1 Ye suɔli, nyagbe mi ɔ, bɔ fɛɛ bɔ nɛ e ji ɔ, nyɛ bua nɛ jɔ ngɛ Nutsɔ ɔ mi. Pɔ tɔɛ ye he kaa ma hi nyɛ enɛ ɔ dee, ejakaa e hi kaa nyɛɛ hi enɛ ɔ nue be fɛɛ be.

2 Nyɛɛ hyɛ nyɛ he saminya ngɛ jamɛ a yi mi wali kɛ awi yeli ɔmɛ nɛ deɔ ke ja a wo nyɛ nyumu mi loko ji a ma he nyɛ yi wami ɔ a he. 3 Ejakaa tsa pi wa nɔmlɔ tso ɔmɛ a pomi nɛ peeɔ wɔ Mawu bimɛ, se mohu wa jami nɛ wa jaa lɛ ngɛ mumi mi ɔ. Lɔ ɔ pɛ ji anɔkuale "nyumu mi womi." Nɛ wɔ Kristo se nyɛɛli wa naa bua jɔmi ngɛ nɔ́ nɛ Kristo Yesu tsu kɛ ha wɔ ɔ he. Nɛ wa yo kaa wa be nyɛe ma he wɔ nitsɛmɛ wa yi wami.

4 Se kɛ ɔ, ke nɔ ko ngɛ nɛ e ngɛ hɛ nɔ kami ko kaa e ma nyɛ he lɛ nitsɛ e yi wami ɔ, lɛɛ ami i. Nɛ ke a ma nyɛ he ni komɛ a yi wami ngɛ bɔ nɛ a ji he je ɔ, lɛɛ ami hu ma de ke a ma he ye yi wami. 5 Ejakaa i gu Yuda bi ɔmɛ a kusumi ɔmɛ a mi. Benɛ i ye ligbi kpaanyɔ ɔ, a wo mi nyumu mi. Yuda no fɔfɔɛ ji mi, nɛ i je Benyami wɛtso ɔ mi. Lɔ ɔ he je ɔ, Yuda no tutuutu ji mi. Nɔ́ nɛ pe lɔ ɔ hu ji kaa, i piɛ Farisi bi ɔmɛ nɛ hyɛɔ kaa a ye Yuda bi ɔmɛ a mlaahi kɛ kusumi ɔmɛ a nɔ pɛpɛɛpɛ ɔ he. 6 Anɛ i ye anɔkuale ngɛ mi lo? Ee, i ye anɔkuale bɔ nɛ ma nyɛ, nɛ i wa asafo ɔ yi mi saminya. Nɛ i bɔ mɔde kaa ma ye Yuda bi ɔmɛ a mlaahi kɛ blɔ nya tomi ɔmɛ kulaa nɔ pɛpɛɛpɛ.

7 Se ní nɛ ɔmɛ nɛ a ji se nami kɛ ha mi sa a, i sake mɛ kɛ pue he, bɔ nɛ pee nɛ ma ngɔ ye hɛ kɛ fɔ Kristo nɔ, nɛ ma he lɛ pɛ e nɔ ma ye. 8 Ee, i buu nɔ́ tsuaa nɔ kaa níhi nɛ a he be se nami ke ji i kɛ to se nami nɛ ngɛ Kristo Yesu, ye Nutsɔ ɔ lemi he ɔ. I sake enɛ ɔmɛ tsuo kɛ fɔ se, ejakaa a he be se nami kulaa, bɔ nɛ pee nɛ ma ngɔ Kristo, 9 nɛ i kɛ lɛ nɛ pee kake. Nɛ ma ko susu kaa ye dami he je nɛ a he ye yi wami ngɛ, aloo Mawu mlaa amɛ a nɔ yemi he, se Kristo nɔ hemi kɛ yemi he. Ejakaa Kristo nɔ hemi kɛ yemi kɛkɛ nɔ Mawu guu kɛ dlaa waa kɛ lɛ wa kpɛti. 10 Amlɔ nɛ ɔ, i ngmɛɛ ni kpa amɛ kulaa a he. I na kaa kɛ gu lɔ ɔ nɔ nɛ ma nyɛ ma pee Kristo nɔ anɔkuale mi, nɛ ma na he wami agbo nɛ tle lɛ si kɛ je gbeje ɔ. Nɛ ma hla nɔ nɛ e ji kaa i kɛ lɛ nɛ na nɔ, nɛ i kɛ lɛ nɛ gbo ɔ sisi. 11 Lɔ ɔ he je ɔ, bɔ fɛɛ bɔ nɛ e ji ha a, i ma hi kaa ni nɛmɛ nɛ a te si kɛ je gbeje nɛ a na wami he ɔ.

