1 Ligbi ko ɔ, Yesu ya ngɛ sɔlee ngɛ he ko nɛ benɛ e gbe nya a, e kaseli ɔmɛ a ti nɔ kake de lɛ ke, "Nutsɔ, moo tsɔɔ wɔ hu Sɔlemi konɛ ke e pee ɔ waa hi sɔlee kaa bɔ nɛ Yohane tsɔɔ e kaseli ɔmɛ ɔ."

2 Nɛ Sɔlemi nɛ e tsɔɔ mɛ ɔ ji enɛ ɔ nɛ: "Tsaatsɛ, o biɛ ɔ he nɛ tsɔ; o Matsɛyemi ɔ nɛ ba. 3 Mo ha wɔ wa nya ngma daa ligbi. 4 Nɛ o wo wa tɔmi ɔmɛ kɛ ke wɔ, ejakaa wɔ hu wa kɛ kee nihi nɛ tɔɔ wa nɔ ɔ. Nɛ o ko ha nɛ waa sɛ kami mi."

5 Nɛ e tsa nɔ nɛ e tsɔɔ mɛ ni nɛ kɔɔ sɔlemi he nɛ e de ke, "Nyɛɛ ngɔ lɛ kaa o ya o huɛ ngɔ nyɔ mi kpɛti nɛ o ya ba abolo etɛ ngɛ e dɛ. O ya tsɛ lɛ nɛ o de lɛ ke, 6 ‘Ye huɛ ko ba to mi nubwɔ piɔ nɛ e ma mi slaami, se niye ni ko kulaa be ye dɛ ngɛ we ɔ mi nɛ ma ha lɛ. Taflaatsɛ, moo dloo mi abolo etɛ ko nɛ ma kɛ ha lɛ nɛ e ye.’ 7 Kɛkɛ nɛ e ma de mo ke, ‘O le ɔ, piɔ ɔ, je jɔ nɛ wa hwɔ si nɛ a nga sinya a, lɔ ɔ he je ɔ, piɔ lɛɛ nɔ́ ko be hiɛ maa pee.’

8 Se i ngɛ nyɛ dee ke, nɔmlɔ nɛ ɔ maa te si, tsa pi ngɛ e huɛ nɛ ngɛ lɛ tsɛɛ ɔ he je, se ngɛ bɔ nɛ nɔ́ balɔ ɔ ngɛ nɔ ngɛ sinya a sie nɛ e jɔɔ we ɔ he je, nɛ e ma ha lɛ nɔ́ tsuaa nɔ nɛ e ngɛ hlae ɔ. 9 Ja a kɛ̃ nɛ e ngɛ ngɛ sɔlemi blɔ fa mi; moo hi nɔ nɛ o hi o hiami ni ɔmɛ bie nɛ a maa hi mo hae; moo hi nɔ nɛ o hi hlae nɛ o maa hi nae; moo hi nɔ nɛ o hi sie nɛ sinya a ma bli ha mo. 10 Nɔ tsuaa nɔ nɛ biɔ ɔ, e nine suu nɔ; nɔ tsuaa nɔ nɛ hlaa a, e naa; nɛ nɔ tsuaa nɔ nɛ siɔ ɔ, a bliɔ sinya a haa lɛ.

11 Nyɛ tsɛmɛ ɔmɛ nɛɛ, ke nyɛ bi bi abolo ɔ, tɛ nɛ nyɛ kɛ haa lɛ lo? Nɛ ke e bi lo ɔ nɛɛ, sinɔ nɛ nyɛ kɛ woɔ e dɛ lo? 12 Nɛ ke e bi hlui ɔ nɛɛ, nyingmogblakoto nɛ nyɛ kɛ haa lɛ lo?

13 Ke nyɛ nɛ nyɛ ji nimli yayamihi ɔ, nyɛ le bɔ nɛ nyɛ kɛ nɔ́ kpakpahi haa nyɛ bimɛ ɔ, anɛ nyɛ he we yi kaa nyɛ Tsɛ nɛ ngɛ Hiɔwe ɔ hu maa pee ja a, nɛ e maa ngɔ Mumi Klɔuklɔu ɔ kɛ ha nihi nɛ biɔ lɛ ɔ lo?"

