1 Nyɛ kai enɛ ɔ kaa ke tsɛ ko gbo nɛ e si gbosi ni kɛ ha e bi nɛ wɛ lolo ɔ, e ngɛ mi kaa e tsɛ ni ɔmɛ kulaa peeɔ e nɔ́ mohu, se mi gbami ko be e kɛ a nyɔguɛ kpɛti kɛ yaa si e maa wa nɛ e ma ba ye ni ɔmɛ a nɔ. 2 E ngɛ nɔ hyɛli kɛ nikɔtɔmahi a sisi nɛ e buɔ mɛ tue kɛ yaa si be nɛ e tsɛ ɔ to ɔ.

3 Ja a nɔuu nɛ wɔ hu wa ngɛ loko Kristo ba. Wa hi Yuda bi ɔmɛ a mlaahi kɛ kusumihi a sisi kaa nyɔguɛhi, ejakaa wa susu kaa a ma he wa yi wami. 4 Se benɛ be nɛ Mawu to ɔ su ɔ, e tsɔ lɛ nitsɛ e Bi ɔ kɛ ba, nɛ yo fɔ lɛ kɛ je Yuda bi ɔmɛ a mi, 5 konɛ e ba kpɔ wɔ nihi nɛ wa ngɛ mlaa nyɔguɛ yemi sisi ɔ, nɛ e ngɔ wɔ kɛ pee lɛ nitsɛ e bimɛ. 6 Nɛ akɛnɛ e bimɛ ji wɔ he je ɔ, Mawu tsɔ e Bi ɔ Mumi ɔ kɛ ba wa tsui mi, nɛ lɔ ɔ he je ɔ, wa ma nyɛ tsɛ Mawu jehanɛ ke wa Suɔlɔ Tsɛ.

7 Enɛ ɔ he je ɔ, tsa pi nyɔguɛhi ji wɔ hu, se mohu Mawu nitsɛ e bimɛ ji wɔ. Nɛ ke e bimɛ ji wɔ ɔ, lɛɛ nɔ́ tsuaa nɔ nɛ e ngɛ ɔ, e peeɔ wa nɔ́ ngɛ Mawu nitsɛ e blɔ nya tomi ɔ nya.

8 Sa a, be mi nɛ nyɛ ma je li ɔmɛ nyɛ li Mawu ɔ, nyɛ pee nyɛ he nyɔguɛhi kɛ ha níhi nɛ a tsɛɛ mɛ ke mawuhi, nɛ tete po ɔ, nɔ́ ko be kaa ja. 9 Se jehanɛ ɔ nɛ nyɛ le Mawu ɔ, aloo nɛ Mawu le nyɛ ɔ, kɛ peeɔ kɛɛ nɛ nyɛ ngɛ hlae kaa nyɛ maa kpale nyɛ se nɛ nyɛ ya pee nyɔguɛhi ekohu kɛ ha jami nɛ he be se nami, nɔ́ nɛ tsɔɔ Mawu mlaahi a nɔ yemi loko a ma na hiɔwe yami he blɔ ɔ? 10 Nyɛ ngɛ hlae nɛ nyɛɛ sa Mawu hɛ mi kɛ gu níhi nɛ nyɛ peeɔ aloo nyɛ pee we ngɛ ligbi komɛ a nɔ loo nyɔhiɔ komɛ loo be komɛ loo jeha komɛ a mi ɔ a nɔ. 11 I ngɛ gbeye yee kaa i gbo yaka dengme ngɛ nyɛ he.

12 Mamimɛ, i ngɛ nyɛ pɛɛ kpae kaa nyɛ susu ni nɛ ɔmɛ a he saminya kaa bɔ nɛ i susuu a he ɔ. Ejakaa i ye ye he kɛ je ni nɛ ɔmɛ a mi kaa bɔ nɛ nyɛ hu nyɛ ngɛ sa a. Nyɛ nyangee we mi be mi nɛ i fiɛ kɛ ha nyɛ kekle ɔ; 13 nɛ e ngɛ mi kaa jamɛ a be ɔ mi nɛ i kɛ Kristo Manye Munyu ɔ ba ha nyɛ ɔ, i be nɔmlɔ tso mi he wami mohu. 14 Ye hiɔ ɔ pee nya tsɔmi nɔ́ kɛ ha nyɛ, se nyɛ kua we mi nɛ nyɛ fie we mi hulɔ. Nyɛ he mi atuu nɛ nyɛ hyɛ ye nɔ kaa nɔ́ nɛ Mawu bɔfo ji mi aloo Yesu Kristo nitsɛ nɛ ba nyɛ ngɔ.

15 Jije jamɛ a bua jɔmi mumi ɔ nɛ wɔ tsuo wa na a ngɛ? Ejakaa i he ye jamɛ a be ɔ mi kaa nyɛ ma nyɛ hia nyɛ hɛ ngmɛhi tete ngɔ ha mi kɛ to ye nɔ́ ɔmɛ a nane mi ke a hi ha mi.

