1 Shakapanu Mlungu katakuliti visoweru avi kwa wantu wa Israeli, 2 "Neni Mtuwa Mlungu, ulii yamumguwira. Neni ndo ulii yaniwalaviyiti kulawa muisi ya Misri. Neni ndo ulii yanuwakomboliti kulawa muumanda kulii."

3 "Su munguwiri neni gweka yangu, namuwaguwira milungu yamonga."

4 "Nagulinyawira shinyagu shashilifana na shintu shoseri kulyera ama muisi ama mumashi pasi nentu pa pasipanu. 5 Nagushisuntamalira shinyagu shoseri na kushiguwira, toziya neni Mtuwa Mlungu, nfira gunguwiri neni gweka yangu. Hanuwazibu woseri yawatenda vidoda na kunkalalira neni. Hanuwazibu ndiri gweka yawu, kumbiti hanuwazibu pamuhera na wana wawu na wazukulu wawu na wazukulu wa wana wawu. 6 Kumbiti neni hanuwafiri maelufu ga shiyiwuku sha walii yawanfira neni na kugajimira malagaliru gangu."

7 "Nagulitendera hera litawu lyaneni muukontola, toziya neni Mtuwa Mlungu, ulii yanfiruwa kumguwira, haniwazibu walii yawalitendera litawu lyaneni muukontola."

8 "Nagulyaluwa lishaka lya Kwoyera mukila lijuwa kuwera ndo lyaneni, su mugatuli mashaka aga kwajili ya neni. 9 Kwana mashaka sita kwa gwenga kutenda mahengu gaku, 10 kumbiti lishaka lya saba haliweri lishaka lya Kwoyera, lishaka lyalitulituwi kwajili ya neni Mtuwa Mlungu, ulii yamfira kumguwira. Mulishaka ali namtenda lihengu lyoseri. Gwenga na wana wapalu waku na wahinga waku na wamanda waku wapalu na wadala, namtenda mahengu. Naguwatenda kwa makakala wankanyama waku watendi mahengu, viraa nagulekeziya wahenga kutenda mahengu, pamuhera na woseri yawalikala muisi yaku. 11 Neni Mtuwa Mlungu numbiti lyera na pasipanu na bahari na kila shintu shashiwera mubahari kwa mashaka sita. Shakapanu ndeka kutenda lihengu lyangu lya kuumba kila shintu na kwoyera mulishaka lya saba. Toziya ayi neni Mtuwa Mlungu nulitekeleriti kuwera lishaka lya Kwoyera na kulitenda liweri lishaka linanagala."

12 "Guwapanani ligoya tati gwaku na mawu gwaku, su gwenga guwezi kulikala makaliru gavuwa muisi neni Mtuwa Mlungu yang'enda kukupanana gwenga."

13 "Nagulaga."

14 "Naguwumba."

15 "Nagwiwa shintu shoseri."

16 "Nagutakula ukapitawu wa upayira kwa muntu yoseri."

17 "Naguwera na matamata na shintu shoseri sha wapakwegera gwaku ama mdala gwa muntu yoseri ama mpalu gwa muntu yoseri ama mmanda mdala ama mpalu gwa muntu yoseri ama wankanyama wa muntu yoseri ama wankanyama punda wa muntu yoseri ama shintu shoseri shilii sha wantu wamoga."

18 Wantu pawapikaniriti kulendemera na mimeta ya milendemeru na pawapikaniriti liziwu lya mbalapi na kuwona lyosi palugongu, womberi watiriti nentu na kulendemera. Su womberi wagolokiti kutali, 19 wamgambiriti Musa, "Handa paguyowera na twenga, twenga hatukupikaniri. Kumbiti nagulekeziya Mlungu kayoweri shintu shoseri kwa twenga. Twenga twankutira nentu kuwera handa pakatakula na twenga, hatuhowi."

20 Musa kawawankula, "Namtira! Mlungu kiza kuwajera su lyoga kuusu Mlungu haliweri pamuhera na mwenga kuwatenda namtenda vidoda."

21 Su wantu woseri wagolokiti kutali Musa pakagenditi pakwengera netu mulihundi litopa lilii kwakaweriti Mlungu.

22 Mtuwa Mlungu kamgambiri Musa, "Guwagambiri aga wantu wa Israeli, mpikaniriti neni Mtuwa Mlungu ntambu yantakuliti na mwenga kulawa kumpindi. 23 Niwagambiriti kuwera namulinyawira shinyagu shoseri sha madini ga feza ama mlungu yamgenda kumguwira kuliku neni. 24 Mwenga munyawili neni shitalawanda sha kutambikira sha litapaka, mulaviyi nkanyama kuwera tambiku ya kulunguziya nakamu. Viraa mulaviyi nkanyama kuwera tambiku ya kulunguziya kidogu, hayiweri tambiku ya ponga kwa wantu. Munguwiri neni pahala poseri yanuwasyagula mwenga kunguwira neni, pamtenda hangu, neni hanizi kwa mwenga na kuwatekelera. 25 Handa pamulinyawira shitalawanda sha mabuwi sha kutambikira, namshinyawa kwa mabuwi gamgasongola gawoneki gaherepa, toziya pamtendera vyombu vya kusongolera, hamuidodiziyi. 26 Namunyawira neni shitalawanda shashiwera na lukweneru, toziya pamtenda hangu, wantu mewawoni shivula sha muntu yakakwena mulukeneru."