1 Hejɔɔmi Ligbi ɔ eko nɔ ɔ, Yesu ngɛ Yuda bi ɔmɛ a kpe mi no ko we mi nɛ Farisi bi ɔmɛ ngɛ lɛ hwɔɔe pɛpɛɛpɛ. 2 Ejakaa a ngɛ hlae nɛ a hyɛ ha kaa e ma tsa nyumu hiɔtsɛ ko nɛ ngɛ kumi hiɔ nue ɔ lo.

3 Yesu bi Farisi bi ɔmɛ kɛ mlaa tsɔɔli ɔmɛ nɛ daa si ngɛ lejɛ ɔ ke, "E da kaa a tsaa hiɔtsɛ ngɛ Hejɔɔmi Ligbi ɔ nɔ aloo e dɛ?"

4 Se a ha we lɛ heto. Kɛkɛ nɛ Yesu ta hiɔtsɛ ɔ dɛ mi nɛ e tsa lɛ nɛ e wo lɛ blɔ kɛ ho.

5 Nɛ e plɛ nɛ e bi mɛ ke, "Nyɛ ti mɛnɔ nɛ e tsu we ni ngɛ Hejɔɔmi Ligbi ɔ nɔ? Ke o na yo nɔ muɔ mi ngɛ Hejɔɔmi Ligbi ɔ nɔ ɔ, o be lɛ jee lo?"

6 Se munyu nɛ ɔ hu a nyɛ we lɛ heto nɛ a ha. Nyɛ ko hua blɔ nya he. 7 Benɛ e to he hɛ kaa nihi nɛ a tsɛ mɛ ni yemi ɔmɛ tsuo ngɛ hlae kaa a ma ya hi okplɔɔ ɔ yi ma je ɔ, e slɔ mɛ ke, 8 "Ke a kpee mo kɛ ya yo kpeemi niye ni he ɔ, mo ko sɛ hlami kɛ ya hi okplɔɔ yi ma je. Eko ɔ, a tsɛ nɔ ko nɛ hine nɔkɔtɔma nɛ hɛ mi jiɔ pe mo. 9 Ke jamɛatsɛ ɔ ba a, nɔ nɛ tsɛ nyɛ ni yemi ɔ ma ba de mo ke, ‘Mo ha awetsɛ nɛ ɔ blɔ ngɛ hiɛ ɔ nɛ o ya hi he kpa’. Jamɛ a be ɔ mi pɛ zo maa gbe mo nɛ o ma ya hi okplɔɔ nane si blɔ.

10 Nɔ́ nɛ hi kaa o pee mohu ji kaa o ya hi okplɔɔ ɔ nane si ma je. Nɛ ke nɔ nɛ tsɛ ni yemi ɔ ba nɛ e ba na mo ngɛ lejɛ ɔ, e ma de mo ngɛ ni ɔmɛ a hɛ mi ke, ‘Ye huɛ, moo ba hiɛ ɔ nɛ o ba hi okplɔɔ ɔ yi ma je.’ Jamɛ a be ɔ mi pɛ kɛkɛ a wo o hɛ mi nyami ngɛ ma hɛ mi. 11 Ejakaa nɔ tsuaa nɔ nɛ hlaa kaa e ma wo e he nɔ ɔ, a maa ba lɛ si; nɛ nɔ nɛ baa e he si ɔ, a ma wo e nɔ." 12 Enɛ ɔ se ɔ, e de wetsɛ ɔ nɛ tsɛ lɛ ni yemi ɔ ke, "Ke o ngmɛ okplɔɔ ɔ, mo ko tsɛ huɛmɛ kɛ nyɛmimɛ kɛ wekuli kɛ niatsɛmɛ. Ejakaa mɛ hu a maa ngmɛ okplɔɔ nɛ a ma tsɛ mo ni yemi. 13 Se mohu ɔ, o tsɛ ohiafohi kɛ akpaketsɛmɛ kɛ hɛ yuyuili. 14 Kɛkɛ ɔ, a maa jɔɔ mo, nɛ ngɛ hwɔɔ se dali a si temi ɔ mi ɔ, Mawu maa wo mo hiɔ kaa o tsɛ nihi nɛ a be mo nane mi nyɛe maa to."

15 Benɛ e de enɛ ɔ, nɔ ko nɛ e kɛ lɛ ngɛ niye he ɔ de lɛ ke, "E ma ji he blɔ agbo kɛ ha nɔ nɛ maa sɛ Mawu Matsɛyemi ɔ mi hwɔɔ se."

