1 I na nɛ nyɛɛ kɛ asafo ɔ nɛ ngɛ Laodikea kɛ huɛmɛ kpahi fuu nɛ a kɛ mi kpi hɛ mi kɛ hɛ mi hyɛ ɔ le nyɛ he dengme nɛ i ngɛ gboe ngɛ sɔlemi mi.

2 I ngɛ sɔlee ha nyɛ kaa a wo nyɛ he wami nɛ nyɛɛ pee kake ngɛ suɔmi mi nɛ nyɛɛ le Kristo kɛ juɛmi nɛ mi tsɔ kɛ pi si. Nɛ Kristo nitsɛ ji Mawu laami sane ɔ nɛ jehanɛ ɔ a je kpo ɔ nɛ. 3 E mi nɛ a ngɔ juɛmi kɛ nile mi june ɔ tsuo kɛ laa ngɛ.

4 I ngɛ nyɛ enɛ ɔ dee bɔ nɛ pee nɛ nɔ ko nɛ ko ba sisi nyɛ kɛ nya mi ngɔngɔɛ munyu. 5 E ngɛ mi kaa i kɛ nyɛ wa kpɛti kɛ mohu, se i kɛ nyɛ ngɛ ngɛ mumi mi, nɛ ye bua jɔɔ, ejakaa nyɛ ngɛ nɔ yae saminya nɛ nyɛ ngɛ hemi kɛ yemi nɛ mi wa ngɛ Kristo mi. 6 Lɔ ɔ he je ɔ, akɛnɛ nyɛ he Kristo nɔ ye jehanɛ ɔ kaa e ma he nyɛ yi wami ɔ, nyɛ he e nɔ nɛ nyɛɛ ye hu kaa e maa ye kɛ bua nyɛ ngɛ nyɛ daa ligbi haomi ɔmɛ a mi nɛ nyɛɛ kɛ lɛ nɛ pee kake kpɛii. 7 Nyɛɛ hi si ngɛ e mi, nɛ nyɛ na nyɛ wami ngma kɛ je e mi, nɛ nyɛɛ ya nɔ nyɛɛ wa ngɛ e mi nɛ nyɛɛ kɛ nyɛ hɛ nɛ fɔ e nɔ be fɛɛ be, konɛ nyɛ he nɛ wa kpitikplii ngɛ anɔkuale ɔ nɛ a tsɔɔ nyɛ ɔ mi. Nɛ nyɛ hyi tɔ kɛ bua jɔmi, konɛ nyɛɛ na lɛ si babauu ngɛ níhi tsuo nɛ e tsu ha nyɛ ɔ he.

8 Nyɛɛ hyɛ nɛ hi nɛ, ngɛ nɔ́ nɛ Kristo de ɔ se ɔ, nɔ ko nɛ ko puɛ nyɛ bua jɔmi kɛ nyɛ hemi kɛ yemi ɔ kɛ je nɛ ɔ mi nile kɛ juɛmi. 9 Ejakaa bɔ nɛ Mawu su ngɛ ha a, wa naa ja a ngɛ Kristo Nɔmlɔ tso su mi. 10 Lɔ ɔ he je ɔ, ke nyɛ ngɛ Kristo ɔ, nyɛ ngɛ nɔ́ tsuaa nɔ, nɛ nyɛ hyi tɔ kɛ Mawu, ngɛ nyɛɛ kɛ Kristo kake peemi mi. Lɛ ji nɔ́ yelɔ nɛ pe kulaa nɛ e ngɛ he wami nɛ eko kɛ lɛ sɔɛ.

11 Kristo mi nɛ a wo nyɛ nyumu mi ngɛ benɛ nyɛ ba e ngɔ ɔ, nyumu mi womi nɛ pi he lo blɔ fa mi nɔ, se mohu mumi mi nyumu mi womi nɛ je nyɛ kɛ je nyɛ yayami ɔmɛ a mi, nɛ e baptisi nyɛ klaa amɛ. 12 Kɛ gu baptisimi ɔ nɔ ɔ, nyɛ sa je mi bami yaya a gbo kɛ Kristo, nɛ a pu lɛ kɛ Kristo; nɛ jehanɛ ɔ a tle nyɛ kɛ lɛ tsuo si kɛ ba wami he mi, ejakaa nyɛ he Mawu Ope nɛ tle Kristo si kɛ je gbeje ɔ Munyu ɔ nyɛ ye.