12 I de we ke i hi kɛ pi si, ejakaa i kase we nɔ fɛɛ nɔ́ nɛ sa kaa ma kase ɔ lolo, se mohu i ngɛ mɔde bɔe kɛ ha jamɛ a ligbi ɔ nɛ ye nine maa su nɔ́ nɛ Kristo he ye yi wami kɛ ha a nɔ, kɛ nɔ nɛ e ngɛ mi hlae kaa ma pee ɔ.

13 Suɔli, i na we ma pee bɔ nɛ sa kaa ma hi tutuutu ɔ lolo, se i ngɛ nɔ́ kake too nɛ ɔ he mɔde bɔe kɛ ye he wami kulaa, kaa ye hɛ nɛ je níhi nɛ be ɔmɛ a nɔ, nɛ ma hyɛ níhi nɛ ngɛ ye hɛ mi ɔ blɔ. 14 Nɛ i ngɛ dengme gboe nɛ ma ya su oti ɔ he, nɛ ye nine nɛ su jlasi ɔ nɔ; nɔ́ nɛ he je nɛ Mawu ngɛ wɔ tsɛe kɛ yaa hiɔwe ɔ, ngɛ nɔ́ nɛ Kristo Yesu tsu kɛ ha wɔ ɔ he je ɔ.

15 I heɔ yeɔ kaa nyɛ nihi kulaa nɛ nyɛ wa ngɛ Kristo jami ɔ mi ɔ, nyɛɛ kɛ mi ma kpa gbi ngɛ ni nɛ ɔmɛ a he, nɛ ke nyɛɛ kɛ mi kpa we gbi ngɛ ekomɛ a he ɔ, i ngɛ hɛ nɔ kami kaa Mawu ma je mɛ kpo paa kɛ tsɔɔ nyɛ, 16 ke ji nyɛ ye anɔkuale ɔ nɛ a kɛ ha nyɛ ɔ nɔ pɛpɛɛpɛ ɔ.

17 Nyɛmimɛ suɔli, nyɛɛ hi si kaa bɔ nɛ i ngɛ ɔ, nɛ nyɛɛ hyɛ nihi hu nɛ ngɛ kaa ami ɔ. 18 Ejakaa i de nyɛ hyɛ si abɔ, nɛ i ngɛ nyɛ dee ekohu kɛ ye hɛ mi vo nyu, kaa nihi fuu ngɛ nɛ a peeɔ a he Kristo se nyɛɛli, se ngɛ anɔkuale mi ɔ, Kristo sɛumi tso ɔ he nyɛli ji mɛ. 19 A nyagbe maa pee hɛ mi kpatami. A mawu ji a muklii, nɛ a fĩaa ngɛ níhi nɛ e sa nɛ zo nɛ pee mɛ ngɛ he. Zugba nɛ ɔ nɔ si himi he pɛ a susuɔ. 20 Se wɔɔ lɛɛ wa we ngɛ hiɔwe, he nɛ wa Yiwamihelɔ Nutsɔ Yesu Kristo ngɛ ɔ. Nɛ nɔ nɛ wa ngɛ blɔ hyɛe ji kaa e maa kpale kɛ je lejɛ ɔ kɛ ba. 21 Ke e kpale kɛ ba a, e maa ngɔ wa nɔmlɔ tsohi nɛ gboɔ nɛ ɔmɛ nɛ e ma tsake mɛ kɛ pee nɔmlɔ tsohi nɛ hɛ mi ngɛ anunyami kaa e nɔ́ ɔ, ngɛ e he wami nɛ e ngɛ ngɛ nɔ́ fɛɛ nɔ́ nɔ ɔ nya.