14 Ligbi ko ɔ, Yesu hia mumi yayami kɛ je mumui ko mi nɛ nɔ ɔ bɔni munyu tumi. Ni nɛmɛ nɛ na nyakpɛ ni tsumi nɛ ɔ, a hɛ mi pee mɛ yaa. 15 Se nɔ́ nɛ ni komɛ hu de ji, "E be nyakpɛ kaa e nyɛ ngɛ mumi yayami ɔmɛ hiae. Abosiami nɛ ji mumi yayami ɔmɛ kulaa a matsɛ ɔ e he wami nɛ e kɛ ngɛ ni ɔ tsue ɔ nɛ." 16 Ni komɛ hu de lɛ ke e je Hiɔwe okadi ko kpo kɛ tsɔɔ mɛ kaa lɛ ji Yiwamihelɔ ɔ niinɛ.

17 Se akɛnɛ e le nɔ́ nɛ a ngɛ susue he je ɔ, e de mɛ ke, "Ke ji kaa matsɛ yemi ko mi gba enyɔ nɛ e mi bi ɔmɛ gba ta wo a bi ɔ, matsɛ yemi ɔ hɛ mi ma kpata. Ja a kɛ̃ nɛ ke pɛ sɛ we ko mi bimɛ a kpɛti nɛ a bɔni a he ni fiaami ɔ, Jamɛ a we ɔ maa gbɛ. 18 Lɔ ɔ he je ɔ, ke ji nɔ́ nɛ nyɛ ngɛ dee nɛ ɔ ngɛ mi anɔkuale ɔ, lɛɛ Abosiami kɛ lɛ nitsɛ e he ngɛ ta hwue. Ejakaa e ha mi he blɔ kaa ma hiaa lɛ nitsɛ e mumi ɔmɛ ngɛ nihi a mi, nɛ kɛ e maa pee nɛ e matsɛ yemi ɔ maa da si kɛɛ? 19 Nɛ ke ji Abosiami he wami nɛ i kɛ ngɛ ni tsue ɔ, lɛɛ nyɛ nitsɛmɛ nyɛ se nyɛɛli ɔmɛ ɔ nɛɛ, mɛni he wami a kɛ ngɛ mumi yayami ɔmɛ hiae? Anɛ nyɛ ngɛ dee ke Abosiami mumi ngɛ a mi lo? Nyɛ bi mɛ kaa nɔ́ nɛ nyɛ ngɛ dee nɛ ɔ ngɛ mi anɔkuale lo? 20 Se ke Mawu he wami nɛ i kɛ ngɛ mumi yayami ɔmɛ hiae ɔ lɛɛ e tsɔɔ paa kaa Mawu Matsɛyemi ɔ su si.

21 Ejakaa ke he walɔ fi gbaja nɛ e kpla ta hwumi nihi kɛ ngɛ e we he bue ɔ, e nɔ́ fɛɛ nɔ́ yi naa wami. 22 Ja benɛ nɔ ko nɛ he wa pe lɛ nɛ e ta hwumi ni ɔmɛ hi pe e ni ɔmɛ ba tua lɛ, nɛ e fiaa lɛ ni nɛ e kpɔ e ta hwumi ni ɔmɛ ngɛ e dɛ loko ji e maa muɔ e weto ni ɔmɛ kɛ je.

23 Ke nɔ ko pataa we ye he ɔ, lɛɛ e kɛ mi ngɛ hwue; nɛ nɔ tsuaa nɔ nɛ yi kɛ bua we mi ɔ, e ngɛ mi awi yee.

24 Ke a hia mumi yayami kɛ je nɔ ko mi ɔ, e hiaa blɔ nɛ e ya nyɛɛɔ nga nɔ kɛ hlaa he jɔɔmi he. Ke ji e ya nɛ he ko kaa ja a, e kpaleɔ kɛ hoɔ he nɛ a hia lɛ kɛ je ɔ ya. 25 Nɛ e ya naa kaa a bɛɛ e we momo ɔ mi nɛ a dla mi saminya se nɔ ko be mi. 26 Nɛ lɔ ɔ he je ɔ, e yaa nɛ e ya tsɛɔ mumi yayamihi kpaago kpa nɛ yobu pe lɛ nitsɛ ngɔ piɛɔ e he kɛ ba sɛɔ nɔ ɔ e mi, nɛ a puɛɔ Nɔmlɔ ɔ pe kekle ɔ."

27 Benɛ e ngɛ munyu ɔ tue ɔ, yo ko hia ngmlaa ngɛ ni ɔmɛ a kpɛti nɛ e de ke, "Mawu nɛ jɔɔ nyɛ ke muklii nɛ hɛɛ o hɔ kɛ nyɔ nɛ o pupɔ ɔ."

