1 Ligbi ko ɔ, benɛ e ngɛ Manye Munyu ɔ fiɛe ngɛ Sɔlemi We ɔ, osɔfo nikɔtɔma amɛ kɛ asafo nikɔtɔma amɛ kɛ kpe mi nikɔtɔma amɛ ya na lɛ. 2 Nɛ a bi lɛ nɛ e tsɔɔ mɛ nɔ nɛ ha lɛ he wami kaa e fie ni juali ɔmɛ kɛ je Sɔlemi We ɔ.

3 Yesu de mɛ ke, "I ma bi nyɛ nɔ́ ko, nɛ ke nyɛ ha mi heto ɔ, ami hu i ma tsɔɔ nyɛ he nɛ i na he wami ɔ kɛ je. 4 Yohane ɔ nɛɛ, Mawu nɛ tsɔ lɛ aloo lɛ nitsɛ e he wami nya ni nɛ e ngɛ tsue?"

5 A hla munyu ɔ mi hluu nɛ a de a he ke, "Ke ji wa de ke Yohane fiɛmi ɔ Hiɔwe nɛ e je ɔ, e ma bi wɔ ke, ‘Nɛ mɛni he je nɛ nyɛ he we lɛ yi mɔ.’ 6 Se ke wa de ke tsa pi Mawu nɛ tsɔ lɛ ɔ, ma a maa fiaa wɔ tɛ, ejakaa a he ye kaa Yohane ɔ gbalɔ ji lɛ." 7 Nyagbe mi ɔ, heto nɛ a ha lɛ ji, "Wa li."

8 Nɛ Yesu de mɛ ke, "Lɛɛ ami hu i be nyɛ munyu nɛ nyɛ bi mi ɔ heto hae."

9 Kɛkɛ nɛ e plɛ nɛ e bu ni ɔmɛ abɛ nɛ ɔ ke, "Nyumu ko hu wai ngmɔ nɛ e ngɔ kɛ wo apaatsɛmɛ a dɛ nɛ e hia blɔ kɛ ho ma se tsitsaa he ko ya nɛ e se ya kɛ be saii nitsɛ. 10 Benɛ wai yiblii ɔ tsɔmi be su ɔ, e tsɔ e we bi ɔmɛ a ti nɔ kake kɛ ho a ngɔ ya konɛ e ya wo e nɔ́ kɛ ba ha lɛ. Se apaatsɛ ɔmɛ fiaa e tsɔlɔ ɔ ni nɛ a fie lɛ kɛ e dɛ mi gu. 11 E tsɔ nɔ nɛ ji enyɔ; se apaatsɛ ɔmɛ pee le hu ja a kɛ. A kongo lɛ, nɛ a pue e hɛ mi si nɛ a fie lɛ nɛ a ha we lɛ ngmɔ ni ɔ eko. 12 E tsɔ nɔ nɛ ji etɛ; lɛ hu a pee lɛ ja a nɔuu nɛ a plaa lɛ tete nɛ a fie lɛ kɛ je ngmɔ ɔ mi.

13 Kɛkɛ nɛ ngmɔtsɛ ɔ bi e he ke, ‘Kɛ ma pee kee? I ma tsɔ ami nitsɛ ye binyumu nɛ i suɔ lɛ saminya a kɛ ya apaatsɛ ɔmɛ a ngɔ. Ye bi ɔ lɛɛ a maa bu lɛ.’

14 Se benɛ bi nɛ ɔ yi je pɛ nɛ apaatsɛ ɔmɛ ke, ‘Wa bi, nyɛɛ ba; ni yelɔ ɔ nɛ ma nɛ ɔ nɛ. Nyɛɛ ba nɛ waa gbe lɛ, kɛkɛ ngmɔ ɔ maa pee wa nɔ́.’ 15 Lɔ ɔ he je ɔ, a sa lɛ kɛ je ngmɔ ɔ mi nɛ a ya gbe lɛ.

Kɛ nyɛ susu nɛ ngmɔtsɛ ɔ maa pee kɛɛ? 16 I ngɛ nyɛ dee ke, e ma ba gbe apaatsɛ ɔmɛ nɛ e ma wo ngmɔ ɔ ngɔ ha ni kpahi." Se nihi nɛ ngɛ lɛ tue bue ɔ de lɛ ke, "Kɛ apaatsɛ ɔmɛ maa pee nɔ́ kaa ja a kɛɛ?"

