1 Ami Yohane nɛ ji asafo nɔkɔtɔma a, ngɛ womi nɛ ɔ ngmae kɛ ya ha Gaio, nɔ nɛ i suɔ lɛ ngɛ anɔkuale mi ɔ.

2 Ye suɔlɔ, i ngɛ sɔlee kaa nɔ́ tsuaa nɔ nɛ e hi ha mo, nɛ o hi kpakpataa ngɛ nɔmlɔ tso blɔ fa mi kaa bɔ nɛ o klaa ngɛ nɛ i le ɔ. 3 Ejakaa i na bua jɔmi babauu benɛ nyɛmi ɔmɛ ekomɛ ba su hiɛ ɔ nɛ a ye o si himi he odase, kaa o ngɛ anɔkuale ɔ se nyɛɛe ɔ. 4 Bua jɔmi nɛ kle kpa ko be nɛ i ma na, pe nɔ́ nɛ i na benɛ i nu kaa ye bi ɔmɛ ngɛ anɔkuale ɔ se nyɛɛe ɔ.

5 Anyɛminyumu, o ngɛ ni tsumi kpakpa tsue kɛ ha Mawu ngɛ tsɔɔli kɛ Mawu Munyu fiɛli blɔ hiali ɔmɛ nɛ o li mɛ se o hyɛɔ a nɔ ɔ. 6 A ba ye o suɔmi ɔ he odase kɛ tsɔɔ asafo ɔ ngɛ hiɛ ɔ. I ngɛ mo pɛɛ kpae nɛ o ye kɛ bua mɛ ngɛ a blɔ hiami ɔ mi bɔ nɛ maa sa Mawu hɛ mi. 7 Ejakaa a ngɛ blɔ hiae ngɛ Nutsɔ ɔ biɛ mi. Nɛ a kplɛɛ we nɛ a ngɔ niye ni loo heha nihi loo hwɔ he loo sika ngɛ nihi nɛ a pi Kristo se nyɛɛli a dɛ, se a ngɛ fiɛe kɛ ngɛ mɛ tsɔɔe mohu. 8 Lɔ ɔ he je ɔ, e sa kaa wɔ nitsɛmɛ waa hyɛ a nɔ́ bɔ nɛ pee nɛ waa kɛ mɛ waa pee kake kɛ ha Nutsɔ ɔ ni tsumi ɔ.

9 I ngma asafo ɔ womi kpiti ko ngɛ enɛ ɔ he. Se Diotrefe fiãlɔ ɔ nɛ ngɛ blɔ nya hlae kaa e pee lejɛ ɔ asafo ɔ nɔkɔtɔma a, e hla we nɛ e hi ye sisi, nɛ lɔ ɔ he je ɔ e bui mi tue. 10 Ke i ba a, i ma de nyɛ níhi nɛ e ngɛ pee ɔ ekomɛ, kɛ munyu yaya komɛ nɛ e ngɛ tue ngɛ ye he, kɛ jɛmihi nɛ e ngɛ mi jɛe. E sume nɛ e he nyɛmimɛ Mawu Munyu fiɛli ɔmɛ atuu. Nɛ e ha we he blɔ kaa nɔ ko hu nɛ e he mɛ. Lɔ ɔ he je ɔ, ke ni komɛ he mɛ ɔ, e fieɔ mɛ ngɛ asafo ɔ mi.

11 Anyɛmi, mo ko kase je mi bami yaya nɛ ɔ. Moo nyɛɛ nɔ́ kpakpa pɛ se. Nɛ o kai kaa nihi nɛ peeɔ kpakpa a, Mawu bimɛ ji mɛ. Nɛ ni nɛmɛ nɛ peeɔ yayami ɔ, a li Mawu. 12 Se Demetrio lɛɛ nɔ tsuaa nɔ yeɔ e he odase kpakpa ngɛ anɔkuale mi. Ami nitsɛ hu i deɔ ja ngɛ e he, nɛ o le kaa i tuɔ anɔkuale.

13 I ngɛ níhi fuu nɛ ma de, se i sume nɛ ma ngma. 14 Ejakaa i heɔ yeɔ kaa i ma ba o ngɔ ngɛ be kpiti mi, nɛ wa maa tu níhi fuu a he munyu. 15 Lɔ ɔ he je ɔ, i biɔ mo saminya. Huɛmɛ nɛ ngɛ hiɛ ɔ hu ke a biɔ mo. I kpa mo pɛɛ nɛ o nga nyɛmimɛ nɛ ngɛ lejɛ ɔ a ti nɔ tsuaa nɔ ha mi.