1 Mtuwa Mlungu kamgambiriti Musa, "Gwanji mwanja guwuki panu, gwenga pamuhera na wantu yaguwalaviyiti Misri, mgendi muisi yanuwalagaliti kuwapanana Abrahamu na Isaka na Yakubu panongiti, haniwapanani shiyiwuku shenu isi ayi. 2 Hanumlagaliri ntumintumi gwangu gwa kumpindi kawalongoziyi, hanuwawingi wantu Wakanaani na Waamori na Wahiti na Waperizi na Wahivi na Wayebusi. 3 Mgendi muisi ayi yaiherepa kulima na kufuga wankanyama. Kumbiti hapeni ng'endi pamuhera na mwenga toziya pang'enda pamuhera na mwenga hanuwaagaiziyi munjira."

4 Wantu waliriti pawapikaniriti visoweru avi vidoda, kuweriti ndiri muntu yakavaliti malembiziya gakuyi. 5 Womberi watenditi hangu toziya Mtuwa Mlungu kamgambiriti Musa, "Guwagambiri wantu wa Israeli, mwenga mwawantu yamuwera na mtiti. Pang'enda pamuhera na mwenga kwa shaka shididini, haniwagamiziyi. Su mvuli malembiziya genu su neni hanivimani ntambu ya kuwatendera." 6 Su wantu wa Israeli wavuliti malembiziya gawu palugongu Horebu, viraa lugongu alu lushemuwa Sinai.

7 Vinu Musa kaweriti na shitiba sha kulitola Liringu Linanagala na kulibawira kunja kwa kambi, Liringu ali kalipananiti litawu Liringu Linanagala. Muntu yoseri yakafira shoseri kwa Mtuwa Mlungu, kagenditi Muliringu Linanagala kunja kwa kambi. 8 Musa pakaweriti kankugenda Kuliringu lilii, kila muntu kagolokiti muliringu lyakuyi pakamlola Musa mpaka kingiri Muliringu lilii. 9 Shaka Musa pakingiriti Muliringu lilii, mnara gwa lihundi lisulukiti na kugoloka paligomi lya Liringu Linanagala na Mtuwa Mlungu kayoweriti na yomberi. 10 Wantu woseri pawawoniti mnara gwa lihundi lilii ligoloka paligomi lya Liringu Linanagala, kila yumu gwawu kagoloka na kuguwira paligomi lya liringu lyakuyi. 11 Hangu ndo Mtuwa Mlungu ntambu yakayoweriti na Musa sheni kwa sheni, gambira muntu na ganja gwakuyi. Shakapanu Musa kawuyiti kayi kukambi. Kumbiti Yoshuwa mwana gwa Nuni kalikaliti Muliringu Linanagala.

12 Musa kamgambiriti Mtuwa Mlungu, "Gwenga gung'ambiliti, guwalongoziyi wantu awa, kumbiti gung'ambiliti ndiri gaa yagumtuma kantangi. Pamuhera na hangu gutakula kuwera gumana neni kwa litawu, viraa mpata upendelewu kulongolu kwaku. 13 Su vinu nukuhiga handa nakaka mpata upedelewu kulongolu kwaku, gunanguziyi njira zaku, su mpati kumana na kupata upendelewu kulongolu kwaku. Nikuluwa guholi kuwera guwasyagula isi ayi kuwera wantu waku."

14 Mtuwa Mlungu kamwankula, "Neni namweni hang'endi pamuhera na gwenga, na hanikutendi gulibwedi." 15 Musa kalongiti, "Handa gwenga gamweni pagugenda ndiri pamuhera na neni, su nagutuwusiya pahala panu. 16 Toziya hanivimani hashi kuwera mpata upendelewu kulongolu kwaku, neni pamuhera na wantu waku handa pagugenda ndiri pamuhera na twenga? Pagugenda pamuhera na twenga, ntambu ayi haitutendi neni pamuhera na wantu waku kuwera wantu wa gweka pakati pa wantu woseri pasipanu."

17 Mtuwa Mlungu kamgambiriti Musa, "Toziya gupata upendelewu kulongolu kwa neni, neni nukumana kwa litawu lyaku, shitwatira shilaa ashi shagulongiti hanishitendi."

18 Musa kaluwiti, "Nukuhiga gunanguziyi ukwisa waku." 19 Mtuwa Mlungu kamwankula, "Hampiti kulongolu kwaku na kukulanguziya uheri woseri waneni pambwera litawu lyangu, Mtuwa Mlungu. Neni hanumlekeziyi ulii yanfira kumlekeziya na kumwonera lusungu ulii yanfira kumwonera lusungu. 20 Kumbiti hapeni guwezi kumona sheni shangu toziya kwahera muntu yoseri yaweza kumona na kulikala. 21 Shakapanu Mtuwa Mlungu kamgambiriti Musa, kwana pahala pakwegera na neni, peni apa hagugoloki palitalawu. 22 Ukwisa wangu paguwera wankupita, hanukutuli mumpanga mulitalawu na kukugubikira kwa liwoku lyangu, mpaka pampita kala. 23 Shakapanu hanuliwusiyi liwoku lyangu nagwenga hagumoni neni kumbeli, kumbiti sheni shangu hapeni gushiwoni."