1 Mtuwa Mlungu kamgambiriti Musa na Aruni kulii muisi ya Misri, 2 "Kwanjira vinu, mwezi agu haguweri mwezi gwa kwanja mushinja shenu. 3 Muwagambiri wantu woseri wa Israeli kuwera mkila kaya, muntu yakawera mkulu gwa kaya, hakatoli mwana gwa kondolu ama mwana gwa mbuzi kwajili ya kaya yakuwi. 4 Handa kwahera wantu yawatosha mukaya yakuwi kuliya mwana gwa kondolu ulii, shakapanu kaya yakuwi pamuhera na kaya ya shiwogu shashifata, hawaliyi pamuhera kondolu ulii. Hayiweri wana wa wakondolu waninga yawafiruwa kulawiranan na muntu ntambu hakawezi kumalila kuliya. 5 Mwana gwa kondolu ama mwana gwa mbuzi yagumsyaguliti mpaka kaweri washipalu na gwa shinja shimu, viraa nakawera kana shilema shoseri. 6 Mwenga hamuwaloleri weri mumashaka lilongu na msheshi mumwezi agu. Mulishaka lya lilongu na msheshi, wantu woseri wa Israeli hawawalikituli wakondolu pamuhera na wambuzi pamihi. 7 Shakapanu womberi hawatoli mwazi gwa wakondolu pamuhera na wambuzi, hawagutyelemeki mwazi gulii pampindi pa mpanda mbili za magomi na pampindi pa magomi ga numba zawu zyawalikaliti kuliya vinofu. 8 Womberi hawaviwoshiyi vinofu, hawaviliyi pamuhera na mabumunda gawalekera ndiri simika pamuhera na likolu lya mahamba gakalipa. 9 Namuliya vinofu viwisi ama vyavipwasiwa mumashi, kumbiti vifiruwa viwoshiwi vyoseri mumotu pota na kulikitula kuwusiya mtuwi ama magulu ama kuwusiya vinofu virii vyaviwera mkati mwa nkanyama ulii. 10 Mfiruwa muviliyi vinofu virii pamihi, namuvisigala kuviliya vinofu virii vilikali mpaka mandawira lishaka lyalifata. Handa shinofu shoseri pashisigala mpaka mandawira lishaka lyalifata, hagushilunguziyi nakamu mumotu. 11 Pamuliya avi, mwenga muvali nguwu na kuwera kala kwa mwanja. Muvali vilwatu vyenu na muweri na luhonga lwa kutyangira mumawoku mwenu. Hakuweri msambu gwagushemuwa Pasaka kumpanana ligoya neni Mtuwa Mlungu."

12 "Pashiru panu neni hang'endi muisi yoseri ya Misri, haniwalagi vipanta njira muisi ya Misri, wantu wapalu na wankanyama washipalu. Kwa kutenda hangu, hanuwazibu milungu yoseri muisi ya Misri. Hantendi hangu toziya Neni Mtuwa mlungu, ndo Mlungu yakawera na makakala goseri. 13 Mwazi yagutyelemeka pampindi pamagomi, hagulanguziyi numba zyawalikala wantu wa Israeli. Panuguwona mwazi, hapeni mpiti mnumba azi, viraa hapeni nagi wantu yawalikala amu, shaka panuwazibu wantu wa Misri. 14 Kila shinja, mwenga hamvini msambu mulishaka ali, kushihola shashitendituwi na Mtuwa Mlungu kwa mwenga. Muvileri vyoseri vyavizaku, kila shinja hamvini msambu agu. Shitwatira ashi hashyendereyi mumashaka goseri."

15 "Kwa mashaka saba, mwenga hamliyi mabumunda gagalekeluwa ndiri simika. Mulishaka lya kwanja mulijuwa, muntu yoseri pakaliya libumunda lyalilekerituwi simika, yomberi hakafiruwi kuwusiwi pakati pa wantu wa Israeli. 16 Lishaka lya kwanja na lishaka lya saba hamuweri na lijojoniru lya kunguwira neni. Mumashaka aga mawili wantu nawatenda mahengu, kumbiti walekeziwa hera kutandira shiboga. 17 Kila shinja, mwenga hamvini msambu agu gwa kuliya libumunda lyalilekeruwa ndiri simika, toziya lishaka ali haliwaholuziyi mwenga kuwera viyiwuku vya mwenga woseri mlaviwituwi kulawa muisi ya Misri. Su kila shinja muvileri vya mwenga vyoseri vyavizaku, hamuvini msambu mulishaka ali. Shitwatira ashi hashyendereyi mashaka goseri. 18 Mumwezi gwa kwanja mwega hamuliyi mabumunda gagalekeruwa ndiri simika, hamuliyi kwanjira pamihi mulishaka lya lilongu na msheshi mpaka pamihi mulishaka lya malongu mawili na yimu mumwezi agu. 19 Mumashaka aga saba, mwenga namuwera na simika yoseri mnumba zyenu. Mushaka ashi, muntu yoseri ulii, muntu gwa Israeli ama muhenga pakaliya libumunda lyalilekeruwa simika, hakalaviwu kulawa pakati pa wantu wa Israeli. 20 Poseri palii pamulikala, mwenga namuliya shintu shoseri shashilekeruwa simika mumashaka aga saba."

