1,2 Kɛ je Paulo nɛ ji bɔfo kɛ nyɛmimɛ Kristo se nyɛɛli nɛ ngɛ hiɛ ɔ. Kɛ ha: Galata asafo ɔmɛ. Ami Paulo nɛ ji bɔfo nɛ pi kuu ko loo nɔmlɔ ko nɛ tsɛ mi, se mohu Yesu Kristo nitsɛ kɛ Tsɛ Mawu nɔ nɛ tle lɛ si kɛ je gbeje ɔ nɛ tsɛ mi ɔ, nɛ ngɛ womi nɛ ɔ ngmae kɛ ya ha Galata asafo ɔmɛ. 3 Dloomi kɛ jɔɔmi nɛ je Tsɛ Mawu ɔ kɛ Nutsɔ Yesu Kristo dɛ mi ɔ ha nyɛ. 4 Yesu, nɔ nɛ ngɔ e muɔ kɛ sã bɔ ngɛ wa yayami ɔmɛ a he, kaa bɔ nɛ wa Tsɛ Mawu ɔ to ɔ, nɛ e kpɔ wɔ kɛ je je nɛ ɔ mi yayami nɛ wa ngɛ mi nɛ ɔ mi. 5 A ngɔ anunyami kɛ ha Mawu kɛ ya neneene. Amen.

6 Ye nya kpɛ ye he kaa e kɛ we kulaa nɛ nyɛ ngɛ nyɛ he tsɔe kɛ ngɛ Mawu he jee, nɔ nɛ tsɛ nyɛ ngɛ e suɔmi kɛ dloomi ɔ nya kɛ ba neneene wami nɛ e ha nyɛ kɛ gu Kristo nɔ ɔ mi ɔ, nɛ nyɛ ngɛ blɔ kpa nɛ kɛ nɔ yɛ Hiɔwe kulaa a nɔ gue. 7 Blɔ kpa ko be pe nɔ́ nɛ wa tsɔɔ nyɛ ɔ, nɛ nihi nɛ plɛ Kristo he anɔkuale munyu ɔ hɛ mi kɛ bu si ɔ, a ngɛ nyɛ kuasia pee.

8 Ke nɔ ko loo ami po loo bɔfo nɛ je hiɔwe tete ba fiɛ yi wami hemi blɔ kpa ko kɛ tsɔɔ nyɛ ngɛ nɔ nɛ wa fiɛ kɛ tsɔɔ nyɛ ɔ se ɔ, Mawu gbiɛmi nɛ ba jamɛatsɛ ɔ nɔ.

9 I ngɛ dee ekohu ke, ke nɔ ko ma ba fiɛ Manye Munyu kpa ko kɛ tsɔɔ nyɛ ngɛ nɔ́ nɛ nyɛ he ye momo nɛ ɔ se ɔ, Mawu gbiɛmi nɛ tloo jamɛatsɛ ɔ.

10 Nyɛ maa na kaa tsa pi nya mi dɔkɔdɔkɔ nɛ i ngɛ pee bɔ nɛ pee nɛ ma sa nyɛ hɛ mi. Dabi, i ngɛ dengme gboe nɛ ma sa Mawu hɛ mi, ejakaa ke nimli a hɛ mi i ngɛ hlae nɛ ma sa a, lɛɛ tsa pi Kristo tsɔlɔ ji mi.

11 Mamimɛ, suɔli, i ngɛ nyɛ dee ke, Manye Munyu ɔ nɛ i ngɛ fiɛe ɔ, tsa pi nimli a dɛ mi nɛ e je, nɛ e pi nlami munyu hulɔ. 12 Ejakaa ye munyu ɔ ji nɔ kpa ko ngɔ, pe Yesu Kristo, nɛ lɛ e tsɔɔ mi nɔ nɛ ma de.

13 Nyɛ le bɔ nɛ i ngɛ ha benɛ i ngɛ Yuda bi ɔmɛ a jami ɔ se nyɛɛe, nɛ i wa Kristo se nyɛɛli ɔmɛ yi mi kɛ hɛ dɔ, nɛ i bɔ mɔde kaa ma kpata asafo ɔ hɛ mi. 14 I pe ye juami Yuda bi fuu ngɛ jami ɔ mi ngɛ zugba a nɔ jamɛ a be ɔ mi, nɛ i gboɔ dengme kaa ma ye wa tsɛmɛ a blema jami ɔ mi mlaa amɛ a nɔ.

15 Se ngɛ Mawu dloomi kɛ mi mi jɔmi nya a, e hla mi be mi nɛ a na we nɛ a fɔ mi po, nɛ e tsɛ mi ke ma ba sɔmɔ lɛ. 16 E je e bi ɔ kpo kɛ tsɔɔ mi konɛ ma ya fiɛ e he Manye Munyu ɔ ngɔ tsɔɔ ma je li ɔmɛ. Se be mi nɛ enɛ ɔmɛ ba mi ɔ, i jaje we kɛ de we nɔ ko. 17 Nɛ i yɛ Yerusalem nɛ ma ya na bɔfohi nɛ nyɛɛ ye hɛ mi ɔ nɛ a to mi blɔ nya ko; se mohu, i pue nɔ amlɔ ɔ nɔuu kɛ ho Arabia nga a nɔ ya, nɛ lɔ ɔ se loko i kpale kɛ ba Damasko ma a mi ekohu. 18 Jeha etɛ se loko ji i ya Yerusalem, nɛ i ya slaa Petro nɛ i kɛ lɛ hi si ligbi nyɔngma kɛ enuɔ. 19 Yakobo nɛ ji wa Nutsɔ ɔ nyɛminyumu ɔ pɛ ji bɔfo ɔmɛ a ti nɔ nɛ i na ngɛ lejɛ ɔ jamɛ a be ɔ mi. 20 Nyɛɛ bu níhi nɛ i ngɛ nyɛ dee nɛ ɔ tue saminya, ejakaa Mawu hɛ mi i ngɛ nyɛ dee ngɛ. Nɔ́ nɛ ba mi ɔ pɛpɛɛpɛ ji nɛ ɔ nɛ, tsa pi lakpa nɛ i ngɛ yee. 21 Enɛ ɔ se ɔ i ya Siria kɛ Kilikia ma amɛ a mi. 22 Se loloolo ɔ, Yudea Kristo asafo ɔ li nɔ́ nɛ ji mi. 23 Nɔ́ nɛ kɛkɛ nɛ a le ji nɔ́ nɛ nihi ngɛ dee ke, "Wa sa he nyɛlɔ ɔ bɔni hemi kɛ yemi nɛ e ngɛ hlae nɛ e kpata hɛ mi ɔ fiɛmi amlɔ nɛ ɔ." 24 Nɛ a wo Mawu hɛ mi nyami kɛ gu ye nɔ.