1,2 Jehanɛ ɔ, mamimɛ nɛ a suɔ, nyɛ le momo bɔ nɛ e sa kaa nyɛɛ ba nyɛ je mi ngɛ Mawu hɛ mi ha, ejakaa nyɛ le wa Nutsɔ Yesu nitsɛ mlaa amɛ nɛ wa wo nyɛ ɔ. Lɔ ɔ he je ɔ, wa ngɛ nyɛ pɛɛ kpae ngɛ Nutsɔ Yesu biɛ mi kaa nyɛɛ ba nyɛ je mi ja a pɛpɛɛpɛ. 3,4 Ejakaa Mawu suɔmi nya ni ji kaa nyɛɛ hi klɔuklɔu, nɛ nyɛɛ hyɛ nyɛ he ngɛ ajuama bɔmi he, bɔ nɛ pee nɛ nyɛ ti nɔ tsuaa nɔ nɛ ngɔ yo ngɛ klɔuklɔu peemi kɛ hɛ mi nyami mi, 5 nɛ nyɛ ko di he lo akɔnɔ se kaa bɔ nɛ wɔ jali nɛ li Mawu peeɔ ɔ.

6 Nɛ nɔ ko nɛ kó sisi e nyɛmi nɛ e kpɔ e yo, ejakaa Nutsɔ ɔ maa gbla e tue ngɛ enɛ ɔ he, kaa bɔ nɛ wa de nyɛ momo ɔ. 7 Ejakaa Mawu tsɛ we wɔ nɛ wa juɛmi mi nɛ sɛ mu kɛ akɔnɔ níhi, se mohu nɛ wa he nɛ tsɔ nɛ waa pee klɔuklɔu. 8 Lɔ ɔ he je ɔ, ke nɔ ko yi mlaa nɛ ɔmɛ a nɔ ɔ, pi nimli a mlaahi a nɔ tue nɛ e ngɛ gboe, se mohu Mawu nɔ nɛ ha nyɛ e Mumi Klɔuklɔu ɔ. 9 Nɛ e he hia we kaa ma de nyɛ nɔ́ ko tsɔ ngɛ nyɛmimɛ a suɔmi klɔuu, nɛ sa nɛ a na ngɛ Mawu we bimɛ a kpɛti ɔ he. Ejakaa Mawu nitsɛ ngɛ nyɛ tsɔɔe bɔ nɛ sa nɛ nyɛɛ suɔ nyɛ he ɔ. 10 Ngɛ anɔkuale mi ɔ, suɔmi nɛ nyɛ ngɛ kɛ ha Kristo se nyɛɛli ngɛ nyɛ ma a tsuo mi ɔ mi kuɔ. Se kɛ ɔ, anyɛmimɛ, wa ngɛ nyɛ pɛɛ kpae nɛ nyɛɛ suɔ mɛ pe kekle ɔ. 11 Nɛ enɛ ɔ nɛ pee nyɛ oti, kaa nyɛɛ ba nyɛ je mi ngɛ kpoo peemi mi, nɛ nyɛɛ kɛ nyɛ he nɛ ko wo ni kpahi a sane mi. Nyɛ tsu nyɛ nitsɛmɛ nyɛ ni tsumi kaa bɔ nɛ wa de nyɛ momo ɔ. 12 Ke nyɛ pee ja a, nyɛ hɛ mi maa ba nyami ngɛ nihi nɛ pi Kristo se nyɛɛli ɔ a hɛ mi, nɛ a maa bu nyɛ; nɛ nyɛ be nyɛ hɛ woe kɛ fɔ ni kpahi a nɔ ngɛ nyɛ hiami níhi a he.

13 Jehanɛ ɔ, mamimɛ nɛ a suɔ, ma suɔ kaa nyɛɛ le nɔ́ nɛ baa Kristo se nyɛɛlɔ nɛ gbo ɔ e nɔ, konɛ nyɛ ko ye kɔmɔ tsɔ, kaa nihi nɛ be he nɔ kami ke e ba mi ja a. 14 Ejakaa akɛnɛ wa heɔ yeɔ kaa Yesu gbo nɛ e te si kɛ je gbeje ɔ, ja a nɔuu e sa kaa wa he ye , kaa be mi nɛ Yesu maa kpale kɛ ba a, Mawu ma tle Kristo se nyɛɛli nɛ gbo ɔmɛ si ngɔ piɛ e he kɛ ba.

15 I ngɛ nyɛ enɛ ɔ dee kaa munyu nɛ je Nutsɔ ɔ nya, kaa wɔ ni nɛmɛ nɛ wa ma ji hɛ kali be mi nɛ Nutsɔ ɔ maa ba a, wa be ni nɛmɛ nɛ gbo ɔmɛ a hlami sɛe kɛ ya kpee lɛ. 16 Ejakaa Nutsɔ ɔ nitsɛ ma kple si kɛ je hiɔwe kɛ ngmlaa nɛ nya wa, kɛ hiɔwe bɔfo nɔkɔtɔma a gbi kɛ ha klaahi a he wami womi, kɛ Mawu titimati pɛmi nɛ nya wa. Kristo se nyɛɛli nɛ gbo ɔmɛ kekle maa te si kɛ ya kpee Nutsɔ ɔ. 17 Nɛ lɔ ɔ se loko wɔ hɛ kali ɔmɛ nɛ piɛ ngɛ zugba a nɔ ɔ, waa kɛ mɛ kulaa ma futu ngɛ bɔ kuu ɔmɛ a mi kɛ ya kpee lɛ, nɛ waa kɛ lɛ maa hi si kɛ ya neneene. 18 Lɔ ɔ he je ɔ, nyɛɛ kɛ kikɛmɛ a munyu nɛ ɔ nɛ ha nyɛ bi bua jɔmi kɛ he wami.