28 Yesu ha heto nɛ e de lɛ ke, "Ja i; se a maa jɔɔ nihi nɛ nuɔ Mawu Munyu ɔ nɛ a yeɔ nɔ ɔ pe ja."

29 Nɛ benɛ ni ɔmɛ ba bua wo e he fuu ɔ, e fiɛ tsɔɔ mɛ nɛ e de ke, "Be yobu kɛ yi nɔ yayami bimɛ ji nɛ ɔ nɛ. A ngɛ bie kaa a tsɔɔ mɛ okadi mi mi slɔɔto ko kɛ je hiɔwe; se a be mɛ okadi kpa ko tsɔɔe pe Yona okadi ɔ. 30 Nɔ́ nɛ ba Yona nɔ ɔ ha Ninive bi ɔmɛ he ye kaa Mawu nɛ tsɔ lɛ niinɛ, ja a kɛ nɔ́ nɛ Nɔmlɔ Bi ɔ maa na a, maa tsɔɔ yi nɔ bi nɛ ɔmɛ kaa Mawu nɛ tsɔ lɛ nimli nɛ ɔmɛ a ngɔ.

31 Kojomi Ligbi ɔ nɔ ɔ, Sheba Manyɛ ɔ ma je e nine ngɔ tsɔɔ yi nɔ bi nɛ ɔmɛ nɛ e maa bu mɛ fɔ. Ejakaa e hia blɔ kɛ je he lokoo kɛ ya bu Salomo nile ɔ tue; nɛ nɔ nɛ pe Salomo si abɔ ngɛ nyɛ kpɛti se nihi bɔɔ pɛ nɛ ngɛ lɛ tue bue. 32 Ja a kɛ̃ nɛ Ninive bi hu maa te si kɛ si yi nɔ nɛ ɔ nɛ a maa bu mɛ fo, ejakaa nɛ Yona ya fiɛ ngɔ tsɔɔ mɛ ɔ, a pia a he nɛ a tsake a tsui. Nɛ nɔ nɛ pe Yona si abɔ ngɛ hiɛmɛ nɛ ɔ se ma nɛ ɔ bui lɛ tue.

33 Nɔ ko sui kane nɛ e ngɔ hɔɔ sowe sisi. Kane tso nɔ nɛ a woɔ kane ngɔ maa nɛ e ha nɛ nɔ tsuaa nɔ nɛ maa sɛ tsu ɔ mi ɔ nɛ e hyɛ nɔ. 34 Nɔmlɔ tso ɔ e kane ji hɛ ngmɛ; ke o hɛ ngmɛ nɔ tsɔ ɔ, nɔmlɔ tso ɔ tsuo mi tsɔɔ; se ke o hɛ ngmɛ ɔ nɔ tsɔ we ɔ, e haa nɛ nɔmlɔ tso ɔ tlɔɔ diblii mi. 35 Lɔ ɔ he je ɔ, nyɛɛ hyɛ nɛ e hi nɛ nyɛ ko tlɔ diblii mi. 36 Ke la ngɛ nɔmlɔ tso ɔ mi nɛ diblii be he ko ɔ, o hɛ mi ma kpɛ kaa nɔ nɛ a kpɛ la ngɔ ma o nɔ."

37 Benɛ e tu munyu ɔ ta pɛ nɛ Farisi bi ɔmɛ eko ba tsɛ lɛ nɛ e kɛ lɛ a ya ye ni ngɛ e we mi. Benɛ Yesu ya su we ɔ mi ɔ, e ya hi si nɛ e bɔni ni ɔ yemi benɛ e fɔ we e he kaa bɔ nɛ Yuda bi ɔmɛ peeɔ ngɛ a kusumi nya loko ji a yeɔ ni ɔ. 38 Se benɛ Yuda no ɔ na enɛ ɔ, e pee lɛ nyakpɛ. 39 Kɛkɛ nɛ Yesu de lɛ ke, "Nyɛ Farisi bi ɔmɛ ɔ, nyɛ fɔɔ nyɛ kpo nɔ blɔ he, be mi nɛ nyɛ mi blɔ sɛ mu kɛ jiklɔɔ kɛ yi kpɛti wawɛ. 40 Kuasiahi ji nyɛ; anɛ tsa pi Mawu nɛ pee kpo nɔ kɛ mi mi ɔ kulaa lo? 41 Nɔ nɔ́ hami ji nɔ nɛ yeɔ nɔ tsui mi tsɔmi he odase pe kulaa.

