛ nɛ o tsɛɔ mi o bi pohu. Mo wo mi ngɔ pee o apaatsɛ ɔmɛ a ti nɔ ko kɛkɛ.’

20 Nɛ bi nɛ ɔ ba te si nɛ e pue blɔ. Se benɛ e ma ngɛ lokoo ɔ nɛ e tsɛ ɔ na lɛ nɛ e muklii mi sa lɛ ngɛ e he nɛ e wo fo nɛ e kɛ lɛ ya kpe nɛ e ya fua lɛ atuu.

21 Bi ko bɔlɔ nɛ ɔ de e tsɛ ɔ ke, ‘Tsaatsɛ, i pee yayami kɛ si hiɔwe nɛ i tɔ mo hu o nɔ, nɛ e sɛ nɛ o tsɛɔ mi o bi pohu.’

22 Se e tsɛ ɔ de e sɔmɔli ɔmɛ ke, ‘Esɔ! Nyɛ ya wo tade nɛ hi, nɛ ngɛ fɛu pe kulaa a kɛ sika ga kɛ tokota amɛ nɛ nyɛ ba wo ha lɛ. 23 Nɛ nyɛɛ gbe na niheyo ɔ nɛ wa ngɛ lɛe nɛ e wo zɔ ɔ. Mwɔnɛ ɔ lɛɛ okplɔɔ nitsɛ nɛ wa ma tsɛ. 24 Ejakaa ye bi nɛ ɔ ya gbeje nɛ e kpale kɛ ba, e laa nɛ wa na lɛ ekohu.’ Kɛkɛ nɛ we ɔ tsuo bɔni nyami.

25 Be mi nɛ enɛ ɔ ngɛ nɔ yae ɔ, nɔkɔtɔmatsɛ ɔ hɛ dɔ ngɛ ni tsue ngɛ ngmɔ mi. Benɛ e kpa kɛ ma we ɔ mi ɔ, e nu nɛ la kɛ do ngɛ pɛe ngɛ we ɔ mi. 26 Kɛkɛ nɛ e tsɛ sɔmɔli ɔmɛ a ti nɔ kake nɛ e bi lɛ nɔ́ nɛ ba ngɛ we ɔ mi.

27 E de lɛ ke, ‘O senɔ ɔ nɛ ba nɛ o tsɛ ha nɛ wa gbe na niheyo nɛ wo zɔ ɔ, nɛ a ngmɛ okplɔɔ kɛ ngɛ e he nyae, ejakaa e kpale kɛ ba su we, nɛ e ngɛ kpakpataa.’

28 Anɔkuale ji kaa sane ɔ hua tsui ha nɔkɔtɔmatsɛ ɔ saminya nɛ e kua we ɔ mi yami; se e tsɛ ɔ je kpo ba kpa lɛ pɛɛ ke e ba we ɔ mi. 29 Se e de e tsɛ ɔ ke, ‘Tsaatsɛ, jehahi abɔ ji nɛ ɔ nɛ i ngɛ ni tsue ha mo, nɛ o de we mi hyɛ ke ma pee nɔ́ ko nɛ i kua; se apletsi bi kɛkɛ po o ha we mi kaa ma gbe nɛ i kɛ ye huɛmɛ wa kɛ nya. 30 Se nɛ o bi nɛ ɔ nɛ e kɛ ajuama bɔli ya kpata o nihi a hɛ mi ɔ ba a, o gbe na niheyo nɛ tu zɔ pe kulaa a ha lɛ.’

31 E tsɛ ɔ de lɛ ke, ‘Hyɛ ha, ye bi, moo lɛɛ i kɛ mo ngɛ daa; nɛ nɔ́ tsuaa nɔ nɛ ji ye nɔ́ ɔ, o nɔ́ i. 32 Se e sa kaa wa bua nɛ jɔ nɛ wa nya, ejakaa o senɔ i; e gbo nɛ e kpale kɛ ba, e laa nɛ wa na lɛ.’ "