1 Mo kai o ni ɔmɛ nɛ a ba a he si kɛ ha amlaalo ɔ kɛ nikɔtɔma amɛ nɛ a bu mɛ be fɛɛ be, nɛ a dla a he kɛ ha ni tsumi kpakpa be fɛɛ be. 2 A ko tu nɔ ko he munyu yaya, nɛ a ko pɛ, se mohu a ba a he si nɛ a bu nɔ tsuaa nɔ.

3 Be nɛ be ɔ mi ɔ, wɔ hu wa li nɔ́ ko, nɛ wa bui nɔ. Nihi ha nɛ wa laa blɔ nɛ wa pee wa he akɔnɔ níhi kɛ he lo se dili. Wa je mi bami hyi tɔ kɛ hetsɛ kɛ nyɛmi. Wa nyɛɛ nihi, nɛ nihi hu nyɛɛ wɔ.

4 Se benɛ Mawu nɛ ji wa Yiwamihelɔ ɔ e mi mi jɔmi kɛ e suɔmi ɔ je kpo ɔ, 5 e he wa yi wami, pi ngɛ himi nɛ wa hi ɔ he je, se mohu ngɛ e mi mi jɔmi kɛ e mɔbɔ nami nya nɛ e fɔ wa he yayami ɔmɛ ngɛ, nɛ e ha wa na bua jɔmi he kɛ je Mumi Klɔuklɔu ɔ nɛ ngɛ wa mi ɔ dɛ. 6 E ha nɛ wa hyi tɔ kɛ Mumi Klɔuklɔu ɔ ngɛ nɔ́ nɛ Yesu Kristo, wa Yiwamihelɔ ɔ tsu ha wɔ ɔ he, 7 konɛ e wo wa hɛ mi nyami ngɛ Mawu hɛ mi, ngɛ e mi mi jɔmi babauu ɔ he. Enɛ ɔ he je ɔ, wa maa pee neneene wami ɔ nɛ e ha wɔ ɔ e mi ni yeli, nɛ wa ngɛ blɔ hyɛe kɛ hɛ nɔ kami nɛ wa nine nɛ su nɔ. 8 Anɔkuale munyuhi ji níhi nɛ i de mo nɛ ɔ nɛ. Moo hyɛ nɛ a pee bɔ nɛ pee nɛ Kristo se nyɛɛli a tsu ni tsumi kpakpa be fɛɛ be, ejakaa e hi nɛ e woɔ yiblii hulɔ.

9 O kɛ o hɛ nɛ ko wo kuasia nya samihi kɛ weku sisi tsɔɔmi kɛ pɛ kɛ Yuda bi ɔmɛ a mlaa amɛ a he kunɔ nɔmi ɔ mi, ejakaa ni nɛ ɔmɛ a he be se nami, awi mohu nɛ a yeɔ nɔ. 10 Ke nɔ ko ngɛ nɔ́ mi gbae ngɛ nyɛ kpɛti ɔ, moo bɔ lɛ kɔkɔ si kake kɛ si enyɔ, nɛ ke e tsakee we ɔ, moo ngmɛɛ e he. 11 Ejakaa nɔmlɔ kaa kikɛ ɔ, e ngɛ juɛmi yaya nɛ e le kaa yayami e ngɛ pee.

12 I ngɛ hlae nɛ ma tsɔ Artema loo Tihiko kɛ ba o ngɔ. Ke a ti nɔ ko ba su o ngɔ nɔuu ɔ, moo bɔ mɔde nɛ o kɛ mi ba kpe ngɛ Nikopoli, ejakaa i to kaa ma ya ye fiɛ be ɔ ngɛ lejɛ ɔ. 13 Bɔɔ mɔde nɛ o wo Zena, mlaa tsɔɔlɔ ɔ, kɛ Apolo blɔ saminya. Moo hyɛ nɛ o ha mɛ nɔ́ tsuaa nɔ nɛ he maa hia mɛ ɔ. 14 E sa kaa wa ni ɔmɛ nɛ kase bɔ nɛ sa nɛ a ye kɛ bua ni nɛmɛ nɛ ngɛ fimi mi ɔ, konɛ a wo yiblii kpakpa.

15 Nɔ tsuaa nɔ nɛ kɛ mi ngɛ hiɛ ɔ ke a biɔ mo. Wa biɔ huɛmɛ Kristo se nyɛɛli kulaa. Mawu dloomi ɔ kɛ nyɛ kulaa nɛ hi si.