16 Anɛ jehanɛ ɔ i plɛ nyɛ he nyɛlɔ ngɛ anɔkuale ɔ nɛ i tuɔ kɛ tsɔɔ nyɛ ɔ he lo?

17 Jamɛ a lakpa tsɔɔli ɔmɛ nɛ ngɛ hlae nɛ a sa nyɛ hɛ mi ɔ, tsa pi nyɛ kpakpa nɛ a ngɛ hlae. Nɔ́ nɛ a ngɛ hlae ji kaa, a tsi nyɛ ye ngɔ blɔ konɛ nyɛɛ ya a ngɔ. 18 E ji nɔ́ kpakpa, ke nihi suɔ nyɛ kɛ a tsui mi kulaa, nɛ pi be nɛ i kɛ nyɛ ngɛ ɔ kɛkɛ. 19 Ye bimɛ kpakpahi, nyɛɛ hyɛ bɔ nɛ nyɛ ngɛ mi awi yee ha! I ngɛ nɔ́ nae ngɛ nyɛ he ekohu kaa bɔ nɛ yofɔyo nuu kɔɔmi nɛ e hii nɔ nae kɛ ya siɔ be nɛ e fɔɔ ɔ, ja a nɔuu ami hu i nu kɔɔmi nɛ i ngɛ blɔ hyɛe kɛ yaa si be nɛ nyɛ ma na Kristo ngɛ nyɛ mi. 20 I na nɛ i ngɛ nyɛ kasa nya amlɔ nɛ ɔ, se pi nɛ i kɛ nyɛ waa tu munyu kɛ je se lokoo kikɛ ɔ, nɛ i li bɔ nɛ ma pee.

21 Nyɛɛ bu mi tue, nyɛ ni nɛmɛ nɛ nyɛ susu kaa Yuda bi ɔmɛ a mlaa amɛ a nɔ yemi ɔ ma he nyɛ yi wami ɔ. Mɛni he je nɛ nyɛ hla we nɛ nyɛɛ le nɔ́ nɛ mlaa amɛ ngɛ tsɔɔe tutuutu? 22 Ejakaa a ngma ke Abraham ngɛ bimɛ enyɔ, nɔ kake ɔ, e kɛ yo nyɔguɛ ɔ nɛ fɔ; nɛ nɔ nɛ ji enyɔne ɔ hu e kɛ e yo odehe ɔ nɛ fɔ. 23 Nyakpɛ nɔ́ ko be bi ɔ nɛ e kɛ yo nyɔguɛ ɔ fɔ ɔ he; se bi ɔ nɛ e kɛ odehe ɔ fɔ ɔ, a wo e fɔmi he si loko ji a fɔ lɛ.

24,25 Anɔkuale sane nɛ ɔ tsɔɔ blɔhi enyɔ nɔ nɛ Mawu guu kɛ yeɔ kɛ buaa nɔ. Kekle blɔ ɔ ji, e ha Mose mlaa nɛ ji Kita Nyɔngma a ngɛ Sinai Yoku ɔ nɔ ke a ye nɔ. Arabia bi tsɛɛ Sinai Yoku ɔ ke "Hagar Yoku." Nɛ ngɛ ye sane ɔ nya tsɔɔmi mi ɔ, Abraham yo nyɔguɛ ɔ nɛ a tsɛɛ ke Hagar a daa si ngɛ Yerusalem nɛ ji Yuda bi ɔmɛ a ma ngua a nane mi. Nɛ lejɛ ɔ ji Yuda bi ɔmɛ a mlaa amɛ a nɔ yemi kɛ ha Mawu hɛ mi sami ɔ a he ni tsumi he. Nɛ Yuda bi ɔmɛ nɛ ngɛ jamɛ a mlaa amɛ a sisi ɔ ji e bimɛ nyɔguɛ ɔmɛ. 26 Se wɔɔ lɛɛ wa ma ngua ji Yerusalem nɛ ngɛ hiɔwe ɔ, nɛ lɛɛ e pi nyɔguɛ kɛ ha Yuda bi ɔmɛ a mlaa amɛ.

27 Lɔ ɔ ji nɔ́ nɛ Yesaia ngɛ tsɔɔe benɛ e gba ke, "Na bua jɔmi jehanɛ, mo yosa. O ma nyɛ kpa ngmlaa kɛ bua jɔmi, tse be ɔ, o nui kɔɔmi hyɛ; ejakaa i ma ha mo bimɛ fuu pe nɔ nɛ yo nyɔguɛ ɔ ngɛ ɔ."

28 Anyɛmimɛ, suɔli, i kɛ nyɛ tsuo ɔ, Mawu si womi ɔ mi bimɛ ji wɔ kaa bɔ nɛ Isak ngɛ ɔ. 29 Enɛ ɔ he je ɔ, ni nɛmɛ nɛ ngɛ hlae kaa waa ye Yuda bi ɔmɛ a mlaa amɛ a nɔ ɔ, a ngɛ wɔ ni nɛmɛ nɛ a fɔ ngɛ Mumi Klɔuklɔu ɔ mi ɔ yi mi wae kaa bɔ nɛ Ishmael nɛ ji nyɔguɛ ɔ bi ɔ wa Isak odehe bi ɔ yi mi ɔ.

30 Se Ngmami ɔ tsɔɔ kaa Mawu de Abraham ke e fie yo nyɔguɛ ɔ kɛ e bi ɔ, ejakaa e sɛ kaa yo nyɔguɛ ɔ bi ɔ kɛ odehe ɔ bi ɔ tsuo yeɔ Abraham gbosi ni nɛ ji e we kɛ e zugba amɛ. 31 Mamimɛ, suɔli, enɛ ɔ he je ɔ, tsa pi yo nyɔguɛ ɔ bimɛ nɛ ngɛ Yuda bi ɔmɛ a mlaa amɛ a sisi ɔmɛ ji wɔ. Se wɔɔ lɛɛ odehe ɔ bimɛ ji wɔ, nɛ Mawu ngɔ wɔ ngɛ wa hemi kɛ yemi ɔ he.