Atos 3

Peteru kankumponiziya mluwa shibyeketu

1 Lishaka limu Peteru na Yohani wagenditi Mnumba nkulu ya Mlungu shaka sha saa tisa paliwala, shaka sha kusali. 2 Paweriti na Ligomi Liherepa, muntu yumu shibyeketu kwanjira kwiwuka. Wantu hawa waweriti wankumpapa muntu ayu kila lishaka kumjega kuligomi kuluwa mpiya kwa wantu yawingira kunumba nkulu ya Mlungu. 3 Pakawawoniti Peteru na Yohani wankwingira Mnumba nkulu ya Mlungu, shibyeketu ulii kawaluwiti wampanani shintu. 4 Peteru pamuhera na Yohani wamjodolera masu, na Peteru kamgambira, "Gutuloli!" 5 Su kawagalambukira, pakalolelera kupananwa shintu kulawa kwawomberi. 6 Kumbiti Peteru kamgambira, "Nahera mpiya, kumbiti shirii shamweri nashu hanukupanani, kwa litawu lya Yesu Kristu gwa Nazareti nukugambira gugoloki na gugendigendi!" 7 Shakapanu kamkola liwoku lya kumliwu na kamgolosiya. Palaa palii magulu na manung’unu gakuwi gapata likakala. 8 Kakopoka, kagoloka na kwanja kugendagenda. Shakapanu kingira pamuhera nawomberi Mnumba nkulu ya Mlungu, pakagendagenda na kukopokakopoka na pakamkwisa Mlungu. 9 Wantu woseri yawamwoniti kankugendagenda na kumkwisa Mlungu, 10 na pawavimaniti weri ndo ulii yakaweriti kankuluwaluwa pakwegera na Mlyangu Guherepa gulii gwa Numba nkulu ya Mlungu, woseri walikangasha nentu, su waweziti ndiri kuvimana vyavimpatiti.