13 Nyɛ he yayami ɔmɛ ha nɛ nyɛ gbo ngɛ mumi mi, nɛ nyɛ je mi bami yaya amɛ a se pui lolo. Kɛkɛ nɛ e ha nyɛ blɔ he ngɛ Kristo wami ɔ mi, ejakaa e ngɔ nyɛ he yayami ɔmɛ tsuo kɛ ke nyɛ, 14 nɛ e kita amɛ nɛ nyɛ yi nɔ, nɛ ji nyɛ nya pomi ɔmɛ ɔ, e po tsuo mi. E ngɔ nyɛ yayami nɛ ɔmɛ tsuo nɛ e ka kɛ wo Kristo sɛumi tso ɔ he nɛ e kpata a hɛ mi, nɛ tsɔɔ kaa a ngɔ nyɛ he yayami ɔmɛ kɛ ke nyɛ. 15 Kɛ gu enɛ ɔ nɔ́ ɔ, Mawu kpɔ Abosiami he wami nɛ e kɛ poo nyɛ nya ngɛ yayami he ɔ, nɛ Mawu je Kristo sɛumi tso nɔ kunimi yemi, he nɛ a je nyɛ he yayami ɔmɛ tsuo kɛ ho ngɛ ɔ, kɛ tsɔɔ je ɔ kulaa.

16 Enɛ ɔ he je ɔ, nyɛ ko ha nɛ nɔ ko nɛ kojo nyɛ ngɛ nɔ́ nɛ nyɛ yeɔ loo nyɛ nuu ɔ he, aloo ngɛ Yuda bi ɔmɛ a gbijlɔhi nɛ nyɛ yi, kɛ nyɔhiɔ he kusumi ɔmɛ loo hejɔɔmi ligbi ɔmɛ a he. 17 Ejakaa ni nɛ ɔmɛ ji mlaahi nɛ a pee kɛ ha be kpiti ko mi si himi, nɛ a se po ngɛ Kristo bami ɔ mi. A ji Kristo he nini kɛkɛ. 18 Nyɛ ko ha nɛ nɔ ko nɛ e ngɔ nyɛ kaa nihi nɛ laa, ke nyɛ sɔmɔ we bɔfohi kaa bɔ nɛ a ke nyɛɛ pee ɔ. A deɔ ke a na ngɛ nina mi nɛ e sa kaa nyɛɛ pee. Kikɛmɛ a fĩali nɛ ɔmɛ, nɛ mɛɛ a deɔ ke he si bali ji mɛ ɔ, ngɛ nɔ kalemi he juɛmi nɛ nya wa. 19 Se a kɛ Kristo nɔ nɛ ji wɔ tsuo wa yi ɔ be nɔ́ ko peemi. Kristo pani ɔmɛ tsa wɔ tsuo kɛ pee kake, nɛ wa waa kɛ guɔ niye ni kɛ he wami nɛ wa naa kɛ jee Mawu dɛ mi ɔ mi.

20 Ke nyɛɛ kɛ Kristo gbo nɛ lɔ ɔ ha nyɛ ye nyɛ he kɛ je je nɛ ɔ sisije blɔ nya tomihi kɛ ha yi wami hemi ɔ mi ɔ, mɛni he je mɔ nɛ nyɛ ngɛ a se nyɛɛe kɛ sa, nɛ jamɛ a mlaa amɛ fi nyɛ kaa 21 nyɛ ko ye enɛ, nyɛ ko nu enɛ aloo nyɛ ko ta niye ni komɛ tete a he? 22 Jamɛ a mlaa amɛ ji nimli a ni tsɔɔmihi kɛkɛ, ejakaa a pee niye ni nɛ a ye. 23 Mlaa nɛ ɔmɛ ngɛ kaa nɔ́ nɛ a hi, ejakaa mlaahi kaa enɛ ɔmɛ hia suɔmi wawɛɛ, nɛ a woɔ he si bami nɛ nya wa kɛ baa nɔmlɔ tso ɔ nɔ, se a he be se nami kɛ ha nɔmlɔ je mi bami yaya tsakemi. A haa nɛ e woɔ e he nɔ mohu.