17 Se Yesu hyɛ mɛ too nɛ e de mɛ ke, "Lɛɛ kɛ Ngmami ɔ nɛ deɔ ke, ‘Tɛ ɔ nɛ tsu fiali ɔmɛ sake kɛ fɔ he ɔ ba plɛ pee kɔ nya tɛ’ ɔ sisi tsɔɔ kɛɛ?" 18 Nɛ e de mɛ ke, "Nɔ tsuaa nɔ nɛ ma tɛ jamɛ a tɛ ɔ, e maa ku; se nɔ tsuaa nɔ nɛ tɛ ɔ maa nɔ e nɔ ɔ,e maa wɛɛ lɛ kaa mamu."

19 Se benɛ osɔfo nikɔtɔma amɛ kɛ asafo nikɔtɔma amɛ nu kikɛmɛ a munyu nɛ ɔ, a hla nɛ a nu lɛ nɔuu, ejakaa a na kaa munyu ɔ kɔɔ a he; se a ya ye ma a gbeye kaa ke mɛ nitsɛmɛ a nu lɛ ɔ, basabasa maa te si. Lɔ ɔ he je ɔ, a tsɔ e nya kaa e ma de nɔ ko nɛ a maa da nɔ kɛ po e nya kɛ ha Roma Amlaalo ɔ konɛ a nu lɛ lo.

20 Kɛkɛ nɛ a bɔni lɛ hwɔɔmi; nɛ a tsɔ nihi nɛ pee a he kaa anɔkualetsɛmɛ. 21 Nɛ a ya bi Yesu ke, "Tsɔɔlɔ, wa le kaa moo lɛɛ nɔ nɛ ji anɔkuale ɔ pɛ nɛ o tsɔɔ, nɛ o hlɛ nimli a mi; Mawu anɔkuale blɔ ɔ pɛ nɛ o tsɔɔ. 22 E da kaa waa wo lapoo kɛ ha Roma amlaalo ɔ aloo e dɛ?"

23 Se Yesu na a ga a momoomo nɛ e de mɛ ke, 24 "Nyɛ wo kaplɛ ɔ eko kɛ ba tsɔɔ mi nɛ ma hyɛ ha. Mɛnɔ foto kɛ biɛ nɛ ngɛ nɔ nɛ ɔ?" A ha lɛ heto ke, "Kaisare nɛ ji Roma nɔ yelɔ ɔ nɔ i."

25 Yesu de mɛ ke, "Lɛɛ nyɛ wo Kaisare nɔ kɛ ha Kaisare, nɛ nɔ́ nɛ ji Mawu nɔ ɔ, nyɛɛ ngɔ kɛ ha Mawu."

26 A ga nɛ a tsɔ ɔ nui lɛ! Heto ɔ nɛ e ha mɛ ɔ pee mɛ nitsɛmɛ nyakpɛ nɛ a nɛ nɔ ko nɔ nɛ a maa da kɛ wo munyu ngɔ wo e he, kɛkɛ nɛ a nya jɔ.

27 Enɛ ɔ se ɔ, Saduki bi ɔmɛ, nihi nɛ ke mɛɛ a he we yi kaa ngɛ gbenɔ se ɔ, si temi ko ngɛ hwɔɔ se ɔ, mɛ hu a ba nɛ a ba bi Yesu ke, 28 "Tsɔɔlɔ, Mose wo wɔ mlaa ke, ke ji nɔ ko ngɔ yo nɛ e gbo benɛ e kɛ lɛ be bi ɔ, e senɔ nɛ ngɔ yo ɔ nɛ e kɛ lɛ nɛ fɔ kɛ ha awetsɛ ɔ konɛ awetsɛ ɔ biɛ nɛ ko laa. 29 E ba mi kaa nyɛmimɛ nyumuhi kpaago ko hi si. Tɛte ɔ ngɔ yo se e gbo kɛ je yo ɔ he nɛ e kɛ lɛ be bi. 30 Tɛtɛ ɔ ba ngɔ yo ɔ se lɛ hu e gbo kɛ je e he nɛ e kɛ lɛ fɔ we. 31 Tɛɛ ɔ hu ja, hluu kɛ ya si nyagbe nɔ ɔ nɔ; mɛ nihi kpaago ɔmɛ tsuo a ngɔ yo ɔ se a kɛ lɛ fɔ we. 32 Nyagbe mi ɔ, yo ɔ hu yi ba ta. 33 Jehanɛ ɔ, nɔ́ nɛ wa ngɛ hlae nɛ waa le ɔ ji, ngɛ hwɔɔ se si temi ɔ mi ɔ, nyɛmimɛ nyumuhi kpaago nɛ ɔmɛ a ti mɛnɔ nɛ maa pee yo ɔ e huno, ejakaa mɛ tsuo a kɛ yo ɔ hi si?"