21 Su Musa kawashemiti wakulu woseri wa wantu wa Israeli. Yomberi kawagambiriti, "Kila kaya isyaguli mwana gwa kondolu ama mwana gwa mbuzi na kumlikitula, mwenga hamumliyi pamuvina msambu gwagushemuwa Pasaka. 22 Mtoli mwazi gwa mwana gwa kondolu na mgutuli mushiwiga, mwenga mwapi shintambi sha mivumbeza na mushitoteri mumwazi. Shakapanu mutyelemeki pampindi pa ligomi na pampindi pa mpanda mbili za ligomi za numba. Wantu wafiruwa kulikala mnumba zawu mpaka shilawu mandawira lishaka lyalifata. 23 Mtuwa Mlungu pakapita kugenda kuwalaga vipanta njira mukaya za wantu wa Misri, su hakawoni mwazi pampindi pa magomi ga numba zyenu, yomberi hakaleki na kuloka numba zilii. Mlungu hapeni kamlekeziyi ntumintumi gwa kumpindi yakalaga kwingira mnumba zyenu kuwalaga. 24 Mwenga pamuhera na shiyiwuku shenu mfiruwa kushilola weri shitwatira ashi kuwera lilagaliru mashaka goseri. 25 Mwenga pamwingira muisi ilii Mtuwa Mlungu yakagenda kuwapanana ntambu yakalagiliti, mwenga hamshitendi shitwatira kuwera shitiba kila shinja. 26 Wana wenu pawawakosiya, hashi, shitiba ashi shiwera na mana gaa?’ 27 Mwenga hamuwagambiri, shitiba ashi sha kulihola wambuyi wetu ntambu yawalaviyiti tambiku ya mwana gwa kondolu paluwala, ntumintumi gwa Mtuwa Mlungu pakagulukiti pampindi pa numba za wantu wa Israeli pawaweriti kulii muisi ya Misri. Yomberi kawalagiti wana vipanta njira mnumba za wantu woseri wa Misri, kumbiti kawalekiti wana mnumba za zyetu."

Musa pakawagambiriti womberi shitwatira ashi, su womberi wasuntamiti makukama na kumguwira Mtuwa Mlungu. 28 Shakapanu wantu wa Israeli watenditi shilii Mtuwa Mlungu shakawagambiriti Musa na Aruni wawagambiri womberi.

29 Pashiru nentu, Mtuwa Mlungu kawalagiti vipanta njira wa wantu woseri wa Misri. Wantu awa waweriti mwana shipanta njira gwa Falawu na shipanta njira gwa muntu yakatatilituwi mushibetubetu na shipanta njira washipalu gwa kila nkanyama. 30 Pashiru palii, Falawu na wakulu wayaguwi pamuhera na wantu woseri wa Misri wimukiti na kyambula shilii shashilawiriti. Womberi waliliti shiwembu shikulu muisi yoseri, toziya mukila numba, mwana shipanta njira kahowiti.

31 Pashiru palii Falawu kawashema Musa na Aruni kawagambiriti, "Mwenga pamuhera na wantu woseri wa Israeli, mlawi pakati pa wantu waneni. Mgendi mwakamguwiri Mtuwa Mlungu ntambu yamlongiti. 32 Mtoli vipinga vya wakondolu na wambuzi na wang'ombi, su muwuki! Mumluwi Mtuwa Mlungu viraa kantekeleri!"