16 Yesu bu abɛ nɛ ɔ kɛ ha munyu ɔ heto ke, "Nyumu ko ngmɛ okplɔɔ ngua ko nɛ e fɔ nine tsɛ nihi fuu ke a ba ye ni ɔ. 17 Benɛ a gbe nɔ́ tsuaa nɔ nya a, e tsɔ konɛ a ya de ni ɔmɛ nɛ e tsɛ ni yemi ɔ kaa be ɔ su se a ba. 18 Se ni ɔmɛ bɔni a nya jemi kulaa. Nɔ kake ke e ya he zugba nɛ e yaa nɛ e ya hyɛ ha, lɔ ɔ he je ɔ, e be nyɛe maa ba. 19 Nɔ kake hu ke e he na kuhi nyɔngma nɛ e yaa nɛ e ya ka mɛ kɛ humi nɛ e hyɛ ha. 20 Nɔ kpa hu ke piɔ pɛ nɛ e ngɔ yo he, nɛ lɔ ɔ he je ɔ, e be nyɛe maa ba.

21 Tsɔlɔ ɔ kpale kɛ ba bɔ e nutsɔ ɔ nɔ́ nɛ ni ɔmɛ de ɔ. E nutsɔ ɔ muklii mi fu saminya nɛ e de tsɔlɔ ɔ ke e he nɛ sɔ nɛ e ya gbɛjegbɛ ɔmɛ a nɔ kɛ blɔ kpɛ ɔmɛ nɛ e ya tsɛ ni bali ɔmɛ kɛ akpaketsɛ ɔmɛ kɛ hɛ yuyuili ɔmɛ nɛ e maa na a tsuo kɛ ba. 22 Tsɔlɔ ɔ ba nɛ e ba de e nutsɔ ɔ ke e pee bɔ nɛ e de lɛ ɔ, se blɔ ngɛ kɛ sa.

23 E nutsɔ ɔ de lɛ ke, ‘Yaa kɔpekɔpe ɔmɛ a mi kɛ blɔ ɔmɛ a he nɛ o nyɛ a nɔ nɛ a ba, bɔ nɛ pee nɛ ye we ɔ nɛ e hyi. 24 Se ma de nyɛ anɔkuale mi kaa niye ni nɛ ɔ nya bɔbɔɛ kake pohu be nihi nɛ i tsɛ kekle ɔ a ti nɔ ko nya mi yae.’ "

25 Ligbi ko benɛ nihi fuu nyɛɛ e se ɔ, e plɛ e he nɛ e de mɛ ke, 26 "Nɔ nɛ maa nyɛɛ ye se ɔ, e sa kaa e suɔ mi pe e tsɛ loo e nyɛ loo e yo loo e bimɛ loo e nyɛmimɛ yihi kɛ nyumuhi. E sa nɛ e suɔ mi pe bɔ nɛ e suɔ lɛ nitsɛ e wami, ke pi ja a, e be nyɛe maa pee ye kaselɔ. 27 Nɛ nɔ nɛ suɔ nɛ e kase mi ɔ, lɛɛ e wo lɛ nitsɛ e sɛumi tso ɔ ngɔ tloo nɛ e nyɛɛ ye se.

28 Se loko ji o maa nyɛɛ ye se ɔ, moo ka o he nɛ o hyɛ ha kaa o ma nyɛ lo? Ejakaa mɛnɔ nɛ ke e yaa ma tsu ɔ, e hyɛ ha kaa e ngɛ sika bɔ nɛ maa su tsu ɔ mami nya lo? 29 Ke e pee we ja a, e be tsu ɔ nya nyɛe maa gbe, nɛ ma maa muɔ lɛ.

30 A ma de ke, ‘Hyɛ nɔmlɔ nɛ ɔ ha, e je tsu nɛ ɔ mami sisi se e nyɛ we nya nɛ e gbe ejakaa e sika ta.’

31 Aloo matsɛ te nɔ nɛ hiaa ta ke e kɛ matsɛ kpa yaa kpe be mi nɛ e kɛ e ga woli kpi nɛ e hyɛ ha kaa e ta bimɛ akpe nyɔngma a ma nyɛ matsɛ kpa a e ta bimɛ akpe nyingmi enyɔ ɔ nya maa da lo?

32 Nɛ ke e na kaa e be nyɛɛ a nya maa da a, lɛɛ benɛ he nyɛlɔ ɔ ta a ba na we lɛ lolo ɔ, e tsɔɔ kɛ ya haa yi. 33 Ja a kɛ̃ nɛ ke nɔ ko suɔ kaa e nyɛɛ ye se ɔ, ja e hi si nɛ e hyɛ nihi slɔɔtohi nɛ ngɛ e dɛ ɔ, nɛ e ma nya si kaa ngɛ ye he ɔ, e ma si kulaa se, loko ji e ma nyɛ maa pee ye kaselɔ.

34 Mɛni se nami nɛ ngɛ ngo nɛ ngɔɔmi ta mi he? 35 Se nami ko kulaa be ngo nɛ mɛmɛɛmɛ ta mi he hu. O be nyɛe ma kɛ wo ngmɔ ni po sisi. E he be se nami hu nɛ e sa nɛ a muɔ kɛ pue he. Nyɛɛ bu tue saminya nɛ nyɛ kɔ ye munyu nɛ ɔ se."