42 Due ha nyɛ Farisi bi ɔmɛ! Nyɛ ngɛ veveeve kɛ fitsofitso ngɛ nɔ tsuaa nɔ mi dlami nyɔngma a hami ɔ he, se nyɛ di we dami sane yemi kɛ Mawu suɔmi se. E sa kaa nyɛ woɔ mi dlami nyɔngma a, se lɔ ɔ tsɔɔ we kaa nyɛ si ni kpa amɛ se.

43 Due ba nyɛ Farisi bi ɔmɛ! Nyɛ suɔ nyɛ he tsɔɔmi kɛ ngua ma je himi ngɛ kpe he ɔmɛ, nɛ nyɛ suɔ kaa nɔ tsuaa nɔ nɛ e ba si kɛ nga nyɛ ke e kɛ nyɛ kpe ngɛ jua amɛ a nɔ. 44 Due ha nyɛ, ni gbogboe muɔhi nɛ hɔɔ si ngɛ nga mi nɛ a nɛ ji nyɛ. Nihi nyɛɛ nyɛ se nɛ a li bɔ nɛ nyɛ puɛ ha. Nyɛ kojomi maa kle hwɔɔ se."

45 Kɛkɛ nɛ mlaa lelɔ ko nɛ daa si ngɛ lejɛ ɔ de lɛ ke, "Awetsɛ, nɔ nɛ o de nɛ ɔ, o kɛ puɛ wɔ hu wa ni tsumi ɔ hɛ mi si."

46 Yesu de lɛ ke, "Ee, ja i! Nyɛ hu nyɛ ma na nyɛ kojomi kɛ fɔ bumi hwɔɔ se ja a kɛ. Nyɛɛ kɛ jami he mlaahi nɛ a nɔ be hiɛ yemi yeɔ nihi awi, be mi nɛ nyɛ nitsɛmɛ nyɛ yi nɔ. 47 Due ha nyɛ, ejakaa nyɛ ngɛ kaa nyɛ nimeli ɔmɛ nɛ gbe gbali ɔmɛ blema a pɛpɛɛpɛ. 48 Nɔ gbeli kɛ dikali ji nyɛ, nyɛ kplɛɛ níhi nɛ nyɛ nɛmɛ pee ɔmɛ a nɔ, nɛ tsɔɔ kaa nyɛ hu nyɛ ko pee ja a pɛpɛɛpɛ."

49 "Nɔ́ nɛ Mawu de ngɛ nyɛ he ji nɛ ɔ nɛ, ‘I ma tsɔ gbali ɔmɛ kɛ bɔfo ɔmɛ kɛ ya a ngɔ se a maa gbe a ti ni komɛ nɛ a maa pee ni komɛ hu nisɛ ni a ni nɛ a maa fie mɛ kɛ je a ngɔ.’

50 Nɛ enɛ ɔ he je ɔ, gbali ɔmɛ nɛ a gbe kɛ je benɛ a bɔ je ɔ hluu kɛ ba si amlɔ nɛ ɔ tsuo ɔ, nyɛ yi nɔ bi nɛ ɔmɛ nyɛ dɛ nɛ a ma bi a muɔ si ngɛ. 51 A ma bi kɛ je Habel nɔ hluu kɛ ba si Zakaria, nɔ nɛ a gbe ngɛ bɔ sami la tɛ ɔ kɛ Sɔlemi Tsu ɔ kpɛti ɔ, nɔ ngɛ nyɛ dɛ.

52 Due ha nyɛ mlaa tsɔɔli! Ejakaa nyɛ woɔ anɔkuale ɔ kɛ laa ni ɔmɛ. Nɛ benɛ nyɛ nitsɛmɛ nyɛ he we nɛ nyɛɛ ye ɔ, nyɛ ha we ni nɛmɛ nɛ ko suɔ ɔ hu he blɔ nɛ a he ye."

53 Enɛ ɔ ha nɛ Farisi bi ɔmɛ kɛ mlaa tsɔɔli ɔmɛ a mi mi fu Yesu nɛ a je a hɛ kɛ ka lɛ. Nɛ kɛ je jamɛ a be ɔ mi ɔ, a bɔni lɛ munyuhi bimi babauu, 54 nɛ a kɛ hla e nya konɛ a da nɔ nɛ a wo e he munyu nɛ a nu lɛ.