33 Shakapanu wantu wa Israeli watenditi ntambu yawagambiritwi na Musa. Womberi walongiti, Patutenda ndiri hangu, nakaka hatuhowi! Womberi wagenditi kwa wapakwegera wawu wantu wa "Misri na wawaluwi vintu vyavinyawiwa kwa madini ga feza pamuhera na zahabu, viraa wawaluwi nguwu." 34 Mtuwa Mlungu kawatenditi wantu wa Misri wawapanani ligoya likulu wantu wa Israeli, su womberi wawapananiti vyoseri vyawaluwiti. Kwanjira ayi, wantu wa Israeli watoliti ulunda woseri wa wantu wa Misri. 35 Waisraeli waweriti watenditi kala handa Musa ntambu yakatakuriti, na wawaluwiti Wamisri wawapanani vito vya mbiya na zahabu na vivalu. 36 Nayomberi Mwenyezi Mlungu kaperiti kuwatenda Waisreli wafilwi na Wamisri, nawomberi Wamisri wawapanana kila shintu shawaluwiti. Ndo Wamisri ntambu yawawapokiti Misri ulanda wawu.

37 Wantu wa Israeli wagenditi mwanja kulawa mlushi lwa Ramesesi kugenda mlushi lwa Sukoti. Kuweriti na wapalu elufu miya sita, pota kuwawalanga wadala na wana. 38 Kuweriti viraa na wantu wavuwa wamonga yawaweriti ndiri wantu wa Israeli, wagenditi mwanja pamuhera na wantu wa Israeli, wagenditi pamuhera na wakondolu wawu na wang'ombi wawu na wankanyama wavuwa nentu. 39 Pawaweriti munjira, womberi wawoshiyiti mabumunda kwa ubumu yawautoliti pawaweriti wankuwuka kulawa muisi ya Misri. Ubumu uweriti wahera simika, toziya wagambirituwi wawuki kalongola, su waheriti shaka sha kutandira shiboga sha kuwuka nashu, ama shaka sha kuhanganya simika muubumu.

40 Wantu wa Israeli walikaliti muisi ya Misri kwa mivinja miya msheshi na malongu matatu. 41 Mushinja sha upeleru sha shinja sha miya msheshi na malongu matatu, lishaka lilaa lilii, makabila goseri ga wantu wa Mtuwa Mlungu galawiti muisi ya Misri. 42 Pashiru palii Mtuwa kawaloleriti eri wantu wa Israeli pakawalaviyiti womberi kulawa muisi ya Misri. So pashiru panu pafiruwa kuholuziwa na wantu wa Israeli pamuhera na viyiwuku vyawu vyoseri gambira pashiru pa kulikala msu toziya ya Mtuwa Mlungu. Mlungu kakeshiti iri kuwalaviya Waisraeli isini Misri; utakiwa kuazimisha na Waisraeli woseri na vireli vyawu vyoseri kulihola ntambu Mtuwa Mlungu kawaloleriti weri wambuyi wetu.

43 Mtuwa Mlungu kawagambiriti Musa na Aruni, "Aga ndo malagaliru ga shitiba sha Pasaka. Namumleka muhenga kaliyi shiboga sha Pasaka. 44 Kumbiti mpalu yoseri mmanda yamumuhemiriti, kaweza kuliya shibogapa kuwayingiziya jandu. 45 Namuwaleka wantu yawalikala na mwenga kwa shaka shididini hera ama walii watenda lihengu wa shibenamgongu sha lishaka limu, walii shiboga ashi. 46 Namtola shiboga shoseri sha Pasaka kushijega kunja kwa numba. Ila kaya ifiruwa kuliya shiboga sha Pasaka mnumba mwawu weni ama kushimega shifupa shoseri. 47 Wantu woseri wa Israeli wafiruwa kuvina msambu agu. 48 Muhenga yoseri pakiza kulawa muisi yamonga, pakafira kulikala na mwenga na kafira kuvina msambu gwa Pasaka, muwawayingiziyi jandu wapalu woseri mukaya zawu. Shakapanu womberi waweza kuliya shiboga sha Pasaka na muweza kulikala nawu gambira muntu muyenu gwa Israeli. Kumbiti Namuwaleka wantu yawayingiziwa ndiri jandu kuliya shiboga sha Pasaka. 49 Malagaliru aga gawera ga wantu wa Israeli pamuhera na wahenga yawalikala pakati penu."

50 Wantu woseri wa Israeli wawajimiriti Musa na Aruni na watenditi shilii shashilagalirituwi na Mtuwa Mlungu. 51 Lishaka lilaa ali Mtuwa Mlungu kawalaviyiti wantu wa Israeli kulawa muisi ya Misri.