34 Yesu ha mɛ heto nɛ e de ke, "Je nɛ ɔ mi pɛ nɛ nimli gbaa nɛ a ngɔɔ yo ngɛ. 35 Se ni nɛmɛ nɛ a ma tle mɛ si hwɔɔ se kɛ ya hiɔwe ɔ, a be yo ngɔe nɛ a be gbae. 36 Nɛ a be gboe hulɔ. A ngɛ kaa bɔfohi, nɛ a peeɔ Mawu bimɛ, ejakaa a tle mɛ si kɛ je gbenɔ mi kɛ ba wami he mi.

37 Se munyu nɛ nyɛ ngɛ bie ɔ tutuutu ji kaa hwɔɔ se ɔ si temi ko ngɛ lo? Nɛ enɛ ɔ, Mose nitsɛ e ngmami ɔmɛ tsɔɔ paa kaa si temi ko ngɛ. Ejakaa benɛ e tsɔɔ bɔ nɛ Mawu je e he kpo ngɔ tsɔɔ lɛ ngɛ hue ɔ nɛ ngɛ tsoe se e ngla we ɔ mi ɔ, bɔ nɛ e tsɛ Mawu ji, ‘Abraham Mawu kɛ Isak Mawu kɛ Yakob Mawu.’ 38 Ke a ke Mawu hine ni komɛ a Mawu kɛ ba si mwɔnɛ ɔ, se tsa pi be ko nɛ be ɔ, e tsɔɔ kaa jamɛ a ni ɔmɛ ngɛ hɛ ngmengmle, tsa pi nihi nɛ gbo."

39 Mlaa leli ɔmɛ ekomɛ nɛ daa si ngɛ lejɛ ɔ de lɛ ke, "Tsɔɔlɔ, o ha heto tutuutu." 40 Enɛ ɔ se ɔ, a nyɛ we lɛ nɔ ko nɛ a bi hu. 41 Kɛkɛ nɛ lɛ hu e bi mɛ ke, "Kɛ e ba kɛɛ nɛ a deɔ ke David bibimibi ji Kristo nɛ ji Yiwamihelɔ ɔ? 42 Ejakaa David nitsɛ ngma ngɛ e La Womi ɔ mi nɛ e de ke, ‘Mawu de ye Nutsɔ nɛ ji Yiwamihelɔ ɔ ke, "Moo hi si ngɛ ye hiɔ nine nɔ, 43 kɛ ya si be nɛ i ma wo o he nyɛli ɔmɛ ba ngɔ wo o nane sisi." ’ 44 Kɛ e peeɔ kɛɛ nɛ Yiwamihelɔ kake ɔ peeɔ David Mawu kɛ e bibimibi kɛɛ?"

45 Kɛkɛ nɛ benɛ asafo ɔ ngɛ tue bue nɔuu ɔ, e plɛ nɛ e de e kaseli ɔmɛ ke, 46 "Nyɛɛ hyɛ nyɛ he nɛ hi ngɛ mlaa tsɔɔli ɔmɛ a he, ejakaa a suɔ nɛ a tsɔɔ a he nɛ nihi nɛ na mɛ. A woɔ tade ngua kɛ hii gbɛjegbɛ ɔmɛ a nɔ nyɛɛe nɛ nihi nɛ hi si bae ha mɛ. Nɛ a suɔ ngua ma je himi ngɛ kpe he ɔmɛ kɛ jeha yemi he ɔmɛ. 47 Benɛ a ngɛ sɔlee gagaaga kɛ gbi slɔɔto ko kaa nihi nɛ a nɔ dali be je nɛ ɔ mi ɔ, blɔ a ngɛ nihi nɛ be nɔ ko kɛ yihi nɛ a hunohi gbo ɔmɛ a he ga toe nɛ a kpɔ a weto níhi ngɛ a dɛ. I ngɛ nyɛ dee anɔkuale mi ke hwɔɔ se ɔ, a fɔ bumi maa kle."